अलङ्करणमालिकास्तुतिः Alankaranamalikastutih

अलङ्करणमालिकास्तुतिः ।कमलवनावळिभोग्यं कलशपयोराशिराजसौभाग्यम् ।किमपि हयाननभाग्यं कलयतु मां स्वगुणविनुतिकृतियोग्यम् ॥ १॥

alaṅkaraṇamālikāstutiḥ |kamalavanāvaḷibhogyaṃ kalaśapayorāśirājasaubhāgyam |kimapi hayānanabhāgyaṃ kalayatu māṃ svaguṇavinutikṛtiyogyam || 1||

हरणायाखिलविपदां करणान्येकादशापि विनियम्य ।श्लोकैरेकादशभिर्लोकेशित्रीं स्तुवे प्रसीदतु सा ॥ २॥

haraṇāyākhilavipadāṃ karaṇānyekādaśāpi viniyamya |ślokairekādaśabhirlokeśitrīṃ stuve prasīdatu sā || 2||

अं (ब वि) धूमणि भवतीमम्बुरुहाक्षोऽपि वक्षसि बिभर्ति ।किम्बहुनाऽखिलजगतां त्वं बहुमान्या सुधाम्बुनिधिकन्या ॥ ३॥

aṃ (ba vi) dhūmaṇi bhavatīmamburuhākṣo'pi vakṣasi bibharti |kimbahunā'khilajagatāṃ tvaṃ bahumānyā sudhāmbunidhikanyā || 3||

निरुपमवरतमसुगुणाङ्कुरनिकुरुं(बालवा) लभूतां त्वाम् ।तुरगवदनस्य तरुणीं तरुणाम्बुजलोचनां श्रये शरणम् ॥ ४॥

nirupamavaratamasuguṇāṅkuranikuruṃ(bālavā) labhūtāṃ tvām |turagavadanasya taruṇīṃ taruṇāmbujalocanāṃ śraye śaraṇam || 4||

शुभदाय(कौलव) णिमप्रभवौ ननु जननि तव विदितविभवौ ।पादौ वितीर्णमोदौ श्रीदौ स्यातां ममाब्जदायादौ ॥ ५॥

śubhadāya(kaulava) ṇimaprabhavau nanu janani tava viditavibhavau |pādau vitīrṇamodau śrīdau syātāṃ mamābjadāyādau || 5||

हरिदर्शनसविकसनं हारि ममामोदिषट्पदोल्लसनम् ।हृदयाम्बुजं शरण्याहयमुखदायि (तैतुल) लितलावण्या ॥ ६॥

haridarśanasavikasanaṃ hāri mamāmodiṣaṭpadollasanam |hṛdayāmbujaṃ śaraṇyāhayamukhadāyi (taitula) litalāvaṇyā || 6||

शिशिरमयूखावरजं वसितहयग्रीवममृतसा(गरज)म् ।भजतां भवभरतापं नयतां नः किमपि धाम तल्लोकम् ॥ ७॥

śiśiramayūkhāvarajaṃ vasitahayagrīvamamṛtasā(garaja)m |bhajatāṃ bhavabharatāpaṃ nayatāṃ naḥ kimapi dhāma tallokam || 7||

कञ्चि(द्वणिग्ज)न इव न्यासधनी मौग्ध्यमम्ब तव वीक्ष्य ।त्वयि विक्रीयाणुतमं स्वमहो लभते महाविभूतिं त्वत् ॥ ८॥

kañci(dvaṇigja)na iva nyāsadhanī maugdhyamamba tava vīkṣya |tvayi vikrīyāṇutamaṃ svamaho labhate mahāvibhūtiṃ tvat || 8||

भुवनावनतिर्निद्रा सवनाशननाथकृतनुतिकृपार्द्रा ।धुवतात्काचिन्मुद्रा भवतापं भव्यदायिनी (भद्रा) ॥ ९॥

bhuvanāvanatirnidrā savanāśananāthakṛtanutikṛpārdrā |dhuvatātkācinmudrā bhavatāpaṃ bhavyadāyinī (bhadrā) || 9||

(शकुनि) ध्वजाविभाज्यं सकलं तत्किमपि तस्य साम्राज्यम् ।दत्तां विभवं प्राज्यं तत्तादृशमखिलविबुधपरिपूज्यम् ॥ १०॥

(śakuni) dhvajāvibhājyaṃ sakalaṃ tatkimapi tasya sāmrājyam |dattāṃ vibhavaṃ prājyaṃ tattādṛśamakhilavibudhaparipūjyam || 10||

सुचतुरमतिरपि यस्ते नचरणकमलद्वयीं नमेज्जातु ।अ(चतुष्पा) त्वर एव स नच विशयोऽत्रास्ति वचननिचयैः किम् ॥(नागव) रभोगवाहौ रागवती भगवतीह वागीशे ।द्रागवतात्प्रचुरभवोद्वेगवतोऽस्मान्कृपाझरी काऽपि ॥ १२॥

sucaturamatirapi yaste nacaraṇakamaladvayīṃ namejjātu |a(catuṣpā) tvara eva sa naca viśayo'trāsti vacananicayaiḥ kim ||(nāgava) rabhogavāhau rāgavatī bhagavatīha vāgīśe |drāgavatātpracurabhavodvegavato'smānkṛpājharī kā'pi || 12||

भवभरतपर्तुतापा भवन्ति तेऽमी चिरं न साटोपाः ।कमलापाङ्गामानसके (किंस्तुघ्नं) त्यमून्घनस्मेराः ॥ १३॥

bhavabharatapartutāpā bhavanti te'mī ciraṃ na sāṭopāḥ |kamalāpāṅgāmānasake (kiṃstughnaṃ) tyamūnghanasmerāḥ || 13||

कल्याणगुणस्यूतां कान्त्याश्लेषेण सन्ततं स्फीताम् ।तनुतां हृद्यां जगतां माताऽलङ्करणमालिकामेताम् ॥ १४॥

kalyāṇaguṇasyūtāṃ kāntyāśleṣeṇa santataṃ sphītām |tanutāṃ hṛdyāṃ jagatāṃ mātā'laṅkaraṇamālikāmetām || 14||

एषां महिशूरेश्वरकृष्णक्ष्मापालरत्नवंशगुरोः ।उदिता कृतिर्विजयतां श्रीकृष्णब्रह्मतन्त्रपरकालात् ॥ १५॥

eṣāṃ mahiśūreśvarakṛṣṇakṣmāpālaratnavaṃśaguroḥ |uditā kṛtirvijayatāṃ śrīkṛṣṇabrahmatantraparakālāt || 15||

इत्यलङ्करणमालिकास्तुतिस्सम्पूर्णा ।

ityalaṅkaraṇamālikāstutissampūrṇā |