श्रीरामप्रणामाष्टकम् Shri Tanatulasidasacharyapranitam Shriramapranama Ashtakam

आदिर्यस्य तथा चान्तः क्वचिच्चापि न लभ्यते ।आद्यन्तरहितं ब्रह्म तं रामं प्रणमाम्यहम् ॥ १॥

ādiryasya tathā cāntaḥ kvaciccāpi na labhyate |ādyantarahitaṃ brahma taṃ rāmaṃ praṇamāmyaham || 1||

उपादानं निमित्तं च कारणं जगतोऽस्य यः ।अद्वितीयं जगद्धेतुं तं रामं प्रणमाम्यहम् ॥ २॥

upādānaṃ nimittaṃ ca kāraṇaṃ jagato'sya yaḥ |advitīyaṃ jagaddhetuṃ taṃ rāmaṃ praṇamāmyaham || 2||

यस्मिन्निदं जगत् सर्वं सर्वस्मिन् यश्च विद्यते ।सर्वस्यान्तर्बहिर्व्याप्तं तं रामं प्रणमाम्यहम् ॥ ३॥

yasminnidaṃ jagat sarvaṃ sarvasmin yaśca vidyate |sarvasyāntarbahirvyāptaṃ taṃ rāmaṃ praṇamāmyaham || 3||

अर्चनात् कीर्त्तनाद् यस्य भवाब्धिस्तीर्यते सुखम् ।सर्वेषां तारकं ब्रह्म तं रामं प्रणमाम्यहम् ॥ ४॥

arcanāt kīrttanād yasya bhavābdhistīryate sukham |sarveṣāṃ tārakaṃ brahma taṃ rāmaṃ praṇamāmyaham || 4||

नैयायिका वदन्तीशं कर्म मीमांसकाश्च यम् ।वेदान्तवेदिनो ब्रह्म तं रामं प्रणमाम्यहम् ॥ ५॥

naiyāyikā vadantīśaṃ karma mīmāṃsakāśca yam |vedāntavedino brahma taṃ rāmaṃ praṇamāmyaham || 5||

यस्य भक्त्या प्रपत्त्या वा सायुज्यं लभते नरः ।त्रातारं स्वाश्रितानां च तं रामं प्रणमाम्यहम् ॥ ६॥

yasya bhaktyā prapattyā vā sāyujyaṃ labhate naraḥ |trātāraṃ svāśritānāṃ ca taṃ rāmaṃ praṇamāmyaham || 6||

स्वे स्वे कार्ये रता देवाः सन्ति यस्य भयादिह ।नियामकं च सर्वेषां तं रामं प्रणमाम्यहम् ॥ ७॥

sve sve kārye ratā devāḥ santi yasya bhayādiha |niyāmakaṃ ca sarveṣāṃ taṃ rāmaṃ praṇamāmyaham || 7||

अमोघं वन्दनं यस्य पूजनं कीर्त्तनं तथा ।अमोघस्मरणं चेशं तं रामं प्रणमाम्यहम् ॥ ८॥

amoghaṃ vandanaṃ yasya pūjanaṃ kīrttanaṃ tathā |amoghasmaraṇaṃ ceśaṃ taṃ rāmaṃ praṇamāmyaham || 8||

श्री तनतुलसीदासद्वारपीठेशनिर्मितम् ।भवतादष्टकं चेदं पठतां सुखदं नृणाम् ॥ ९॥

śrī tanatulasīdāsadvārapīṭheśanirmitam |bhavatādaṣṭakaṃ cedaṃ paṭhatāṃ sukhadaṃ nṛṇām || 9||

इति श्रीतनतुलसीदासाचार्यप्रणीतं श्रीरामप्रणामाष्टकं सम्पूर्णम् ।

iti śrītanatulasīdāsācāryapraṇītaṃ śrīrāmapraṇāmāṣṭakaṃ sampūrṇam |