हयग्रीवमङ्गलम् हयग्रीवमङ्गलाष्टकम् Shri Hayagriva Mangalam

मङ्गलं श्रीहयास्याय वेदाहरणकर्मणे ।प्रणवोद्गीतवपुषे हयग्रीवाय मङ्गलम् ॥ १॥

maṅgalaṃ śrīhayāsyāya vedāharaṇakarmaṇe |praṇavodgītavapuṣe hayagrīvāya maṅgalam || 1||

चतुःषष्टिकलाधीश! विश्वग्रूप! हयानन!।महार्णवाम्बुपर्यङ्क! विष्णवे तेऽस्तु मङ्गलम् ॥ २॥

catuḥṣaṣṭikalādhīśa! viśvagrūpa! hayānana!|mahārṇavāmbuparyaṅka! viṣṇave te'stu maṅgalam || 2||

अनिरुद्धाय सौम्याय वेदभर्त्रे सनातन! ।श्रीदाय श्रीमयायास्तु मङ्गलं स्वामिने तव ॥ ३॥

aniruddhāya saumyāya vedabhartre sanātana! |śrīdāya śrīmayāyāstu maṅgalaṃ svāmine tava || 3||

भद्रश्रीवत्सहाराढ्य! पञ्चरात्रप्रवर्तक!।भक्तात्मभावभवन! मङ्गलं तेऽस्तु मुक्तिद ॥ ४॥

bhadraśrīvatsahārāḍhya! pañcarātrapravartaka!|bhaktātmabhāvabhavana! maṅgalaṃ te'stu muktida || 4||

सर्वकर्मसमाराध्य! पूर्णषाड्गुण्यविग्रह!।श्रिया गाढोपगूढात्मन्! मङ्गलं ते हयानन!॥ ५॥

sarvakarmasamārādhya! pūrṇaṣāḍguṇyavigraha!|śriyā gāḍhopagūḍhātman! maṅgalaṃ te hayānana!|| 5||

अङ्केनोदूह्य वाग्देवीमाचार्यकमुपाश्रित!।मङ्गलं तेऽस्तु वागीश! श्रीनिधे! श्रीनिकेतन ॥ ६॥

aṅkenodūhya vāgdevīmācāryakamupāśrita!|maṅgalaṃ te'stu vāgīśa! śrīnidhe! śrīniketana || 6||

स्वराजे च विराजे च संराजे ते हयानन!।वेदकर्त्रे वेदभर्त्रे वेदहर्त्रेऽस्तु मङ्गलम् ॥ ७॥

svarāje ca virāje ca saṃrāje te hayānana!|vedakartre vedabhartre vedahartre'stu maṅgalam || 7||

क्षमासाराय हरये दयाघन! हयानन!।वेदवेदान्तवेद्याय सर्वदा तव मङ्गलम् ॥ ८॥

kṣamāsārāya haraye dayāghana! hayānana!|vedavedāntavedyāya sarvadā tava maṅgalam || 8||

श्रीरङ्गनाथेन भक्तेन हयग्रीवस्य मङ्गलम् ।रचितं प्रीतये तस्य भूयात् सर्वत्र मङ्गलम् ॥ ९॥

śrīraṅganāthena bhaktena hayagrīvasya maṅgalam |racitaṃ prītaye tasya bhūyāt sarvatra maṅgalam || 9||

इति श्रीहयग्रीवमङ्गलं सम्पूर्णम् ।

iti śrīhayagrīvamaṅgalaṃ sampūrṇam |