हर्यष्टकम् Shri Haryashtakam

प्रह्लादकृतम् ।हरिर्हरति पापानि दुष्टचित्तैरपि स्मृतः ।अनिच्छयाऽपि संस्पृष्टो दहत्येव हि पावकः ॥ १॥

prahlādakṛtam |harirharati pāpāni duṣṭacittairapi smṛtaḥ |anicchayā'pi saṃspṛṣṭo dahatyeva hi pāvakaḥ || 1||

स गङ्गा स गया सेतुः स काशी स च पुष्करम् ।जिह्वाग्रे वर्तते यस्य हरिरित्यक्षरद्वयम् ॥ २॥

sa gaṅgā sa gayā setuḥ sa kāśī sa ca puṣkaram |jihvāgre vartate yasya harirityakṣaradvayam || 2||

वाराणस्यां कुरुक्षेत्रे नैमिशारण्य एव च ।यत्कृतं तेन येनोक्तं हरिरित्यक्षरद्वयम् ॥ ३॥

vārāṇasyāṃ kurukṣetre naimiśāraṇya eva ca |yatkṛtaṃ tena yenoktaṃ harirityakṣaradvayam || 3||

पृथिव्यां यानि तीर्थानि पुण्यान्यायतनानि च ।तानि सर्वाण्यशेषाणि हरिरित्यक्षरद्वयम् ॥ ४॥

pṛthivyāṃ yāni tīrthāni puṇyānyāyatanāni ca |tāni sarvāṇyaśeṣāṇi harirityakṣaradvayam || 4||

गवां कोटिसहस्राणि हेमकन्यासहस्रकम् ।दत्तं स्यात्तेन येनोक्तं हरिरित्यक्षरद्वयम् ॥ ५॥

gavāṃ koṭisahasrāṇi hemakanyāsahasrakam |dattaṃ syāttena yenoktaṃ harirityakṣaradvayam || 5||

ऋग्वेदोऽथ यजुर्वेदः सामवेदोऽप्यथर्वणः ।अधीतस्तेन येनोक्तं हरिरित्यक्षरद्वयम् ॥ ६॥

ṛgvedo'tha yajurvedaḥ sāmavedo'pyatharvaṇaḥ |adhītastena yenoktaṃ harirityakṣaradvayam || 6||

अश्वमेधैर्महायज्ञैर्नरमेधैस्तथैव च ।इष्टं स्यात्तेन येनोक्तं हरिरित्यक्षरद्वयम् ॥ ७॥

aśvamedhairmahāyajñairnaramedhaistathaiva ca |iṣṭaṃ syāttena yenoktaṃ harirityakṣaradvayam || 7||

प्राणः प्रयाणपाथेयं संसारव्याधिनाशनम् ।दुःखात्यन्तपरित्राणं हरिरित्यक्षरद्वयम् ॥ ८॥

prāṇaḥ prayāṇapātheyaṃ saṃsāravyādhināśanam |duḥkhātyantaparitrāṇaṃ harirityakṣaradvayam || 8||

बद्धः परिकरस्तेन मोक्षाय गमनं प्रति ।सकृदुच्चारितं येन हरिरित्यक्षरद्वयम् ॥ ९॥

baddhaḥ parikarastena mokṣāya gamanaṃ prati |sakṛduccāritaṃ yena harirityakṣaradvayam || 9||

हर्यष्टकमिदं पुण्यं प्रातरुत्थाय यः पठेत् ।आयुष्यं बलमारोग्यं यशो वृद्धिश्श्रियावहम् ॥ १०॥

haryaṣṭakamidaṃ puṇyaṃ prātarutthāya yaḥ paṭhet |āyuṣyaṃ balamārogyaṃ yaśo vṛddhiśśriyāvaham || 10||

प्रह्लादेन कृतं स्तोत्रं दुःखसागरशोषणम् ।यः पठेत्स नरो याति तद्विष्णोः परमं पदम् ॥ ११॥

prahlādena kṛtaṃ stotraṃ duḥkhasāgaraśoṣaṇam |yaḥ paṭhetsa naro yāti tadviṣṇoḥ paramaṃ padam || 11||

इति प्रह्लादकृतं श्रीहर्यष्टकं सम्पूर्णम् ।

iti prahlādakṛtaṃ śrīharyaṣṭakaṃ sampūrṇam |