रेणुकासप्तकम् Renuka Saptakam

श्रीगणेशाय नमः ।पुरतो विलोक्य वृषभं पार्श्वे लिङ्गं परात्परस्य विभोः ।पृष्ठे स्कन्दगणेशौ त्वां कालीं मन्महे मातः ॥ १॥

śrīgaṇeśāya namaḥ |purato vilokya vṛṣabhaṃ pārśve liṅgaṃ parātparasya vibhoḥ |pṛṣṭhe skandagaṇeśau tvāṃ kālīṃ manmahe mātaḥ || 1||

न त्वं लक्ष्मीमातः यल्लक्ष्मीनायकस्य माताऽसि ।जनयित्रि राक्षसारेः तस्मात्त्वां मन्महे कालीम् ॥ २॥

na tvaṃ lakṣmīmātaḥ yallakṣmīnāyakasya mātā'si |janayitri rākṣasāreḥ tasmāttvāṃ manmahe kālīm || 2||

संहारनायिकत्वात् मारीत्वादुग्रवेषरूपत्वात् ।मध्यमलोकनिवासात् त्वां कालीं मन्महे मातः ॥ ३॥

saṃhāranāyikatvāt mārītvādugraveṣarūpatvāt |madhyamalokanivāsāt tvāṃ kālīṃ manmahe mātaḥ || 3||

जमदग्निः शिवभागः भागस्त्वं देवि शैलकन्यायाः ।एवं ज्ञात्वा यस्त्वां भजति स धन्यो महाभागः ॥ ४॥

jamadagniḥ śivabhāgaḥ bhāgastvaṃ devi śailakanyāyāḥ |evaṃ jñātvā yastvāṃ bhajati sa dhanyo mahābhāgaḥ || 4||

त्वां चण्डिकां प्रचण्डामाहुस्तन्त्राणि जनिमतां मातः ।तस्मात्त्वं शिवकान्ता न श्रीर्न प्रेयसी च विधेः ॥ ५॥

tvāṃ caṇḍikāṃ pracaṇḍāmāhustantrāṇi janimatāṃ mātaḥ |tasmāttvaṃ śivakāntā na śrīrna preyasī ca vidheḥ || 5||

गौरी श्रीर्वा वाग्वा न विशेषो जगति भक्तलोकस्य ।मम तु विशिष्टा गौरी साक्षादस्याः सुतो यदहम् ॥ ६॥

gaurī śrīrvā vāgvā na viśeṣo jagati bhaktalokasya |mama tu viśiṣṭā gaurī sākṣādasyāḥ suto yadaham || 6||

तिसृषु परदेवतासु श्रेष्ठत्वं नोच्यते मयैकस्याः ।प्रीतिर्मे गिरिजायां लक्ष्मीतो भारतीतश्च ॥ ७॥

tisṛṣu paradevatāsu śreṣṭhatvaṃ nocyate mayaikasyāḥ |prītirme girijāyāṃ lakṣmīto bhāratītaśca || 7||

॥ इति श्रीभगवन्महर्षिरमणान्तेवासिनो वासिष्ठस्यनरसिंहसूनोर्गणपतेः कृतिः रेणुकासप्तकं समाप्तम् ॥

|| iti śrībhagavanmaharṣiramaṇāntevāsino vāsiṣṭhasyanarasiṃhasūnorgaṇapateḥ kṛtiḥ reṇukāsaptakaṃ samāptam ||