कैलासोद्यानवर्णनम् Kailasodyanavarnanam

(शिवरहस्यान्तर्गते ईशाख्ये)सुब्रह्मण्य उवाच ।जैगीषव्य महाभव्य हव्यवाहसमप्रभ ।दिव्यं कथानकं शम्भोर्नाकिभिर्मुनिभिर्गणैः ॥ १५॥

(śivarahasyāntargate īśākhye)subrahmaṇya uvāca |jaigīṣavya mahābhavya havyavāhasamaprabha |divyaṃ kathānakaṃ śambhornākibhirmunibhirgaṇaiḥ || 15||

शृण्वपर्णापतेस्तूर्णं पूर्णं कर्णरसायनम् ।(शृण्वपर्णापतेस्तूर्णं सन्तारणकरं शुभम् ।)भवार्णवनिमग्नानां सन्तीर्णतरिमद्भुताम् ॥ १६॥

śṛṇvaparṇāpatestūrṇaṃ pūrṇaṃ karṇarasāyanam |(śṛṇvaparṇāpatestūrṇaṃ santāraṇakaraṃ śubham |)bhavārṇavanimagnānāṃ santīrṇatarimadbhutām || 16||

पुरा कैलासतदने मदनान्तकरो हरः ।रत्नप्रासादसम्बाधे सौधगोपुरमण्डिते ॥ १७॥

purā kailāsatadane madanāntakaro haraḥ |ratnaprāsādasambādhe saudhagopuramaṇḍite || 17||

शिखण्डिताण्डवयुते डम्बराडम्बरैर्युते ।उद्यद्भास्करसङ्काशविद्रुमस्तम्भमण्डपे ॥ १८॥

śikhaṇḍitāṇḍavayute ḍambarāḍambarairyute |udyadbhāskarasaṅkāśavidrumastambhamaṇḍape || 18||

नानातरुगणापारफुल्लपुष्पविराजिते ।तत्पुष्पसुन्दरतरपरागावृतमारुते ॥ १९॥

nānātarugaṇāpāraphullapuṣpavirājite |tatpuṣpasundarataraparāgāvṛtamārute || 19||

नानापक्षिरुतापारनन्दितानन्दकन्दरे ।चन्दनानन्दसुभगगन्धमेदुरपूजिते ॥ २०॥

nānāpakṣirutāpārananditānandakandare |candanānandasubhagagandhamedurapūjite || 20||

पर्वताखर्वसर्वस्वशर्वरीनाथसप्रभे ।शिखरे विजहारेशो हरो गौर्या सदार्यया ॥ २१॥

parvatākharvasarvasvaśarvarīnāthasaprabhe |śikhare vijahāreśo haro gauryā sadāryayā || 21||

मुदा हृदा तदा देवो दर्शयन् तद्वनस्थलीम् ।नानापुष्पतरुच्छन्नामभ्रभ्रान्तिनिवारिणीम् ॥ २२॥

mudā hṛdā tadā devo darśayan tadvanasthalīm |nānāpuṣpatarucchannāmabhrabhrāntinivāriṇīm || 22||

हरिणीगणसंयुक्तां पतत्पत्रवरैर्युताम् ।नियुतायुतविस्तीर्णां सङ्कीर्णां मृगपक्षिभिः ॥ २३॥

hariṇīgaṇasaṃyuktāṃ patatpatravarairyutām |niyutāyutavistīrṇāṃ saṅkīrṇāṃ mṛgapakṣibhiḥ || 23||

भ्रमन्मातङ्गसारङ्गां रत्नगङ्गातटोज्ज्वलाम् ।तुङ्गशाङ्गमहालिङ्गसङ्ग सौधोज्ज्वलत्प्रभाम् ॥ २४॥

bhramanmātaṅgasāraṅgāṃ ratnagaṅgātaṭojjvalām |tuṅgaśāṅgamahāliṅgasaṅga saudhojjvalatprabhām || 24||

भावितुं मनसा सर्वैरशक्यां तां वनस्थलीम् ।उत्फुल्लहल्लकाक्रान्तां क्रौञ्चसारससेविताम् ॥ २५॥

bhāvituṃ manasā sarvairaśakyāṃ tāṃ vanasthalīm |utphullahallakākrāntāṃ krauñcasārasasevitām || 25||

पतङ्गांशुसमुत्फुल्लरक्ताब्जवरशोभिताम् ।परागरागस्वच्छोदां तटप्रासादशोभिताम् ॥ २६॥

pataṅgāṃśusamutphullaraktābjavaraśobhitām |parāgarāgasvacchodāṃ taṭaprāsādaśobhitām || 26||

तत्प्रासादाग्रमध्यस्थसिह्मासनवराश्रितः ।दिव्याङ्गसङ्गसुभगो भर्गो देव्या समन्वितः ॥ २७॥

tatprāsādāgramadhyasthasihmāsanavarāśritaḥ |divyāṅgasaṅgasubhago bhargo devyā samanvitaḥ || 27||

चन्द्रापीडो मृडो गौर्या दर्शयामास तद्वनम् ॥ २८॥

candrāpīḍo mṛḍo gauryā darśayāmāsa tadvanam || 28||

स्वस्यास्यमादर्शतले ददर्शशर्वोऽथ गौर्याप्रतिबिम्बितं वनम् ।सर्वैकनाथः स हि विश्वनाथोविश्वं यथा स्वात्मपथं करोति ॥ २९॥

svasyāsyamādarśatale dadarśaśarvo'tha gauryāpratibimbitaṃ vanam |sarvaikanāthaḥ sa hi viśvanāthoviśvaṃ yathā svātmapathaṃ karoti || 29||

मत्तद्विरेफकलहंसकुलाभिरामंपुंस्कोकिलाकलितकाकलिरागमुक्तम् ।उत्पुच्छगुच्छसमरैश्चमरैरुपेतंत्र्यक्षो मुदैक्षत वनं शिवया समेतः ॥ ३०॥

mattadvirephakalahaṃsakulābhirāmaṃpuṃskokilākalitakākalirāgamuktam |utpucchagucchasamaraiścamarairupetaṃtryakṣo mudaikṣata vanaṃ śivayā sametaḥ || 30||

शारदमुदिराभफुल्लमल्लीसुमगन्धोद्यतमेदुरं वनान्तम् ।स दिनान्तेऽथ वसन्तवासरेशिखरे शैलवरे ददर्श शर्वः ॥ ३१॥

śāradamudirābhaphullamallīsumagandhodyatameduraṃ vanāntam |sa dinānte'tha vasantavāsareśikhare śailavare dadarśa śarvaḥ || 31||

भल्लालिङ्गितकुन्दवल्लिकलिके(कं)प्रोत्फुल्लमल्लीगणे(णं)तज्जातालदिव्यगन्धसुमहाबन्धान्धसन्मारुतंजिघ्रन् साम्बशिवस्तदास्त शिखरे कैलासभूभृद्वरे ॥ ३२॥

bhallāliṅgitakundavallikalike(kaṃ)protphullamallīgaṇe(ṇaṃ)tajjātāladivyagandhasumahābandhāndhasanmārutaṃjighran sāmbaśivastadāsta śikhare kailāsabhūbhṛdvare || 32||

तमालतिलकालकं तिलकिताच्छसत्केतकंप्रफुल्लवनराजिकं शिवपदाब्जसंसेवकम् ।ददर्श शिखरावृतं हरितपीतरीतीयुतंप्रफुल्लनगसंयुतं गिरिमथैक्षताम्बासुतः ॥ ३३॥

tamālatilakālakaṃ tilakitācchasatketakaṃpraphullavanarājikaṃ śivapadābjasaṃsevakam |dadarśa śikharāvṛtaṃ haritapītarītīyutaṃpraphullanagasaṃyutaṃ girimathaikṣatāmbāsutaḥ || 33||

कदम्बजसुनिम्बजैः सफलबिम्बवल्लीवृतैःसदम्बुजसरोवरैर्वृतमपारजम्बूद्रुमैः ।हृदम्बरमुदं व्यधात् वरदिशाम्बरोऽहस्करधनञ्जयनिशाकरप्रकटलोचनोस्ताम्बया ॥ ३४॥

kadambajasunimbajaiḥ saphalabimbavallīvṛtaiḥsadambujasarovarairvṛtamapārajambūdrumaiḥ |hṛdambaramudaṃ vyadhāt varadiśāmbaro'haskaradhanañjayaniśākaraprakaṭalocanostāmbayā || 34||

(धनञ्जयनिशाकर प्रकट चक्षुरास्ताम्बया) ॥ ३४॥

(dhanañjayaniśākara prakaṭa cakṣurāstāmbayā) || 34||

सुनीपतरु संवृतं प्रथिततापपापापहंअपायशरणं वनं तगरधूपसम्मोदनम् ।चिरन्तनतपोवनं शिवविहारतः पावनंददर्श किलकाननं स शिवया स्वकीयाननम् ॥ ३५॥

sunīpataru saṃvṛtaṃ prathitatāpapāpāpahaṃapāyaśaraṇaṃ vanaṃ tagaradhūpasammodanam |cirantanatapovanaṃ śivavihārataḥ pāvanaṃdadarśa kilakānanaṃ sa śivayā svakīyānanam || 35||

प्रफुल्लनानाविधगुल्मशोभितंलतावितानादिमनोरमं वनम् ।विरूढशष्पैः परितः प्रियङ्गुभिःसुपुष्पितं कण्टकितं च केतकैः ॥ ३६॥

praphullanānāvidhagulmaśobhitaṃlatāvitānādimanoramaṃ vanam |virūḍhaśaṣpaiḥ paritaḥ priyaṅgubhiḥsupuṣpitaṃ kaṇṭakitaṃ ca ketakaiḥ || 36||

तमालगुच्छैर्निचितं सुगन्धिभिर्निकामपुष्पैर्वकुलैश्च सर्वशः ।अशोकपुन्नागवनैः सुपुष्पितैःद्विरेफमालाकुलपुष्पसञ्चयैः ॥ ३७॥

tamālagucchairnicitaṃ sugandhibhirnikāmapuṣpairvakulaiśca sarvaśaḥ |aśokapunnāgavanaiḥ supuṣpitaiḥdvirephamālākulapuṣpasañcayaiḥ || 37||

क्वचित्प्रफुल्लाम्बुजरेणुरूषितंविहङ्गमैश्चारुकलप्रणादिभिः ।विनादितं सारसहंसपङ्क्तिभिःप्रमत्तनत्यूहरुतैश्च शोभितम् ॥ ३८॥

kvacitpraphullāmbujareṇurūṣitaṃvihaṅgamaiścārukalapraṇādibhiḥ |vināditaṃ sārasahaṃsapaṅktibhiḥpramattanatyūharutaiśca śobhitam || 38||

क्वचिच्च चक्राह्वरुतैर्विनादितंक्वचिच्च कारण्डवनादमण्डितम् ।क्वचिच्च मत्तालिकुलाकुलीकृतंमदाकुलाभिर्भ्रमराङ्गनादिभिः ॥ ३९॥

kvacicca cakrāhvarutairvināditaṃkvacicca kāraṇḍavanādamaṇḍitam |kvacicca mattālikulākulīkṛtaṃmadākulābhirbhramarāṅganādibhiḥ || 39||

निषेवितं चारुसुगन्धिपुष्पंक्वचित्सपुष्पैः सहकारवृक्षैः ।लतोपगूढैस्तिलकैस्तमालैःप्रगीतविद्याधरसिद्धचारणम् ॥ ४०॥

niṣevitaṃ cārusugandhipuṣpaṃkvacitsapuṣpaiḥ sahakāravṛkṣaiḥ |latopagūḍhaistilakaistamālaiḥpragītavidyādharasiddhacāraṇam || 40||

विवस्वत्प्रभापुञ्जगुञ्जाफलाढ्यंविराजत्सुधांशोःशशशोभिमध्यम् ।गिरावद्रिवृन्दप्रभानीलवस्त्रंवियद्व्याधवेश्मेव विश्वं विभाति ॥ ४१॥

vivasvatprabhāpuñjaguñjāphalāḍhyaṃvirājatsudhāṃśoḥśaśaśobhimadhyam |girāvadrivṛndaprabhānīlavastraṃviyadvyādhaveśmeva viśvaṃ vibhāti || 41||

प्रवृत्तनृत्तानुगतोऽप्सरोगणंप्रहृष्टनानाविधपुष्टसन्मृगम् ।प्रमत्तहारीतकुलोपपन्नंमृगेन्द्रनादाकुलसन्नशम्बरम् ॥ ४२॥

pravṛttanṛttānugato'psarogaṇaṃprahṛṣṭanānāvidhapuṣṭasanmṛgam |pramattahārītakulopapannaṃmṛgendranādākulasannaśambaram || 42||

कूचिच्च रुद्रोरुकदम्बमृग्यविलूनशष्पाङ्कुरवाप्यमण्डितम् ।प्रफुल्लसद्धल्लकनीलकोत्पलैःसत्पुण्डरीकैः कमलैश्च शेभितम् ॥ ४३॥

kūcicca rudrorukadambamṛgyavilūnaśaṣpāṅkuravāpyamaṇḍitam |praphullasaddhallakanīlakotpalaiḥsatpuṇḍarīkaiḥ kamalaiśca śebhitam || 43||

विटपनिचयनीलं नीलकण्ठाभिरामंमदमुदितविहङ्गव्रातनादाभिरामम् ।कुसुमिततरुशाखानीलमत्तद्विरेफंनवकिसलयशोभाशोभितप्रान्तशाखम् ॥ ४४॥

viṭapanicayanīlaṃ nīlakaṇṭhābhirāmaṃmadamuditavihaṅgavrātanādābhirāmam |kusumitataruśākhānīlamattadvirephaṃnavakisalayaśobhāśobhitaprāntaśākham || 44||

क्वचिच्च दन्तिक्षतचारुवीरुधंवेणुद्रुमैर्रुद्धमरीचिमार्गम् ।क्वचिल्लताऽऽलिङ्गितफुल्लवृक्षंऋक्षौघसन्दारितमूलभागम् ॥ ४५॥

kvacicca dantikṣatacāruvīrudhaṃveṇudrumairruddhamarīcimārgam |kvacillatā''liṅgitaphullavṛkṣaṃṛkṣaughasandāritamūlabhāgam || 45||

क्वचिद्विलासालसगामिनीभिर्निषेवितं रुद्रगणाङ्गनाभिः ।पारावतध्वनिभिरूर्जित चारुशृङ्गमभ्रङ्कषैःसितसितायितपर्वताग्रैः ॥ ४६॥

kvacidvilāsālasagāminībhirniṣevitaṃ rudragaṇāṅganābhiḥ |pārāvatadhvanibhirūrjita cāruśṛṅgamabhraṅkaṣaiḥsitasitāyitaparvatāgraiḥ || 46||

सङ्कीर्णपुष्पनिकरप्रविभक्तभासैर्विभ्राजितैरभ्रसमैश्च शृङ्गैः ।प्रान्तोद्भवागरु दवोद्भवधूमरेखालेखामुखाघ्राणसुखैकसन्मुखम् ॥ ४७॥

saṅkīrṇapuṣpanikarapravibhaktabhāsairvibhrājitairabhrasamaiśca śṛṅgaiḥ |prāntodbhavāgaru davodbhavadhūmarekhālekhāmukhāghrāṇasukhaikasanmukham || 47||

वृक्षाग्रसङ्कलितपुष्पविचित्रपङ्क्तिसम्बद्धगुल्मविहगैर्गहनं ददर्श ॥ ४८॥

vṛkṣāgrasaṅkalitapuṣpavicitrapaṅktisambaddhagulmavihagairgahanaṃ dadarśa || 48||

तुङ्गाग्रैर्नीलपुष्पस्तबकभरनतप्रांशुशाखाशिखाभिर्मालाप्रान्तान्तलीनश्रुतिसुखजननैः कूजितं पक्षिसङ्घैः ।रात्रौ चन्द्रस्य भासा कुसुमिततिलकै (रेकतः श्यामकान्तं)छायासुप्तप्रबुद्धस्थितहरिणगणालुप्तदूर्वाङ्कुराग्रम् ॥ ४९॥

tuṅgāgrairnīlapuṣpastabakabharanataprāṃśuśākhāśikhābhirmālāprāntāntalīnaśrutisukhajananaiḥ kūjitaṃ pakṣisaṅghaiḥ |rātrau candrasya bhāsā kusumitatilakai (rekataḥ śyāmakāntaṃ)chāyāsuptaprabuddhasthitahariṇagaṇāluptadūrvāṅkurāgram || 49||

हंसानां पक्षवातप्रचलिचकमलस्वच्छसम्पूर्णतोयंतत्तीरप्रथितोरुचारुकदली(पाली)नृत्यन्मयूरम्पुरः ।मायूरैः पक्षचन्द्रैः क्वचिदवपतितैरर्चितक्ष्माप्रदेशंदेशोऽभासे विलीनप्रमुदितविगलत्सान्द्रकस्तूरिकैणम् ॥ ५०॥

haṃsānāṃ pakṣavātapracalicakamalasvacchasampūrṇatoyaṃtattīraprathitorucārukadalī(pālī)nṛtyanmayūrampuraḥ |māyūraiḥ pakṣacandraiḥ kvacidavapatitairarcitakṣmāpradeśaṃdeśo'bhāse vilīnapramuditavigalatsāndrakastūrikaiṇam || 50||

सारङ्गैरुपशोभिसत्प्रदेशंप्रच्छन्नं कुसुमचयैः क्वचिद्विकीर्णम् ।हृष्टाभिः क्वचिदपि रुद्रकाङ्गनाभिर्वीणाभिः सुमधुरगीतरम्यषण्डम् ॥ ५१॥

sāraṅgairupaśobhisatpradeśaṃpracchannaṃ kusumacayaiḥ kvacidvikīrṇam |hṛṣṭābhiḥ kvacidapi rudrakāṅganābhirvīṇābhiḥ sumadhuragītaramyaṣaṇḍam || 51||

आमूलात्फलनिचितैकचिद्विशालैरुत्तुङ्गैः पनसमहीरुहैरुपेतम् ।फुल्लाविमुक्तकलातागृहलीनबर्हिकेकारवाक्रमिततद्गरिमूलसानुम् ॥ ५२॥

āmūlātphalanicitaikacidviśālairuttuṅgaiḥ panasamahīruhairupetam |phullāvimuktakalātāgṛhalīnabarhikekāravākramitatadgarimūlasānum || 52||

रम्यप्रियङ्गु तरुमञ्जरिसक्तशृङ्गंभृङ्गावली कज्जलिताम्रकदम्बपुष्पम् ।पुष्पोत्तरानिलविधूतफणीन्द्रवक्त्रसत्पारणं विदधतं च नमत्युदारम् ॥ ५३॥

ramyapriyaṅgu tarumañjarisaktaśṛṅgaṃbhṛṅgāvalī kajjalitāmrakadambapuṣpam |puṣpottarānilavidhūtaphaṇīndravaktrasatpāraṇaṃ vidadhataṃ ca namatyudāram || 53||

गुल्मान्तरप्रसृतगीत । । । । ।नेत्रान्तरागलदथाश्रुजशीतवारि ।चण्डांशुजालकलशे तिलके मनोज्ञैःसिन्दूर कुङ्कुमकुसुम्भनिभैरशोकैः ॥ ५४॥

gulmāntaraprasṛtagīta | | | | |netrāntarāgaladathāśrujaśītavāri |caṇḍāṃśujālakalaśe tilake manojñaiḥsindūra kuṅkumakusumbhanibhairaśokaiḥ || 54||

चामीकराभपरिफुल्लसुकर्णिकारैर्मन्दारसुन्दरसुवृत्तकचारुशाखी ।कीलालजातानिललोलमूलमृणालमौलिस्थसुपद्मजालम् ॥ ५५॥

cāmīkarābhapariphullasukarṇikārairmandārasundarasuvṛttakacāruśākhī |kīlālajātānilalolamūlamṛṇālamaulisthasupadmajālam || 55||

वाताहति प्रोद्धतपत्रघर्घरंविरावितालं सुतमालपिप्पलम् ।त्यक्ताः शिवेनेति च केतकेनसङ्केतभाजोऽत्र वसन्ति केतकाः ॥ ५६॥

vātāhati proddhatapatraghargharaṃvirāvitālaṃ sutamālapippalam |tyaktāḥ śiveneti ca ketakenasaṅketabhājo'tra vasanti ketakāḥ || 56||

नागानुबन्धेन विरागमप्यहोशिवाङ्गमप्यातनुते परागैः ।सद्वारणं वारणसङ्घमत्रमन्दारसन्दारितमेघमालम् ॥ ५७॥

nāgānubandhena virāgamapyahośivāṅgamapyātanute parāgaiḥ |sadvāraṇaṃ vāraṇasaṅghamatramandārasandāritameghamālam || 57||

वटं सटाभिर्जटिलप्रभं सदावृतं च खेदारणकोविदारम् ।कैलासमौलिकृतमालतमालजालंतक्कोलहिन्तालरसालजं फलम् ॥ ५८॥

vaṭaṃ saṭābhirjaṭilaprabhaṃ sadāvṛtaṃ ca khedāraṇakovidāram |kailāsamaulikṛtamālatamālajālaṃtakkolahintālarasālajaṃ phalam || 58||

अङ्कोलनारेलफलैर्विलोलंकृतालवालं वकुलं विभाति ।पुन्नागनागसरलार्जुनचम्पकाढ्यंसत्पाटलीपटलगन्धसुगन्धिताशम् ॥ ५९॥

aṅkolanārelaphalairvilolaṃkṛtālavālaṃ vakulaṃ vibhāti |punnāganāgasaralārjunacampakāḍhyaṃsatpāṭalīpaṭalagandhasugandhitāśam || 59||

सच्छिंशुपाबदरशाल्मलिकिंशुकाढ्यंशोकापहारिभिरशोकपरम्पराढ्यम् ।कपित्थतिन्त्रिणीबकूलकाश्वमारशेखरंसुलोध्रभद्रकाम्रकैः सुफुल्लदाडिमीफलम् ॥ ६०॥

sacchiṃśupābadaraśālmalikiṃśukāḍhyaṃśokāpahāribhiraśokaparamparāḍhyam |kapitthatintriṇībakūlakāśvamāraśekharaṃsulodhrabhadrakāmrakaiḥ suphulladāḍimīphalam || 60||

सुमातुलिङ्गरङ्गकं विभाति तद्वनं परंसुरादनामलक्यपूगपूगजम्बुकं वनम् ।कदल्ययूधिकावृतं समीक्ष्य चाम्बया वसन् ॥ ६१॥

sumātuliṅgaraṅgakaṃ vibhāti tadvanaṃ paraṃsurādanāmalakyapūgapūgajambukaṃ vanam |kadalyayūdhikāvṛtaṃ samīkṣya cāmbayā vasan || 61||

हरित्प्रशस्ततरहस्तविशस्तशाखम् ।वातावधूतसरधादिगलत्फलाढ्यम् ॥ ६२॥

haritpraśastatarahastaviśastaśākham |vātāvadhūtasaradhādigalatphalāḍhyam || 62||

गोलाङ्गूलसहस्रकप्रतिपतज्जम्बूफलानीयुतम् ।भ्राजद्भूमितलं द्विरेफबहुलं संराजते तद्वनम् ॥ ६३॥

golāṅgūlasahasrakapratipatajjambūphalānīyutam |bhrājadbhūmitalaṃ dvirephabahulaṃ saṃrājate tadvanam || 63||

इरिणं खरकिरणैररुणंतत्प्रविभाति तलं च वै गिरीन्द्रे ।सुदरिद्रे विषया यथाऽफलास्तृणमात्रं नहि रोहते तत्र ॥ ६४॥

iriṇaṃ kharakiraṇairaruṇaṃtatpravibhāti talaṃ ca vai girīndre |sudaridre viṣayā yathā'phalāstṛṇamātraṃ nahi rohate tatra || 64||

राजीवराजः इनराड्गिरीशंनीराजतीव प्रविभाति तद्गिरौ ।कोलोरुदंष्ट्राभिविशस्तमुस्तामार्ष्टीव सङ्घैश्च शिलातलाभूः ॥ ६५॥

rājīvarājaḥ inarāḍgirīśaṃnīrājatīva pravibhāti tadgirau |kolorudaṃṣṭrābhiviśastamustāmārṣṭīva saṅghaiśca śilātalābhūḥ || 65||

सकलभुवनकर्ता लोकनाथस्तदानींतुहिनशिखरिपुत्र्या सार्धमिष्टैर्गणेन्द्रैः ।विविधतरुविशालं मत्तहृष्टान्यपुष्टंउपवनमतिरम्यं दर्शयमास देव्यै ॥ ६६॥

sakalabhuvanakartā lokanāthastadānīṃtuhinaśikhariputryā sārdhamiṣṭairgaṇendraiḥ |vividhataruviśālaṃ mattahṛṣṭānyapuṣṭaṃupavanamatiramyaṃ darśayamāsa devyai || 66||

(पुष्पैर्वन्यैः सुभक(सुरभि)कुसुमै)पुष्पैर्वन्यैः शुभक(विविध)कुसुमैर्गन्धितैस्तद्गिरीन्द्रेदेवीं दिव्यामुपवनगतां भूषयामास सख्यः ।सा चाप्येवं तुहिन गिरिजा शङ्करं देवदेवंवन्यैः पुष्पैः पशुवरपतिं भूषयामासहृष्टा ॥ ६७॥

(puṣpairvanyaiḥ subhaka(surabhi)kusumai)puṣpairvanyaiḥ śubhaka(vividha)kusumairgandhitaistadgirīndredevīṃ divyāmupavanagatāṃ bhūṣayāmāsa sakhyaḥ |sā cāpyevaṃ tuhina girijā śaṅkaraṃ devadevaṃvanyaiḥ puṣpaiḥ paśuvarapatiṃ bhūṣayāmāsahṛṣṭā || 67||

॥ इति शिवरहस्यान्तर्गते कैलासोद्यानवर्णनं सम्पूर्णम् ॥॥ श्रीशिवरहस्यम् । ईशाख्यः द्वादशमांशः । १ कैलासोद्यानवर्णनम् । १५६७ ॥

|| iti śivarahasyāntargate kailāsodyānavarṇanaṃ sampūrṇam |||| śrīśivarahasyam | īśākhyaḥ dvādaśamāṃśaḥ | 1 kailāsodyānavarṇanam | 1567 ||

– ॥ श्रीशिवरहस्यम् ।ईशाख्यः द्वादशमांशः ।१ कैलासोद्यानवर्णनम् ।१५-६७ ॥

– || śrīśivarahasyam |īśākhyaḥ dvādaśamāṃśaḥ | 1 kailāsodyānavarṇanam | 15-67 ||