कैलासेश्वरप्रदोषपूजावर्णनम् १ कैलासेश्वरप्रदोषपूजाभाषः १ Kailaseshvarapradoshapujavarnanam 1

(स्कन्दप्रोक्तं कैलासेश्वरप्रदोषपूजाभाषः १)सूत उवाचकैलासेश्वरलिङ्गस्य महादेवः सनातनः ।वरिवस्यां स्वयं चक्रे (ततश्चक्रे) सर्वपूज्योऽपि शङ्करः ॥ १॥

(skandaproktaṃ kailāseśvarapradoṣapūjābhāṣaḥ 1)sūta uvācakailāseśvaraliṅgasya mahādevaḥ sanātanaḥ |varivasyāṃ svayaṃ cakre (tataścakre) sarvapūjyo'pi śaṅkaraḥ || 1||

ऋषयःस कथं सर्वपूज्योऽपि भगवानगजापतिः ।कैलासेश्वरलिङ्गस्य पूजनं कृतवान्वद ॥ २॥

ṛṣayaḥsa kathaṃ sarvapūjyo'pi bhagavānagajāpatiḥ |kailāseśvaraliṅgasya pūjanaṃ kṛtavānvada || 2||

सूत उवाचएवमेव पुरा पृष्टो जेगीषव्येन शङ्करः ।तमाह विनयानम्रं देवसेनापतिः पुरा ॥ ३॥

sūta uvācaevameva purā pṛṣṭo jegīṣavyena śaṅkaraḥ |tamāha vinayānamraṃ devasenāpatiḥ purā || 3||

स्कन्दःसाधु पृष्टन्त्वया विप्र तत्ते वक्ष्यामि साम्प्रतम् ।देवदेवस्य चरितं शृण्वतामघनाशनम् ॥ ४॥

skandaḥsādhu pṛṣṭantvayā vipra tatte vakṣyāmi sāmpratam |devadevasya caritaṃ śṛṇvatāmaghanāśanam || 4||

स सर्वगोप्यो धर्मात्मा सर्वाकारतया स्थितः ।लिङ्गार्चनं हि सर्वेषां विमुक्तिदमिति द्विजाः ॥ ५॥

sa sarvagopyo dharmātmā sarvākāratayā sthitaḥ |liṅgārcanaṃ hi sarveṣāṃ vimuktidamiti dvijāḥ || 5||

स्वयं करोति भगवानम्बिकापतिरीश्वरः ।भुक्तिदं मुक्तिदञ्चेति सर्वेषां बोधनाय हि ॥ ६॥

svayaṃ karoti bhagavānambikāpatirīśvaraḥ |bhuktidaṃ muktidañceti sarveṣāṃ bodhanāya hi || 6||

संसारसागरेमग्नान्त्समुद्धर्तुम्महेश्वरः ।कार्यं सुरासुरैश्चैवं विष्णुब्रह्ममरुद्गणैः ॥ ७॥

saṃsārasāgaremagnāntsamuddhartummaheśvaraḥ |kāryaṃ surāsuraiścaivaṃ viṣṇubrahmamarudgaṇaiḥ || 7||

देवैर्मुनीन्द्रैर्गणपैर्द्विजैश्चैवाथ शाङ्करैः ।पूजैव परं श्रेय इति दर्शयितुं शिवः ॥ ८॥

devairmunīndrairgaṇapairdvijaiścaivātha śāṅkaraiḥ |pūjaiva paraṃ śreya iti darśayituṃ śivaḥ || 8||

स्वयं देव्या महादेवः पूजां लिङ्गे करोति हि ।तल्लिङ्गपूजनं देव्या शिवेनाकारि तच्छृणु ॥ ९॥

svayaṃ devyā mahādevaḥ pūjāṃ liṅge karoti hi |talliṅgapūjanaṃ devyā śivenākāri tacchṛṇu || 9||

प्रातस्सङ्गवमध्याह्नप्रदोषेषु मुनीश्वराः ।नन्दिकेशादिगणपैः रुद्राणीभिस्सदाशिवः ॥ १०॥

prātassaṅgavamadhyāhnapradoṣeṣu munīśvarāḥ |nandikeśādigaṇapaiḥ rudrāṇībhissadāśivaḥ || 10||

पूजाप्रकल्पनं शम्भोश्शम्भुना वरिवस्यया ।कैलासेश्वरलिङ्गस्य पूजनन्तच्छृणुष्व मे ॥ ११॥

pūjāprakalpanaṃ śambhośśambhunā varivasyayā |kailāseśvaraliṅgasya pūjanantacchṛṇuṣva me || 11||

सप्तसागरपात्रोत्थरसधारादिभिश्शिवः ।गणानीतैश्च सम्भारैर्मनसा कल्पनक्षमैः ॥ १२॥

saptasāgarapātrottharasadhārādibhiśśivaḥ |gaṇānītaiśca sambhārairmanasā kalpanakṣamaiḥ || 12||

पूजया भोगमोक्षौ च सर्वेषाञ्च प्रदर्शितुम् ।करोत्यपचिति शम्भुः कैलासेश्वरपूजनम् ॥ १३॥

pūjayā bhogamokṣau ca sarveṣāñca pradarśitum |karotyapaciti śambhuḥ kailāseśvarapūjanam || 13||

जगीषव्यःतत्पूजन प्रकारं मे कथय श्रवणोद्धतः ।एभिर्मुनिवरदेवैर्गणेन्द्रैश्च विशेषतः ॥ १४॥

jagīṣavyaḥtatpūjana prakāraṃ me kathaya śravaṇoddhataḥ |ebhirmunivaradevairgaṇendraiśca viśeṣataḥ || 14||

स्कन्द उवाचशृणुत्वं देवदेवेन कैलासेश्वरपृजनम् ।यथाकृतं महेशेन शृणुत्वं मुक्तिदायकम् ॥ १५॥

skanda uvācaśṛṇutvaṃ devadevena kailāseśvarapṛjanam |yathākṛtaṃ maheśena śṛṇutvaṃ muktidāyakam || 15||

श्रवणेनापि भक्तानां सर्वेषां मुक्तिदायकम् ।शृणुष्वैकमना विप्र त्वमेभिर्भूसुरैस्सुरैः ॥ १६॥

śravaṇenāpi bhaktānāṃ sarveṣāṃ muktidāyakam |śṛṇuṣvaikamanā vipra tvamebhirbhūsuraissuraiḥ || 16||

गणौघैर्नन्दिकेशाद्यैरम्बिकापतिपूजनम् ।देव्यै देवेन कथितं पृच्छैन्त्यै शङ्करस्स्वयम् ॥ १७॥

gaṇaughairnandikeśādyairambikāpatipūjanam |devyai devena kathitaṃ pṛcchaintyai śaṅkarassvayam || 17||

तदवक्ष्यामि समासेन शृणु त्वं पापनाशनम् ॥स्नात्वा कैलासगङ्गातटमणिकलिते मण्डपे शम्भुरीशो ।देव्या नन्दीशमुख्यैर्गणवरसहितो भस्मनोद्धूल्य गात्रम् ।स्थित्वा लिङ्गालये स्वे मणिगणखचिते स्वासने सन्निविष्टश्शिष्टस्सर्वेष्टदाता समसमसमदो ह्यर्चति प्राज्ञवर्यः ॥ १८॥

tadavakṣyāmi samāsena śṛṇu tvaṃ pāpanāśanam ||snātvā kailāsagaṅgātaṭamaṇikalite maṇḍape śambhurīśo |devyā nandīśamukhyairgaṇavarasahito bhasmanoddhūlya gātram |sthitvā liṅgālaye sve maṇigaṇakhacite svāsane sanniviṣṭaśśiṣṭassarveṣṭadātā samasamasamado hyarcati prājñavaryaḥ || 18||

कृत्वा फालतले त्रिपुण्ड्ररचनां बालेन्दुमौलिस्स्वयंरुद्राक्षामलहारकण्ठवलयः पञ्चास्यपञ्चाक्षरः ।किञ्चित्किञ्चिदुदञ्चदञ्चलहृगम्भोजावलीमालिकांवारंवारमिहार्पयत्यगजया जीवज्जयार्थी शिवः ॥ १९॥

kṛtvā phālatale tripuṇḍraracanāṃ bālendumaulissvayaṃrudrākṣāmalahārakaṇṭhavalayaḥ pañcāsyapañcākṣaraḥ |kiñcitkiñcidudañcadañcalahṛgambhojāvalīmālikāṃvāraṃvāramihārpayatyagajayā jīvajjayārthī śivaḥ || 19||

तत्रेशानवरस्य पञ्चवरदास्यास्यास्यपञ्चाननेशानस्येश्वरलिङ्गद्भुततमं तत्पञ्चवक्त्रेश्वरम् ।तद्वक्त्रामलतो झरीभररसैः पञ्चापगा निस्सृताःकैलासाचलनिम्नगातटमहालिङ्गैकसौधालयाः ॥ २०॥

tatreśānavarasya pañcavaradāsyāsyāsyapañcānaneśānasyeśvaraliṅgadbhutatamaṃ tatpañcavaktreśvaram |tadvaktrāmalato jharībhararasaiḥ pañcāpagā nissṛtāḥkailāsācalanimnagātaṭamahāliṅgaikasaudhālayāḥ || 20||

प्राच्यां रत्नाच्छगङ्गा शिवतरगभवा देवगङ्गाकिलास्तेपश्चात्कैलासगङ्गा तदपरभुविगा रत्नसोपानयुक्ता ।तत्रावाच्यां च शुद्धा कमलगणगणैस्संयुतात्युग्रगङ्गातन्मध्ये ब्रह्मगङ्गा स्फटिकनिभजला पञ्चताः पञ्चतान्ताः ॥ २१॥

prācyāṃ ratnācchagaṅgā śivataragabhavā devagaṅgākilāstepaścātkailāsagaṅgā tadaparabhuvigā ratnasopānayuktā |tatrāvācyāṃ ca śuddhā kamalagaṇagaṇaissaṃyutātyugragaṅgātanmadhye brahmagaṅgā sphaṭikanibhajalā pañcatāḥ pañcatāntāḥ || 21||

एता या मणिलिङ्गपञ्चमुखतस्सन्निस्सृता मण्डपात्पुण्याः पुण्यतरङ्गशीतलजलाः कूलङ्कपाख्याः पराः ।दिव्यापारशिवालयस्थितमहालिङ्गैकसङ्घाकुलास्तीरेषु प्रथितोरुमण्डपमणीकॢप्तैस्सुधाब्धिंगमाः ॥ २२॥

etā yā maṇiliṅgapañcamukhatassannissṛtā maṇḍapātpuṇyāḥ puṇyataraṅgaśītalajalāḥ kūlaṅkapākhyāḥ parāḥ |divyāpāraśivālayasthitamahāliṅgaikasaṅghākulāstīreṣu prathitorumaṇḍapamaṇīkḷptaissudhābdhiṃgamāḥ || 22||

नानाबिल्ववनैरपारतरुजैः फुल्लप्रसूनाकुलैःपक्षीणां च रवैश्च तीरवकुलै रक्ताच्छदेहल्लकैः ।कोकानाञ्च कुलैस्सुकच्छपमहामीनैर्बकानां कुलैस्स्तोकैः पोतकचक्रवाककुररैः पुण्यैश्च सत्सारसैः ॥ २३॥

nānābilvavanairapāratarujaiḥ phullaprasūnākulaiḥpakṣīṇāṃ ca ravaiśca tīravakulai raktācchadehallakaiḥ |kokānāñca kulaissukacchapamahāmīnairbakānāṃ kulaisstokaiḥ potakacakravākakuraraiḥ puṇyaiśca satsārasaiḥ || 23||

तत्तीरामलमण्डपे मणिमहाकॢप्ते सुसिह्मासनेदेव्या नन्दिगणेश्वरैर्हरवरः पश्यन्त्सरिन्निर्झरीः ।लिङ्गं पञ्चमुखेश्वरं मधुरिमानेत्राञ्चलैशङ्करस्तद्वक्त्रामलपङ्कजोद्भवनदीः पुण्यास्तदाहेश्वरः ॥ २४॥

tattīrāmalamaṇḍape maṇimahākḷpte susihmāsanedevyā nandigaṇeśvarairharavaraḥ paśyantsarinnirjharīḥ |liṅgaṃ pañcamukheśvaraṃ madhurimānetrāñcalaiśaṅkarastadvaktrāmalapaṅkajodbhavanadīḥ puṇyāstadāheśvaraḥ || 24||

॥ इति शिवरहस्यान्तर्गते माहेश्वराख्ये कैलासेश्वरप्रदोषपूजावर्णने स्कन्दप्रोक्तं कैलासेश्वरप्रदोषपूजाभाषः ॥॥ श्रीशिवरहस्यम् । माहेश्वराख्यः प्रथमांशः । अध्यायः १३ कैलासेश्वरप्रदोषपूजावर्णनम् । १२४॥

|| iti śivarahasyāntargate māheśvarākhye kailāseśvarapradoṣapūjāvarṇane skandaproktaṃ kailāseśvarapradoṣapūjābhāṣaḥ |||| śrīśivarahasyam | māheśvarākhyaḥ prathamāṃśaḥ | adhyāyaḥ 13 kailāseśvarapradoṣapūjāvarṇanam | 124||

– ॥ श्रीशिवरहस्यम् ।माहेश्वराख्यः प्रथमांशः ।अध्यायः १३ – कैलासेश्वरप्रदोषपूजावर्णनम् ।१-२४॥

– || śrīśivarahasyam |māheśvarākhyaḥ prathamāṃśaḥ |adhyāyaḥ 13 – kailāseśvarapradoṣapūjāvarṇanam | 1-24||