शिवस्तोत्रम् (जैमिनिकृतं बृहन्नारदीयपुराणान्तर्गतम् विरिञ्चिविष्णुगिरिशप्रणताङ्घ्रिसरोरुहे) Jaiminikritam Shiva Stotram

अथानन्दार्णवे मग्नो दृष्ट्वा नृत्यं महेशितुः ।जैमिनिर्वेदपादेन स्तवेनास्तौत्समाहितः ॥ ७३२८॥

athānandārṇave magno dṛṣṭvā nṛtyaṃ maheśituḥ |jaiminirvedapādena stavenāstautsamāhitaḥ || 7328||

जैमिनिरुवाच ।विरिञ्चिविष्णुगिरिशप्रणताङ्घ्रिसरोरुहे ।जगत्सूते नमस्तुभ्यं देवि काम्पिल्यवासिनि ॥ ७३२९॥

jaiminiruvāca |viriñciviṣṇugiriśapraṇatāṅghrisaroruhe |jagatsūte namastubhyaṃ devi kāmpilyavāsini || 7329||

विघ्नेशविधिमातण्डचन्द्रेन्द्रोपेन्द्रवन्दित ।नमो गणपते तुभ्यं ब्रह्मणां ब्रह्मणस्पते ॥ ७३३०॥

vighneśavidhimātaṇḍacandrendropendravandita |namo gaṇapate tubhyaṃ brahmaṇāṃ brahmaṇaspate || 7330||

उमाकोमलहस्ताब्जसम्भावितललाटकम् ।हिरण्यकुण्डलं वन्दे कुमारं पुष्करस्रजम् ॥ ७३३१॥

umākomalahastābjasambhāvitalalāṭakam |hiraṇyakuṇḍalaṃ vande kumāraṃ puṣkarasrajam || 7331||

शिवं ब्रह्मादिदुर्दर्शं नरः कः स्तोतुमर्हति ।दर्शनात्ते स्तुतिर्मे सा चाभ्राद्वृष्टिरिवाजनि ॥ ७३३२॥

śivaṃ brahmādidurdarśaṃ naraḥ kaḥ stotumarhati |darśanātte stutirme sā cābhrādvṛṣṭirivājani || 7332||

नमः शिवाय साम्बाय नमः शर्वाय शम्भवे ।नमो नटाय रुद्राय सदसस्पतये नमः ॥ ७३३३॥

namaḥ śivāya sāmbāya namaḥ śarvāya śambhave |namo naṭāya rudrāya sadasaspataye namaḥ || 7333||

पादभिन्नाय लोकाय मौलिभिन्नाण्डभित्तये ।भुजभ्रान्तदिगन्ताय भूतानां पतये नमः ॥ ७३३४॥

pādabhinnāya lokāya maulibhinnāṇḍabhittaye |bhujabhrāntadigantāya bhūtānāṃ pataye namaḥ || 7334||

क्वणन्नूपुरयुग्माय विलसत्कृत्तिवाससे ।फणीन्द्रमेखलायास्तु पशूनां पतये नमः ॥ ७३३५॥

kvaṇannūpurayugmāya vilasatkṛttivāsase |phaṇīndramekhalāyāstu paśūnāṃ pataye namaḥ || 7335||

कालकालाय सोमाय योगिने शूलपाणये ।अस्थिभूषाय शुद्धाय जगतां पतये नमः ॥ ७३३६॥

kālakālāya somāya yogine śūlapāṇaye |asthibhūṣāya śuddhāya jagatāṃ pataye namaḥ || 7336||

पात्रे सर्वस्य जगतो नेत्रे सर्वदिवौकसाम् ।गोत्राणां पतये तुभ्यं क्षेत्राणां पतये नमः ॥ ७३३७॥

pātre sarvasya jagato netre sarvadivaukasām |gotrāṇāṃ pataye tubhyaṃ kṣetrāṇāṃ pataye namaḥ || 7337||

शङ्कराय नमस्तुभ्यं मङ्गलाय नमो नमः ।धनानां पतये तुभ्यमन्नानां पतये नमः ।आत्माधिपतये तुभ्यं नमो मीढुष्टमाय च ॥ ७३३८॥

śaṅkarāya namastubhyaṃ maṅgalāya namo namaḥ |dhanānāṃ pataye tubhyamannānāṃ pataye namaḥ |ātmādhipataye tubhyaṃ namo mīḍhuṣṭamāya ca || 7338||

अष्टाङ्गायातिहृद्याय क्लिष्टभक्तेष्टदायिने ।इष्टिघ्नाय सुतुष्टाय पुष्टानां पतये नमः ॥ ७३३९॥

aṣṭāṅgāyātihṛdyāya kliṣṭabhakteṣṭadāyine |iṣṭighnāya sutuṣṭāya puṣṭānāṃ pataye namaḥ || 7339||

पञ्चभूताधिपतये कालाधिपतये नमः ।नम आत्माधिपतये दिशां च पतये नमः ॥ ७३४०॥

pañcabhūtādhipataye kālādhipataye namaḥ |nama ātmādhipataye diśāṃ ca pataye namaḥ || 7340||

विश्वकर्त्रे महेशाय विश्वभर्त्रे पिनाकिने ।विश्वहर्त्रेऽग्निनेत्राय विश्वरूपाय वै नमः ॥ ७३४१॥

viśvakartre maheśāya viśvabhartre pinākine |viśvahartre'gninetrāya viśvarūpāya vai namaḥ || 7341||

ईशान ते तत्पुरुष नमो घोराय ते सदा ।वामदेव नमस्तेऽस्तु सद्योजाताय वै नमः ॥ ७३४२॥

īśāna te tatpuruṣa namo ghorāya te sadā |vāmadeva namaste'stu sadyojātāya vai namaḥ || 7342||

भूतिभूषाय भक्तानां भीतिभङ्गप्रदायिने ।नमो भवाय भर्गाय नमो रुद्राय मीढुषे ॥ ७३४३॥

bhūtibhūṣāya bhaktānāṃ bhītibhaṅgapradāyine |namo bhavāya bhargāya namo rudrāya mīḍhuṣe || 7343||

सहस्राम्बाय साम्बाय सहस्राभीषवे नमः ।सहस्रबाहवे तुभ्यं सहस्राक्षाय मीढुषे ॥ ७३४४॥

sahasrāmbāya sāmbāya sahasrābhīṣave namaḥ |sahasrabāhave tubhyaṃ sahasrākṣāya mīḍhuṣe || 7344||

सुकपोलाय सोमाय सुललाटाय सुभ्रुवे ।सुदेहाय नमस्तुभ्यं सुमृडीकाय मीढुषे ॥ ७३४५॥

sukapolāya somāya sulalāṭāya subhruve |sudehāya namastubhyaṃ sumṛḍīkāya mīḍhuṣe || 7345||

भवक्लेशनिमित्तोरुभयच्छेदकृते सदा ।नमस्तुभ्यमषाढाय सहमानाय मीढुषे ॥ ७३४६॥

bhavakleśanimittorubhayacchedakṛte sadā |namastubhyamaṣāḍhāya sahamānāya mīḍhuṣe || 7346||

वन्देऽहं देवमानन्दसन्दोहं लास्यसुन्दरम् ।समस्तजगतां नाथं सदसस्पतिमद्भुतम् ॥ ७३४७॥

vande'haṃ devamānandasandohaṃ lāsyasundaram |samastajagatāṃ nāthaṃ sadasaspatimadbhutam || 7347||

सुजङ्घं सुन्दरं क्षौमं रक्षोभूतक्षतिक्षमम् ।यक्षेशेष्टं नमामीशमक्षरं परमं प्रभुम् ॥ ७३४८॥

sujaṅghaṃ sundaraṃ kṣaumaṃ rakṣobhūtakṣatikṣamam |yakṣeśeṣṭaṃ namāmīśamakṣaraṃ paramaṃ prabhum || 7348||

अर्द्धालकमवस्त्रार्द्धमस्थ्युत्पलदलस्रजम् ।अर्द्धपुंलक्षणं वन्दे पुरुषं कृष्णपिङ्गलम् ॥ ७३४९॥

arddhālakamavastrārddhamasthyutpaladalasrajam |arddhapuṃlakṣaṇaṃ vande puruṣaṃ kṛṣṇapiṅgalam || 7349||

सकृत्प्रणतसंसारमहासागरतारकम् ।प्रणमामि तमीशानं जगतस्तस्थुषस्पतिम् ॥ ७३५०॥

sakṛtpraṇatasaṃsāramahāsāgaratārakam |praṇamāmi tamīśānaṃ jagatastasthuṣaspatim || 7350||

धातारं जगतामीशं दातारं सर्वसम्पदाम् ।नेतारं मरुतां वन्दे जेतारमपराजितम् ॥ ७३५१॥

dhātāraṃ jagatāmīśaṃ dātāraṃ sarvasampadām |netāraṃ marutāṃ vande jetāramaparājitam || 7351||

तं त्वामन्तकनेतारं वन्दे मन्दाकिनीधरम् ।दधाति विदधद्यो मामिमानि त्रीणि विष्टपा ॥ ७३५२॥

taṃ tvāmantakanetāraṃ vande mandākinīdharam |dadhāti vidadhadyo māmimāni trīṇi viṣṭapā || 7352||

सर्वज्ञं सर्वगं सर्वं कविं वन्दे तमीश्वरम् ।यतश्च यजुषा सार्द्धमृचः सामानि जज्ञिरे ॥ ७३५३॥

sarvajñaṃ sarvagaṃ sarvaṃ kaviṃ vande tamīśvaram |yataśca yajuṣā sārddhamṛcaḥ sāmāni jajñire || 7353||

भवन्तं सुदृशं वन्दे भूतभव्यभवन्ति च ।त्यजन्तीतरकर्माणि यो विश्वाभिर्विपश्यति ॥ ७३५४॥

bhavantaṃ sudṛśaṃ vande bhūtabhavyabhavanti ca |tyajantītarakarmāṇi yo viśvābhirvipaśyati || 7354||

हरं सुरनियन्तारं हरन्तमहमानतः ।यदाज्ञया जगत्सर्वं व्याप्य नारायणः स्थितः ॥ ७३५५॥

haraṃ suraniyantāraṃ harantamahamānataḥ |yadājñayā jagatsarvaṃ vyāpya nārāyaṇaḥ sthitaḥ || 7355||

तं नमामि महादेवं यन्नियोगादिदं जगत् ।कल्पादौ भगवान्धाता यथापूर्वमकल्पयत् ॥ ७३५६॥

taṃ namāmi mahādevaṃ yanniyogādidaṃ jagat |kalpādau bhagavāndhātā yathāpūrvamakalpayat || 7356||

ईश्वरं तमहं देवं यस्य लिङ्गमहर्निशम् ।यजन्ते सह भार्याभिरिन्द्रज्येष्ठा मरुद्गणाः ॥ ७३५७॥

īśvaraṃ tamahaṃ devaṃ yasya liṅgamaharniśam |yajante saha bhāryābhirindrajyeṣṭhā marudgaṇāḥ || 7357||

नमामि तमिमं रुद्रं यमभ्यर्च्य सकृत्पुरा ।अवापुः स्वं स्वमैश्वर्यं देवासः पूषरातयः ॥ ७३५८॥

namāmi tamimaṃ rudraṃ yamabhyarcya sakṛtpurā |avāpuḥ svaṃ svamaiśvaryaṃ devāsaḥ pūṣarātayaḥ || 7358||

तं वन्दे देवमीशानं यं शिवं हृदयाम्बुजे ।सततं यतयः शान्ताः सञ्जानाना उपासते ॥ ७३५९॥

taṃ vande devamīśānaṃ yaṃ śivaṃ hṛdayāmbuje |satataṃ yatayaḥ śāntāḥ sañjānānā upāsate || 7359||

तदस्मै सततं कुर्मो नमः कमलकान्तये ।उमाकुचपटोरस्क या ते रुद्रशिवा तनूः ॥ ७३६०॥

tadasmai satataṃ kurmo namaḥ kamalakāntaye |umākucapaṭoraska yā te rudraśivā tanūḥ || 7360||

नमस्ते रुद्रभावाय नमस्ते रुद्रकेलये ।नमस्ते रुद्रशान्त्यै च नमस्ते रुद्रमन्यवे ॥ ७३६१॥

namaste rudrabhāvāya namaste rudrakelaye |namaste rudraśāntyai ca namaste rudramanyave || 7361||

वेदाश्वरथनिष्ठाभ्यां पादाभ्यां त्रिपुरान्तक ।बाणकार्मुकयुक्ताभ्यां बाहुभ्यामुत ते नमः ॥ ७३६२॥

vedāśvarathaniṣṭhābhyāṃ pādābhyāṃ tripurāntaka |bāṇakārmukayuktābhyāṃ bāhubhyāmuta te namaḥ || 7362||

नमस्ते वासुकिज्याय विष्किराय च शङ्करः ।महते मेरुरूपाय नमस्ते अस्तु धन्वने ॥ ७३६३॥

namaste vāsukijyāya viṣkirāya ca śaṅkaraḥ |mahate merurūpāya namaste astu dhanvane || 7363||

नमः परशवे तेऽस्तु शूलायातुलरोचिषे ।हयग्रीवात्मने तुभ्यमुतोत इषवे नमः ॥ ७३६४॥

namaḥ paraśave te'stu śūlāyātularociṣe |hayagrīvātmane tubhyamutota iṣave namaḥ || 7364||

सुरेतरवधू हारहारीणि हर यानि ते ।अन्यान्यस्त्राण्यहं तूण इदं तेभ्योऽकरं नमः ॥ ७३६५॥

suretaravadhū hārahārīṇi hara yāni te |anyānyastrāṇyahaṃ tūṇa idaṃ tebhyo'karaṃ namaḥ || 7365||

धराधरसुतालीलासरोजाहतबाहवे ।तस्मै तुभ्यमघोराय नमो अस्मा श्रवस्य च ॥ ७३६६॥

dharādharasutālīlāsarojāhatabāhave |tasmai tubhyamaghorāya namo asmā śravasya ca || 7366||

रक्ष मामज्ञमक्षीणमशिक्षितमनन्यगम् ।अनाथं दीनमापन्ने दरिद्रं नीललोहितम् ॥ ७३६७॥

rakṣa māmajñamakṣīṇamaśikṣitamananyagam |anāthaṃ dīnamāpanne daridraṃ nīlalohitam || 7367||

दुर्मुखं दुष्क्रियं दुष्टं रक्षमामीश दुर्दशम् ।आदृशा तमहं न त्वदन्यं विन्दामि राधसे ॥ ७३६८॥

durmukhaṃ duṣkriyaṃ duṣṭaṃ rakṣamāmīśa durdaśam |ādṛśā tamahaṃ na tvadanyaṃ vindāmi rādhase || 7368||

भवाख्येनाग्निना शम्भो रागद्वेषमदार्चिषा ।दयालो दह्यमानानामस्माकमविता भव ॥ ७३६९॥

bhavākhyenāgninā śambho rāgadveṣamadārciṣā |dayālo dahyamānānāmasmākamavitā bhava || 7369||

परदारं परावासं परवस्त्रं पराश्रयम् ।हर पाहि परान्नं मां पुरुणामन्पुरुष्टुत ॥ ७३७०॥

paradāraṃ parāvāsaṃ paravastraṃ parāśrayam |hara pāhi parānnaṃ māṃ puruṇāmanpuruṣṭuta || 7370||

लौकिकैर्यत्कृतं दुष्टैर्नावमानं सहामहे ।देवेश तव दासेभ्यो भूरिदा भूरि देहि नः ॥ ७३७१॥

laukikairyatkṛtaṃ duṣṭairnāvamānaṃ sahāmahe |deveśa tava dāsebhyo bhūridā bhūri dehi naḥ || 7371||

कुलोकानामयत्नानां गर्विणामीश पश्यताम् ।अस्मभ्यं क्षेत्रमायुश्च वसु स्पार्हं तदा भर ॥ ७३७२॥

kulokānāmayatnānāṃ garviṇāmīśa paśyatām |asmabhyaṃ kṣetramāyuśca vasu spārhaṃ tadā bhara || 7372||

याञ्चातो महतीं लज्जामस्मदीयां घृणानिधे ।त्वमेव वेत्सि नस्तूर्णमिदं स्तोतृभ्य आभर ॥ ७३७३॥

yāñcāto mahatīṃ lajjāmasmadīyāṃ ghṛṇānidhe |tvameva vetsi nastūrṇamidaṃ stotṛbhya ābhara || 7373||

जाया माता पिता चान्ये मां द्विषन्त्यमितं कृशम् ।देहि मे महतीं विद्यां राया विश्वपुषा सह ॥ ७३७४॥

jāyā mātā pitā cānye māṃ dviṣantyamitaṃ kṛśam |dehi me mahatīṃ vidyāṃ rāyā viśvapuṣā saha || 7374||

अदृष्टार्थेषु सर्वेषु दृष्टार्थेष्वपि कर्मसु ।मेरुधन्वन्नशक्तेभ्यो बलं धेहि तनूषु नः ॥ ७३७५॥

adṛṣṭārtheṣu sarveṣu dṛṣṭārtheṣvapi karmasu |merudhanvannaśaktebhyo balaṃ dhehi tanūṣu naḥ || 7375||

लब्धानिष्टसहस्रस्य नित्यमिष्टवियोगिनः ।हृद्रोगं मम देवेश हरिमाणं च नाशय ॥ ७३७६॥

labdhāniṣṭasahasrasya nityamiṣṭaviyoginaḥ |hṛdrogaṃ mama deveśa harimāṇaṃ ca nāśaya || 7376||

ये ये रोगाः पिशाचा वा नरा देवाश्च मामिह ।बाधन्ते देवताः सर्वा निबाधस्व महानसि ॥ ७३७७॥

ye ye rogāḥ piśācā vā narā devāśca māmiha |bādhante devatāḥ sarvā nibādhasva mahānasi || 7377||

त्वमेव रक्षितास्माकमन्यः कश्चिन्न विद्यते ।तस्मात्स्वीकृत्य देवेश रक्षा णो ब्रह्मणस्पते ॥ ७३७८॥

tvameva rakṣitāsmākamanyaḥ kaścinna vidyate |tasmātsvīkṛtya deveśa rakṣā ṇo brahmaṇaspate || 7378||

त्वमेवोमापते माता त्वं पिता त्वं पितामहः ।त्वमायुस्त्वं मतिस्त्वं श्रीरुत भ्रातोत नः सखा ॥ ७३७९॥

tvamevomāpate mātā tvaṃ pitā tvaṃ pitāmahaḥ |tvamāyustvaṃ matistvaṃ śrīruta bhrātota naḥ sakhā || 7379||

यतस्त्वमेव देवेश कर्ता सर्वस्य कर्मणः ।ततः क्षमस्व तत्सर्वं यन्मया दुष्कृतं कृतम् ॥ ७३८०॥

yatastvameva deveśa kartā sarvasya karmaṇaḥ |tataḥ kṣamasva tatsarvaṃ yanmayā duṣkṛtaṃ kṛtam || 7380||

त्वत्समो न प्रभुत्वेन फल्गुत्वेन च मत्समः ।ततो देव महादेव त्वमस्माकं तवस्मसि ॥ ७३८१॥

tvatsamo na prabhutvena phalgutvena ca matsamaḥ |tato deva mahādeva tvamasmākaṃ tavasmasi || 7381||

सुस्मितं भस्मगौराङ्गं तरुणादित्यविग्रहम् ।प्रसन्नवदनं सौर्म्य गाये त्वा नमसा गिरा ॥ ७३८२॥

susmitaṃ bhasmagaurāṅgaṃ taruṇādityavigraham |prasannavadanaṃ saurmya gāye tvā namasā girā || 7382||

एष एव वरोऽस्माकं नृत्यन्तं त्वां सभापतिम् ।लोकयन्तमुमाकान्तं पश्येम शरदः शतम् ॥ ७३८३॥

eṣa eva varo'smākaṃ nṛtyantaṃ tvāṃ sabhāpatim |lokayantamumākāntaṃ paśyema śaradaḥ śatam || 7383||

अरोगिणो महाभाग विद्वांसश्च बहुश्रुताः ।भगवंस्त्वत्प्रसादेन जीवेम शरदः शतम् ॥ ७३८४॥

arogiṇo mahābhāga vidvāṃsaśca bahuśrutāḥ |bhagavaṃstvatprasādena jīvema śaradaḥ śatam || 7384||

सदारा बन्धुभिः सार्द्धं त्वदीयं ताण्डवामृतम् ।पिबन्तः काममीशानं नन्दाम शरदः शतम् ॥ ७३८५॥

sadārā bandhubhiḥ sārddhaṃ tvadīyaṃ tāṇḍavāmṛtam |pibantaḥ kāmamīśānaṃ nandāma śaradaḥ śatam || 7385||

देवदेव महादेव त्वदीयाङ्घ्रिसरोरुहम् ।कामं मधुमयं पीत्वा मोदाम शरदः शतम् ॥ ७३८६॥

devadeva mahādeva tvadīyāṅghrisaroruham |kāmaṃ madhumayaṃ pītvā modāma śaradaḥ śatam || 7386||

कीटा नागाः पिशाचा वा ये वा के वा भवेभवे ।तव दासा महादेव भवाम शरदः शतम् ॥ ७३८७॥

kīṭā nāgāḥ piśācā vā ye vā ke vā bhavebhave |tava dāsā mahādeva bhavāma śaradaḥ śatam || 7387||

सभायामीश ते देव नृत्यवाद्यगलस्वनम् ।श्रवणाभ्यां महादेव शृणुयाम शरदः शतम् ॥ ७३८८॥

sabhāyāmīśa te deva nṛtyavādyagalasvanam |śravaṇābhyāṃ mahādeva śṛṇuyāma śaradaḥ śatam || 7388||

स्मृतिमात्रेण संसारविनाशनकराणि ते ।नामानि खलु दिव्यानि प्रब्रवाम शरदः शतम् ॥ ७३८९॥

smṛtimātreṇa saṃsāravināśanakarāṇi te |nāmāni khalu divyāni prabravāma śaradaḥ śatam || 7389||

इषुसन्धानमात्रेण दग्धत्रिपुर घूर्जटे ।आधिभिर्व्याधिभिर्नित्यमजिताः स्याम शरदः शतम् ॥ ७३९०॥

iṣusandhānamātreṇa dagdhatripura ghūrjaṭe |ādhibhirvyādhibhirnityamajitāḥ syāma śaradaḥ śatam || 7390||

चारुचामीकराभासं गौरीकुचपटोरसम् ।कदा नु लोकयिष्यामि युवानं विश्पतिं कविम् ॥ ७३९१॥

cārucāmīkarābhāsaṃ gaurīkucapaṭorasam |kadā nu lokayiṣyāmi yuvānaṃ viśpatiṃ kavim || 7391||

प्रमथेन्द्रावृतं प्रीतवदनं प्रियवाससम् ।सेविष्येऽहं कदा साम्बं सुभासं शुक्रशोचिषम् ॥ ७३९२॥

pramathendrāvṛtaṃ prītavadanaṃ priyavāsasam |seviṣye'haṃ kadā sāmbaṃ subhāsaṃ śukraśociṣam || 7392||

बह्वेनसं मामकृतपुण्यलेशं च दुर्मतिम् ।स्वीकरिष्यति किं न्वीशो नीलग्रीवो विलोहितः ॥ ७३९३॥

bahvenasaṃ māmakṛtapuṇyaleśaṃ ca durmatim |svīkariṣyati kiṃ nvīśo nīlagrīvo vilohitaḥ || 7393||

कालशूलानलासक्तं भीतं व्याकुलमानसम् ।कदा नु द्रक्ष्यतीशो मां तुविग्रीवो अनानतः ॥ ७३९४॥

kālaśūlānalāsaktaṃ bhītaṃ vyākulamānasam |kadā nu drakṣyatīśo māṃ tuvigrīvo anānataḥ || 7394||

गायका यूयमायात यदि रागादि लिप्सवः ।धनदस्य सखायं तमुपास्मै गायता नरः ॥ ७३९५॥

gāyakā yūyamāyāta yadi rāgādi lipsavaḥ |dhanadasya sakhāyaṃ tamupāsmai gāyatā naraḥ || 7395||

स्वस्त्यस्तु सखि ते जिह्वे विद्यादातुरुमापतेः ।स्तवमुच्चतरं ब्रूहि जयतामिव दुन्दुभिः ॥ ७३९६॥

svastyastu sakhi te jihve vidyādāturumāpateḥ |stavamuccataraṃ brūhi jayatāmiva dundubhiḥ || 7396||

चेतयाजन शान्तस्त्वं नेदं वेदाखिलं जगत् ।अस्य तृप्त्याखिलं शभोर्गौरो न तृषितः पिब ॥ ७३९७॥

cetayājana śāntastvaṃ nedaṃ vedākhilaṃ jagat |asya tṛptyākhilaṃ śabhorgauro na tṛṣitaḥ piba || 7397||

सुगन्धिं च सुखस्पर्शं कामदं सोमभूषणम् ।गाढमालिङ्ग मच्चित्तं योषा जारमिव प्रियम् ॥ ७३९८॥

sugandhiṃ ca sukhasparśaṃ kāmadaṃ somabhūṣaṇam |gāḍhamāliṅga maccittaṃ yoṣā jāramiva priyam || 7398||

महामयूखाय महाभुजाय महाशरीराय महाम्बराय ।महाकिरीटाय महेश्वराय महो महीं सुष्टुतिमीरयामि ॥ ७३९९॥

mahāmayūkhāya mahābhujāya mahāśarīrāya mahāmbarāya |mahākirīṭāya maheśvarāya maho mahīṃ suṣṭutimīrayāmi || 7399||

यथाकथञ्चिद्रचिताभिरीषत्प्रसन्नतश्चारुभिरादरेण ।प्रपूजयामि स्तुतिभिर्महेशमषाढमुग्रं सहमानमाभिः ॥ ७३१००॥

yathākathañcidracitābhirīṣatprasannataścārubhirādareṇa |prapūjayāmi stutibhirmaheśamaṣāḍhamugraṃ sahamānamābhiḥ || 73100||

नमः शिवाय त्रिपुरान्तकाय जगत्त्रयेशाय दिगम्बराय ।नमोऽस्तु मुख्याय हराय भूयो नमो जघन्याय च बुध्नियाय ॥ ७३१०१॥

namaḥ śivāya tripurāntakāya jagattrayeśāya digambarāya |namo'stu mukhyāya harāya bhūyo namo jaghanyāya ca budhniyāya || 73101||

नमो विकाराय विकारिणे ते नमो भवायास्तु भवोद्भवाय ।बहुप्रजात्यन्तविचित्ररूप यतः प्रसूता जगतः प्रसूतिः ॥ ७३१०२॥

namo vikārāya vikāriṇe te namo bhavāyāstu bhavodbhavāya |bahuprajātyantavicitrarūpa yataḥ prasūtā jagataḥ prasūtiḥ || 73102||

तस्मै सुरेशोरुकिरीटनानारत्नावृताष्टापदविष्टराय ।भस्माङ्गरागाय नमः परस्मै यस्मात्परं नापरमस्ति किञ्चित् ॥ ७३१०३॥

tasmai sureśorukirīṭanānāratnāvṛtāṣṭāpadaviṣṭarāya |bhasmāṅgarāgāya namaḥ parasmai yasmātparaṃ nāparamasti kiñcit || 73103||

सर्पाधिराजोषधिनाथयुद्धक्षुभ्यज्जटामण्डलगह्वराय ।तुभ्यं नमः सुन्दरताण्डवाय यस्मिन्निदं सञ्चविचैति सर्वम् ॥ ७३१०४॥

sarpādhirājoṣadhināthayuddhakṣubhyajjaṭāmaṇḍalagahvarāya |tubhyaṃ namaḥ sundaratāṇḍavāya yasminnidaṃ sañcavicaiti sarvam || 73104||

मुरारिनेत्रार्चितपादपद्ममुमाङ्घ्रिलाक्षापरिरक्तपाणिम् ।नमामि देवं वृषनीलकण्ठं हिरण्यदन्तं शुचिवर्णमारात् ॥ ७३१०५॥

murārinetrārcitapādapadmamumāṅghrilākṣāpariraktapāṇim |namāmi devaṃ vṛṣanīlakaṇṭhaṃ hiraṇyadantaṃ śucivarṇamārāt || 73105||

अनन्तमव्यक्तमचिन्त्यमेकं हरन्तमाशाम्बरमम्बराङ्गम् ।आजं पुराणं प्रणमामि यूपमणोरणीयान्महतो महीयान् ॥ ७३१०६॥

anantamavyaktamacintyamekaṃ harantamāśāmbaramambarāṅgam |ājaṃ purāṇaṃ praṇamāmi yūpamaṇoraṇīyānmahato mahīyān || 73106||

अन्तःस्थमात्मानमजं न दृष्ट्वा भ्रमन्ति मूढा गिरिगयह्वरेषु ।पश्चादुदग्दक्षिणतः पुरस्तादधः स्विदासीदुपरि स्विदासीत् ॥ ७३१०७॥

antaḥsthamātmānamajaṃ na dṛṣṭvā bhramanti mūḍhā girigayahvareṣu |paścādudagdakṣiṇataḥ purastādadhaḥ svidāsīdupari svidāsīt || 73107||

इमं नमामीश्वरमिन्दुमौले शिवं महानन्दमशोकदुःखम् ।हृदम्बुजे तिष्ठति यः परात्मा यतश्च सर्वाः प्रदिशो दिशश्च ॥ ७३१०८॥

imaṃ namāmīśvaramindumaule śivaṃ mahānandamaśokaduḥkham |hṛdambuje tiṣṭhati yaḥ parātmā yataśca sarvāḥ pradiśo diśaśca || 73108||

रागादिकापट्यसमुद्भवेन भान्तं भवाख्येन महामयेन ।विलोक्य मां पालय चन्द्रमौले भिषक्तमं त्वा भिषजां शृणोमि ॥ ७३१०९॥

rāgādikāpaṭyasamudbhavena bhāntaṃ bhavākhyena mahāmayena |vilokya māṃ pālaya candramaule bhiṣaktamaṃ tvā bhiṣajāṃ śṛṇomi || 73109||

दुःखाम्बुराशिं सुखलेशहीनमस्पृष्टपुण्यं बहुपातकं माम् ।मृत्योः करस्थं भव रक्ष भीतं पश्चात्पुरस्तादधरादुदक्तात् ॥ ७३११०॥

duḥkhāmburāśiṃ sukhaleśahīnamaspṛṣṭapuṇyaṃ bahupātakaṃ mām |mṛtyoḥ karasthaṃ bhava rakṣa bhītaṃ paścātpurastādadharādudaktāt || 73110||

गिरीन्द्रजाचारुमुखावलोकसुशीतया देव तवैव दृष्ट्या ।वयं दयापूरितयैव पूर्णमपो न नावा दुरिता तरेम ॥ ७३११॥

girīndrajācārumukhāvalokasuśītayā deva tavaiva dṛṣṭyā |vayaṃ dayāpūritayaiva pūrṇamapo na nāvā duritā tarema || 7311||

अपारसंसारसमुद्रमध्ये निमग्नमुत्क्रोशमनल्परागम् ।मामक्षमं पाहि महेशजुष्टमोजिष्ठया दक्षिणयेव रातिम् ॥ ७३११२॥

apārasaṃsārasamudramadhye nimagnamutkrośamanalparāgam |māmakṣamaṃ pāhi maheśajuṣṭamojiṣṭhayā dakṣiṇayeva rātim || 73112||

स्मरन्पुरा सञ्चितपातकानि खरं यमस्यापि मुखं यमारे ।बिभेमि मे देहि यथेष्टमायुर्यदि क्षितायुर्यदि वा परेतः ॥ ७३११३॥

smaranpurā sañcitapātakāni kharaṃ yamasyāpi mukhaṃ yamāre |bibhemi me dehi yatheṣṭamāyuryadi kṣitāyuryadi vā paretaḥ || 73113||

सुगन्धिभिः सुन्दरभस्मगौरैरनन्तभोगैर्मृदुलैरघोरैः ।इमं कदाऽऽलिङ्गति मां पिनाकी स्थिरेभिरङ्गैः पुरुरूप उग्रः ॥ ७३११४॥

sugandhibhiḥ sundarabhasmagaurairanantabhogairmṛdulairaghoraiḥ |imaṃ kadā''liṅgati māṃ pinākī sthirebhiraṅgaiḥ pururūpa ugraḥ || 73114||

क्रोशन्तमीशं पतितं भवाब्धौ नाकुस्थमण्डूकमिवातिभीतम् ।कदा नु मां रक्षति देवदेवो हिरण्यरूपः स हिरण्यसन्दृक् ॥ ७३११५॥

krośantamīśaṃ patitaṃ bhavābdhau nākusthamaṇḍūkamivātibhītam |kadā nu māṃ rakṣati devadevo hiraṇyarūpaḥ sa hiraṇyasandṛk || 73115||

चारुस्मितं चन्द्रकलावतंसं गौरीकटाक्षारुहयुग्मनेत्रम् ।आलोकयिष्यामि कदा नु साम्बमादित्यवर्णं तमसः परस्तात् ॥ ७३११६॥

cārusmitaṃ candrakalāvataṃsaṃ gaurīkaṭākṣāruhayugmanetram |ālokayiṣyāmi kadā nu sāmbamādityavarṇaṃ tamasaḥ parastāt || 73116||

आगच्छतानादि मुमुक्षवो ये यूयं शिवं चिन्तयतान्तरेऽब्जे ।ध्यायन्ति मुक्त्यर्थममुं हि नित्यं वेदान्तविज्ञानसुनिश्चितार्थाः ॥ ७३११७॥

āgacchatānādi mumukṣavo ye yūyaṃ śivaṃ cintayatāntare'bje |dhyāyanti muktyarthamamuṃ hi nityaṃ vedāntavijñānasuniścitārthāḥ || 73117||

आयात यूयं भवताधिपत्ये कामं महेशं गिरिशं यजध्वम् ।एवं पुराभ्यर्च्य हिरण्यगर्भो भूतस्य जातः पतिरेक आसीत् ॥ ७३११८॥

āyāta yūyaṃ bhavatādhipatye kāmaṃ maheśaṃ giriśaṃ yajadhvam |evaṃ purābhyarcya hiraṇyagarbho bhūtasya jātaḥ patireka āsīt || 73118||

एकायनं ते विपुलां श्रियं ते श्रीकण्ठमेनं सुकृता नमन्ताम् ।श्रीमानयं श्रीपतिवन्द्यपादः श्रीणामुदारो धरुणो रयीणाम् ॥ ७३११९॥

ekāyanaṃ te vipulāṃ śriyaṃ te śrīkaṇṭhamenaṃ sukṛtā namantām |śrīmānayaṃ śrīpativandyapādaḥ śrīṇāmudāro dharuṇo rayīṇām || 73119||

सुपुत्रकामा अपि ये मनुष्या युवानमेनं गिरिशं यजन्ताम् ।यतः स्वयम्भूर्जगतो विधाता हिरण्यगर्भः समवर्तताग्रे ॥ ७३१२०॥

suputrakāmā api ye manuṣyā yuvānamenaṃ giriśaṃ yajantām |yataḥ svayambhūrjagato vidhātā hiraṇyagarbhaḥ samavartatāgre || 73120||

अलं किमुक्तैर्बहुभिः समीहितं समस्तमस्याश्रयणेन सिध्यति ।पुरैनमाश्रित्य हि कुम्भसम्भवो दिवा न नक्तं पलितो युवाजनि ॥ ७३१२१॥

alaṃ kimuktairbahubhiḥ samīhitaṃ samastamasyāśrayaṇena sidhyati |purainamāśritya hi kumbhasambhavo divā na naktaṃ palito yuvājani || 73121||

अन्यत्परित्यज्य ममाक्षिभृङ्गाः सर्वं सदैनं शिवमाश्रयध्वम् ।आमोदवानेष मृदुः शिवाय स्वादुःष्किलायं मधुमाँ उतायम् ॥ ७३१२२॥

anyatparityajya mamākṣibhṛṅgāḥ sarvaṃ sadainaṃ śivamāśrayadhvam |āmodavāneṣa mṛduḥ śivāya svāduḥṣkilāyaṃ madhumām̐ utāyam || 73122||

भविष्यसि त्वं प्रतिमानहीनो विनिर्ज्जिताशेषनरामरश्च ।नमश्च ते वाणि महेशमेनं स्तुहि श्रुतं गर्तसदं युवानम् ॥ ७३१२३॥

bhaviṣyasi tvaṃ pratimānahīno vinirjjitāśeṣanarāmaraśca |namaśca te vāṇi maheśamenaṃ stuhi śrutaṃ gartasadaṃ yuvānam || 73123||

यद्यन्मनश्चिन्तयसि त्वमिष्टं तत्तद्भिविष्यत्यखिलं ध्रुवं ते ।दुःखेन वृत्तिं विषये कदाचिद्यक्ष्वामहे सौमनसाय रुद्रम् ॥ ७३१२४॥

yadyanmanaścintayasi tvamiṣṭaṃ tattadbhiviṣyatyakhilaṃ dhruvaṃ te |duḥkhena vṛttiṃ viṣaye kadācidyakṣvāmahe saumanasāya rudram || 73124||

अज्ञानयोगादपचारकर्म यत्पूर्वमस्माभिरनुष्ठितं ते ।तदेव सोढ्वा सकलं दयालो पितेवपुत्रान्प्रति नो जुषस्व ॥ ७३१२५॥

ajñānayogādapacārakarma yatpūrvamasmābhiranuṣṭhitaṃ te |tadeva soḍhvā sakalaṃ dayālo pitevaputrānprati no juṣasva || 73125||

संसाराख्यक्रुद्धसर्पेण तीव्रै रागद्वेषोन्मादलोभादिदन्तैः ।दष्टं दृष्ट्वा मां दयालुः पिनाकी देवस्त्राता त्रायतामप्रयुच्छन् ॥ ७३१२६॥

saṃsārākhyakruddhasarpeṇa tīvrai rāgadveṣonmādalobhādidantaiḥ |daṣṭaṃ dṛṣṭvā māṃ dayāluḥ pinākī devastrātā trāyatāmaprayucchan || 73126||

इत्युक्त्वान्ते ये समाधेर्नमन्ते रुद्र त्वां ते यान्ति जन्माहिदष्टाः ।सन्तो नीलग्रीवसूत्रात्मनाहं तत्त्वा यामि ब्रह्मणा वन्दमानः ॥ ७३१२७॥

ityuktvānte ye samādhernamante rudra tvāṃ te yānti janmāhidaṣṭāḥ |santo nīlagrīvasūtrātmanāhaṃ tattvā yāmi brahmaṇā vandamānaḥ || 73127||

भवाधिभीषणज्वरेण पीडितान्महामयानशेषपातकालयानदूरकाललोचनान् ।अनाथनाथ ते करेण भेषजेन कालहाउदूषुणो वसो महे मृशस्व शूर राधसे ॥ ७३१२८॥

bhavādhibhīṣaṇajvareṇa pīḍitānmahāmayānaśeṣapātakālayānadūrakālalocanān |anāthanātha te kareṇa bheṣajena kālahāudūṣuṇo vaso mahe mṛśasva śūra rādhase || 73128||

जयेम येन सर्वमेतदिष्टमष्टदिग्गणंभुवः स्थलं दिवः स्थलं नभःस्थलं च तद्गतम् ।य एष सर्वदेव दानवप्रभुः सभापतिःस नो ददातु तं रयिं पुरुं पिशङ्गसन्दृशम् ॥ ७३१२९॥

jayema yena sarvametadiṣṭamaṣṭadiggaṇaṃbhuvaḥ sthalaṃ divaḥ sthalaṃ nabhaḥsthalaṃ ca tadgatam |ya eṣa sarvadeva dānavaprabhuḥ sabhāpatiḥsa no dadātu taṃ rayiṃ puruṃ piśaṅgasandṛśam || 73129||

नमो भवाय ते हराय भूतिभासितोरसेनमो भवाभिभूति भीतिसङ्गिने पिनाकिने ।नमः शिवाय विश्वपाय शाश्वताय हेलयेन यस्य हन्यते सखा न जीयते कदाचन ॥ ७३१३०॥

namo bhavāya te harāya bhūtibhāsitorasenamo bhavābhibhūti bhītisaṅgine pinākine |namaḥ śivāya viśvapāya śāśvatāya helayena yasya hanyate sakhā na jīyate kadācana || 73130||

सुरपतिपतये नमो नमः प्रजापतिपतये नमो नमः ।क्षितिपतिपतये नमो नमोऽम्बिकापतय उमापतये नमो नमः ॥ ७३१३१॥

surapatipataye namo namaḥ prajāpatipataye namo namaḥ |kṣitipatipataye namo namo'mbikāpataya umāpataye namo namaḥ || 73131||

विनायकं वन्दनमस्तकाहतस्वनाद्यसङ्घृष्टकिरीटमस्तकम् ।नमामि नित्यं प्रणतार्तिनाशनं कविं कवीनामुपमश्रवस्तमम् ॥ ७३१३२॥

vināyakaṃ vandanamastakāhatasvanādyasaṅghṛṣṭakirīṭamastakam |namāmi nityaṃ praṇatārtināśanaṃ kaviṃ kavīnāmupamaśravastamam || 73132||

देवा युद्धे यागे विप्रास्त्रेप्याह्वयं ध द्वयं विन्दन्ति स्कन्दम् ।वन्दे सुब्रह्मण्यों सुब्रह्मण्यों सुब्रह्मण्योम् ॥ ७३१३३॥

devā yuddhe yāge viprāstrepyāhvayaṃ dha dvayaṃ vindanti skandam |vande subrahmaṇyoṃ subrahmaṇyoṃ subrahmaṇyom || 73133||

नमः शिवायै जगदम्बिकायै शिवप्रियायै शिवविग्रहायै ।समुद्बभूवाद्रिपतेः सुता या चतुष्कपर्दा युवतिः सुपेशाः ॥ ७३१३४॥

namaḥ śivāyai jagadambikāyai śivapriyāyai śivavigrahāyai |samudbabhūvādripateḥ sutā yā catuṣkapardā yuvatiḥ supeśāḥ || 73134||

हिरण्यवर्णां मणिनूपुराङ्घ्रिं प्रसन्नवक्त्रां शुकपद्महस्ताम् ।विशालनेत्रां प्रणमामि गौरीं वचोविदं वाचमुदीरयन्तीम् ॥ ७३१३५॥

hiraṇyavarṇāṃ maṇinūpurāṅghriṃ prasannavaktrāṃ śukapadmahastām |viśālanetrāṃ praṇamāmi gaurīṃ vacovidaṃ vācamudīrayantīm || 73135||

नमामि मेनातनयाममेयामिमामुमां कान्तिमतीममेयाम् ।करोति या भूतिसितौ स्तनौ द्वौ प्रियं सखायं परिषस्वजाना ॥ ७३१३६॥

namāmi menātanayāmameyāmimāmumāṃ kāntimatīmameyām |karoti yā bhūtisitau stanau dvau priyaṃ sakhāyaṃ pariṣasvajānā || 73136||

कान्तामुमां कान्तनिभाङ्गकान्तिभान्तामुपात्तानतहर्यजेन्द्राम् ।नतोऽस्मि यास्ते गिरिशस्य पार्श्वे विश्वानि देवी भुवनानि चष्टे ॥ ७३१३७॥

kāntāmumāṃ kāntanibhāṅgakāntibhāntāmupāttānataharyajendrām |nato'smi yāste giriśasya pārśve viśvāni devī bhuvanāni caṣṭe || 73137||

वन्दे गौरीं तुङ्गपीनस्तनीं तां चन्द्राचूडां क्लिष्टसर्वाङ्गरागाम् ।यैषा दुःखिप्राणिनामात्मकान्तिं देवीं देवीं राधसे चादयन्तीम् ॥ ७३१३८॥

vande gaurīṃ tuṅgapīnastanīṃ tāṃ candrācūḍāṃ kliṣṭasarvāṅgarāgām |yaiṣā duḥkhiprāṇināmātmakāntiṃ devīṃ devīṃ rādhase cādayantīm || 73138||

एनां वन्दे दीनरक्षाविनोदां मेनाकन्यां मानदानन्ददात्रीम् ।या विद्यानां मङ्गलानां च वाचामेषा नेत्री राधसः सूनृतानाम् ॥ ७३१३९॥

enāṃ vande dīnarakṣāvinodāṃ menākanyāṃ mānadānandadātrīm |yā vidyānāṃ maṅgalānāṃ ca vācāmeṣā netrī rādhasaḥ sūnṛtānām || 73139||

संसारतापोरुभयापहन्त्रि भवानि भोज्याभरणैकभोगे ।धियं वरां देहि शिवे निरर्गलां ययाति विश्वादुरिता तरेम ॥ ७३१४०॥

saṃsāratāporubhayāpahantri bhavāni bhojyābharaṇaikabhoge |dhiyaṃ varāṃ dehi śive nirargalāṃ yayāti viśvāduritā tarema || 73140||

शिवे कथं त्वत्समता क्व दीयते जगत्कृतिः केलिरयं शिवः पतिः ।हरिस्तु दासोऽनुचरीन्दिरा शची सरस्वतीं वा सुभगा ददिर्वसु ॥ ७३१४१॥

śive kathaṃ tvatsamatā kva dīyate jagatkṛtiḥ kelirayaṃ śivaḥ patiḥ |haristu dāso'nucarīndirā śacī sarasvatīṃ vā subhagā dadirvasu || 73141||

वसुरुवाच ।इत्यनेन स्तवेनेशं स्तुत्वेत्थं स महामुनिः ।स्नेहाश्रुपूर्णनयनः प्रणनाम सभापतिम् ॥ ७३१४२॥

vasuruvāca |ityanena staveneśaṃ stutvetthaṃ sa mahāmuniḥ |snehāśrupūrṇanayanaḥ praṇanāma sabhāpatim || 73142||

मुहुर्मुहुः पिबन्नीशं ताण्डवामृतमङ्गलम् ।सर्वान्कामानवाप्यान्ते गाणपत्यमवाप ह ॥ ७३१४३॥

muhurmuhuḥ pibannīśaṃ tāṇḍavāmṛtamaṅgalam |sarvānkāmānavāpyānte gāṇapatyamavāpa ha || 73143||

इमं स्तवं जैमिनिना वचोदितं द्विजोत्तमो यः पठतीह भक्तितः ।तमिष्टवाक्सिद्धिमतिद्युतिश्रियः परिष्वजन्ते जनयो यथा पतिम् ॥ ७३१४४॥

imaṃ stavaṃ jaimininā vacoditaṃ dvijottamo yaḥ paṭhatīha bhaktitaḥ |tamiṣṭavāksiddhimatidyutiśriyaḥ pariṣvajante janayo yathā patim || 73144||

महीपतिर्यस्तु युयुत्सुरादरादमुं पठत्यस्य तथैव सादरात् ।प्रयान्ति शीघ्रं प्रमदान्तकान्तिकं भियं दधाना हृदयेषु शत्रवः ॥ ७३१४५॥

mahīpatiryastu yuyutsurādarādamuṃ paṭhatyasya tathaiva sādarāt |prayānti śīghraṃ pramadāntakāntikaṃ bhiyaṃ dadhānā hṛdayeṣu śatravaḥ || 73145||

त्रैवर्णिकेष्वन्यतमो य एनं नित्यं कदाचित्पठतीशभक्तितः ।कलेवरान्ते शिवपार्श्ववर्ती निरञ्जनः साम्यमुपैति दिव्यम् ॥ ७३१४६॥

traivarṇikeṣvanyatamo ya enaṃ nityaṃ kadācitpaṭhatīśabhaktitaḥ |kalevarānte śivapārśvavartī nirañjanaḥ sāmyamupaiti divyam || 73146||

लभन्ते पठन्तो मतिं बुद्धिकामा लभन्ते तथैव श्रियं पुष्टिकामाः ।लभन्ते हि धान्यं नरा धान्यकामा लभन्ते ह पुत्रान्नराः पुत्रकामाः ॥ ७३१४७॥

labhante paṭhanto matiṃ buddhikāmā labhante tathaiva śriyaṃ puṣṭikāmāḥ |labhante hi dhānyaṃ narā dhānyakāmā labhante ha putrānnarāḥ putrakāmāḥ || 73147||

पादं वाप्यर्द्धपादं वा श्लोकं श्लोकार्द्धमेव वा ।यस्तु धारयते नित्यं शिवलोकं स गच्छति ॥ ७३१४८॥

pādaṃ vāpyarddhapādaṃ vā ślokaṃ ślokārddhameva vā |yastu dhārayate nityaṃ śivalokaṃ sa gacchati || 73148||

यत्र नृत्तं शिवश्चक्रे ताण्डवं तत्स्थलं शुभे ।पुण्यात्पुण्यतरं तीर्थं तत्र स्नात्वा विमुच्यते ॥ ७३१४९॥

yatra nṛttaṃ śivaścakre tāṇḍavaṃ tatsthalaṃ śubhe |puṇyātpuṇyataraṃ tīrthaṃ tatra snātvā vimucyate || 73149||

यस्तत्र कुरुते श्राद्धं पितॄणां मनुजोत्तम ।पूर्वजान्स नयेत्स्वर्गं नात्र कार्या विचारणा ॥ ७३१५०॥

yastatra kurute śrāddhaṃ pitṝṇāṃ manujottama |pūrvajānsa nayetsvargaṃ nātra kāryā vicāraṇā || 73150||

गां सुवर्णं धरां शय्यां वस्त्रमातपवारणम् ।पानमन्नं द्विजे दद्यात्तत्र तत्सर्वमक्षयम् ॥ ७३१५१॥

gāṃ suvarṇaṃ dharāṃ śayyāṃ vastramātapavāraṇam |pānamannaṃ dvije dadyāttatra tatsarvamakṣayam || 73151||

एतदाख्यानकं पुण्यं पुण्डरीकपुरोद्भवम् ।शृणुयाच्छ्रावयेद्वापि सोऽपि रुद्रप्रियो भवेत् ॥ ७३१५२॥

etadākhyānakaṃ puṇyaṃ puṇḍarīkapurodbhavam |śṛṇuyācchrāvayedvāpi so'pi rudrapriyo bhavet || 73152||

इति श्रीबृहन्नारदीयपुराणे बृहदुपाख्याने उत्तरभागे वसुमोहिनी संवादेत्र्यम्बकेश्वरमाहात्म्ये वेदपादस्तवो नाम त्रिसप्ततितमोऽध्यायः ॥ ७३॥

iti śrībṛhannāradīyapurāṇe bṛhadupākhyāne uttarabhāge vasumohinī saṃvādetryambakeśvaramāhātmye vedapādastavo nāma trisaptatitamo'dhyāyaḥ || 73||

बृहन्नारदीयपुराण । उत्तरभाग । अध्याय ७३/२९१४८॥बृहन्नारदीयपुराण । उत्तरभाग । अध्याय ७३/२९-१४८॥

bṛhannāradīyapurāṇa | uttarabhāga | adhyāya 73/29148||bṛhannāradīyapurāṇa | uttarabhāga | adhyāya 73/29-148||