कैलासवासमहिमा Kailasavasamahima

कैलासाचलवार्तापि न शक्या गमनङ्कथम् ।सुरा विष्ण्वादयः पूर्वे ब्रह्मापि भगवद्गणाः ॥ १९॥

kailāsācalavārtāpi na śakyā gamanaṅkatham |surā viṣṇvādayaḥ pūrve brahmāpi bhagavadgaṇāḥ || 19||

मुनयस्तपतेऽद्यापि कैलासनगवीक्षणे ।कैलासगमने लिप्सान्धृत्वा ते सुरसत्तमाः ॥ २०॥

munayastapate'dyāpi kailāsanagavīkṣaṇe |kailāsagamane lipsāndhṛtvā te surasattamāḥ || 20||

शिवप्रसादसिध्यर्थं तप्यन्ते परमन्तपः ।केचित्पञ्चाग्निनिरतास्समीरणसुपारणाः ॥ २१॥

śivaprasādasidhyarthaṃ tapyante paramantapaḥ |kecitpañcāgniniratāssamīraṇasupāraṇāḥ || 21||

वृन्तश्लथछदाशाश्च केचिद्वारिषु संस्थिताः ।कटधूमशिखापानाः केचिच्चैवोर्ध्वबाहवः ॥ २२॥

vṛntaślathachadāśāśca kecidvāriṣu saṃsthitāḥ |kaṭadhūmaśikhāpānāḥ keciccaivordhvabāhavaḥ || 22||

भस्मछन्नाभस्मसंस्थाः केचिच्छ्रीरुद्रजापकाः ।भस्माङ्काबिल्वमूलेषुकेचित्पञ्चाक्षरादराः ॥ २३॥

bhasmachannābhasmasaṃsthāḥ kecicchrīrudrajāpakāḥ |bhasmāṅkābilvamūleṣukecitpañcākṣarādarāḥ || 23||

रुद्राक्षवरकोटीराश्शिवनामपरायणाः ।केचिल्लिङ्गार्चनपरास्त्रिकालं बिल्वपल्लवैः ॥ २४॥

rudrākṣavarakoṭīrāśśivanāmaparāyaṇāḥ |kecilliṅgārcanaparāstrikālaṃ bilvapallavaiḥ || 24||

एवं तपोभिरत्युग्रैस्तप्यन्ति मुनयस्सुराः ।सदाशिवप्रसादो हि तेषाम्भावि मुनीश्वराः ॥ २५॥

evaṃ tapobhiratyugraistapyanti munayassurāḥ |sadāśivaprasādo hi teṣāmbhāvi munīśvarāḥ || 25||

सर्वलोकेषुगन्तारस्सर्वधर्मपरायणाः ।पुनरावृत्तिनस्सर्वे न कैलासगता मुने ॥ २६॥

sarvalokeṣugantārassarvadharmaparāyaṇāḥ |punarāvṛttinassarve na kailāsagatā mune || 26||

यतयोऽपि निवर्तन्ते ज्ञाननिर्धूतकल्मषाः ।शिवप्रसादलभ्योऽयङ्कैलासो ह्यतिदुर्लभः ॥ २७॥

yatayo'pi nivartante jñānanirdhūtakalmaṣāḥ |śivaprasādalabhyo'yaṅkailāso hyatidurlabhaḥ || 27||

मेरुशृङ्गगकैलासशिखरेवरशाम्भवाः ।पूजया श्रद्धया शम्भोरीशानस्य पदङ्गताः ॥ २८॥

meruśṛṅgagakailāsaśikharevaraśāmbhavāḥ |pūjayā śraddhayā śambhorīśānasya padaṅgatāḥ || 28||

सुखिनस्सम्प्रमोदन्ते स्वर्गकोटिगुणाधिके ।महाकैलासगमनमस्माकङ्किं पुनर्नृणाम् ॥ २९॥

sukhinassampramodante svargakoṭiguṇādhike |mahākailāsagamanamasmākaṅkiṃ punarnṛṇām || 29||

शिवप्रसादहीनानां तत्कथाश्रवणं न हि ।अनेककोटिकल्पोत्थतपसा प्राप्य एव सः ॥ ३०॥

śivaprasādahīnānāṃ tatkathāśravaṇaṃ na hi |anekakoṭikalpotthatapasā prāpya eva saḥ || 30||

मेरुमन्दरसङ्काशरत्नस्वर्णादिदानतः ।सत्रातिरात्रकलनैर्वेदाध्ययनकोटिभिः ॥ ३१॥

merumandarasaṅkāśaratnasvarṇādidānataḥ |satrātirātrakalanairvedādhyayanakoṭibhiḥ || 31||

गवाङ्कोटिप्रदानैर्वा विद्यया तपसापि वा ।इष्टापूर्तादिधर्मैंर्वा कैलासप्राप्तिरेव न ॥ ३२॥

gavāṅkoṭipradānairvā vidyayā tapasāpi vā |iṣṭāpūrtādidharmaiṃrvā kailāsaprāptireva na || 32||

शिवप्रसादाल्लभ्योऽयं प्रसादो दुर्लभो नृणाम् ।देव्या मया गणेशेन नन्द्याद्यैर्गणपैरपि ॥ ३३॥

śivaprasādāllabhyo'yaṃ prasādo durlabho nṛṇām |devyā mayā gaṇeśena nandyādyairgaṇapairapi || 33||

कैलासबाह्यप्राकारे तपसा याचिता स्थितिः ।अनेकयुगसन्तप्ततपसा तोषितश्शिवः ॥ ३४॥

kailāsabāhyaprākāre tapasā yācitā sthitiḥ |anekayugasantaptatapasā toṣitaśśivaḥ || 34||

शिवप्रसादेन वयं तद्ब्राह्यशिखराश्रयाः ।गण्यन्ते सिकता भूमौ गण्यन्ते दिवि तारकाः ॥ ३५॥

śivaprasādena vayaṃ tadbrāhyaśikharāśrayāḥ |gaṇyante sikatā bhūmau gaṇyante divi tārakāḥ || 35||

कैलासापारशृङ्गस्थलिङ्गानाङ्गणना न हि ।तत्रापि कोटिलिङ्गानामुत्तमानां श्रुता मया ॥ ३६॥

kailāsāpāraśṛṅgasthaliṅgānāṅgaṇanā na hi |tatrāpi koṭiliṅgānāmuttamānāṃ śrutā mayā || 36||

ततोस्पि लक्षलिङ्गानां ततोऽयुतसहस्रकम् ।उत्तमानाञ्च देव्यै तद्गदता श्रीशिवेन हि ॥ ३७॥

tatospi lakṣaliṅgānāṃ tato'yutasahasrakam |uttamānāñca devyai tadgadatā śrīśivena hi || 37||

गणना गण्यते केन कल्पकोटिशतैरपि ।अनिर्वचनमायस्य मायिनश्श्रीत्रिशूलिनः ॥ ३८॥

gaṇanā gaṇyate kena kalpakoṭiśatairapi |anirvacanamāyasya māyinaśśrītriśūlinaḥ || 38||

को वेद महिमानं तु तत्र तन्मौलिलिङ्गगम् ।स वेद वेदनिश्वासस्सर्वज्ञश्शशिशेखरः ॥ ३९॥

ko veda mahimānaṃ tu tatra tanmauliliṅgagam |sa veda vedaniśvāsassarvajñaśśaśiśekharaḥ || 39||

शिवसन्निधिरेव सन्निधिस्स्याद्विबुधाधीशपदाब्जरत्नवारिधिः ।जनिनाशप्रभवापराधसन्धिः प्लुतिजापारविशेषतोषगाधिः ॥ ४०॥

śivasannidhireva sannidhissyādvibudhādhīśapadābjaratnavāridhiḥ |janināśaprabhavāparādhasandhiḥ plutijāpāraviśeṣatoṣagādhiḥ || 40||

निधिरेवाखिलसम्पदां युगाधिर्भवभक्तामलचेतदारिताखिलाधिः ॥एवङ्कैलासशैलामलशिखरवरैर्मौलिकुम्भैकजालैःतत्रापारशिवालयस्थितमहालिङ्गौघलिङ्गाश्रयैः ।ईशापारमनोविलासजनितैर्दृष्ट्वा महेशस्स्वयंबालार्धाकृतिरिन्दुमौलिरनलालङ्कारभालाक्षकः ॥ ४१॥

nidhirevākhilasampadāṃ yugādhirbhavabhaktāmalacetadāritākhilādhiḥ ||evaṅkailāsaśailāmalaśikharavarairmaulikumbhaikajālaiḥtatrāpāraśivālayasthitamahāliṅgaughaliṅgāśrayaiḥ |īśāpāramanovilāsajanitairdṛṣṭvā maheśassvayaṃbālārdhākṛtirindumauliranalālaṅkārabhālākṣakaḥ || 41||

कालारिः कलधौतशैलशिखरं लिङ्गालिपूर्णङ्करोत् ॥ ४२॥

kālāriḥ kaladhautaśailaśikharaṃ liṅgālipūrṇaṅkarot || 42||

॥ इति शिवरहस्यान्तर्गते माहेश्वराख्ये कैलासवासमहिमा ॥॥ श्रीशिवरहस्यम् । माहेश्वराख्यः प्रथमांशः । अध्यायः ३७ कैलासवासमहिमा । १९४२॥

|| iti śivarahasyāntargate māheśvarākhye kailāsavāsamahimā |||| śrīśivarahasyam | māheśvarākhyaḥ prathamāṃśaḥ | adhyāyaḥ 37 kailāsavāsamahimā | 1942||

– ॥ श्रीशिवरहस्यम् ।माहेश्वराख्यः प्रथमांशः ।अध्यायः ३७ – कैलासवासमहिमा ।१९-४२॥

– || śrīśivarahasyam |māheśvarākhyaḥ prathamāṃśaḥ |adhyāyaḥ 37 – kailāsavāsamahimā | 19-42||