शिवसन्ततपूजनवर्णनं व्यासकृतम् Vyasakritam Shivasantatapujanavarnanam

अविच्छिन्ना नीरधारा शिवलिङ्गे मनोहरा ।कल्पनीया सैव धारा शिवसन्ततपूजनम् ॥ १॥

avicchinnā nīradhārā śivaliṅge manoharā |kalpanīyā saiva dhārā śivasantatapūjanam || 1||

शिवसन्ततपूजायाः फलमप्युच्यते शृणु ।यस्य श्रवणमात्रेण तस्य भक्तिः प्रजायते ॥ २॥

śivasantatapūjāyāḥ phalamapyucyate śṛṇu |yasya śravaṇamātreṇa tasya bhaktiḥ prajāyate || 2||

जलधारा मुक्तिधारा पापधारापहारिणी ।धारारूपाणि पापानि नश्यन्ति जलधारया ॥ ३॥

jaladhārā muktidhārā pāpadhārāpahāriṇī |dhārārūpāṇi pāpāni naśyanti jaladhārayā || 3||

अविच्छिन्नानि पापानि जलाविच्छिन्नधारया ।विनश्यन्तीति सा लिङ्गे कल्पनीया सदा द्विजैः ॥ ४॥

avicchinnāni pāpāni jalāvicchinnadhārayā |vinaśyantīti sā liṅge kalpanīyā sadā dvijaiḥ || 4||

धर्मकाले विशेषेण जलधाराप्रकल्पनम् ।शिवलिङ्गेषु कर्तव्यं तेन पापलयो भवेत् ॥ ५॥

dharmakāle viśeṣeṇa jaladhārāprakalpanam |śivaliṅgeṣu kartavyaṃ tena pāpalayo bhavet || 5||

अतः पापलयोद्योगः कर्तव्यो नीरधारया ।शोधितं नीरमादाय सुगन्धद्रव्यसंयुतम् ॥ ६॥

ataḥ pāpalayodyogaḥ kartavyo nīradhārayā |śodhitaṃ nīramādāya sugandhadravyasaṃyutam || 6||

पत्रैः फलैर्वा पुष्पैर्वा नवदुर्गाङ्कुरैरपि ।जलैरपि प्रकुर्वन्ति मुनयः शिवपूजनम् ॥ ७॥

patraiḥ phalairvā puṣpairvā navadurgāṅkurairapi |jalairapi prakurvanti munayaḥ śivapūjanam || 7||

जलं दत्वा महेशाय यत्फलं समवाप्यते ।तत्फलं केन वा सम्यग्वर्णनीयं नृपोत्तम ॥ ८॥

jalaṃ datvā maheśāya yatphalaṃ samavāpyate |tatphalaṃ kena vā samyagvarṇanīyaṃ nṛpottama || 8||

शिवार्चनेन सिद्।ह्ध्यन्ति सर्वे कामाः श्रुतिश्रुताः ।अनायासेन मर्त्यानां शुभदं शिवपूजनम् ॥ ९॥

śivārcanena sid|hdhyanti sarve kāmāḥ śrutiśrutāḥ |anāyāsena martyānāṃ śubhadaṃ śivapūjanam || 9||

अपारकरुणासारसागरः शङ्करः परः ।भक्त्या दत्तं फलं पत्रं गृह्णाति शुभदायकः ॥ १०॥

apārakaruṇāsārasāgaraḥ śaṅkaraḥ paraḥ |bhaktyā dattaṃ phalaṃ patraṃ gṛhṇāti śubhadāyakaḥ || 10||

तस्य सम्पूर्णकामस्य नित्यानन्दस्य वस्तुतः ।तोषो जलार्पणेनापि जायते तत् किलाद्भुतम् ॥ ११॥

tasya sampūrṇakāmasya nityānandasya vastutaḥ |toṣo jalārpaṇenāpi jāyate tat kilādbhutam || 11||

प्रच्छिन्नान्यपि शुष्काणि बिल्वपत्राणि शङ्करः ।गृह्णाति विपुलं भाग्यं दत्वा भक्ताय सादरम् ॥ १२॥

pracchinnānyapi śuṣkāṇi bilvapatrāṇi śaṅkaraḥ |gṛhṇāti vipulaṃ bhāgyaṃ datvā bhaktāya sādaram || 12||

शिवस्य करुणासिन्धोर्महिमापि महान् खलु ।स्वभक्तदयया गृह्णात्यम्बु पत्रं च किञ्चन ॥ १३॥

śivasya karuṇāsindhormahimāpi mahān khalu |svabhaktadayayā gṛhṇātyambu patraṃ ca kiñcana || 13||

नाराधयन्ति सहसा करुणासागरं हरम् ।न तरत्यपि संसारसागरं पातकाकरम् ॥ १४॥

nārādhayanti sahasā karuṇāsāgaraṃ haram |na taratyapi saṃsārasāgaraṃ pātakākaram || 14||

भक्त्या देवशिरोमणिः सुरमणिर्द्वित्राणि पत्राणि वानीरं वा कुसुमं फलं मणिमये लिङ्गेऽन्यलिङ्गेऽपि वा ।दत्तं भस्मविभूषितेन कृपया गृह्णात्यनुग्राहकोदातृत्वव्यसनात् प्रयच्छति महत् भाग्यं भवानीपतिः ॥ १५॥

bhaktyā devaśiromaṇiḥ suramaṇirdvitrāṇi patrāṇi vānīraṃ vā kusumaṃ phalaṃ maṇimaye liṅge'nyaliṅge'pi vā |dattaṃ bhasmavibhūṣitena kṛpayā gṛhṇātyanugrāhakodātṛtvavyasanāt prayacchati mahat bhāgyaṃ bhavānīpatiḥ || 15||

॥ इति शिवरहस्यान्तर्गते व्यासकृतं शिवसन्ततपूजनवर्णनं सम्पूर्णम् ॥॥ श्रीशिवरहस्यम् । हराख्यः तृतीयांशः । पूर्वार्धम् । अध्यायः ४९। १०१११५॥

|| iti śivarahasyāntargate vyāsakṛtaṃ śivasantatapūjanavarṇanaṃ sampūrṇam |||| śrīśivarahasyam | harākhyaḥ tṛtīyāṃśaḥ | pūrvārdham | adhyāyaḥ 49| 101115||

– ॥ श्रीशिवरहस्यम् ।हराख्यः तृतीयांशः ।पूर्वार्धम् ।अध्यायः ४९। १०१-११५॥

– || śrīśivarahasyam |harākhyaḥ tṛtīyāṃśaḥ |pūrvārdham |adhyāyaḥ 49| 101-115||