वैष्णवदिनचर्या Shri Surasuranandacharyavirachita Shrivaishnavadinacharya

प्रणम्य भाष्यकृद्रामानन्दाचार्यं च राघवम् ।वैष्णवदिनचर्यां हि कल्याणीं बोधयाम्यहम् ॥ १॥

praṇamya bhāṣyakṛdrāmānandācāryaṃ ca rāghavam |vaiṣṇavadinacaryāṃ hi kalyāṇīṃ bodhayāmyaham || 1||

स्नानसन्ध्यादिकं कार्यं स्तुत्वा प्रातर्हि राघवम् ।जप्यः श्रीराममन्त्रश्च कर्तव्यं रामपूजनम् ॥ २॥

snānasandhyādikaṃ kāryaṃ stutvā prātarhi rāghavam |japyaḥ śrīrāmamantraśca kartavyaṃ rāmapūjanam || 2||

ऊर्ध्वपुण्ड्रं सदा कार्यं श्रीयुतं हि मुमुक्षुभिः ।ग्रीवायां तुलसीमालाद्वयं धार्यं च वैष्णवैः ॥ ३॥

ūrdhvapuṇḍraṃ sadā kāryaṃ śrīyutaṃ hi mumukṣubhiḥ |grīvāyāṃ tulasīmālādvayaṃ dhāryaṃ ca vaiṣṇavaiḥ || 3||

वैष्णवाश्च नमस्कार्या दण्डवद् वैष्णवैः सदा ।अग्राह्यं वैष्णवैर्नित्यं निषिद्धं चानिवेदितम् ॥ ४॥

vaiṣṇavāśca namaskāryā daṇḍavad vaiṣṇavaiḥ sadā |agrāhyaṃ vaiṣṇavairnityaṃ niṣiddhaṃ cāniveditam || 4||

श्रीमदानन्दभाष्यादिग्रन्थानां पठनं तथा ।चिन्तनं वैष्णवैः कार्यं स्वाचार्याणां च पूजनम् ॥ ५॥

śrīmadānandabhāṣyādigranthānāṃ paṭhanaṃ tathā |cintanaṃ vaiṣṇavaiḥ kāryaṃ svācāryāṇāṃ ca pūjanam || 5||

वैष्णवैर्मूलमन्त्रेण बोद्धव्यमर्थपञ्चकम् ।कर्त्तव्या नवधा भक्तिः श्रीसीतारामचन्द्रयोः ॥ ६॥

vaiṣṇavairmūlamantreṇa boddhavyamarthapañcakam |karttavyā navadhā bhaktiḥ śrīsītārāmacandrayoḥ || 6||

परम्परानुसन्धेया रामभक्तैर्हि वैष्णवैः ।द्वयमन्त्रानुसन्धानं कार्यं श्रीवैष्णवैः सदा ॥ ७॥

paramparānusandheyā rāmabhaktairhi vaiṣṇavaiḥ |dvayamantrānusandhānaṃ kāryaṃ śrīvaiṣṇavaiḥ sadā || 7||

वासः सहैव कर्त्तव्यो द्वयनिष्ठैश्च वैष्णवैः ।कर्त्तव्या सङ्गतिर्नैव संसारिणां तु गर्विणाम् ॥ ८॥

vāsaḥ sahaiva karttavyo dvayaniṣṭhaiśca vaiṣṇavaiḥ |karttavyā saṅgatirnaiva saṃsāriṇāṃ tu garviṇām || 8||

असात्विकाच्च लौकिकाद् वृत्तात् कार्या पृथक् स्थितिः ।औदासीन्यं परित्याज्यं श्रीवैष्णवेषु सर्वदा ॥ ९॥

asātvikācca laukikād vṛttāt kāryā pṛthak sthitiḥ |audāsīnyaṃ parityājyaṃ śrīvaiṣṇaveṣu sarvadā || 9||

मनूक्ता दश धर्माश्च पालनीयाः प्रयत्नतः ।व्रतोत्सवौ च कर्त्तव्यौ वैष्णवौ वैष्णवैर्मुदा ॥ १०॥

manūktā daśa dharmāśca pālanīyāḥ prayatnataḥ |vratotsavau ca karttavyau vaiṣṇavau vaiṣṇavairmudā || 10||

दृष्टार्थोऽननुवर्त्यो हि त्याज्यसंसारिदेहिनाम् ।रामस्य च तदीयानां निन्दा कार्या न कर्हिचित् ॥ ११॥

dṛṣṭārtho'nanuvartyo hi tyājyasaṃsāridehinām |rāmasya ca tadīyānāṃ nindā kāryā na karhicit || 11||

स्वदोषदर्शनं कार्यं सततं वैष्णवैर्जनैः ।स्वप्रशंसा न कर्त्तव्या श्रीवैष्णवैर्मुमुक्षुभिः ॥ १२॥

svadoṣadarśanaṃ kāryaṃ satataṃ vaiṣṇavairjanaiḥ |svapraśaṃsā na karttavyā śrīvaiṣṇavairmumukṣubhiḥ || 12||

स्वस्वातन्त्र्यं निवर्त्याथ वैष्णवपरतन्त्रता ।वैष्णवैरनुसन्धेया स्वीयाऽत्र सर्वदा जनैः ॥ १३॥

svasvātantryaṃ nivartyātha vaiṣṇavaparatantratā |vaiṣṇavairanusandheyā svīyā'tra sarvadā janaiḥ || 13||

परिहारश्च कर्त्तव्यो भक्तैगर्वस्य सर्वथा ।असाधूनां परित्यागः साधूनां च परिग्रहः ॥ १४॥

parihāraśca karttavyo bhaktaigarvasya sarvathā |asādhūnāṃ parityāgaḥ sādhūnāṃ ca parigrahaḥ || 14||

स्वरूपवर्धकं कार्यं सदाचार्यप्रसादनम् ।ज्ञेयश्च परमोपायः श्रीरामः सर्वकारणम् ॥ १५॥

svarūpavardhakaṃ kāryaṃ sadācāryaprasādanam |jñeyaśca paramopāyaḥ śrīrāmaḥ sarvakāraṇam || 15||

उपकारस्मृतिः कार्या रामस्य सकलेशतुः ।अमोघा संस्तुतिः कार्या रामस्य परमात्मनः ॥ १६॥

upakārasmṛtiḥ kāryā rāmasya sakaleśatuḥ |amoghā saṃstutiḥ kāryā rāmasya paramātmanaḥ || 16||

श्रीरामे च तदीयेषु निष्ठा कार्या मुमुक्षुभिः ।उपेक्षा नैव कर्त्तव्या कस्यचित् प्राणिनः खलु ॥ १७॥

śrīrāme ca tadīyeṣu niṣṭhā kāryā mumukṣubhiḥ |upekṣā naiva karttavyā kasyacit prāṇinaḥ khalu || 17||

श्रीरामज्ञानशून्याश्च दोषशून्या विभाव्यताम् ।रामवृत्तं च संश्राव्य कार्यस्तेषां समादरः ॥ १८॥

śrīrāmajñānaśūnyāśca doṣaśūnyā vibhāvyatām |rāmavṛttaṃ ca saṃśrāvya kāryasteṣāṃ samādaraḥ || 18||

निष्ठा भागवती ज्ञेया श्रीरामस्य प्रसादतः ।प्रायश्चित्तादिना नैव सन्निष्ठा जायते खलु ॥ १९॥

niṣṭhā bhāgavatī jñeyā śrīrāmasya prasādataḥ |prāyaścittādinā naiva sanniṣṭhā jāyate khalu || 19||

निषादगृद्धवृत्तं हि प्रमाणं तत्र विद्यते ।वैष्णवानां मुमुक्षूणामेते चार्था अपेक्षिताः ॥ २०॥

niṣādagṛddhavṛttaṃ hi pramāṇaṃ tatra vidyate |vaiṣṇavānāṃ mumukṣūṇāmete cārthā apekṣitāḥ || 20||

श्रीमत्सुरसुरानन्दाचार्येण निर्मिता शुभा ।वैष्णवदिनचर्येयं भूयात् कल्याणकारिणी ॥ २१॥

śrīmatsurasurānandācāryeṇa nirmitā śubhā |vaiṣṇavadinacaryeyaṃ bhūyāt kalyāṇakāriṇī || 21||

इति श्रीसुरसुरानन्दाचार्यविरचिता श्रीवैष्णवदिनचर्या सम्पूर्णा ।

iti śrīsurasurānandācāryaviracitā śrīvaiṣṇavadinacaryā sampūrṇā |