रेणुकाषट्कम् Renuka Shatkam

श्रीगणेशाय नमः ।जयदेवसमूहनुते जमदग्निमुनेर्दयिते ।जननं विबुधावनि ते जगतामुपकारकृते ॥ १॥

śrīgaṇeśāya namaḥ |jayadevasamūhanute jamadagnimunerdayite |jananaṃ vibudhāvani te jagatāmupakārakṛte || 1||

विपिने विप्ने विनुता नगरे नगरे नमिता ।जयति स्थिरचित्तहिता जमदग्निमुनेर्वनिता ॥ २॥

vipine vipne vinutā nagare nagare namitā |jayati sthiracittahitā jamadagnimunervanitā || 2||

मतिकैरविणीन्दुकला मम हृत्कमले कमला ।जयति स्तुतिदूरबला जमदग्निवधूर्विमला ॥ ३॥

matikairaviṇīndukalā mama hṛtkamale kamalā |jayati stutidūrabalā jamadagnivadhūrvimalā || 3||

कलिपक्षजुषां दमनी कलुषप्रततेः शमनी ।जयति स्तुवतामवनी जगतामवतुर्जननी ॥ ४॥

kalipakṣajuṣāṃ damanī kaluṣapratateḥ śamanī |jayati stuvatāmavanī jagatāmavaturjananī || 4||

निखिलामयतापहरी निजसेवकभव्यकरी ।जमदग्निनदोपझरी जयतीश्वरचिल्लहरी ॥ ५॥

nikhilāmayatāpaharī nijasevakabhavyakarī |jamadagninadopajharī jayatīśvaracillaharī || 5||

सकलामयनाशचणे सततं स्मरतः सुगुणे ।मम कार्यगतेः प्रथमं मरणं न भवत्वधमम् ॥ ६॥

sakalāmayanāśacaṇe satataṃ smarataḥ suguṇe |mama kāryagateḥ prathamaṃ maraṇaṃ na bhavatvadhamam || 6||

॥ इति श्रीभगवन्महर्षिरमणान्तेवासिनो वासिष्ठस्यनरसिंहसूनोर्गणपतेः कृतिः रेणुकाषट्कं समाप्तम् ॥

|| iti śrībhagavanmaharṣiramaṇāntevāsino vāsiṣṭhasyanarasiṃhasūnorgaṇapateḥ kṛtiḥ reṇukāṣaṭkaṃ samāptam ||