पञ्चपञ्चाशद्विष्णुनामानि Panchapanchashadvishnunamani

अग्निरुवाचजपन् वै पञ्चपञ्चाशद्विष्णुनामानि यो नरः ।मन्त्रजप्यादिफलभाक्तीर्थेष्वर्चादि चाक्षयम् ॥ १॥

agniruvācajapan vai pañcapañcāśadviṣṇunāmāni yo naraḥ |mantrajapyādiphalabhāktīrtheṣvarcādi cākṣayam || 1||

पुष्करे पुण्डरीकाक्षं गयायाञ्च गदाधरम् ।राघवञ्चित्रकूटे तु प्रभासे दैत्यसूदनम् ॥ २॥

puṣkare puṇḍarīkākṣaṃ gayāyāñca gadādharam |rāghavañcitrakūṭe tu prabhāse daityasūdanam || 2||

जयं जयन्त्यां तद्वच्च जयन्तं हस्तिनापुरे ।वाराहं वर्धमाने च काश्मीरे चक्रपाणिनम् ॥ ३॥

jayaṃ jayantyāṃ tadvacca jayantaṃ hastināpure |vārāhaṃ vardhamāne ca kāśmīre cakrapāṇinam || 3||

जनार्दनञ्च कुब्जाम्रे मथुरायाञ्च केशवम् ।कुब्जाम्रके हृषीकेशं गङ्गाद्वारे जटाधरम् ॥ ४॥

janārdanañca kubjāmre mathurāyāñca keśavam |kubjāmrake hṛṣīkeśaṃ gaṅgādvāre jaṭādharam || 4||

शालग्रामे महायोगं हरिं गोबर्धनाचले ।पिण्डारके चतुर्वाहुं शङ्खोद्धारे च शङ्खिनम् ॥ ५॥

śālagrāme mahāyogaṃ hariṃ gobardhanācale |piṇḍārake caturvāhuṃ śaṅkhoddhāre ca śaṅkhinam || 5||

वामनञ्च कुरुक्षेत्रे यमुनायां त्रिविक्रमम् ।विश्वेश्वरं तथा शोणे कपिलं पूर्वसागरे ॥ ६॥

vāmanañca kurukṣetre yamunāyāṃ trivikramam |viśveśvaraṃ tathā śoṇe kapilaṃ pūrvasāgare || 6||

विष्णुं महोदधौ विद्याद्गङ्गासागरसङ्गमे ।वनमालञ्च किष्किन्ध्यां देवं रैवतकं विदुः ॥ ७॥

viṣṇuṃ mahodadhau vidyādgaṅgāsāgarasaṅgame |vanamālañca kiṣkindhyāṃ devaṃ raivatakaṃ viduḥ || 7||

काशीतटे महायोगं विरजायां रिपुञ्जयम् ।विशाखयूपे ह्यजितन्नेपाले लोकभावनम् ॥ ८॥

kāśītaṭe mahāyogaṃ virajāyāṃ ripuñjayam |viśākhayūpe hyajitannepāle lokabhāvanam || 8||

द्वारकायां विद्धि कृष्णं मन्दरे मधुसूदनम् ।लोकाकुले रिपुहरं शालग्रामे हरिं स्मरेत् ॥ ९॥

dvārakāyāṃ viddhi kṛṣṇaṃ mandare madhusūdanam |lokākule ripuharaṃ śālagrāme hariṃ smaret || 9||

पुरुषं पूरुषवटे विमले च जगत्प्रभुम् ।अनन्तं सैन्धवारण्ये दण्डके शार्ङ्गधारिणम् ॥ १०॥

puruṣaṃ pūruṣavaṭe vimale ca jagatprabhum |anantaṃ saindhavāraṇye daṇḍake śārṅgadhāriṇam || 10||

उत्पलावर्तके सौरीं नर्मदायां श्रियः पतिम् ।दामोदरं रैवतके नन्दायां जलशायिनम् ॥ ११॥

utpalāvartake saurīṃ narmadāyāṃ śriyaḥ patim |dāmodaraṃ raivatake nandāyāṃ jalaśāyinam || 11||

गोपीश्वरञ्च सिन्ध्वब्धौ माहेन्द्रे चाच्युतं विटुः ।सहाद्रौ देवदेवेशं वैकुण्ठं मागधे वने ॥ १२॥

gopīśvarañca sindhvabdhau māhendre cācyutaṃ viṭuḥ |sahādrau devadeveśaṃ vaikuṇṭhaṃ māgadhe vane || 12||

सर्वपापहरं विन्ध्ये औड्रे तु पुरुषोत्तमम् ।आत्मानं हृदये विद्धि जपतां भुक्तिमुक्तिदम् ॥ १३॥

sarvapāpaharaṃ vindhye auḍre tu puruṣottamam |ātmānaṃ hṛdaye viddhi japatāṃ bhuktimuktidam || 13||

वटे वटे वैश्रवणं चत्वरे चत्वरे शिवम् ।पर्वते पर्वते रामं सर्वत्र मधुसूदनम् ॥ १४॥

vaṭe vaṭe vaiśravaṇaṃ catvare catvare śivam |parvate parvate rāmaṃ sarvatra madhusūdanam || 14||

नरं भूमौ तथा व्योम्नि वशिष्ठे गरुडध्वजम् ।वासुदेवञ्च सर्वत्र संस्मरन् भुक्तिमुक्तिभाक् ॥ १५॥

naraṃ bhūmau tathā vyomni vaśiṣṭhe garuḍadhvajam |vāsudevañca sarvatra saṃsmaran bhuktimuktibhāk || 15||

नामान्येतानि विष्णोश्च जप्त्वा सर्वमवाप्नुयात् ।क्षेत्रेष्वेतेषु यत् श्राद्धं दानं जप्यञ्च तर्पणम् ॥ १६॥

nāmānyetāni viṣṇośca japtvā sarvamavāpnuyāt |kṣetreṣveteṣu yat śrāddhaṃ dānaṃ japyañca tarpaṇam || 16||

तत्सर्वं कोटिगुणितं मृतो ब्रह्ममयो भवेत् ।यः पठेत् शृणुयाद्वापि निर्मलः स्वर्गमाप्नुयात् ॥ १७॥

tatsarvaṃ koṭiguṇitaṃ mṛto brahmamayo bhavet |yaḥ paṭhet śṛṇuyādvāpi nirmalaḥ svargamāpnuyāt || 17||

इत्याग्नेये महापुराणे पञ्चपञ्चाशद्विष्णुनामानि नामचतुरधिकत्रिशततमोऽध्यायः ॥ ३०४॥

ityāgneye mahāpurāṇe pañcapañcāśadviṣṇunāmāni nāmacaturadhikatriśatatamo'dhyāyaḥ || 304||