शिवाष्टकस्तोत्रम् Vyasakritam Shivashtaka Stotram

व्यास उवाच ।एको रुद्रो न द्वितीयो यतस्तद्ब्रह्मैवैकं नेह नानास्ति किञ्चित् ।यद्यप्यन्यः कोऽपि वा कुत्रचिद्वा व्याचष्टां तद्यस्य शक्तिर्मदग्रे ॥ १॥

vyāsa uvāca |eko rudro na dvitīyo yatastadbrahmaivaikaṃ neha nānāsti kiñcit |yadyapyanyaḥ ko'pi vā kutracidvā vyācaṣṭāṃ tadyasya śaktirmadagre || 1||

यः क्षीराब्धेर्मन्दराघातजातो ज्वालामाली कालकूटोऽतिभीमः ।तं सोढुं वा को परोऽभून्महेशाद्यत्कीलाभिः कृष्णतामाप विष्णुः ॥ २॥

yaḥ kṣīrābdhermandarāghātajāto jvālāmālī kālakūṭo'tibhīmaḥ |taṃ soḍhuṃ vā ko paro'bhūnmaheśādyatkīlābhiḥ kṛṣṇatāmāpa viṣṇuḥ || 2||

यद्वाणोऽभूच्छ्रीपतिर्यस्य यन्ता लोकेशो यत्स्यन्दनं भूः समस्ता ।वाहा वेदा यस्य येनेषुपाताद्दग्धा ग्रामास्त्रैपुरास्तत्समः कः ॥ ३॥

yadvāṇo'bhūcchrīpatiryasya yantā lokeśo yatsyandanaṃ bhūḥ samastā |vāhā vedā yasya yeneṣupātāddagdhā grāmāstraipurāstatsamaḥ kaḥ || 3||

यं कन्दर्पो वीक्षमाणः समानं देवैरन्यैर्भस्मजातः स्वयं हि ।पौष्पैर्बाणैः सर्वविश्वैकजेता को वा स्तुत्यः कामजेतुस्ततोऽन्यः ॥ ४॥

yaṃ kandarpo vīkṣamāṇaḥ samānaṃ devairanyairbhasmajātaḥ svayaṃ hi |pauṣpairbāṇaiḥ sarvaviśvaikajetā ko vā stutyaḥ kāmajetustato'nyaḥ || 4||

यं वै वेदो वेद नो नैव विष्णुर्नो वा वेधा नो मनो नैव वाणी ।तं देवेशं मादृशः कोऽल्पमेधा याथात्म्याद्वै वेत्त्यहो विश्वनाथम् ॥ ५॥

yaṃ vai vedo veda no naiva viṣṇurno vā vedhā no mano naiva vāṇī |taṃ deveśaṃ mādṛśaḥ ko'lpamedhā yāthātmyādvai vettyaho viśvanātham || 5||

यस्मिन्सर्वं यस्तु सर्वत्र सर्वो यो वै कर्ता योऽविता योऽपहर्ता ।नो यस्यादिर्यः समस्तादिरेको नो यस्यान्तो योऽन्तकृत्तं नतोऽस्मि ॥ ६॥

yasminsarvaṃ yastu sarvatra sarvo yo vai kartā yo'vitā yo'pahartā |no yasyādiryaḥ samastādireko no yasyānto yo'ntakṛttaṃ nato'smi || 6||

यस्यैकाख्या वाजिमेधेन तुल्या यस्य नत्या चैकयाल्पेन्द्रलक्ष्मीः ।यस्य स्तुत्या लभ्यते सत्यलोको यस्यार्चातो मोक्षलक्ष्मीरदूरा ॥ ७।

yasyaikākhyā vājimedhena tulyā yasya natyā caikayālpendralakṣmīḥ |yasya stutyā labhyate satyaloko yasyārcāto mokṣalakṣmīradūrā || 7|

नान्यं देवं वेद्म्यहं श्रीमहेशान्नान्यं देवं स्तौमि शम्भोरृतेऽहम् ।नान्यं देवं वा नमामि त्रिनेत्रात्सत्यं सत्यं सत्यमेतन्मृषा न ॥ ८॥

nānyaṃ devaṃ vedmyahaṃ śrīmaheśānnānyaṃ devaṃ staumi śambhorṛte'ham |nānyaṃ devaṃ vā namāmi trinetrātsatyaṃ satyaṃ satyametanmṛṣā na || 8||

इत्थं यावत्स्तौति शम्भुं महर्षिस्तावन्नन्दी शाम्भवाद्दृक्प्रसादात् ।तद्दोः स्तम्भं त्यक्तवांश्चाबभाषे स्मायं स्मायं ब्राह्मणेभ्यो नमो वः ॥ ९॥

itthaṃ yāvatstauti śambhuṃ maharṣistāvannandī śāmbhavāddṛkprasādāt |taddoḥ stambhaṃ tyaktavāṃścābabhāṣe smāyaṃ smāyaṃ brāhmaṇebhyo namo vaḥ || 9||

नन्दिकेश्वर उवाच ।इदं स्तवं महापुण्यं व्यास ते परिकीर्तितम् ।यः पठिष्यति मेधावी तस्य तुष्यति शङ्करः ॥ १०॥

nandikeśvara uvāca |idaṃ stavaṃ mahāpuṇyaṃ vyāsa te parikīrtitam |yaḥ paṭhiṣyati medhāvī tasya tuṣyati śaṅkaraḥ || 10||

व्यासाष्टकमिदं प्रातः पठितव्यं प्रयत्नतः ।दुःस्वप्नपापशमनं शिवसान्निध्यकारकम् ॥ ११॥

vyāsāṣṭakamidaṃ prātaḥ paṭhitavyaṃ prayatnataḥ |duḥsvapnapāpaśamanaṃ śivasānnidhyakārakam || 11||

मातृहा पितृहा वापि गोघ्नो बालघ्र एव वा ।सुरापी स्वर्णहृद्वापि निष्पापो स्याः स्तुतेर्जपात् ॥ १२॥

mātṛhā pitṛhā vāpi goghno bālaghra eva vā |surāpī svarṇahṛdvāpi niṣpāpo syāḥ stuterjapāt || 12||

इति श्रीस्कादपुराणे काशीखण्डे पूर्वार्द्धे पञ्चनवतितमा ध्यायान्तर्गतंव्यासकृतं शिवाष्टकस्तोत्रं समाप्तम् ।स्कन्दपुराण । काशीखण्ड । उत्तरखण्ड २ । अध्याय ९५/५६६३॥स्कन्दपुराण । काशीखण्ड । उत्तरखण्ड २ । अध्याय ९५/५६-६३॥

iti śrīskādapurāṇe kāśīkhaṇḍe pūrvārddhe pañcanavatitamā dhyāyāntargataṃvyāsakṛtaṃ śivāṣṭakastotraṃ samāptam |skandapurāṇa | kāśīkhaṇḍa | uttarakhaṇḍa 2 | adhyāya 95/5663||skandapurāṇa | kāśīkhaṇḍa | uttarakhaṇḍa 2 | adhyāya 95/56-63||