विष्णुस्तोत्रम् (अग्निबिन्दुकृतं स्कन्दपुराणान्तर्गतम् ॐ नमः पुण्डरीकाक्ष बाह्यान्तःशौचदायिने) Agnibindukritam Vishnu Stotram

अग्निबिन्दुरुवाच ।ॐ नमः पुण्डरीकाक्ष बाह्यान्तःशौचदायिने ।सहस्रशीर्षा पुरुषः सहस्राक्षः सहस्रपात् ॥ २५॥

agnibinduruvāca |oṃ namaḥ puṇḍarīkākṣa bāhyāntaḥśaucadāyine |sahasraśīrṣā puruṣaḥ sahasrākṣaḥ sahasrapāt || 25||

नमामि ते पदद्वन्द्वं सर्वद्वन्द्वनिवारकम् ।निर्द्वन्द्वया धिया विष्णो जिष्ण्वादि सुरवन्दित ॥ २६॥

namāmi te padadvandvaṃ sarvadvandvanivārakam |nirdvandvayā dhiyā viṣṇo jiṣṇvādi suravandita || 26||

यं स्तोतुं नाधिगच्छन्ति वाचो वाचस्पतेरपि ।तमीष्टे क इह स्तोतुं भक्तिरत्र बलीयसी ॥ २७॥

yaṃ stotuṃ nādhigacchanti vāco vācaspaterapi |tamīṣṭe ka iha stotuṃ bhaktiratra balīyasī || 27||

अपि यो भगवानीशो मनःप्राचामगोचरः ।समादृशैरल्पधीभिः कथं स्तुत्यो वचः परः ॥ २८॥

api yo bhagavānīśo manaḥprācāmagocaraḥ |samādṛśairalpadhībhiḥ kathaṃ stutyo vacaḥ paraḥ || 28||

यं वाचो न विशन्तीशं मनतीह मनो न यम् ।मनो गिरामतीतं तं कः स्तोतुं शक्तिमान्भवेत् ॥ २९॥

yaṃ vāco na viśantīśaṃ manatīha mano na yam |mano girāmatītaṃ taṃ kaḥ stotuṃ śaktimānbhavet || 29||

यस्य निःश्वसितं वेदाः स षडङ्गपदक्रमाः ।तस्य देवस्य महिमा महान्कैरवगम्यते ॥ २\।६०\।३०॥अतन्द्रितमनोबुद्धीन्द्रिया यं सनकादयः ।ध्यायन्तोऽपि हृदाकाशे न विन्दन्ति यथार्थतः ॥ ३१॥

yasya niḥśvasitaṃ vedāḥ sa ṣaḍaṅgapadakramāḥ |tasya devasya mahimā mahānkairavagamyate || 2\|60\|30||atandritamanobuddhīndriyā yaṃ sanakādayaḥ |dhyāyanto'pi hṛdākāśe na vindanti yathārthataḥ || 31||

नारदाद्यैर्मुनिवरैराबालब्रह्मचारिभिः ।गीयमानचरित्रोऽपि न सम्यग्योऽधिगम्यते ॥ ३२॥

nāradādyairmunivarairābālabrahmacāribhiḥ |gīyamānacaritro'pi na samyagyo'dhigamyate || 32||

तं सूक्ष्मरूपमजमव्ययमेकमाद्यंबह्माद्यगोचरमजेयमनन्तशक्तिम् ।नित्यं निरामयममूर्तमचिन्त्यमूर्तिंकस्त्वां चराचर चराचरभिन्न वेत्ति ॥ ३३॥

taṃ sūkṣmarūpamajamavyayamekamādyaṃbahmādyagocaramajeyamanantaśaktim |nityaṃ nirāmayamamūrtamacintyamūrtiṃkastvāṃ carācara carācarabhinna vetti || 33||

एकैकमेव तव नाम हरेन्मुरारेजन्मार्जिताघमघिनां च महापदाढ्यम् ।दद्यात्फलं च महितं महतो मखस्यजप्तं मुकुन्द मधुसूदन माधवेति ॥ ३४॥

ekaikameva tava nāma harenmurārejanmārjitāghamaghināṃ ca mahāpadāḍhyam |dadyātphalaṃ ca mahitaṃ mahato makhasyajaptaṃ mukunda madhusūdana mādhaveti || 34||

नारायणेति नरकार्णवतारणेतिदामोदरेति मधुहेति चतुर्भुजेति ।विश्वम्भरेति विरजेति जनार्दनेतिक्वास्तीह जन्म जपतां क्व कृतान्तभीतिः ॥ ३५॥

nārāyaṇeti narakārṇavatāraṇetidāmodareti madhuheti caturbhujeti |viśvambhareti virajeti janārdanetikvāstīha janma japatāṃ kva kṛtāntabhītiḥ || 35||

ये त्वां त्रिविक्रम सदा हृदि शीलयन्तिकादम्बिनी रुचिर रोचिषमम्बुजाक्षम् ।सौदामनीविलसितांशुकवीतमूर्तेतेऽपि स्पृशन्ति तव कान्तिमचिन्त्यरूपाम् ॥ ३६॥

ye tvāṃ trivikrama sadā hṛdi śīlayantikādambinī rucira rociṣamambujākṣam |saudāmanīvilasitāṃśukavītamūrtete'pi spṛśanti tava kāntimacintyarūpām || 36||

श्रीवत्सलाञ्छन हरेऽच्युत कैटभारेगोविन्द तार्क्ष्यरथ केशव चक्रपाणे ।लक्ष्मीपते दनुजसूदन शार्ङ्गपाणेत्वद्भक्तिभाजि न भयं क्वचिदस्ति पुंसि ॥ ३७॥

śrīvatsalāñchana hare'cyuta kaiṭabhāregovinda tārkṣyaratha keśava cakrapāṇe |lakṣmīpate danujasūdana śārṅgapāṇetvadbhaktibhāji na bhayaṃ kvacidasti puṃsi || 37||

यैरर्चितोऽसि भगवंस्तुलसीप्रसूनैर्दूरीकृतैणमदसौरभदिव्यगन्धैः ।तानर्चयन्ति दिवि देवगणाःसमस्तामन्दारदामभिरलं विमलस्वभावान् ॥ ३८॥

yairarcito'si bhagavaṃstulasīprasūnairdūrīkṛtaiṇamadasaurabhadivyagandhaiḥ |tānarcayanti divi devagaṇāḥsamastāmandāradāmabhiralaṃ vimalasvabhāvān || 38||

यद्वाचि नाम तव कामदमब्जनेत्रयच्छ्रोत्रयोस्तव कथा मधुराक्षराणि ।यच्चित्तभित्तिलिखितं भवतोऽस्ति रूपंनीरूपभूपपदवी न हि तैर्दुरापा ॥ ३९॥

yadvāci nāma tava kāmadamabjanetrayacchrotrayostava kathā madhurākṣarāṇi |yaccittabhittilikhitaṃ bhavato'sti rūpaṃnīrūpabhūpapadavī na hi tairdurāpā || 39||

ये त्वां भजन्ति सततं भुवि शेषशायिंस्ताञ्छ्रीपते पितृपतीन्द्रकुबेरमुख्याः ।वृन्दारका दिवि सदैव सभाजयन्तिस्वर्गापवर्गसुखसन्ततिदानदक्ष ॥ २\।६०\।४०॥ये त्वां स्तुवन्ति सततं दिवि तान्स्तुवन्तिसिद्धाप्सरोमरगणा लसदब्जपाणे ।विश्राणयत्यखिलसिद्धिद को विना त्वांनिर्वाणचारुकमलां कमलायताक्ष ॥ ४१॥

ye tvāṃ bhajanti satataṃ bhuvi śeṣaśāyiṃstāñchrīpate pitṛpatīndrakuberamukhyāḥ |vṛndārakā divi sadaiva sabhājayantisvargāpavargasukhasantatidānadakṣa || 2\|60\|40||ye tvāṃ stuvanti satataṃ divi tānstuvantisiddhāpsaromaragaṇā lasadabjapāṇe |viśrāṇayatyakhilasiddhida ko vinā tvāṃnirvāṇacārukamalāṃ kamalāyatākṣa || 41||

त्वं हंसि पासि सृजसि क्षणतः स्वलीलालीलावपुर्धर विरिञ्चिनताङ्घ्रियुग्म ।विश्वं त्वमेव परविश्वपतिस्त्वमेवविश्वस्य बीजमसि तत्प्रणतोऽस्मि नित्यम् ॥ ४२॥

tvaṃ haṃsi pāsi sṛjasi kṣaṇataḥ svalīlālīlāvapurdhara viriñcinatāṅghriyugma |viśvaṃ tvameva paraviśvapatistvamevaviśvasya bījamasi tatpraṇato'smi nityam || 42||

स्तोता त्वमेव दनुजेन्द्ररिपो स्तुतिस्त्वंस्तुत्यस्त्वमेव सकलं हि भवानिहैकः ।त्वत्तो न किञ्चिदपि भिन्नमवैमि विष्णोतृष्णां सदा कृणुहि मे भवजाम्भवारे ॥ ४३॥

stotā tvameva danujendraripo stutistvaṃstutyastvameva sakalaṃ hi bhavānihaikaḥ |tvatto na kiñcidapi bhinnamavaimi viṣṇotṛṣṇāṃ sadā kṛṇuhi me bhavajāmbhavāre || 43||

इति श्रीस्कादपुराणे काशीखण्डे पूर्वार्द्धे षष्टितमा ध्यायान्तर्गतंअग्निबिन्दुकृतं विष्णुस्तोत्रं समाप्तम् ।स्कन्दपुराण । काशीखण्ड । उत्तरखण्ड । अध्याय ६०/२५४३॥स्कन्दपुराण । काशीखण्ड । उत्तरखण्ड । अध्याय ६०/२५-४३॥

iti śrīskādapurāṇe kāśīkhaṇḍe pūrvārddhe ṣaṣṭitamā dhyāyāntargataṃagnibindukṛtaṃ viṣṇustotraṃ samāptam |skandapurāṇa | kāśīkhaṇḍa | uttarakhaṇḍa | adhyāya 60/2543||skandapurāṇa | kāśīkhaṇḍa | uttarakhaṇḍa | adhyāya 60/25-43||