वीरराघवप्रपत्तिः Shri Viraraghavaprapattih

श्रीधर्मसेननृपरम्यसुतासमेतंश्रीभूसहायममलं श्रितपारिजातम् ।श्रीशेषभोगशयनेऽतिसुखं शयानंश्रीवीरराघवमहं शरणं प्रपद्ये ॥ १॥

śrīdharmasenanṛparamyasutāsametaṃśrībhūsahāyamamalaṃ śritapārijātam |śrīśeṣabhogaśayane'tisukhaṃ śayānaṃśrīvīrarāghavamahaṃ śaraṇaṃ prapadye || 1||

हृत्तापनाशनसरोत्तरतीरवासंहृत्पुण्डरीककुहरे समसन्निविष्टम् ।श्रीशालिहोत्रमुनिपुङ्गवसेव्यमानंश्रीवीरराघवमहं शरणं प्रपद्ये ॥ २॥

hṛttāpanāśanasarottaratīravāsaṃhṛtpuṇḍarīkakuhare samasanniviṣṭam |śrīśālihotramunipuṅgavasevyamānaṃśrīvīrarāghavamahaṃ śaraṇaṃ prapadye || 2||

वीक्षाटवीविहरणक्षमपादपद्मंवेद्यं सदा विजयकोटिविमानसेव्यम् ।विश्वम्भरं विधिशिवेन्द्रनिषेव्यमाणंश्रीवीरराघवमहं शरणं प्रपद्ये ॥ ३॥

vīkṣāṭavīviharaṇakṣamapādapadmaṃvedyaṃ sadā vijayakoṭivimānasevyam |viśvambharaṃ vidhiśivendraniṣevyamāṇaṃśrīvīrarāghavamahaṃ śaraṇaṃ prapadye || 3||

सस्नेहभक्तिभयभूकमलाकराब्जसंवाह्यमानचरणं सरसीरुहाक्षम् ।सौम्यं समस्तजगदेकनिवासभूतंश्रीवीरराघवमहं शरणं प्रपद्ये ॥ ४॥

sasnehabhaktibhayabhūkamalākarābjasaṃvāhyamānacaraṇaṃ sarasīruhākṣam |saumyaṃ samastajagadekanivāsabhūtaṃśrīvīrarāghavamahaṃ śaraṇaṃ prapadye || 4||

पद्मोपमानपदपाणिविलोचनाढ्यंपद्मानिवासगृहबाहुयुगान्तरालम् ।पद्मासनायुतनिकेतनपद्मनाभंश्रीवीरराघवमहं शरणं प्रपद्ये ॥ ५॥

padmopamānapadapāṇivilocanāḍhyaṃpadmānivāsagṛhabāhuyugāntarālam |padmāsanāyutaniketanapadmanābhaṃśrīvīrarāghavamahaṃ śaraṇaṃ prapadye || 5||

आरोग्यपुत्रविलसत्कविनाञ्जनैकराज्याधिपत्यवरदाननिवाददीक्षम् ।मोक्षप्रदं स्वपदवन्दकवैष्णवानांश्रीवीरराघवमहं शरणं प्रपद्ये ॥ ६॥

ārogyaputravilasatkavināñjanaikarājyādhipatyavaradānanivādadīkṣam |mokṣapradaṃ svapadavandakavaiṣṇavānāṃśrīvīrarāghavamahaṃ śaraṇaṃ prapadye || 6||

मध्येशिखं सुरवरैः परमैरशेषैरार्योपचित्तविभवैरतिशुद्धसत्त्वैः ।अप्राकृतैरतिसमश्रितपादपद्मंश्रीवीरराघवमहं शरणं प्रपद्ये ॥ ७॥

madhyeśikhaṃ suravaraiḥ paramairaśeṣairāryopacittavibhavairatiśuddhasattvaiḥ |aprākṛtairatisamaśritapādapadmaṃśrīvīrarāghavamahaṃ śaraṇaṃ prapadye || 7||

रामानुजार्यमुखपद्मसहस्रभानुंपूर्णार्यवर्यनयनोत्पलपूर्णचन्द्रम् ।श्रीयामुनार्यहृदयाम्बुजचञ्चरीकंश्रीवीरराघवमहं शरणं प्रपद्ये ॥ ८॥

rāmānujāryamukhapadmasahasrabhānuṃpūrṇāryavaryanayanotpalapūrṇacandram |śrīyāmunāryahṛdayāmbujacañcarīkaṃśrīvīrarāghavamahaṃ śaraṇaṃ prapadye || 8||

श्रीराममिश्रकमलाक्षवरार्थनाथयोगीन्द्रतीर्थविभवं शठकोपवन्द्यम् ।शय्यासु सागरसुतापरिचर्यमाणंश्रीवीरराघवमहं शरणं प्रपद्ये ॥ ९॥

śrīrāmamiśrakamalākṣavarārthanāthayogīndratīrthavibhavaṃ śaṭhakopavandyam |śayyāsu sāgarasutāparicaryamāṇaṃśrīvīrarāghavamahaṃ śaraṇaṃ prapadye || 9||

श्रीमच्छठारिपरकालयतीन्द्रमुख्यैर्दिव्यप्रबन्धनिवहैरनुबध्यमानम् ।पूर्वैः सदा गुरुवरैः प्रथितानुभावैःश्रीवीरराघवमहं शरणं प्रपद्ये ॥ १०॥

śrīmacchaṭhāriparakālayatīndramukhyairdivyaprabandhanivahairanubadhyamānam |pūrvaiḥ sadā guruvaraiḥ prathitānubhāvaiḥśrīvīrarāghavamahaṃ śaraṇaṃ prapadye || 10||

हृत्तः सदानु परमं परिशुद्धदिव्यंदुग्धाम्बुधिं सकलसंश्रितरक्षणाढ्यम् ।हृत्तापनाशनतटीरतयावसानंश्रीवीरराघवमहं शरणं प्रपद्ये ॥ ११॥

hṛttaḥ sadānu paramaṃ pariśuddhadivyaṃdugdhāmbudhiṃ sakalasaṃśritarakṣaṇāḍhyam |hṛttāpanāśanataṭīratayāvasānaṃśrīvīrarāghavamahaṃ śaraṇaṃ prapadye || 11||

सौम्योपयन्तृमुनिना करुणाविरक्तिधीभक्तिशान्तिमुखसद्गुणसागरेण ।संसेव्यमानचरणं जगतां शरण्यंश्रीवीरराघवमहं शरणम्प्रपद्ये ॥ १२॥

saumyopayantṛmuninā karuṇāviraktidhībhaktiśāntimukhasadguṇasāgareṇa |saṃsevyamānacaraṇaṃ jagatāṃ śaraṇyaṃśrīvīrarāghavamahaṃ śaraṇamprapadye || 12||

इति श्रीवीरराघवप्रपत्तिः सम्पूर्णा ।

iti śrīvīrarāghavaprapattiḥ sampūrṇā |