विठ्ठलकवचम् Shri Viththala Kavacham

सूत उवाच ।शिरो मे विठ्ठलः पातु कपोलं मुद्गरप्रियः ।नेत्रयोर्विष्णुरूपी च वैकुण्ठो घ्राणमेव च ॥ १॥

sūta uvāca |śiro me viṭhṭhalaḥ pātu kapolaṃ mudgarapriyaḥ |netrayorviṣṇurūpī ca vaikuṇṭho ghrāṇameva ca || 1||

मुनिसेव्यो मुखं पातु दन्तपङ्क्तिं सुरेश्वरः ।विद्याधीशस्तु मे जिह्वां कण्ठं विश्वेशवन्दितः ॥ २॥

munisevyo mukhaṃ pātu dantapaṅktiṃ sureśvaraḥ |vidyādhīśastu me jihvāṃ kaṇṭhaṃ viśveśavanditaḥ || 2||

व्यापको हृदयं पातु स्कन्धौ पातु सुखप्रदः ।भुजौ मे नृहरिः पातु करौ च सुरनायकः ॥ ३॥

vyāpako hṛdayaṃ pātu skandhau pātu sukhapradaḥ |bhujau me nṛhariḥ pātu karau ca suranāyakaḥ || 3||

मध्यं पातु सुराधीशो नाभिं पातु सुरालयः ।सुरवन्द्यः कटी पातु जानुनी कमलासनः ॥ ४॥

madhyaṃ pātu surādhīśo nābhiṃ pātu surālayaḥ |suravandyaḥ kaṭī pātu jānunī kamalāsanaḥ || 4||

जङ्घे पातु हृषीकेशः पादौ पातु त्रिविक्रमः ।निखिलं च शरीरं मे पातां गोविन्दमाधवौ ॥ ५॥

jaṅghe pātu hṛṣīkeśaḥ pādau pātu trivikramaḥ |nikhilaṃ ca śarīraṃ me pātāṃ govindamādhavau || 5||

अकारो व्यापको विष्णुरक्षरात्मक एव च ।पावकः सर्वपापानामकाराय नमो नमः ॥ ६॥

akāro vyāpako viṣṇurakṣarātmaka eva ca |pāvakaḥ sarvapāpānāmakārāya namo namaḥ || 6||

तारकः सर्वभूतानां धर्मशास्त्रेषु गीयते ।पुनातु विश्वभुवनं तोङ्काराय नमो नमः ॥ ७॥

tārakaḥ sarvabhūtānāṃ dharmaśāstreṣu gīyate |punātu viśvabhuvanaṃ toṅkārāya namo namaḥ || 7||

मूलप्रकृतिरूपा या महामाया च वैष्णवी ।तस्या बीजेन संयुक्तयकारायनमो नमः ॥ ८॥

mūlaprakṛtirūpā yā mahāmāyā ca vaiṣṇavī |tasyā bījena saṃyuktayakārāyanamo namaḥ || 8||

वैकुण्ठाधिपतिः साक्षाद्वैकुण्ठपददायकः ।वैजयन्तीसमायुक्तो विकाराय नमो नमः ॥ ९॥

vaikuṇṭhādhipatiḥ sākṣādvaikuṇṭhapadadāyakaḥ |vaijayantīsamāyukto vikārāya namo namaḥ || 9||

स्नातः सर्वेषु तीर्थेषु पूतो यज्ञादिकर्मसु ।पावनो द्विजपङ्क्तीनां ठकाराय नमो नमः ॥ १०॥

snātaḥ sarveṣu tīrtheṣu pūto yajñādikarmasu |pāvano dvijapaṅktīnāṃ ṭhakārāya namo namaḥ || 10||

वाहनं गरुडो यस्य भुजङ्गः शयनं तथा ।वामभागे च लक्ष्मीश्च लकाराय नमो नमः ॥ ११॥

vāhanaṃ garuḍo yasya bhujaṅgaḥ śayanaṃ tathā |vāmabhāge ca lakṣmīśca lakārāya namo namaḥ || 11||

नारदादिसमायुक्तं वैष्णवं परमं पदम् ।लभते मानवो नित्यं वैष्णवं धर्ममाश्रितः ॥ १२॥

nāradādisamāyuktaṃ vaiṣṇavaṃ paramaṃ padam |labhate mānavo nityaṃ vaiṣṇavaṃ dharmamāśritaḥ || 12||

व्याधयो विलयं यान्ति पूर्वकर्मसमुद्भवाः ।भूतानि च पलायन्ते मन्त्रोपासकदर्शनात् ॥ १३॥

vyādhayo vilayaṃ yānti pūrvakarmasamudbhavāḥ |bhūtāni ca palāyante mantropāsakadarśanāt || 13||

इदं षडक्षरस्तोत्रं यो जपेच्छ्रद्धयान्वितः ।विष्णोस्सायुज्यमाप्नोति सत्यं सत्यं न संशयः ॥ १४॥

idaṃ ṣaḍakṣarastotraṃ yo japecchraddhayānvitaḥ |viṣṇossāyujyamāpnoti satyaṃ satyaṃ na saṃśayaḥ || 14||

इति श्रीपद्मपुराणे विठ्ठलकवचं सम्पूर्णम् ।

iti śrīpadmapurāṇe viṭhṭhalakavacaṃ sampūrṇam |