शिवस्तोत्रम् (जैगीषव्यकृतं स्कन्दपुराणान्तर्गतम् नमः शिवाय शान्ताय सर्वज्ञाय शुभात्मने) Jaigishavyakritam Shiva Stotram

जैगीषव्य उवाच ।नमः शिवाय शान्ताय सर्वज्ञाय शुभात्मने ।जगदानन्दकन्दाय परमानन्दहेतवे ॥ ३२॥

jaigīṣavya uvāca |namaḥ śivāya śāntāya sarvajñāya śubhātmane |jagadānandakandāya paramānandahetave || 32||

अरूपाय सरूपाय नानारूपधराय च ।विरूपाक्षाय विधये विधिविष्णुस्तुताय च ॥ ३३॥

arūpāya sarūpāya nānārūpadharāya ca |virūpākṣāya vidhaye vidhiviṣṇustutāya ca || 33||

स्थावराय नमस्तुभ्यं जङ्गमाय नमोऽस्तुते ।सर्वात्मने नमस्तुभ्यं नमस्ते परमात्मने ॥ ३४॥

sthāvarāya namastubhyaṃ jaṅgamāya namo'stute |sarvātmane namastubhyaṃ namaste paramātmane || 34||

नमस्त्रैलोक्यकाम्याय कामाङ्गदहनाय च ।नमो शेषविशेषाय नमः शेषाङ्गदाय ते ॥ ३५॥

namastrailokyakāmyāya kāmāṅgadahanāya ca |namo śeṣaviśeṣāya namaḥ śeṣāṅgadāya te || 35||

श्रीकण्ठाय नमस्तुभ्यं विषकण्ठाय ते नमः ।वैकुण्ठवन्द्यपादाय नमोऽकुण्ठितशक्तये ॥ ३६॥

śrīkaṇṭhāya namastubhyaṃ viṣakaṇṭhāya te namaḥ |vaikuṇṭhavandyapādāya namo'kuṇṭhitaśaktaye || 36||

नमः शक्त्यर्धदेहाय विदेहाय सुदेहिने ।सकृत्प्रणाममात्रेण देहिदेहनिवारिणे ॥ ३७॥

namaḥ śaktyardhadehāya videhāya sudehine |sakṛtpraṇāmamātreṇa dehidehanivāriṇe || 37||

कालाय कालकालाय कालकूटविषादिने ।व्यालयज्ञोपवीताय व्यालभूषणधारिणे ॥ ३८॥

kālāya kālakālāya kālakūṭaviṣādine |vyālayajñopavītāya vyālabhūṣaṇadhāriṇe || 38||

नमस्ते खण्डपरशो नमः खण्डेन्दुधारिणे ।खण्डिताशेष दुःखाय खड्गखेटकधारिणे ॥ ३९॥

namaste khaṇḍaparaśo namaḥ khaṇḍendudhāriṇe |khaṇḍitāśeṣa duḥkhāya khaḍgakheṭakadhāriṇe || 39||

गीर्वाणगीतनाथाय गङ्गाकल्लोलमालिने ।गौरीशाय गिरीशाय गिरिशाय गुहारणे ॥ २\।६३\।४०॥चन्द्रार्धशुद्धभूषाय चन्द्रसूर्याग्निचक्षुषे ।नमस्ते चर्मवसन नमो दिग्वसनाय ते ॥ ४१॥

gīrvāṇagītanāthāya gaṅgākallolamāline |gaurīśāya girīśāya giriśāya guhāraṇe || 2\|63\|40||candrārdhaśuddhabhūṣāya candrasūryāgnicakṣuṣe |namaste carmavasana namo digvasanāya te || 41||

जगदीशाय जीर्णाय जराजन्महराय ते ।जीवाय ते नमस्तुभ्यं जञ्जपूकादिहारिणे ॥ ४२॥

jagadīśāya jīrṇāya jarājanmaharāya te |jīvāya te namastubhyaṃ jañjapūkādihāriṇe || 42||

नमो डमरुहस्ताय धनुर्हस्ताय ते नमः ।त्रिनेत्राय नमस्तुभ्यं जगन्नेत्राय ते नमः ॥ ४३॥

namo ḍamaruhastāya dhanurhastāya te namaḥ |trinetrāya namastubhyaṃ jagannetrāya te namaḥ || 43||

त्रिशूलव्यग्रहस्ताय नमस्त्रिपथगाधर ।त्रिविष्टपाधिनाथाय त्रिवेदीपठिताय च ॥ ४४॥

triśūlavyagrahastāya namastripathagādhara |triviṣṭapādhināthāya trivedīpaṭhitāya ca || 44||

त्रयीमयाय तुष्टाय भक्ततुष्टिप्रदाय च ।दीक्षिताय नमस्तुभ्यं देवदेवाय ते नमः ॥ ४५॥

trayīmayāya tuṣṭāya bhaktatuṣṭipradāya ca |dīkṣitāya namastubhyaṃ devadevāya te namaḥ || 45||

दारिताशेषपापाय नमस्ते दीर्घदर्शिने ।दूराय दुरवाप्याय दोषनिर्दलनाय च ॥ ४६॥

dāritāśeṣapāpāya namaste dīrghadarśine |dūrāya duravāpyāya doṣanirdalanāya ca || 46||

दोषाकरकलाधार त्यक्तदोषागमाय च ।नमो धूर्जटये तुभ्यं धत्तूरकुसुमप्रिय ॥ ४७॥

doṣākarakalādhāra tyaktadoṣāgamāya ca |namo dhūrjaṭaye tubhyaṃ dhattūrakusumapriya || 47||

नमो धीराय धर्माय धर्मपालाय ते नमः ।नीलग्रीव नमस्तुभ्यं नमस्ते नीललोहित ॥ ४८॥

namo dhīrāya dharmāya dharmapālāya te namaḥ |nīlagrīva namastubhyaṃ namaste nīlalohita || 48||

नाममात्रस्मृतिकृतां त्रैलोक्यैश्वर्यपूरक ।नमः प्रमथनाथाय पिनाकोद्यतपाणये ॥ ४९॥

nāmamātrasmṛtikṛtāṃ trailokyaiśvaryapūraka |namaḥ pramathanāthāya pinākodyatapāṇaye || 49||

पशुपाशविमोक्षाय पशूनां पतये नमः ।नामोच्चारणमात्रेण महापातकहारिणे ॥ २\।६३\।५०॥परात्पराय पाराय परापरपराय च ।नमोऽपारचरित्राय सुपवित्रकथाय च ॥ ५१॥

paśupāśavimokṣāya paśūnāṃ pataye namaḥ |nāmoccāraṇamātreṇa mahāpātakahāriṇe || 2\|63\|50||parātparāya pārāya parāparaparāya ca |namo'pāracaritrāya supavitrakathāya ca || 51||

वामदेवाय वामार्धधारिणे वृषगामिने ।नमो भर्गाय भीमाय नतभीतिहराय च ॥ ५२॥

vāmadevāya vāmārdhadhāriṇe vṛṣagāmine |namo bhargāya bhīmāya natabhītiharāya ca || 52||

भवाय भवनाशाय भूतानां पतये नमः ।महादेव नमस्तुभ्यं महेश महसां पते ॥ ५३॥

bhavāya bhavanāśāya bhūtānāṃ pataye namaḥ |mahādeva namastubhyaṃ maheśa mahasāṃ pate || 53||

नमो मृडानीपतये नमो मृत्युञ्जयाय ते ।यज्ञारये नमस्तुभ्यं यक्षराजप्रियाय च ॥ ५४॥

namo mṛḍānīpataye namo mṛtyuñjayāya te |yajñāraye namastubhyaṃ yakṣarājapriyāya ca || 54||

यायजूकाय यज्ञाय यज्ञानां फलदायिने ।रुद्राय रुद्रपतये कद्रुद्राय रमाय च ॥ ५५॥

yāyajūkāya yajñāya yajñānāṃ phaladāyine |rudrāya rudrapataye kadrudrāya ramāya ca || 55||

शूलिने शाश्वतेशाय श्मशानावनिचारिणे ।शिवाप्रियाय शर्वाय सर्वज्ञाय नमोऽस्तु ते ॥ ५६॥

śūline śāśvateśāya śmaśānāvanicāriṇe |śivāpriyāya śarvāya sarvajñāya namo'stu te || 56||

हराय क्षान्तिरूपाय क्षेत्रज्ञाय क्षमाकर ।क्षमाय क्षितिहर्त्रे च क्षीरगौराय ते नमः ॥ ५७॥

harāya kṣāntirūpāya kṣetrajñāya kṣamākara |kṣamāya kṣitihartre ca kṣīragaurāya te namaḥ || 57||

अन्धकारे नमस्तुभ्यमाद्यन्तरहिताय च ।इडाधाराय ईशाय उपेद्रेन्द्रस्तुताय च ॥ ५८॥

andhakāre namastubhyamādyantarahitāya ca |iḍādhārāya īśāya upedrendrastutāya ca || 58||

उमाकान्ताय उग्राय नमस्ते ऊर्ध्वरेतसे ।एकरूपाय चैकाय महदैश्वर्यरूपिणे ॥ ५९॥

umākāntāya ugrāya namaste ūrdhvaretase |ekarūpāya caikāya mahadaiśvaryarūpiṇe || 59||

अनन्तकारिणे तुभ्यमम्बिकापतये नमः ।त्वमोङ्कारो वषट्कारो भूर्भुवःस्वस्त्वमेव हि ॥ २\।६३\।६०॥दृश्यादृश्यं यदत्रास्ति तत्सर्वं त्वमु माधव ।स्तुतिं कर्तुं न जानामि स्तुतिकर्ता त्वमेव हि ॥ ६१॥

anantakāriṇe tubhyamambikāpataye namaḥ |tvamoṅkāro vaṣaṭkāro bhūrbhuvaḥsvastvameva hi || 2\|63\|60||dṛśyādṛśyaṃ yadatrāsti tatsarvaṃ tvamu mādhava |stutiṃ kartuṃ na jānāmi stutikartā tvameva hi || 61||

वाच्यस्त्वं वाचकस्त्वं हि वाक्च त्वं प्रणतोऽस्मि ते ।नान्यं वेद्मि महादेव नान्यं स्तौमि महेश्वर ॥ ६२॥

vācyastvaṃ vācakastvaṃ hi vākca tvaṃ praṇato'smi te |nānyaṃ vedmi mahādeva nānyaṃ staumi maheśvara || 62||

नान्यं नमामि गौरीश नान्याख्यामाददे शिव ।मूकोऽन्यनामग्रहणे बधिरोऽन्यकथाश्रुतौ ॥ ६३॥

nānyaṃ namāmi gaurīśa nānyākhyāmādade śiva |mūko'nyanāmagrahaṇe badhiro'nyakathāśrutau || 63||

पङ्गुरन्याभिगमनेऽस्म्यन्धोऽन्यपरिवीक्षणे ।एक एव भवानीश एककर्ता त्वमेव हि ॥ ६४॥

paṅguranyābhigamane'smyandho'nyaparivīkṣaṇe |eka eva bhavānīśa ekakartā tvameva hi || 64||

पाता हर्ता त्वमेवैको नानात्वं मूढकल्पना ।अतस्त्वमेव शरणं भूयोभूयः पुनःपुनः ॥ ६५॥

pātā hartā tvamevaiko nānātvaṃ mūḍhakalpanā |atastvameva śaraṇaṃ bhūyobhūyaḥ punaḥpunaḥ || 65||

संसारसागरे मग्नं मामुद्धर महेश्वर ।इति स्तुत्वा महेशानं जैगीषव्यो महामुनिः ॥ ६६॥

saṃsārasāgare magnaṃ māmuddhara maheśvara |iti stutvā maheśānaṃ jaigīṣavyo mahāmuniḥ || 66||

वाचं यमो भवत्स्थाणोः पुरतः स्थाणुसन्निभः ॥इति श्रीस्कादपुराणे काशीखण्डे पूर्वार्द्धे त्रिषष्टितमा ध्यायान्तर्गतंजैगीषव्यकृतं शिवस्तोत्रं समाप्तम् ।स्कन्दपुराण । काशीखण्ड । उत्तरखण्ड । अध्याय ६३/३२६५॥स्कन्दपुराण । काशीखण्ड । उत्तरखण्ड । अध्याय ६३/३२-६५॥

vācaṃ yamo bhavatsthāṇoḥ purataḥ sthāṇusannibhaḥ ||iti śrīskādapurāṇe kāśīkhaṇḍe pūrvārddhe triṣaṣṭitamā dhyāyāntargataṃjaigīṣavyakṛtaṃ śivastotraṃ samāptam |skandapurāṇa | kāśīkhaṇḍa | uttarakhaṇḍa | adhyāya 63/3265||skandapurāṇa | kāśīkhaṇḍa | uttarakhaṇḍa | adhyāya 63/32-65||