जम्बुनाथाष्टकम् १ Jambunathashtakam

। श्री श्रीधरवेङ्कटेशार्येण विरचितम् ।कश्चन जगतां हेतुः कपर्दकन्दलितकुमुदजीवातुः ।जयति ज्ञानमहीन्दुर्जन्ममृतिक्लान्तिहरदयाबिन्दुः ॥ १॥

| śrī śrīdharaveṅkaṭeśāryeṇa viracitam |kaścana jagatāṃ hetuḥ kapardakandalitakumudajīvātuḥ |jayati jñānamahīndurjanmamṛtiklāntiharadayābinduḥ || 1||

श्रितभृतिबद्धपताकः कलितोत्पलवननवमदोद्रेकः ।अखिलाण्डमातुरेकः सुखयत्वस्मांस्तपःपरीपाकः ॥ २॥

śritabhṛtibaddhapatākaḥ kalitotpalavananavamadodrekaḥ |akhilāṇḍamāturekaḥ sukhayatvasmāṃstapaḥparīpākaḥ || 2||

कश्चन कारुण्यझरः कमलाकुचकलशकषणनिशितशरः ।श्रीमान् दमितत्रिपुरः श्रितजम्बूपरिसरश्चकास्तु पुरः ॥ ३॥

kaścana kāruṇyajharaḥ kamalākucakalaśakaṣaṇaniśitaśaraḥ |śrīmān damitatripuraḥ śritajambūparisaraścakāstu puraḥ || 3||

शमितस्मरदवविसरः शक्राद्याशास्यसेवनावसरः ।करिवनघनभाग्यभरो गिरतु मलं मम मनस्सरःशफरः ॥ ४॥

śamitasmaradavavisaraḥ śakrādyāśāsyasevanāvasaraḥ |karivanaghanabhāgyabharo giratu malaṃ mama manassaraḥśapharaḥ || 4||

गृहिणीकृतवैकुण्ठं गेहितजम्बूमहीरुडुपकण्ठम् ।दिव्यं किमप्यकुण्ठं तेजः स्तादस्मदवनसोत्कण्ठम् ॥ ५॥

gṛhiṇīkṛtavaikuṇṭhaṃ gehitajambūmahīruḍupakaṇṭham |divyaṃ kimapyakuṇṭhaṃ tejaḥ stādasmadavanasotkaṇṭham || 5||

कृतशमनदर्पहरणं कृतकेतरफणितिचारिरथचरणम् ।शक्रादिश्रितचरणं शरणं जम्बूद्रुमान्तिकाभरणम् ॥ ६॥

kṛtaśamanadarpaharaṇaṃ kṛtaketaraphaṇiticārirathacaraṇam |śakrādiśritacaraṇaṃ śaraṇaṃ jambūdrumāntikābharaṇam || 6||

करुणारसवारिधये करवाणि नमः प्रणम्रसुरविधये ।जगदानन्दधुनिधये जम्बूतरुमूलनिलयसन्निधये ॥ ७॥

karuṇārasavāridhaye karavāṇi namaḥ praṇamrasuravidhaye |jagadānandadhunidhaye jambūtarumūlanilayasannidhaye || 7||

कश्चन शशिचूडालं कण्ठेकालं दयौघमुत्कूलम् ।श्रितजम्बूतरुमूलं शिक्षितकालं भजे जगन्मूलम् ॥ ८॥

kaścana śaśicūḍālaṃ kaṇṭhekālaṃ dayaughamutkūlam |śritajambūtarumūlaṃ śikṣitakālaṃ bhaje jaganmūlam || 8||

॥ इति जम्बुनाथाष्टकं सम्पूर्णम् ॥

|| iti jambunāthāṣṭakaṃ sampūrṇam ||