रेणुकास्तवराजस्तोत्रम् Renuka Stavaraj Stotram Kaularnava

श्री गणेशाय नमः ।

śrī gaṇeśāya namaḥ |

सदाशिवं नमस्कृत्य उमां दुर्गां गणेश्वरम् ।वक्ष्यामि रेणुकास्तोत्रं भुक्तिमुक्तिफलप्रदम् ।

sadāśivaṃ namaskṛtya umāṃ durgāṃ gaṇeśvaram |vakṣyāmi reṇukāstotraṃ bhuktimuktiphalapradam |

गुप्तप्रकटसिद्धानां योगिनी चक्रपादुकाम् ।नमामि शिरसा नाथं काल कौलेश्वरं प्रभुम् ॥

guptaprakaṭasiddhānāṃ yoginī cakrapādukām |namāmi śirasā nāthaṃ kāla kauleśvaraṃ prabhum ||

आनन्दपीठमध्यस्थमानन्दपरवेष्टितम् ।प्रणम्य च कुलानन्दं ज्ञानानन्दप्रकाशकम् ॥

ānandapīṭhamadhyasthamānandaparaveṣṭitam |praṇamya ca kulānandaṃ jñānānandaprakāśakam ||

अक्षरं क्षरमाद्यन्तं प्रकृतिं पुरुषं परम् ।तं वन्दे सच्चिदानन्दमेकवीरं सशाम्भवम् ॥

akṣaraṃ kṣaramādyantaṃ prakṛtiṃ puruṣaṃ param |taṃ vande saccidānandamekavīraṃ saśāmbhavam ||

सिंहपर्वतमासीनं देवदेवेश्वरोत्तमम् ।तत्रस्थञ्च सुरवासिनमात्रेयं ब्रह्मवादिनम् ॥

siṃhaparvatamāsīnaṃ devadeveśvarottamam |tatrasthañca suravāsinamātreyaṃ brahmavādinam ||

अनुसूया वरं प्राप्तं पुत्रस्नेहेन वत्सलाम् ।यत्र योगीश्वरो विष्णुः सम्भविष्यत्वयोनिजाम् ॥

anusūyā varaṃ prāptaṃ putrasnehena vatsalām |yatra yogīśvaro viṣṇuḥ sambhaviṣyatvayonijām ||

नानाभोगसमाकीर्णं क्रीडते प्रमदादिभिः ।मदिरानन्दचैतन्यं ज्ञानानन्दप्रबोधकम् ॥

nānābhogasamākīrṇaṃ krīḍate pramadādibhiḥ |madirānandacaitanyaṃ jñānānandaprabodhakam ||

जमदग्नेस्तु या भार्या रेणुका नाम विश्रुता ।राममातेति विख्याता त्रिषु लोकेषु विस्तृता ॥

jamadagnestu yā bhāryā reṇukā nāma viśrutā |rāmamāteti vikhyātā triṣu lokeṣu vistṛtā ||

दत्तात्रयो महात्माऽसौ नागपिङ्गलपूर्वकम् ।रेणुकायाः विनिक्षिप्तं सद्भावं बीजमुत्तमम् ॥

dattātrayo mahātmā'sau nāgapiṅgalapūrvakam |reṇukāyāḥ vinikṣiptaṃ sadbhāvaṃ bījamuttamam ||

माया बीजेन संयुक्तं महापीठोद्भवं शुभम् ।तत्रस्था शाम्भवी शक्तिः सोमया च कुलान्वया ॥

māyā bījena saṃyuktaṃ mahāpīṭhodbhavaṃ śubham |tatrasthā śāmbhavī śaktiḥ somayā ca kulānvayā ||

कुलाकुलविभागेन वामदक्षिणसञ्ज्ञकम् ।सन्तानं त्रिः प्रकारं चतुः सिंहासने सदा ॥

kulākulavibhāgena vāmadakṣiṇasañjñakam |santānaṃ triḥ prakāraṃ catuḥ siṃhāsane sadā ||

क्रमपीठेः सदा युक्तं द्वीपद्वीपान्तरे स्थितम् ।पञ्चाशद्वर्णभेदेन मन्त्रयन्त्राणि वै स्थितम् ॥

kramapīṭheḥ sadā yuktaṃ dvīpadvīpāntare sthitam |pañcāśadvarṇabhedena mantrayantrāṇi vai sthitam ||

चतुष्कं पञ्चकं षट्कं चतुष्कं पञ्चकन्त्रिकम् ।वषट्कारः समुत्पन्नः कौमार्या बटुकाद्वयः ॥

catuṣkaṃ pañcakaṃ ṣaṭkaṃ catuṣkaṃ pañcakantrikam |vaṣaṭkāraḥ samutpannaḥ kaumāryā baṭukādvayaḥ ||

षड्भिः चक्रैस्तु वै देव्याः श्रीकण्ठाद्याश्चैव भैरवाः ।श्रिया क्रमेण संयुक्ता चतुःषष्ठ्यास्तु देवताः ॥

ṣaḍbhiḥ cakraistu vai devyāḥ śrīkaṇṭhādyāścaiva bhairavāḥ |śriyā krameṇa saṃyuktā catuḥṣaṣṭhyāstu devatāḥ ||

ब्राह्मी माहेश्वरी चैव कौमारी वैष्णवी तथा ।वाराही च तथेन्द्राणी चामुण्डा च शिवोद्भवा ॥

brāhmī māheśvarī caiva kaumārī vaiṣṇavī tathā |vārāhī ca tathendrāṇī cāmuṇḍā ca śivodbhavā ||

प्रयोगे वारुणं कौलं आदावाह्य जयन्तिका ।चरत्रिकं प्रतञ्चैव देवी कोष्ठेन चाष्टधा ॥

prayoge vāruṇaṃ kaulaṃ ādāvāhya jayantikā |caratrikaṃ pratañcaiva devī koṣṭhena cāṣṭadhā ||

माहेन्द्री च तथाग्नेयी याम्यां नैरृत्य वारुणी ।वायव्यां हि च कौवेरी ईशान्यां दिव्ययोगिनी ॥

māhendrī ca tathāgneyī yāmyāṃ nairṛtya vāruṇī |vāyavyāṃ hi ca kauverī īśānyāṃ divyayoginī ||

उड्यायनी जलन्धरी कामरूपा च या स्थिता ।कौलार्णवे स्थिता या च मन्त्रे चक्रे तु या स्थिता ॥

uḍyāyanī jalandharī kāmarūpā ca yā sthitā |kaulārṇave sthitā yā ca mantre cakre tu yā sthitā ||

प्रसन्ना प्रकटा चैव सहजा कुलजादयः ।क्षेत्रपालाश्च दिक्पाला वेतालाश्चैव राक्षसाः ॥

prasannā prakaṭā caiva sahajā kulajādayaḥ |kṣetrapālāśca dikpālā vetālāścaiva rākṣasāḥ ||

पिशाचा गणगन्धर्वा शाकिनी डाकिनी तथा ।ख़ेचरा भूचराश्चैव पातालाश्चान्तरिक्षगाः ॥

piśācā gaṇagandharvā śākinī ḍākinī tathā |ख़ecarā bhūcarāścaiva pātālāścāntarikṣagāḥ ||

नानारूपधरा सर्वे बलिपूजाभिकाङ्क्षिणः ।अधिकारस्वरूपेण विचरन्ति महीतले ॥

nānārūpadharā sarve balipūjābhikāṅkṣiṇaḥ |adhikārasvarūpeṇa vicaranti mahītale ||

क्रीडते योगिनी वृन्दं क्षेत्रमातृगृहे स्थितम् ।केचिद् गायन्ति नृत्यन्ति पूजयन्ति स्तुवन्ति च ॥

krīḍate yoginī vṛndaṃ kṣetramātṛgṛhe sthitam |kecid gāyanti nṛtyanti pūjayanti stuvanti ca ||

हसन्ति किलकिलायन्ति गर्जयन्ति महाबलाः ।मातृपादोद्भवा सर्वे मातृमण्डलसंस्थिता ॥

hasanti kilakilāyanti garjayanti mahābalāḥ |mātṛpādodbhavā sarve mātṛmaṇḍalasaṃsthitā ||

तन्मध्ये शाम्भवी शक्तिर्रेणुका सुरपूजिता ।श्रावण्यश्चैव शाक्तेयमष्टव्या शाम्भवीपदम् ॥

tanmadhye śāmbhavī śaktirreṇukā surapūjitā |śrāvaṇyaścaiva śākteyamaṣṭavyā śāmbhavīpadam ||

तेन सा शाम्भवी प्रोक्ता हकाराद्धि कलास्मृता ।ब्रह्मा विष्णुश्च रुद्रश्च ईश्वरः शिव एव च ॥

tena sā śāmbhavī proktā hakārāddhi kalāsmṛtā |brahmā viṣṇuśca rudraśca īśvaraḥ śiva eva ca ||

मालाबीजसमुत्पन्ना सा शक्तिर्रेणुका मता ।नमोऽस्तु ते महादेवि महामाये नमोऽस्तु ते ॥

mālābījasamutpannā sā śaktirreṇukā matā |namo'stu te mahādevi mahāmāye namo'stu te ||

नमोऽस्तु ते वीरभद्रे वीरमात्रे नमोऽस्तु ते ।राममात्रे नमस्तुभ्यं त्रिषु लोकेषु पूजिता ॥

namo'stu te vīrabhadre vīramātre namo'stu te |rāmamātre namastubhyaṃ triṣu lokeṣu pūjitā ||

नमोऽस्तु कुलकौलेशि नमोऽस्तु ज्ञानभैरवि ।नमोऽस्तु ज्ञानगे सर्वे सर्वेश्वरि नमोऽस्तु ते ॥

namo'stu kulakauleśi namo'stu jñānabhairavi |namo'stu jñānage sarve sarveśvari namo'stu te ||

रामेश्वरि नमस्तुभ्यं कामेश्वरि नमोऽस्तु ते ।भद्रकालि नमस्तुभ्यं कामेश्वरि नमोऽस्तु ते ॥

rāmeśvari namastubhyaṃ kāmeśvari namo'stu te |bhadrakāli namastubhyaṃ kāmeśvari namo'stu te ||

जमदग्निप्रिये शुभ्रे रेणुके त्वां नमोऽस्तु ते ।चैतन्यविग्रहे नित्ये व्यापके त्वां नमोऽस्तु ॥

jamadagnipriye śubhre reṇuke tvāṃ namo'stu te |caitanyavigrahe nitye vyāpake tvāṃ namo'stu ||

त्रैलोक्यव्यापिनी देवी विष्णुमाये नमोऽस्तु ते ।शङ्करप्रेमपात्रत्वं पार्वति त्वां नमोऽस्तु ते ॥

trailokyavyāpinī devī viṣṇumāye namo'stu te |śaṅkarapremapātratvaṃ pārvati tvāṃ namo'stu te ||

हरकायार्द्धवासित्वं शङ्करि त्वां नमोऽस्तु ते ।भक्तिप्रिये महाशुभ्रे मालिनि त्वां नमोऽस्तु ते ॥

harakāyārddhavāsitvaṃ śaṅkari tvāṃ namo'stu te |bhaktipriye mahāśubhre mālini tvāṃ namo'stu te ||

पञ्चमुद्रे महामुद्रे भूतपञ्चकमुद्रिते ।महामुद्रात्मिके शान्ते रेणुकायै नमोऽस्तु ते ॥

pañcamudre mahāmudre bhūtapañcakamudrite |mahāmudrātmike śānte reṇukāyai namo'stu te ||

सद्भावबीजमुत्पन्नं भावेन तव संस्थितम् ।स्वात्मभावात्मजात्मस्था रेणुकायै नमोऽस्तु ॥

sadbhāvabījamutpannaṃ bhāvena tava saṃsthitam |svātmabhāvātmajātmasthā reṇukāyai namo'stu ||

स्वच्छन्दविहरिणी शक्तिः स्वच्छन्देन च संस्थिता ।स्वच्छन्दोन्मत्तमातङ्गी रेणुकायै नमोऽस्तु ते ॥

svacchandavihariṇī śaktiḥ svacchandena ca saṃsthitā |svacchandonmattamātaṅgī reṇukāyai namo'stu te ||

प्रमत्ते मदिरानन्दे मदिरानन्दविग्रहे ।चिद्रुपे परमानन्दे रेणुकायै नमोऽस्तु ते ॥

pramatte madirānande madirānandavigrahe |cidrupe paramānande reṇukāyai namo'stu te ||

जगद्बीजे जगद्रूपे जगद्भूते जगन्मये ।जगन्माते जगन्मातः रेणुकायै नमोऽस्तु ते ॥

jagadbīje jagadrūpe jagadbhūte jaganmaye |jaganmāte jaganmātaḥ reṇukāyai namo'stu te ||

वैष्णवी विष्णुमाया त्वं मोहितं सचराचरम् ।वाञ्छितार्थप्रदादेवि तां वन्दे रेणुकामहम् ॥

vaiṣṇavī viṣṇumāyā tvaṃ mohitaṃ sacarācaram |vāñchitārthapradādevi tāṃ vande reṇukāmaham ||

स्वच्छन्दभैरवीचण्डे मातङ्गी मत्तरूपिणी ।योगिनीवृन्दमध्यस्थे एकवीरे नमोऽस्तु ते ॥

svacchandabhairavīcaṇḍe mātaṅgī mattarūpiṇī |yoginīvṛndamadhyasthe ekavīre namo'stu te ||

ब्रह्मवैकुण्ठरुद्राद्या मुनीन्द्राः सिद्धकिन्नराः ।त्वत्पदं पूजयन्तीह मातृपीठे नमोऽस्तु ॥

brahmavaikuṇṭharudrādyā munīndrāḥ siddhakinnarāḥ |tvatpadaṃ pūjayantīha mātṛpīṭhe namo'stu ||

त्वं परा त्वं च पश्यन्ती मध्यमा त्वं च वैखरी ।ऋग्यजुः सामाथर्वाणि शब्दब्रह्मात्मिके नमः ॥

tvaṃ parā tvaṃ ca paśyantī madhyamā tvaṃ ca vaikharī |ṛgyajuḥ sāmātharvāṇi śabdabrahmātmike namaḥ ||

यज्ञविद्या त्रिसन्ध्या त्वं वेदगर्भा सुरेश्वरि ।गङ्गा गया च गायत्री मातापुरनिवासिनी ॥

yajñavidyā trisandhyā tvaṃ vedagarbhā sureśvari |gaṅgā gayā ca gāyatrī mātāpuranivāsinī ||

त्वं स्वाहा त्वं स्वधा चैव पञ्चयज्ञमहामख़े ।यस्य जाति द्विजेन्द्राणां मातृलिङ्गमहेश्वरि ॥

tvaṃ svāhā tvaṃ svadhā caiva pañcayajñamahāmaख़e |yasya jāti dvijendrāṇāṃ mātṛliṅgamaheśvari ||

त्वं च काली महाकाली महालक्ष्मी सरस्वती ।त्रिपुरा त्वरिता त्वं च रेणुकायै नमोऽस्तु ते ॥

tvaṃ ca kālī mahākālī mahālakṣmī sarasvatī |tripurā tvaritā tvaṃ ca reṇukāyai namo'stu te ||

कपालिनी कालिकात्वं भैरवी त्वं चाम्बिका ।माहेन्द्री त्वं विशालाक्षी रेणुकायै नमोऽस्तु ते ॥

kapālinī kālikātvaṃ bhairavī tvaṃ cāmbikā |māhendrī tvaṃ viśālākṣī reṇukāyai namo'stu te ||

क्षेत्रजा पीठजा त्वं च मन्त्रजा त्वं कलाम्बिके ।प्रसन्ना प्रकटा त्वं च सहजा त्वं च रेणुके ॥

kṣetrajā pīṭhajā tvaṃ ca mantrajā tvaṃ kalāmbike |prasannā prakaṭā tvaṃ ca sahajā tvaṃ ca reṇuke ||

वामे ज्येष्ठे च रौद्रे च मालिनी मन्त्रयोगिनी ।वेद सिद्धान्तयानित्यं तां वन्दे रेणुकामहम् ॥

vāme jyeṣṭhe ca raudre ca mālinī mantrayoginī |veda siddhāntayānityaṃ tāṃ vande reṇukāmaham ||

सुरज्येष्ठे सुरानन्दे सर्वदेवमयी शिवे ।सच्चिदानन्दचिद्रूपे विश्वेश्वरि नमोऽस्तु ते ॥

surajyeṣṭhe surānande sarvadevamayī śive |saccidānandacidrūpe viśveśvari namo'stu te ||

पीठक्षेत्रे श्मशाने च क्रीडते वृन्दभैरवी ।चत्वारि योगिनी वृन्दे रेणुकायै नमोऽस्तु ते ॥

pīṭhakṣetre śmaśāne ca krīḍate vṛndabhairavī |catvāri yoginī vṛnde reṇukāyai namo'stu te ||

चतुःषष्ठिस्तु योगिन्याः सिद्धसङ्घट्टमेलके ।मातृमण्डलमध्यस्थे रेणुकायै नमोऽस्तु ते ॥

catuḥṣaṣṭhistu yoginyāḥ siddhasaṅghaṭṭamelake |mātṛmaṇḍalamadhyasthe reṇukāyai namo'stu te ||

मन्त्रयन्त्रकुलाद्ये तु कुलकौलेश्वरि शिवे ।ज्ञानानन्दसुरापूर्णे रेणुकायै नमोऽस्तु ते ॥

mantrayantrakulādye tu kulakauleśvari śive |jñānānandasurāpūrṇe reṇukāyai namo'stu te ||

चतुरष्टकपीठा त्वं माया सा चण्डिका मता ।बिन्दुनादकलाज्योतिः शिवशक्तिः सुशाम्भवी ॥

caturaṣṭakapīṭhā tvaṃ māyā sā caṇḍikā matā |bindunādakalājyotiḥ śivaśaktiḥ suśāmbhavī ||

पञ्चबीजसमायुक्ता पञ्चप्रणवसम्भवा ।उकारविग्रहा शक्तिः समया चञ्चलाम्बिका ॥

pañcabījasamāyuktā pañcapraṇavasambhavā |ukāravigrahā śaktiḥ samayā cañcalāmbikā ||

कौलान्वयसमुद्भूते कौलिकान्वयपूजिते ।भारती चैकवीरा त्वं कुलकौलान्तरालिनी ॥

kaulānvayasamudbhūte kaulikānvayapūjite |bhāratī caikavīrā tvaṃ kulakaulāntarālinī ||

राजराजेश्वरी त्वं च सिंहे चण्डेश्वरी मते ।स्वच्छन्दा श्रीभवा प्रोक्ता सा शक्तिर्मातृमण्डले ॥

rājarājeśvarī tvaṃ ca siṃhe caṇḍeśvarī mate |svacchandā śrībhavā proktā sā śaktirmātṛmaṇḍale ||

आदि सूत्रक्रमैर्युक्तं मध्यसूत्रं तथैव च ।संवर्त्तमण्डलान्तस्थे वीरमात्रे नमोऽस्तु ते ॥

ādi sūtrakramairyuktaṃ madhyasūtraṃ tathaiva ca |saṃvarttamaṇḍalāntasthe vīramātre namo'stu te ||

कुलावलिमथा वृक्षा अम्बा श्रीनाथपादुका ।अकृष्टकेतकि त्वं च कुब्जे चण्डि नमोऽस्तु ते ॥

kulāvalimathā vṛkṣā ambā śrīnāthapādukā |akṛṣṭaketaki tvaṃ ca kubje caṇḍi namo'stu te ||

दूती बटुककौमार्या भैरवी क्षेत्रपालका ।सिद्धसङ्घट्टयोगिन्यां क्रीडते मातृमण्डले ॥

dūtī baṭukakaumāryā bhairavī kṣetrapālakā |siddhasaṅghaṭṭayoginyāṃ krīḍate mātṛmaṇḍale ||

योगिनी पीठमध्यस्थं महापीठं सशाम्भवम् ।एकवीराक्षरं ब्रह्म सूरसिद्धालयं परम् ॥

yoginī pīṭhamadhyasthaṃ mahāpīṭhaṃ saśāmbhavam |ekavīrākṣaraṃ brahma sūrasiddhālayaṃ param ||

हंसपर्यङ्कमारूढं त्रिकोणं बीजपूरकम् ।एकवीरामिदं बीजं वाग्भवं परमेश्वरम् ॥

haṃsaparyaṅkamārūḍhaṃ trikoṇaṃ bījapūrakam |ekavīrāmidaṃ bījaṃ vāgbhavaṃ parameśvaram ||

त्रिबीजं बाणसंयुक्तं त्रिशट्कोष्ठदले स्थितम् ।तन्मध्ये शाम्भवी बीजमेकवीरं चिदात्मकम् ॥

tribījaṃ bāṇasaṃyuktaṃ triśaṭkoṣṭhadale sthitam |tanmadhye śāmbhavī bījamekavīraṃ cidātmakam ||

त्रिकोणान्येकबीजञ्च मायाबीजेन वेष्टितम् ।आनन्द कन्दकल्लोलं हसन्तं मातृमण्डलम् ॥

trikoṇānyekabījañca māyābījena veṣṭitam |ānanda kandakallolaṃ hasantaṃ mātṛmaṇḍalam ||

ब्रह्मा विष्णुर्महादेव इन्द्राद्याश्चैव देवता ।यद्बीजं मातृपीठस्थं शाम्भवं तं नमाम्यहम् ॥

brahmā viṣṇurmahādeva indrādyāścaiva devatā |yadbījaṃ mātṛpīṭhasthaṃ śāmbhavaṃ taṃ namāmyaham ||

अकारस्याष्टमं बीजं शिवशक्तिसमन्वितम् ।तन्मध्ये वस्तुनिष्क्रान्तं एकवीरं सशाम्भवम् ॥

akārasyāṣṭamaṃ bījaṃ śivaśaktisamanvitam |tanmadhye vastuniṣkrāntaṃ ekavīraṃ saśāmbhavam ||

हृदिमध्ये स्थितं पद्मं हृदि पद्मं सकर्णकम् ।तन्मध्ये वस्तुनिष्क्रान्तमेकवीरं सशम्भवम् ॥

hṛdimadhye sthitaṃ padmaṃ hṛdi padmaṃ sakarṇakam |tanmadhye vastuniṣkrāntamekavīraṃ saśambhavam ||

सर्वनारीशुभत्वञ्च कूटस्थं बीजमव्ययम् ।हकरार्धकुलधरमेकवीरे नमोऽस्तु ते ॥

sarvanārīśubhatvañca kūṭasthaṃ bījamavyayam |hakarārdhakuladharamekavīre namo'stu te ||

नित्यक्लिन्ने मदद्रावे प्राणजीवात्मसञ्ज्ञके ।हृल्लेख़े सच्चिदानन्दे विश्वेश्वरि नमोऽस्तु ते ॥

nityaklinne madadrāve prāṇajīvātmasañjñake |hṛlleख़e saccidānande viśveśvari namo'stu te ||

कुलपङ्कजमार्तण्डे हंसाक्षे प्राणधारिणी ।चैतन्यविग्रहे नित्ये रेणुकायै नमोऽस्तु ते ॥

kulapaṅkajamārtaṇḍe haṃsākṣe prāṇadhāriṇī |caitanyavigrahe nitye reṇukāyai namo'stu te ||

कदम्बगोलकाकारे ब्रह्मरन्ध्रविलम्बिनी ।सूक्ष्मसूक्ष्मान्तरे नित्ये रेणुकायै नमोऽस्तु ते ॥

kadambagolakākāre brahmarandhravilambinī |sūkṣmasūkṣmāntare nitye reṇukāyai namo'stu te ||

केन्दुः स्रवलित शक्तिः षट्चक्रक्रमभेदिनी ।ब्रह्मरन्ध्रे विनिष्क्रान्ते रेणुका व्योममण्डले ॥

kenduḥ sravalita śaktiḥ ṣaṭcakrakramabhedinī |brahmarandhre viniṣkrānte reṇukā vyomamaṇḍale ||

लिङ्गत्रयान्ते निष्क्रान्ते शून्ये नादविनिग्रहे ।निरालम्बे निराभासे रेणुकायै नमोऽस्तु ते ॥

liṅgatrayānte niṣkrānte śūnye nādavinigrahe |nirālambe nirābhāse reṇukāyai namo'stu te ||

नाभिमूलेषु या शक्तिः कुण्डिल्याः सर्परूपिणी ।षट्चक्रविन्दुनादान्ते रेणुका व्योममण्डले ॥

nābhimūleṣu yā śaktiḥ kuṇḍilyāḥ sarparūpiṇī |ṣaṭcakravindunādānte reṇukā vyomamaṇḍale ||

इडा पिङ्गलमध्यस्थे ब्रह्ममार्गप्रवाहिनी ।मृणालतन्तुरूपेण हिमांशु नित्यं चिदाम्बिके ॥

iḍā piṅgalamadhyasthe brahmamārgapravāhinī |mṛṇālatanturūpeṇa himāṃśu nityaṃ cidāmbike ||

द्वासप्ततिसहस्राणि नाडी वृन्दानि चालयेत् ।सोमसूर्याग्निभिन्नेऽसि चिद्रूपे परमामृते ॥

dvāsaptatisahasrāṇi nāḍī vṛndāni cālayet |somasūryāgnibhinne'si cidrūpe paramāmṛte ||

शशिकोटि समाभासे अवसीः ब्रह्ममण्डले ।अचले सर्वभूतस्थे राममात्रे नमोऽस्तु ते ॥

śaśikoṭi samābhāse avasīḥ brahmamaṇḍale |acale sarvabhūtasthe rāmamātre namo'stu te ||

अन्तःकरणसम्बन्धि नाडीयन्त्रप्रवाहिनी ।प्रणवात्मक हः सम्यक् हृत्प्रष्ठे प्रतितिष्ठति ॥

antaḥkaraṇasambandhi nāḍīyantrapravāhinī |praṇavātmaka haḥ samyak hṛtpraṣṭhe pratitiṣṭhati ||

आधारे नाभि मध्यस्थे हृत्पद्मकण्ठतालुके ।प्राणस्यान्तर्गते सूक्ष्मे षोडश चैव रेणुके ॥

ādhāre nābhi madhyasthe hṛtpadmakaṇṭhatāluke |prāṇasyāntargate sūkṣme ṣoḍaśa caiva reṇuke ||

स्थानत्रयविनिष्क्रान्ते मात्रात्रयविनिष्ठिते ।मातृकेत्येकवीरे च व्योमातीते परात्परे ॥

sthānatrayaviniṣkrānte mātrātrayaviniṣṭhite |mātṛketyekavīre ca vyomātīte parātpare ||

पीठस्थे पीठमध्यस्थे मायातीतपरात्परे ।हङ्कारार्धकलापूर्णे रेणुकायै नमोऽस्तु ते ॥

pīṭhasthe pīṭhamadhyasthe māyātītaparātpare |haṅkārārdhakalāpūrṇe reṇukāyai namo'stu te ||

त्वया विनैकभेदेन व्यापितं सचराचरम् ।इच्छाज्ञानक्रियाशक्ति रेणुकायै नमोऽस्तु ते ॥

tvayā vinaikabhedena vyāpitaṃ sacarācaram |icchājñānakriyāśakti reṇukāyai namo'stu te ||

गिरिमध्ये तथारण्ये मेरुमध्ये हिमाचले ।नन्दा कात्यायनी दुर्गे रेणुकायै नमोऽस्तु ते ॥

girimadhye tathāraṇye merumadhye himācale |nandā kātyāyanī durge reṇukāyai namo'stu te ||

स्वर्गपातालमर्त्येषु विचरन्ती त्वनेकधा ।प्रचण्डयोगिनी चण्डे एकवीरे नमोऽस्तु ते ॥

svargapātālamartyeṣu vicarantī tvanekadhā |pracaṇḍayoginī caṇḍe ekavīre namo'stu te ||

तेजोमण्डलदुर्धर्षे सूर्यकोटिसमप्रभे ।दुर्निरीक्ष्ये दुराधारे एकवीरे नमोऽस्तु ते ॥

tejomaṇḍaladurdharṣe sūryakoṭisamaprabhe |durnirīkṣye durādhāre ekavīre namo'stu te ||

ऐं बीजं व्यापितं येन वज्रेयं सचराचरम् ।त्रैलोक्यं क्षोभयन्तीं त्वा मायाबीजेन रेणुकाम् ॥

aiṃ bījaṃ vyāpitaṃ yena vajreyaṃ sacarācaram |trailokyaṃ kṣobhayantīṃ tvā māyābījena reṇukām ||

त्वमेव परमं जाप्यं त्वमेव परमं तपः ।त्वमेव परमं ज्ञानं रेणुकायै नमोऽस्तु ते ॥

tvameva paramaṃ jāpyaṃ tvameva paramaṃ tapaḥ |tvameva paramaṃ jñānaṃ reṇukāyai namo'stu te ||

त्वं माता त्वं पिता भ्राता त्वं सखा त्वं गुरुप्रभुः ।त्वमेव जगतां धात्री त्राहि मां भक्तवत्सले ॥

tvaṃ mātā tvaṃ pitā bhrātā tvaṃ sakhā tvaṃ guruprabhuḥ |tvameva jagatāṃ dhātrī trāhi māṃ bhaktavatsale ||

अधर्मः कुरु ते धर्म धनवान् धनमीश्वरि ।अजातिः कुरु ते जातिस्त्वयाज्ञा परमेश्वरि ॥

adharmaḥ kuru te dharma dhanavān dhanamīśvari |ajātiḥ kuru te jātistvayājñā parameśvari ||

अपवित्रं पवित्रेयं कुरुषे त्वं सदाम्बिके ।त्वमेव परमं तीर्थं त्रैमूर्तिस्त्वं जगन्मये ॥

apavitraṃ pavitreyaṃ kuruṣe tvaṃ sadāmbike |tvameva paramaṃ tīrthaṃ traimūrtistvaṃ jaganmaye ||

जातिभ्रष्टा कुलभ्रष्टा व्रतभ्रष्टा च ये नराः ।एकवीराप्रसादेन शुद्धास्ते नात्र संशयः ॥

jātibhraṣṭā kulabhraṣṭā vratabhraṣṭā ca ye narāḥ |ekavīrāprasādena śuddhāste nātra saṃśayaḥ ||

द्विजाति म्लेक्ष पर्यन्तं पापं यः कुरुते नरः ।तत्सर्वं दह्यते क्षिप्रं रेणुकादर्शनेन तु ॥

dvijāti mlekṣa paryantaṃ pāpaṃ yaḥ kurute naraḥ |tatsarvaṃ dahyate kṣipraṃ reṇukādarśanena tu ||

वर्णावर्णो न तस्यास्ति त्वन्मार्गे ये यथेरितम् ।तीर्थं भूतासि मातङ्गी रेणुकायै नमोऽस्तु ते ॥

varṇāvarṇo na tasyāsti tvanmārge ye yatheritam |tīrthaṃ bhūtāsi mātaṅgī reṇukāyai namo'stu te ||

विरजे रजनीमूर्ते निर्धूते धूतकल्मषे ।त्रैलोक्य पावनि पुण्ये एकवीरे नमोऽस्तु ते ॥

viraje rajanīmūrte nirdhūte dhūtakalmaṣe |trailokya pāvani puṇye ekavīre namo'stu te ||

समनो घ्राणाङ्घ्रि पाणिश्च दद्रुस्फोटकमेव च ।दारिद्र्यदुःखरोगघ्नीं तां वन्दे रेणुकामहम् ॥

samano ghrāṇāṅghri pāṇiśca dadrusphoṭakameva ca |dāridryaduḥkharogaghnīṃ tāṃ vande reṇukāmaham ||

कल्पद्रुमसमाख्याता चिन्तामणिविभूषिता ।रेजनाः किं पश्यन्ति रेणुकां कामधेनुकाम् ॥

kalpadrumasamākhyātā cintāmaṇivibhūṣitā |rejanāḥ kiṃ paśyanti reṇukāṃ kāmadhenukām ||

धर्मार्थकाममोक्षाणां पुरुषाणां चतुर्विधाम् ।एकवीराप्रसादेन सिध्यन्ते नात्र संशयः ॥

dharmārthakāmamokṣāṇāṃ puruṣāṇāṃ caturvidhām |ekavīrāprasādena sidhyante nātra saṃśayaḥ ||

सर्वं तीर्थाभिषेकं तु सर्वयज्ञफलं लभेत ।आषाढे चैव कार्तिक्यां रेणुकादर्शनेन तु ॥

sarvaṃ tīrthābhiṣekaṃ tu sarvayajñaphalaṃ labheta |āṣāḍhe caiva kārtikyāṃ reṇukādarśanena tu ||

पृथिव्यां यानि तीर्थानि समुद्रा सरितानि च ।एकवीरा परं नास्ति सद्यः प्रत्ययकारकम् ॥

pṛthivyāṃ yāni tīrthāni samudrā saritāni ca |ekavīrā paraṃ nāsti sadyaḥ pratyayakārakam ||

कार्तिक्यां कृत्तिकायोगे यः पश्यन्तीह रेणुकाम् ।न तेषां पुनरावृत्तिः कल्पकोटिशतैरपि ॥

kārtikyāṃ kṛttikāyoge yaḥ paśyantīha reṇukām |na teṣāṃ punarāvṛttiḥ kalpakoṭiśatairapi ||

श्रीसिंहामलकं देव देवदेवेन सेवितम् ।मुक्तिगता समासाद्य द्विसप्ततिचतुर्मुखाः ॥

śrīsiṃhāmalakaṃ deva devadevena sevitam |muktigatā samāsādya dvisaptaticaturmukhāḥ ||

देवदेवो तथा रुद्रः सम्भेदो भास्करालयम् ।तोयं मेरुस्तडागस्य सद्यः पापहराणि षट् ॥

devadevo tathā rudraḥ sambhedo bhāskarālayam |toyaṃ merustaḍāgasya sadyaḥ pāpaharāṇi ṣaṭ ||

कुरुक्षेत्रे सकृत्तीर्थे राहुग्रस्ते दिवाकरे ।प्रयागं च सदातीर्थं गया गङ्गा च रेणुका ॥

kurukṣetre sakṛttīrthe rāhugraste divākare |prayāgaṃ ca sadātīrthaṃ gayā gaṅgā ca reṇukā ||

आधारभूतनिलयो ललनारूपधारिणी ।क्षुधा तृषा च दुःखघ्नीं तां वन्दे रेणुकामहम् ॥

ādhārabhūtanilayo lalanārūpadhāriṇī |kṣudhā tṛṣā ca duḥkhaghnīṃ tāṃ vande reṇukāmaham ||

ये पश्चिमास्तु ये सिद्धा पूर्वायै ये च संस्थिताः ।एकवीरा परं बीजं शाश्वतं पदमव्ययम् ॥

ye paścimāstu ye siddhā pūrvāyai ye ca saṃsthitāḥ |ekavīrā paraṃ bījaṃ śāśvataṃ padamavyayam ||

मायाबीजेन या प्रोक्ता हङ्कारार्द्धकलास्मृता ।सा योनिः सर्वमन्त्राणां सा शक्तिः रेणुका स्मृता ॥

māyābījena yā proktā haṅkārārddhakalāsmṛtā |sā yoniḥ sarvamantrāṇāṃ sā śaktiḥ reṇukā smṛtā ||

किं तस्य बहुभिर्मन्त्रैर्वेदसिद्धान्तविस्तरैः ॥एकवीरामहामन्त्रं सर्वकामफलप्रदम् ॥

kiṃ tasya bahubhirmantrairvedasiddhāntavistaraiḥ ||ekavīrāmahāmantraṃ sarvakāmaphalapradam ||

मूलमन्त्रमिदं प्रोक्तं हंसभेदेन संस्थितम् ।स साक्षाद् भैरवे प्रोक्तमेकवीरं परात्परम् ॥

mūlamantramidaṃ proktaṃ haṃsabhedena saṃsthitam |sa sākṣād bhairave proktamekavīraṃ parātparam ||

शिवशक्तिमिदं बीजं रेणुकामिदमव्ययम् ।सर्वमङ्गलमाङ्गल्ये पवित्रं पापनाशनम् ॥

śivaśaktimidaṃ bījaṃ reṇukāmidamavyayam |sarvamaṅgalamāṅgalye pavitraṃ pāpanāśanam ||

य इदं पठते नित्यं त्रिसन्ध्यं श्रद्धयान्वितम् ।आयुरारोग्यमैश्वर्यं पदं निर्वाणमाप्नुयात् ॥

ya idaṃ paṭhate nityaṃ trisandhyaṃ śraddhayānvitam |āyurārogyamaiśvaryaṃ padaṃ nirvāṇamāpnuyāt ||

अचलां श्रियामाप्नोति पुत्रदारादि सम्पदाम् ।भुञ्जते विपुलान्भोगान् त्रैलोक्यं मोहयेद्ध्रुवम् ॥

acalāṃ śriyāmāpnoti putradārādi sampadām |bhuñjate vipulānbhogān trailokyaṃ mohayeddhruvam ||

एकवीरा इदं बीजं त्रैलोक्ये यः पठेन्नरः ।ऐश्वर्यं लभते राज्यं वागैश्वर्यं च जायते ॥

ekavīrā idaṃ bījaṃ trailokye yaḥ paṭhennaraḥ |aiśvaryaṃ labhate rājyaṃ vāgaiśvaryaṃ ca jāyate ||

दुर्वृत्तानामशेषेण तथा दुःस्वप्नदर्शने ।रक्षोभूतपिशाचेभ्यो ग्रहपीडां व्यपोहति ॥

durvṛttānāmaśeṣeṇa tathā duḥsvapnadarśane |rakṣobhūtapiśācebhyo grahapīḍāṃ vyapohati ||

रेणुकापरमं स्तोत्रं ये जपन्ति च मानवाः ।प्राप्नुयात्परमां सिद्धिमणिमादि गुणाष्टधाम् ॥

reṇukāparamaṃ stotraṃ ye japanti ca mānavāḥ |prāpnuyātparamāṃ siddhimaṇimādi guṇāṣṭadhām ||

मातापुरस्थिता देवी मातृपीठोद्भवा शिवा ।महादेवेन संस्तुत्य भुक्तिमुक्तिफलप्रदाम् ॥

mātāpurasthitā devī mātṛpīṭhodbhavā śivā |mahādevena saṃstutya bhuktimuktiphalapradām ||

रेणुकाया इदं स्तोत्रं पठिष्यति दिने दिने ।स गच्छेत् परमं स्थानं यत्र देवो महेश्वरः ॥

reṇukāyā idaṃ stotraṃ paṭhiṣyati dine dine |sa gacchet paramaṃ sthānaṃ yatra devo maheśvaraḥ ||

इति श्रीकौलार्णवे श्रीभैरवप्रोक्तं रेणुकास्तवराजस्तोत्रं सम्पूर्णम् ।

iti śrīkaulārṇave śrībhairavaproktaṃ reṇukāstavarājastotraṃ sampūrṇam |

॥ श्री रेणुकार्पणमस्तु ॥

|| śrī reṇukārpaṇamastu ||