हयग्रीवमङ्गलश्लोकाः Shri Hayagriva Mangala Shlokah

ओङ्कारपञ्जरस्थाय ओजस्तेजोधराय च ।ओषधीशालयान्तस्थवागधीशाय मङ्गलम् ॥ १॥

oṅkārapañjarasthāya ojastejodharāya ca |oṣadhīśālayāntasthavāgadhīśāya maṅgalam || 1||

हरिणाङ्कान्तरस्थाय हरिणाङ्कासनाय च ।हरिण्यधिष्ठिताङ्काय हयग्रीवाय मङ्गलम् ॥ २॥

hariṇāṅkāntarasthāya hariṇāṅkāsanāya ca |hariṇyadhiṣṭhitāṅkāya hayagrīvāya maṅgalam || 2||

यमिनामतिमोदाय यमबाधानिवारिणे ।यज्वने यज्ञपतये यज्ञाङ्गायास्तु मङ्गलम् ॥ ३॥

yamināmatimodāya yamabādhānivāriṇe |yajvane yajñapataye yajñāṅgāyāstu maṅgalam || 3||

ग्रीवाभरणयुक्ताय गीताशास्त्रप्रदायिने ।गीर्वाणानन्ददायाऽस्तु हयग्रीवाय मङ्गलम् ॥ ४॥

grīvābharaṇayuktāya gītāśāstrapradāyine |gīrvāṇānandadāyā'stu hayagrīvāya maṅgalam || 4||

वाजिवक्त्राय हरये वागीशत्वप्रदायिने ।वामाङ्कस्थाङ्गनापाङ्गसङ्गतायास्तु मङ्गलम् ॥ ५॥

vājivaktrāya haraye vāgīśatvapradāyine |vāmāṅkasthāṅganāpāṅgasaṅgatāyāstu maṅgalam || 5||

यशस्विने च चक्राब्जज्ञानपुस्तकधारिणे ।सर्वाभरणयुक्ताय सैन्धवास्याय मङ्गलम् ॥ ६॥

yaśasvine ca cakrābjajñānapustakadhāriṇe |sarvābharaṇayuktāya saindhavāsyāya maṅgalam || 6||

नतदेवेशमौलिस्थनवरत्नाङ्किताङ्घ्रये ।हेमाम्बराञ्चिताङ्गाय हेषारावाय मङ्गलम् ॥ ७॥

natadeveśamaulisthanavaratnāṅkitāṅghraye |hemāmbarāñcitāṅgāya heṣārāvāya maṅgalam || 7||

मत्स्यावतारकृत्याय मङ्गलौघप्रदायिने ।महाश्वशिरसे सर्वमङ्गलायास्तु मङ्गलम् ॥ ८॥

matsyāvatārakṛtyāya maṅgalaughapradāyine |mahāśvaśirase sarvamaṅgalāyāstu maṅgalam || 8||

मुक्तिविद्याप्रदात्रे च अनन्तफलदायिने ।पद्मपीठान्तरस्थाय पद्माश्लिष्टाय मङ्गलम् ॥ ९॥

muktividyāpradātre ca anantaphaladāyine |padmapīṭhāntarasthāya padmāśliṣṭāya maṅgalam || 9||

इति श्रीहयग्रीवमङ्गलश्लोकाः समाप्ताः ।

iti śrīhayagrīvamaṅgalaślokāḥ samāptāḥ |