हयग्रीव प्रार्थना द्वादशकम् Shri Hayagriva Prarthana Dvadashakam

नमोवेदान्तनिधये शास्त्राणां पतये नमः ।यज्ञानां निधये तुभ्यं कर्मणां फलदायिने ॥ १॥

namovedāntanidhaye śāstrāṇāṃ pataye namaḥ |yajñānāṃ nidhaye tubhyaṃ karmaṇāṃ phaladāyine || 1||

विद्याधराय योगाय वागीशाय नमो नमः ।अचिन्त्याय नमो नित्यं सर्वज्ञानात्मने नमः ॥ २॥

vidyādharāya yogāya vāgīśāya namo namaḥ |acintyāya namo nityaṃ sarvajñānātmane namaḥ || 2||

ऋक्मूर्तिस्त्वं महाबाहो! यजुर्मूर्तिरधोक्षजः ।साममूर्तिस्त्वमेवाद्यः सर्वदाऽथर्वमूर्तिमान् ॥ ३॥

ṛkmūrtistvaṃ mahābāho! yajurmūrtiradhokṣajaḥ |sāmamūrtistvamevādyaḥ sarvadā'tharvamūrtimān || 3||

सर्वज्ञानमयोऽसि त्वं हतज्ञानोऽहमच्युत !।देहि मे सर्वविज्ञानं हयग्रीव! नमोऽस्तु ते ॥ ४॥

sarvajñānamayo'si tvaṃ hatajñāno'hamacyuta !|dehi me sarvavijñānaṃ hayagrīva! namo'stu te || 4||

प्रपन्नोऽहं हयग्रीवं प्रपन्नार्तिहरं हरिम् ।यस्य प्रसादलेशेन वागीशत्वमुपाविशत् ॥ ५॥

prapanno'haṃ hayagrīvaṃ prapannārtiharaṃ harim |yasya prasādaleśena vāgīśatvamupāviśat || 5||

धन्योऽहं कृतकृत्योऽहं मुक्तोऽहं कर्मबन्धनैः ।हयग्रीवपदाम्भोजस्मरणेनैव चेतसा ॥ ६॥

dhanyo'haṃ kṛtakṛtyo'haṃ mukto'haṃ karmabandhanaiḥ |hayagrīvapadāmbhojasmaraṇenaiva cetasā || 6||

श्रीभूनीळादिसहितं सर्वाभरणभूषितम् ।हयग्रीवमहं वन्दे चक्रपद्मधरं हरिम् ॥ ७॥

śrībhūnīḷādisahitaṃ sarvābharaṇabhūṣitam |hayagrīvamahaṃ vande cakrapadmadharaṃ harim || 7||

शङ्खचक्रमहापद्मज्ञानपुस्तकधारिणम् ।हयग्रीवमहं वन्दे विद्यैश्वर्यप्रदायकम् ॥ ८॥

śaṅkhacakramahāpadmajñānapustakadhāriṇam |hayagrīvamahaṃ vande vidyaiśvaryapradāyakam || 8||

शुद्धस्फटिकसङ्काशं पुण्डरीकायतेक्षणम् ।सर्वशास्त्रप्रदातारं हयग्रीवमुपास्महे ॥ ९॥

śuddhasphaṭikasaṅkāśaṃ puṇḍarīkāyatekṣaṇam |sarvaśāstrapradātāraṃ hayagrīvamupāsmahe || 9||

ज्ञानानन्दमयन्देवं निर्मलस्फटिकाकृतिम् ।आधारं सर्वविद्यानां हयग्रीवमुपास्महे ॥ १०॥

jñānānandamayandevaṃ nirmalasphaṭikākṛtim |ādhāraṃ sarvavidyānāṃ hayagrīvamupāsmahe || 10||

शङ्खचक्रमहामुद्रापुस्तकाढ्यं चतुर्भुजम् ।सम्पूर्णचन्द्रसङ्काशं हयग्रीवमुपास्महे ॥ ११॥

śaṅkhacakramahāmudrāpustakāḍhyaṃ caturbhujam |sampūrṇacandrasaṅkāśaṃ hayagrīvamupāsmahe || 11||

विशुद्धविज्ञानघनस्वरूपं विज्ञानविश्राणनबद्धदीक्षम् ।दयानिधिं देहभृतां शरण्यं देवं हयग्रीवमहं प्रपद्ये ॥ १२॥

viśuddhavijñānaghanasvarūpaṃ vijñānaviśrāṇanabaddhadīkṣam |dayānidhiṃ dehabhṛtāṃ śaraṇyaṃ devaṃ hayagrīvamahaṃ prapadye || 12||

इति श्रीहयग्रीवप्रार्थनाद्वादशकं सम्पूर्णम् ।

iti śrīhayagrīvaprārthanādvādaśakaṃ sampūrṇam |