ॐ नमो नारायणाय अष्टाक्षरमाहात्म्यम् Om Namo Narayanaya Ashtaksharamahatmyam

श्रीशुक उवाचकिं जपन् मुच्यते तात सततं विष्णुतत्परः ।संसारदुःखात् सर्वेषां हिताय वद मे पितः ॥ १॥

śrīśuka uvācakiṃ japan mucyate tāta satataṃ viṣṇutatparaḥ |saṃsāraduḥkhāt sarveṣāṃ hitāya vada me pitaḥ || 1||

व्यास उवाचअष्टाक्षरं प्रवक्ष्यामि मन्त्राणां मन्त्रमुत्तमम् ।यं जपन् मुच्यते मर्त्यो जन्मसंसारबन्धनात् ॥ २॥

vyāsa uvācaaṣṭākṣaraṃ pravakṣyāmi mantrāṇāṃ mantramuttamam |yaṃ japan mucyate martyo janmasaṃsārabandhanāt || 2||

हृत्पुण्डरीकमध्यस्थं शङ्खचक्रगदाधरम् ।एकाग्रमनसा ध्यात्वा विष्णुं कुर्याज्जपं द्विजः ॥ ३॥

hṛtpuṇḍarīkamadhyasthaṃ śaṅkhacakragadādharam |ekāgramanasā dhyātvā viṣṇuṃ kuryājjapaṃ dvijaḥ || 3||

एकान्ते निर्जनस्थाने विष्णवग्रे वा जलान्तिके ।जपेदष्टाक्षरं मन्त्रं चित्ते विष्णुं निधाय वै ॥ ४॥

ekānte nirjanasthāne viṣṇavagre vā jalāntike |japedaṣṭākṣaraṃ mantraṃ citte viṣṇuṃ nidhāya vai || 4||

अष्टाक्षरस्य मन्त्रस्य ऋषिर्नारायणः स्वयम् ।छन्दश्च दैवी गायत्री परमात्मा च देवता ॥ ५॥

aṣṭākṣarasya mantrasya ṛṣirnārāyaṇaḥ svayam |chandaśca daivī gāyatrī paramātmā ca devatā || 5||

शुक्लवर्णं च ॐकारं नकारं रक्तमुच्यते ।मोकारं वर्णतः कृष्णं नाकारं रक्तमुच्यते ॥ ६॥

śuklavarṇaṃ ca oṃkāraṃ nakāraṃ raktamucyate |mokāraṃ varṇataḥ kṛṣṇaṃ nākāraṃ raktamucyate || 6||

राकारं कुङ्कुमाभं तु यकारं पीतमुच्यते ।णाकारमञ्जनाभं तु यकारं बहुवर्णकम् ॥ ७॥

rākāraṃ kuṅkumābhaṃ tu yakāraṃ pītamucyate |ṇākāramañjanābhaṃ tu yakāraṃ bahuvarṇakam || 7||

ॐ नमो नारायणायेति मन्त्रः सर्वार्थसाधकः ।भक्तानां जपतां तात स्वर्गमोक्षफलप्रदः ।वेदानां प्रणवेनैष सिद्धो मन्त्रः सनातनः ॥ ८॥

oṃ namo nārāyaṇāyeti mantraḥ sarvārthasādhakaḥ |bhaktānāṃ japatāṃ tāta svargamokṣaphalapradaḥ |vedānāṃ praṇavenaiṣa siddho mantraḥ sanātanaḥ || 8||

सर्वपापहरः श्रीमान् सर्वमन्त्रेषु चोत्तमः ।एनमष्टाक्षरं मन्त्रं जपन्नारायणं स्मरेत् ॥ ९॥

sarvapāpaharaḥ śrīmān sarvamantreṣu cottamaḥ |enamaṣṭākṣaraṃ mantraṃ japannārāyaṇaṃ smaret || 9||

संध्यावसाने सततं सर्वपापैः प्रमुच्यते ।एष एव परो मन्त्र एष एव परं तपः ॥ १०॥

saṃdhyāvasāne satataṃ sarvapāpaiḥ pramucyate |eṣa eva paro mantra eṣa eva paraṃ tapaḥ || 10||

एष एव परो मोक्ष एष स्वर्ग उदाहृतः ।सर्ववेदरहस्येभ्यः सार एष समुद्धॄतः ॥ ११॥

eṣa eva paro mokṣa eṣa svarga udāhṛtaḥ |sarvavedarahasyebhyaḥ sāra eṣa samuddhṝtaḥ || 11||

विष्णुना वैष्णवानां हि हिताय मनुजां पुरा ।एवं ज्ञात्वा ततो विप्रो ह्यष्टाक्षरमिमं स्मरेत् ॥ १२॥

viṣṇunā vaiṣṇavānāṃ hi hitāya manujāṃ purā |evaṃ jñātvā tato vipro hyaṣṭākṣaramimaṃ smaret || 12||

स्नात्वा शुचिः शुचौ देशे जपेत् पापविशुद्धये ।जपे दाने च होमे च गमने ध्यानपर्वसु ॥ १३॥

snātvā śuciḥ śucau deśe japet pāpaviśuddhaye |jape dāne ca home ca gamane dhyānaparvasu || 13||

जपेन्नारायणं मन्त्रं कर्मपूर्वे परे तथा ।जपेत्सहस्रं नियुतं शुचिर्भूत्वा समाहितः ॥ १४॥

japennārāyaṇaṃ mantraṃ karmapūrve pare tathā |japetsahasraṃ niyutaṃ śucirbhūtvā samāhitaḥ || 14||

मासि मासि तु द्वादश्यां विष्णुभक्तो द्विजोत्तमः ।स्नात्वा शुचिर्जपेद्यस्तु नमो नारायणं शतम् ॥ १५॥

māsi māsi tu dvādaśyāṃ viṣṇubhakto dvijottamaḥ |snātvā śucirjapedyastu namo nārāyaṇaṃ śatam || 15||

स गच्छेत् परमं देवं नारायणमनामयम् ।गन्धपुष्पादिभिर्विष्णुमनेनाराध्य यो जपेत् ॥ १६॥

sa gacchet paramaṃ devaṃ nārāyaṇamanāmayam |gandhapuṣpādibhirviṣṇumanenārādhya yo japet || 16||

महापातकयुक्तोऽपि मुच्यते नात्र संशयः ।हृदि कृत्वा हरिं देवं मन्त्रमेनं तु यो जपेत् ॥ १७॥

mahāpātakayukto'pi mucyate nātra saṃśayaḥ |hṛdi kṛtvā hariṃ devaṃ mantramenaṃ tu yo japet || 17||

सर्वपापविशुद्धात्मा स गच्छेत् परमां गतिम् ।प्रथमेन तु लक्षेण आत्मशुद्धिर्भविष्यति ॥ १८॥

sarvapāpaviśuddhātmā sa gacchet paramāṃ gatim |prathamena tu lakṣeṇa ātmaśuddhirbhaviṣyati || 18||

द्वितीयेन तु लक्षेण मनुसिद्धिमवाप्नुयात् ।तृतीयेन तु लक्षेण स्वर्गलोकमवाप्नुयात् ॥ १९॥

dvitīyena tu lakṣeṇa manusiddhimavāpnuyāt |tṛtīyena tu lakṣeṇa svargalokamavāpnuyāt || 19||

चतुर्थेन तु लक्षेण हरेः सामीप्यमाप्नुयात् ।पञ्चमेन तु लक्षेण निर्मलं ज्ञानमाप्नुयात् ॥ २०॥

caturthena tu lakṣeṇa hareḥ sāmīpyamāpnuyāt |pañcamena tu lakṣeṇa nirmalaṃ jñānamāpnuyāt || 20||

तथा षष्ठेन लक्षेण भवेद्विष्णौ स्थिरा मतिः ।सप्तमेन तु लक्षेण स्वरूपं प्रतिपद्यते ॥ २१॥

tathā ṣaṣṭhena lakṣeṇa bhavedviṣṇau sthirā matiḥ |saptamena tu lakṣeṇa svarūpaṃ pratipadyate || 21||

अष्टमेन तु लक्षेण निर्वाणमधिगच्छति ।स्वस्वधर्मसमायुक्तो जपं कुर्याद् द्विजोत्तमः ॥ २२॥

aṣṭamena tu lakṣeṇa nirvāṇamadhigacchati |svasvadharmasamāyukto japaṃ kuryād dvijottamaḥ || 22||

एतत् सिद्धिकरं मन्त्रमष्टाक्षरमतन्द्रितः ।दुःस्वप्नासुरपैशाचा उरगा ब्रह्मराक्षसाः ॥ २३॥

etat siddhikaraṃ mantramaṣṭākṣaramatandritaḥ |duḥsvapnāsurapaiśācā uragā brahmarākṣasāḥ || 23||

जापिनं नोपसर्पन्ति चौरक्षुद्राधयस्तथा ।एकाग्रमनसाव्यग्रो विष्णुभक्तो दृढव्रतः ॥ २४॥

jāpinaṃ nopasarpanti caurakṣudrādhayastathā |ekāgramanasāvyagro viṣṇubhakto dṛḍhavrataḥ || 24||

जपेन्नारायणं मन्त्रमेतन्मृत्युभयापहम् ।मन्त्राणां परमो मन्त्रो देवतानां च दैवतम् ॥ २५॥

japennārāyaṇaṃ mantrametanmṛtyubhayāpaham |mantrāṇāṃ paramo mantro devatānāṃ ca daivatam || 25||

गुह्यानां परमं गुह्यमोंकाराद्यक्षराष्टकम् ।आयुष्यं धनपुत्रांश्च पशून् विद्यां महद्यशः ॥ २६॥

guhyānāṃ paramaṃ guhyamoṃkārādyakṣarāṣṭakam |āyuṣyaṃ dhanaputrāṃśca paśūn vidyāṃ mahadyaśaḥ || 26||

धर्मार्थकाममोक्षांश्च लभते च जपन्नरः ।एतत् सत्यं च धर्म्यं च वेदश्रुतिनिदर्शनात् ॥ २७॥

dharmārthakāmamokṣāṃśca labhate ca japannaraḥ |etat satyaṃ ca dharmyaṃ ca vedaśrutinidarśanāt || 27||

एतत् सिद्धिकरं नृणां मन्त्ररूपं न संशयः ।ऋषयः पितरो देवाः सिद्धास्त्वसुरराक्षसाः ॥ २८॥

etat siddhikaraṃ nṛṇāṃ mantrarūpaṃ na saṃśayaḥ |ṛṣayaḥ pitaro devāḥ siddhāstvasurarākṣasāḥ || 28||

एतदेव परं जप्त्वा परां सिद्धिमितो गताः ।ज्ञात्वा यस्त्वात्मनः कालं शास्त्रान्तरविधानतः ।अन्तकाले जपन्नेति तद्विष्णोः परमं पदम् ॥ २९॥

etadeva paraṃ japtvā parāṃ siddhimito gatāḥ |jñātvā yastvātmanaḥ kālaṃ śāstrāntaravidhānataḥ |antakāle japanneti tadviṣṇoḥ paramaṃ padam || 29||

नारायणाय नम इत्ययमेव सत्यंसंसारघोरविषसंहरणाय मन्त्रः ।शृण्वन्तु भव्यमतयो मुदितास्त्वरागाउच्चैस्तरामुपदिशाम्यहमूर्ध्वबाहुः ॥ ३०॥

nārāyaṇāya nama ityayameva satyaṃsaṃsāraghoraviṣasaṃharaṇāya mantraḥ |śṛṇvantu bhavyamatayo muditāstvarāgāuccaistarāmupadiśāmyahamūrdhvabāhuḥ || 30||

भूत्वोर्ध्वबाहुरद्याहं सत्यपूर्वं ब्रवीम्यहम् ।हे पुत्र शिष्याः शृणुत न मन्त्रोऽष्टाक्षरात्परः ॥ ३१॥

bhūtvordhvabāhuradyāhaṃ satyapūrvaṃ bravīmyaham |he putra śiṣyāḥ śṛṇuta na mantro'ṣṭākṣarātparaḥ || 31||

सत्यं सत्यं पुनः सत्यमुत्क्षिप्य भुजमुच्यते ।वेदाच्छास्त्रं परं नास्ति न देवः केशवात् परः ॥ ३२॥

satyaṃ satyaṃ punaḥ satyamutkṣipya bhujamucyate |vedācchāstraṃ paraṃ nāsti na devaḥ keśavāt paraḥ || 32||

आलोच्य सर्वशास्त्राणि विचार्य च पुनः पुनः ।इदमेकं सुनिष्पन्नं ध्येयो नारायणः सदा ॥ ३३॥

ālocya sarvaśāstrāṇi vicārya ca punaḥ punaḥ |idamekaṃ suniṣpannaṃ dhyeyo nārāyaṇaḥ sadā || 33||

इत्येतत् सकलं प्रोक्तं शिष्याणां तव पुण्यदम् ।कथाश्च विविधाः प्रोक्ता मया भज जनार्दनम् ॥ ३४॥

ityetat sakalaṃ proktaṃ śiṣyāṇāṃ tava puṇyadam |kathāśca vividhāḥ proktā mayā bhaja janārdanam || 34||

अष्टाक्षरमिमं मन्त्रं सर्वदुःखविनाशनम् ।जप पुत्र महाबुद्धे यदि सिद्धिमभीप्ससि ॥ ३५॥

aṣṭākṣaramimaṃ mantraṃ sarvaduḥkhavināśanam |japa putra mahābuddhe yadi siddhimabhīpsasi || 35||

इदं स्तवं व्यासमुखात्तु निस्सृतंसंध्यात्रये ये पुरुषाः पठन्ति ।ते धौतपाण्डुरपटा इव राजहंसाःसंसारसागरमपेतभयास्तरन्ति ॥ ३६॥

idaṃ stavaṃ vyāsamukhāttu nissṛtaṃsaṃdhyātraye ye puruṣāḥ paṭhanti |te dhautapāṇḍurapaṭā iva rājahaṃsāḥsaṃsārasāgaramapetabhayāstaranti || 36||

इति श्रीनरसिंहपुराणे अष्टाक्षरमाहात्म्यं नाम सप्तदशोऽध्यायः ॥ १७॥

iti śrīnarasiṃhapurāṇe aṣṭākṣaramāhātmyaṃ nāma saptadaśo'dhyāyaḥ || 17||

णरसिम्हपुरन अध्याय १७

ṇarasimhapurana adhyāya 17