विष्णुस्तुतिः (त्रिविक्रमपण्डितविरचिता १ श्रीमध्वसंसेवितपादपद्मं) Shri Vishnustutih

श्रीमध्वसंसेवितपादपद्मं रुद्रादिदेवैः परिसेव्यमानम् ।ऋष्यादिभिर्वेदपथैः सुगेयं कथं नु पश्येयममोघवीर्यम् ॥ १॥

śrīmadhvasaṃsevitapādapadmaṃ rudrādidevaiḥ parisevyamānam |ṛṣyādibhirvedapathaiḥ sugeyaṃ kathaṃ nu paśyeyamamoghavīryam || 1||

हृन्मन्दिरे सुन्दररत्नपीठे लक्ष्म्यात्मके सारतरे निविष्टम् ।श्रीभूसमाश्लिष्टतनुं तथाऽपि पूर्णं निजानन्दमयं परेशम् ॥ २॥

hṛnmandire sundararatnapīṭhe lakṣmyātmake sāratare niviṣṭam |śrībhūsamāśliṣṭatanuṃ tathā'pi pūrṇaṃ nijānandamayaṃ pareśam || 2||

अनन्तपूर्णेन्दुकिरीटशोभितं सुनीलस्निग्धालकशोभिसन्मुखम् ।प्रत्यग्रकञ्जायतलोललोचनं सुचम्पकाकोरकनासिकायुतम् ॥ ३॥

anantapūrṇendukirīṭaśobhitaṃ sunīlasnigdhālakaśobhisanmukham |pratyagrakañjāyatalolalocanaṃ sucampakākorakanāsikāyutam || 3||

प्रवालमध्यार्पितकुन्दकोरकं स्फुरत्कपोलद्युतिदीप्तकुण्डलम् ।केयूरभूषायुतबाहुदण्डकं सुचक्रशङ्खाब्जगदाविराजितम् ॥ ४॥

pravālamadhyārpitakundakorakaṃ sphuratkapoladyutidīptakuṇḍalam |keyūrabhūṣāyutabāhudaṇḍakaṃ sucakraśaṅkhābjagadāvirājitam || 4||

ग्रैवेयरत्नाभरणादिभूषितं सत्कौस्तुभावेष्टितकम्बुकन्धरम् ।सुवर्णसूत्राञ्चितसुन्दरोरसं विचित्रपिताम्बरधारिणं प्रभुम् ॥ ५॥

graiveyaratnābharaṇādibhūṣitaṃ satkaustubhāveṣṭitakambukandharam |suvarṇasūtrāñcitasundarorasaṃ vicitrapitāmbaradhāriṇaṃ prabhum || 5||

करिराजकरोपमोरुयुग्मं प्रियया सेवितजङ्घया समेतम् ।वरकूर्मप्रपदेन शोभमानं ह्यनभिव्यक्तसुगुल्फपादयुग्मम् ॥ ६॥

karirājakaropamoruyugmaṃ priyayā sevitajaṅghayā sametam |varakūrmaprapadena śobhamānaṃ hyanabhivyaktasugulphapādayugmam || 6||

नखराजिसुपूर्णचन्द्रकान्त्या नुतिमज्जनतापहारिणं रमेशम् ।निजपूर्णसुबोधविग्रहं परमानन्दपरात्मदैवतम् ॥ ७॥

nakharājisupūrṇacandrakāntyā nutimajjanatāpahāriṇaṃ rameśam |nijapūrṇasubodhavigrahaṃ paramānandaparātmadaivatam || 7||

॥ इति श्रीत्रिविक्रमपण्डिताचार्यविरचिता श्रीविष्णुस्तुतिः समाप्ता ॥

|| iti śrītrivikramapaṇḍitācāryaviracitā śrīviṣṇustutiḥ samāptā ||