अक्षपञ्चकम् Akshapanchakam

गिरान्तेऽर्थानुसन्धातॄंश्चिरान्तेवासिनो हरे ।पुरान्ते दर्शनोत्कान्नः स्मरान्ते स्वीयमुन्नयन् ॥ १॥

girānte'rthānusandhātṝṃścirāntevāsino hare |purānte darśanotkānnaḥ smarānte svīyamunnayan || 1||

पोषायाऽऽषाढाब्दनादवेषशेषादिकेकिनाम् ।द्वेषान्तासुरपाषाणपेषायाशनिरोषधूः ॥ २॥

poṣāyā''ṣāḍhābdanādaveṣaśeṣādikekinām |dveṣāntāsurapāṣāṇapeṣāyāśaniroṣadhūḥ || 2||

भाषाशेषाङ्गभूषाणां घोषाभा शोषदा द्विषाम् ।हेषा तवैषा निर्दोषा तोषाय स्याद्धयास्य मे ॥ ३॥

bhāṣāśeṣāṅgabhūṣāṇāṃ ghoṣābhā śoṣadā dviṣām |heṣā tavaiṣā nirdoṣā toṣāya syāddhayāsya me || 3||

हृद्यविद्याब्धिशब्दाभा मार्गे कलकलप्रभ ।स्वर्गिणामुपदेशे सा वल्गुवाद्यस्वनायते ॥ ४॥

hṛdyavidyābdhiśabdābhā mārge kalakalaprabha |svargiṇāmupadeśe sā valguvādyasvanāyate || 4||

सेनाया वैरिसेनाया नाकिनां सपिनाकिनाम् ।भयाभयप्रद स्यान्नोऽभयायांहोभयाय सा ॥ ५॥

senāyā vairisenāyā nākināṃ sapinākinām |bhayābhayaprada syānno'bhayāyāṃhobhayāya sā || 5||

भीरुणा वैरिणः पापाद्दारुणादक्षपञ्चकात् ।यतिना वादिराजेन कृतिनेयं कृतिः कृता ॥ ६॥

bhīruṇā vairiṇaḥ pāpāddāruṇādakṣapañcakāt |yatinā vādirājena kṛtineyaṃ kṛtiḥ kṛtā || 6||

इति श्रीमद्वादिराजपूज्यचरणविरचितं अक्षपञ्चकं सम्पूर्णम् ।भारतीरमणमुख्यप्राणान्तर्गत श्रीकृष्णार्पणमस्तु ।

iti śrīmadvādirājapūjyacaraṇaviracitaṃ akṣapañcakaṃ sampūrṇam |bhāratīramaṇamukhyaprāṇāntargata śrīkṛṣṇārpaṇamastu |