रेणुकास्तोत्रम् (परशुरामकृतम् वायुपुराणान्तर्गतम्) Renuka Stotram from Vayupuranam

श्रीगणेशाय नमः ।श्रीसरस्वत्यै नमः ।श्रीगुरुभ्यो नमः ।श्रीरेणुकाम्बायै नमः ।ॐ नमः परमानन्दे सर्वदेवमयी शुभे ।अकारादिक्षकारान्तं मातृका मन्त्रमालिनी ॥ १॥

śrīgaṇeśāya namaḥ |śrīsarasvatyai namaḥ |śrīgurubhyo namaḥ |śrīreṇukāmbāyai namaḥ |oṃ namaḥ paramānande sarvadevamayī śubhe |akārādikṣakārāntaṃ mātṛkā mantramālinī || 1||

एकवीरे एकरूपे महारूपे अरूपिणि ।अव्यक्ते व्यक्तिमापन्ने गुणातीते गुणात्मिके ॥ २॥

ekavīre ekarūpe mahārūpe arūpiṇi |avyakte vyaktimāpanne guṇātīte guṇātmike || 2||

कमले कमलाभासे हृत्सच्चित्तरणिकालये ।नाभिचक्रस्थिते देवि कुण्डली तन्तुरूपिणि ॥ ३॥

kamale kamalābhāse hṛtsaccittaraṇikālaye |nābhicakrasthite devi kuṇḍalī tanturūpiṇi || 3||

वीरमाता वीरबन्धा योगिनी समरप्रिये ।वेदमाता वेदगर्भे विश्वगर्भे नमोऽस्तु ते ॥ ४ ॥

vīramātā vīrabandhā yoginī samarapriye |vedamātā vedagarbhe viśvagarbhe namo'stu te || 4 ||

राममातर्नमस्तुभ्यं नमस्त्रैलोक्यरूपिणि ।मह्यादिके पञ्चभूता जमदग्निप्रिये शुभे ॥ ५ ॥

rāmamātarnamastubhyaṃ namastrailokyarūpiṇi |mahyādike pañcabhūtā jamadagnipriye śubhe || 5 ||

यैस्तु भक्त्या स्तुता ध्याता अर्चयित्वाऽर्पिते शुभे ।भोगमोक्षप्रदे देवि कामेश्वरि नमोऽस्तु ते ॥ ६॥

yaistu bhaktyā stutā dhyātā arcayitvā'rpite śubhe |bhogamokṣaprade devi kāmeśvari namo'stu te || 6||

नमोऽस्तु ते निरालम्बे परमानन्दविग्रहे ।पञ्चभूतात्मिके देवि भूतभाविवर्जिते ॥ ७॥

namo'stu te nirālambe paramānandavigrahe |pañcabhūtātmike devi bhūtabhāvivarjite || 7||

महारौद्रे महाकाये सृष्टिसंहारकारिणि ।ब्रह्माण्डगोलकाकारे विश्वरूपे नमोऽस्तु ते ॥ ८॥

mahāraudre mahākāye sṛṣṭisaṃhārakāriṇi |brahmāṇḍagolakākāre viśvarūpe namo'stu te || 8||

चतुर्भुजे खड्गहस्ते महाडमरुधारिणि ।शिरःपात्रधरे देवि एकवीरे नमोऽस्तु ते ॥ ९॥

caturbhuje khaḍgahaste mahāḍamarudhāriṇi |śiraḥpātradhare devi ekavīre namo'stu te || 9||

नीलाम्बरे नीलवर्णे मयूरपिच्छधारिणि ।वनभिल्लधनुर्वामे दक्षिणे बाणधारिणि ॥ १०॥

nīlāmbare nīlavarṇe mayūrapicchadhāriṇi |vanabhilladhanurvāme dakṣiṇe bāṇadhāriṇi || 10||

रौद्रकाये महाकाये सहस्रार्जुनभञ्जनि ।एकं शिरः पुरा स्थित्वा रक्तपात्रे च पूरितम् ॥ ११॥

raudrakāye mahākāye sahasrārjunabhañjani |ekaṃ śiraḥ purā sthitvā raktapātre ca pūritam || 11||

मृतधारा पिबन्देवि रुधिरं दैत्यदेहजम् ।रक्तवर्णे रक्तदन्ते खड्गलाङ्गलधारिणि ॥ १२॥

mṛtadhārā pibandevi rudhiraṃ daityadehajam |raktavarṇe raktadante khaḍgalāṅgaladhāriṇi || 12||

वामहस्ते च खट्वाङ्गं डमरुं चैव दक्षिणे ।प्रेतवाहनके देविऋषिपत्नी च देवते ॥ १३॥

vāmahaste ca khaṭvāṅgaṃ ḍamaruṃ caiva dakṣiṇe |pretavāhanake deviṛṣipatnī ca devate || 13||

एकवीरे महारौद्रे मालिनी विश्वभैरवि ।योगिनी योगयुक्ता च महादेवी महेश्वरी ॥ १४॥

ekavīre mahāraudre mālinī viśvabhairavi |yoginī yogayuktā ca mahādevī maheśvarī || 14||

कामाक्षी भद्रकाली च हुङ्कारी त्रिपुरेश्वरी ।रक्तवस्त्रे रक्तनेत्रे महात्रिपुरसुन्दरि ॥ १५॥

kāmākṣī bhadrakālī ca huṅkārī tripureśvarī |raktavastre raktanetre mahātripurasundari || 15||

रेणुका सूनुयोगी च भक्तानामभयङ्करी ।भोगलक्ष्मीर्योगलक्ष्मीर्दिव्यलक्ष्मीश्च सर्वदा ॥ १६॥

reṇukā sūnuyogī ca bhaktānāmabhayaṅkarī |bhogalakṣmīryogalakṣmīrdivyalakṣmīśca sarvadā || 16||

कालरात्रि महारात्रि मद्यमांसशिवप्रिये ।भक्तानां श्रीपदे देवि लोकत्रयविमोहिनि ॥ १७॥

kālarātri mahārātri madyamāṃsaśivapriye |bhaktānāṃ śrīpade devi lokatrayavimohini || 17||

क्लीङ्कारी कामपीठे च ह्रीङ्कारी च प्रबोध्यता ।श्रीङ्कारी च श्रिया देवि सिद्धलक्ष्मीश्च सुप्रभा ॥ १८॥

klīṅkārī kāmapīṭhe ca hrīṅkārī ca prabodhyatā |śrīṅkārī ca śriyā devi siddhalakṣmīśca suprabhā || 18||

महालक्ष्मीश्च कौमारी कौबेरी सिंहवाहिनी ।सिंहप्रेतासने देवि रौद्रि क्रूरावतारिणि ॥ १९॥

mahālakṣmīśca kaumārī kauberī siṃhavāhinī |siṃhapretāsane devi raudri krūrāvatāriṇi || 19||

दैत्या नारी कुमारी च रौद्रदैत्यनिपातिनी ।त्रिनेत्रा श्वेतरूपा च सूर्यकोटिसमप्रभा ॥ २०॥

daityā nārī kumārī ca raudradaityanipātinī |trinetrā śvetarūpā ca sūryakoṭisamaprabhā || 20||

खड्गिनी बाणहस्ता चारूढा महिषवाहिनी ।महाकुण्डलिनी साक्षात् कङ्काली भुवनेश्वरी ॥ २१॥

khaḍginī bāṇahastā cārūḍhā mahiṣavāhinī |mahākuṇḍalinī sākṣāt kaṅkālī bhuvaneśvarī || 21||

कृत्तिवासा विष्णुरूपा हृदया देवतामया ।देवमारुतमाता च भक्तमाता च शङ्करी ॥ २२॥

kṛttivāsā viṣṇurūpā hṛdayā devatāmayā |devamārutamātā ca bhaktamātā ca śaṅkarī || 22||

चतुर्भुजे चतुर्वक्त्रे स्वस्तिपद्मासनस्थिते ।पञ्चवक्त्रा महागङ्गा गौरी शङ्करवल्लभा ॥ २३॥

caturbhuje caturvaktre svastipadmāsanasthite |pañcavaktrā mahāgaṅgā gaurī śaṅkaravallabhā || 23||

कपालिनी देवमाता कामधेनुस्त्रयोगुणी ।विद्या एकमहाविद्या श्मशानप्रेतवासिनी ॥ २४॥

kapālinī devamātā kāmadhenustrayoguṇī |vidyā ekamahāvidyā śmaśānapretavāsinī || 24||

देवत्रिगुणत्रैलोक्या जगत्त्रयविलोकिनी ।रौद्रा वैतालि कङ्काली भवानी भववल्लभा ॥ २५॥

devatriguṇatrailokyā jagattrayavilokinī |raudrā vaitāli kaṅkālī bhavānī bhavavallabhā || 25||

काली कपालिनी क्रोधा मातङ्गी वेणुधारिणी ।रुद्रस्य न पराभूता रुद्रदेहार्द्धधारिणी ॥ २६॥

kālī kapālinī krodhā mātaṅgī veṇudhāriṇī |rudrasya na parābhūtā rudradehārddhadhāriṇī || 26||

जया च विजया चैव अजया चापराजिता ।रेणुकायै नमस्तेऽस्तु सिद्धदेव्यै नमो नमः ॥ २७॥

jayā ca vijayā caiva ajayā cāparājitā |reṇukāyai namaste'stu siddhadevyai namo namaḥ || 27||

श्रियै देव्यै नमस्तेऽस्तु दीननाथे नमो नमः ।जय त्वं देवदेवेशि सर्वदेवि नमोऽस्तु ते ॥ २८॥

śriyai devyai namaste'stu dīnanāthe namo namaḥ |jaya tvaṃ devadeveśi sarvadevi namo'stu te || 28||

देवदेवस्य जननि पञ्चप्राणप्रपूरिते ।त्वत्प्रसादाय देवेशि देवाः क्रन्दन्ति विष्णवे ॥ २९॥

devadevasya janani pañcaprāṇaprapūrite |tvatprasādāya deveśi devāḥ krandanti viṣṇave || 29||

महाबले महारौद्रे सर्वदैत्यनिपातिनि ।आधारा बुद्धिदा शक्तिः कुण्डली तन्तुरूपिणी ॥ ३०॥

mahābale mahāraudre sarvadaityanipātini |ādhārā buddhidā śaktiḥ kuṇḍalī tanturūpiṇī || 30||

षट्चक्रमणे देवि योगिनि दिव्यरूपिणि ।कामिका कामरक्ता च लोकत्रयविलोकिनी ॥ ३१॥

ṣaṭcakramaṇe devi yogini divyarūpiṇi |kāmikā kāmaraktā ca lokatrayavilokinī || 31||

महानिद्रा मद्यनिद्रा मधुकैटभभञ्जिनी ।भद्रकाली त्रिसन्ध्या च महाकाली कपालिनी ॥ ३२॥

mahānidrā madyanidrā madhukaiṭabhabhañjinī |bhadrakālī trisandhyā ca mahākālī kapālinī || 32||

रक्षिता सर्वभूतानां दैत्यानां च क्षयङ्करी ।शरण्यं सर्वसत्त्वानां रक्ष त्वं परमेश्वरि ॥ ३३॥

rakṣitā sarvabhūtānāṃ daityānāṃ ca kṣayaṅkarī |śaraṇyaṃ sarvasattvānāṃ rakṣa tvaṃ parameśvari || 33||

त्वामाराधयते लोके तेषां राज्यं च भूतले ।आषाढे कार्तिके चैव पूर्णे पूर्णचतुर्दशी ॥ ३४॥

tvāmārādhayate loke teṣāṃ rājyaṃ ca bhūtale |āṣāḍhe kārtike caiva pūrṇe pūrṇacaturdaśī || 34||

आश्विने पौषमासे च कृत्वा पूजां प्रयत्नतः ।गन्धपुष्पैश्च नैवेद्यैस्तोषितां पञ्चभिः सह ॥ ३५॥

āśvine pauṣamāse ca kṛtvā pūjāṃ prayatnataḥ |gandhapuṣpaiśca naivedyaistoṣitāṃ pañcabhiḥ saha || 35||

यं यं प्रार्थयते नित्यं तं तं प्राप्नोति निश्चितम् ।तत्त्वं मे वरदे देवि रक्ष मां परमेश्वरि ॥ ३६॥

yaṃ yaṃ prārthayate nityaṃ taṃ taṃ prāpnoti niścitam |tattvaṃ me varade devi rakṣa māṃ parameśvari || 36||

तव वामाङ्कितं देवि रक्ष मे सकलेश्वरि ।सर्वभूतोदये देवि प्रसाद वरदे शिवे ॥ ३७॥

tava vāmāṅkitaṃ devi rakṣa me sakaleśvari |sarvabhūtodaye devi prasāda varade śive || 37||

श्रीदेव्युवाचवरं ब्रूहि महाभाग राज्यं कुरु महीतले ।मामाराध्यते लोके भयं क्वापि न विद्यते ॥ ३८॥

śrīdevyuvācavaraṃ brūhi mahābhāga rājyaṃ kuru mahītale |māmārādhyate loke bhayaṃ kvāpi na vidyate || 38||

मम मार्गे च आयान्ती भीर्देवी मम सन्निधौ ।अभार्यो लभते भार्यां निर्धनो लभते धनम् ॥ ३९॥

mama mārge ca āyāntī bhīrdevī mama sannidhau |abhāryo labhate bhāryāṃ nirdhano labhate dhanam || 39||

विद्यां पुत्रमवाप्नोति शत्रुनाशं च विन्दति ।अपुत्रो लभते पुत्रान् बद्धो मुच्येत बन्धनात् ॥ ४०॥

vidyāṃ putramavāpnoti śatrunāśaṃ ca vindati |aputro labhate putrān baddho mucyeta bandhanāt || 40||

कामार्थी लभते कामं रोगी आरोग्यमाप्नुयात् ।मम आराधनं नित्यं राज्यं प्राप्नोति भूतले ॥ ४१॥

kāmārthī labhate kāmaṃ rogī ārogyamāpnuyāt |mama ārādhanaṃ nityaṃ rājyaṃ prāpnoti bhūtale || 41||

सर्वकार्याणि सिध्यन्ति प्रसादान्मे न संशयः ।सर्वकार्याण्यवाप्नोति दीर्घायुश्च लभेत्सुखी ॥ ४२॥

sarvakāryāṇi sidhyanti prasādānme na saṃśayaḥ |sarvakāryāṇyavāpnoti dīrghāyuśca labhetsukhī || 42||

श्रीपरशुराम उवाचअत्र स्थानेषु भवतां अभयं कुरु सर्वदा ।यं यं प्रार्थयते नित्यं तं तं प्राप्नोति निश्चितम् ॥ ४३॥

śrīparaśurāma uvācaatra sthāneṣu bhavatāṃ abhayaṃ kuru sarvadā |yaṃ yaṃ prārthayate nityaṃ taṃ taṃ prāpnoti niścitam || 43||

प्रयागे पुष्करे चैव गङ्गासागरसङ्गमे ।स्नानं च कुरुते नित्यं नित्यं च चरणोदके ॥ ४४॥

prayāge puṣkare caiva gaṅgāsāgarasaṅgame |snānaṃ ca kurute nityaṃ nityaṃ ca caraṇodake || 44||

इदं स्तोत्रं पठेन्नित्यं त्रिसन्ध्यं श्रद्धयान्वितः ।सर्वान् कामानवाप्नोति प्राप्यते परमं पदम् ॥ ४५॥

idaṃ stotraṃ paṭhennityaṃ trisandhyaṃ śraddhayānvitaḥ |sarvān kāmānavāpnoti prāpyate paramaṃ padam || 45||

इति श्रीवायुपुराणे परशुरामकृतं श्रीरेणुकास्तोत्रं सम्पूर्णम् ॥॥ श्रीरेणुकार्पणमस्तु ॥

iti śrīvāyupurāṇe paraśurāmakṛtaṃ śrīreṇukāstotraṃ sampūrṇam |||| śrīreṇukārpaṇamastu ||