विठ्ठलप्रबोधः Shri Viththalaprabodhah

विठ्ठलेश्वरकृतः ।जय जय तुहिनकरनिकरकुड्मलितकमलावलीनिलीनतयानिवृत्तमधुकरनिकरमधुरतरोद्घोषोद्धतिविहतनिद्रभद्र सुभद्राग्रज ॥ १॥

viṭhṭhaleśvarakṛtaḥ |jaya jaya tuhinakaranikarakuḍmalitakamalāvalīnilīnatayānivṛttamadhukaranikaramadhuratarodghoṣoddhativihatanidrabhadra subhadrāgraja || 1||

जय जय निजमुखकमलामलपरिमलाघ्राणजनितसुखातिशयेनैवसञ्जातसुखनिद्राविद्रावणभियेव नयनयुगलखञ्जरीटोन्मीलनभियेवझङ्काररहितैरलिभिरिवालकशतैः परिवृतवदनारविन्द गोविन्द ॥ २॥

jaya jaya nijamukhakamalāmalaparimalāghrāṇajanitasukhātiśayenaivasañjātasukhanidrāvidrāvaṇabhiyeva nayanayugalakhañjarīṭonmīlanabhiyevajhaṅkārarahitairalibhirivālakaśataiḥ parivṛtavadanāravinda govinda || 2||

जय जय निशाकरकरविकचकुवलयकोशनिर्यातदिवाकरकरनिकरकुञ्चितकमलावलिकोशस्थितिजनितमधुरमधुपानोन्मोदमुदितभृङ्गाङ्गनारवमधुरतरोद्घोषविद्रावितनिद्र निखिलगोपीजनजनितनिजाधारहिन्दोलान्दोलनचलदमलवलयझणत्कारेण मधुरतरनिनदवीणागीतादिभिरुन्निद्रनयनखञ्जरीटयुगल ॥ ३॥

jaya jaya niśākarakaravikacakuvalayakośaniryātadivākarakaranikarakuñcitakamalāvalikośasthitijanitamadhuramadhupānonmodamuditabhṛṅgāṅganāravamadhuratarodghoṣavidrāvitanidra nikhilagopījanajanitanijādhārahindolāndolanacaladamalavalayajhaṇatkāreṇa madhurataraninadavīṇāgītādibhirunnidranayanakhañjarīṭayugala || 3||

जय जय ततः किञ्चिदुन्मीलनोन्नतभ्रूलतासमशरासनच्युतकुसुमविशिखद्वयेनेव गोपीजनवदनशरदिन्दुविभ्रमसञ्चरत्खञ्जनयुगलेनेवहिन्दोलान्दोलनचलदमलसुभगबल्लवीगण्डमण्डलस्फुरत्ताटङ्कमार्तण्डभ्रमविकसितकमलद्वयेनेवारुणतरामलराधाधरदीधितिकिर्मीरितदरहसनप्रकटरदनावलीतुहिनकरप्रतिभटप्रभाजनितशारदशर्वरीपत्युदयभ्रमविकसितकुमुदद्वयेन प्रकटितनयनयुगेनेक्षितनिखिलनितम्बनीवृन्द ॥ ४॥

jaya jaya tataḥ kiñcidunmīlanonnatabhrūlatāsamaśarāsanacyutakusumaviśikhadvayeneva gopījanavadanaśaradinduvibhramasañcaratkhañjanayugalenevahindolāndolanacaladamalasubhagaballavīgaṇḍamaṇḍalasphurattāṭaṅkamārtaṇḍabhramavikasitakamaladvayenevāruṇatarāmalarādhādharadīdhitikirmīritadarahasanaprakaṭaradanāvalītuhinakarapratibhaṭaprabhājanitaśāradaśarvarīpatyudayabhramavikasitakumudadvayena prakaṭitanayanayugenekṣitanikhilanitambanīvṛnda || 4||

जय जय निजदृगन्तपातसोपानसमारूढमकरकेतुभिर्निजवदनशरदिन्दुसम्फुल्लातिलोललोचनकुवलयाभिरनल्पाकल्पभूषिताभिर्निजनितम्बबिम्बालङ्कृतसुधाकरकरधवलविशदसुभगतल्पाभिर्हरिकरकमलनखशरसम्पातपराजितानङ्गपृतनाभिरिव विगलितकञ्चिकाञ्चलनितम्बाम्बरभूषाभिः अतिसुभगविशदजघनकनकासनोपवेशितप्रियाभिर्निजनखदृगन्तविविधप्रसूनार्चितवल्लभाभिः सुरतविद्याविनोदचतुराभिर्भावाधिगमसमये प्रियवियोगशङ्कयान्तर्नयनद्वारं प्रवेश्यपिहितकपाटाभिरिव निमीलितनयनाभिः क्रीडित ॥ ५॥

jaya jaya nijadṛgantapātasopānasamārūḍhamakaraketubhirnijavadanaśaradindusamphullātilolalocanakuvalayābhiranalpākalpabhūṣitābhirnijanitambabimbālaṅkṛtasudhākarakaradhavalaviśadasubhagatalpābhirharikarakamalanakhaśarasampātaparājitānaṅgapṛtanābhiriva vigalitakañcikāñcalanitambāmbarabhūṣābhiḥ atisubhagaviśadajaghanakanakāsanopaveśitapriyābhirnijanakhadṛgantavividhaprasūnārcitavallabhābhiḥ suratavidyāvinodacaturābhirbhāvādhigamasamaye priyaviyogaśaṅkayāntarnayanadvāraṃ praveśyapihitakapāṭābhiriva nimīlitanayanābhiḥ krīḍita || 5||

जय जय पुनरतिनिर्वृतिविहितनिद्र जागृहि जागृहि ॥ ६॥

jaya jaya punaratinirvṛtivihitanidra jāgṛhi jāgṛhi || 6||

न यावदेष कुङ्कुमारुणांशुरिन्दिरापतेपुरन्दरीयदिङ्मुखं समेति तावदुत्थितः ।प्रमार्जयाननाम्बुजं निजाधरं च सुन्दरंकदम्बशोभितान्तरस्वतल्पमन्मथोदयम् ॥ ७॥

na yāvadeṣa kuṅkumāruṇāṃśurindirāpatepurandarīyadiṅmukhaṃ sameti tāvadutthitaḥ |pramārjayānanāmbujaṃ nijādharaṃ ca sundaraṃkadambaśobhitāntarasvatalpamanmathodayam || 7||

न चेदमी शमीतरुप्रसूनतल्पकञ्चुकंनखक्षतं च मेचकाधरं सकुङ्कुमं मुखम् ।विलोक्य नागरा जनास्त ईदृशीं तव स्थितिंप्रभो सभासु भाषितुं समुज्झितोक्तयो न हि ॥ ८॥

na cedamī śamītaruprasūnatalpakañcukaṃnakhakṣataṃ ca mecakādharaṃ sakuṅkumaṃ mukham |vilokya nāgarā janāsta īdṛśīṃ tava sthitiṃprabho sabhāsu bhāṣituṃ samujjhitoktayo na hi || 8||

स्फुरत्त्वन्मुखाम्भोजशोभानिवृत्तस्वसौन्दर्यगर्वाचलः शर्वरीशः ।ह्रिया मज्जति क्षीरवारान्निधौ तन्नखालिच्छटाभिश्च तुच्छीकृतोऽयम् ॥ ९॥

sphurattvanmukhāmbhojaśobhānivṛttasvasaundaryagarvācalaḥ śarvarīśaḥ |hriyā majjati kṣīravārānnidhau tannakhālicchaṭābhiśca tucchīkṛto'yam || 9||

दिवाकरोऽयमुत्कटस्त्वदङ्घ्रिपङ्कजार्हणंविधातुमागतोऽम्बुजैस्तदर्हणं सभाजय ।कलिन्दजा त्वदाननावलोकनाय दृक्सरोजनूंषि सम्प्रसारयत्यनङ्गकोटिसुन्दर ॥ १०॥

divākaro'yamutkaṭastvadaṅghripaṅkajārhaṇaṃvidhātumāgato'mbujaistadarhaṇaṃ sabhājaya |kalindajā tvadānanāvalokanāya dṛksarojanūṃṣi samprasārayatyanaṅgakoṭisundara || 10||

स्फुरत्सरोजनिर्गतद्विरेफयूथगायकायशोदयावतन्वते दिशं शुभाय दर्शनार्थिनः ।जगद्विलोचने हरे कुरुष्व सार्थजन्मकेकृपां कुरुष्व विठ्ठले स्वपादपद्मसेवके ॥ ११॥

sphuratsarojanirgatadvirephayūthagāyakāyaśodayāvatanvate diśaṃ śubhāya darśanārthinaḥ |jagadvilocane hare kuruṣva sārthajanmakekṛpāṃ kuruṣva viṭhṭhale svapādapadmasevake || 11||

इति विठ्ठलेश्वरकृतः श्रीविठ्ठलप्रबोधः सम्पूर्णः ।

iti viṭhṭhaleśvarakṛtaḥ śrīviṭhṭhalaprabodhaḥ sampūrṇaḥ |