कैलासलिङ्गवर्णनम् २ Kailasalingavarnanam 2

ईश्वरःशृणु देवि प्रवक्ष्यामि गिरीन्द्रवरनन्दिनि ।त्वयिगोप्यं न मे किञ्चित्त्रिषु लोकेषु विद्यते ॥ १३॥

īśvaraḥśṛṇu devi pravakṣyāmi girīndravaranandini |tvayigopyaṃ na me kiñcittriṣu lokeṣu vidyate || 13||

न प्रकाश्यं त्वया देवि रहस्यं मम हृद्गतम् ।तथापि त्वयि वक्ष्यामि लिङ्गाध्यायमिमं शिवे ॥ १४॥

na prakāśyaṃ tvayā devi rahasyaṃ mama hṛdgatam |tathāpi tvayi vakṣyāmi liṅgādhyāyamimaṃ śive || 14||

कैलासाचलमौलिस्थं लिङ्गमण्डलमम्बिके ।तज्ज्ञातुन्नैव शक्यं हि मयैव मनसा ततम् ॥ १५॥

kailāsācalamaulisthaṃ liṅgamaṇḍalamambike |tajjñātunnaiva śakyaṃ hi mayaiva manasā tatam || 15||

कोटिलिङ्गाकृतिरहं तत्पूजाकल्पकोऽप्यहम् ।न तानि देवमुनिभिर्गन्धर्वैः पूजितान्युमे ॥ १६॥

koṭiliṅgākṛtirahaṃ tatpūjākalpako'pyaham |na tāni devamunibhirgandharvaiḥ pūjitānyume || 16||

नामरेन्द्रवरैर्देवि श्रुतानि किमु दर्शनम् ।(नमद्गणैर्वरैर्देवि श्रुतानि किमु दर्शनम्) ।पूजने का कथा देवि चागम्यो मम भूधरः ॥ १७॥

nāmarendravarairdevi śrutāni kimu darśanam |(namadgaṇairvarairdevi śrutāni kimu darśanam) |pūjane kā kathā devi cāgamyo mama bhūdharaḥ || 17||

तत्पश्यामि प्रसन्नेन मनसा विस्मयेन च ।मदीक्षणेन सर्वेषां लिङ्गानां पूजनं भवेत् ॥ १८॥

tatpaśyāmi prasannena manasā vismayena ca |madīkṣaṇena sarveṣāṃ liṅgānāṃ pūjanaṃ bhavet || 18||

शिवे पश्य महादेवि यावत्ते दृष्टिसन्ततिः ॥ १९॥

śive paśya mahādevi yāvatte dṛṣṭisantatiḥ || 19||

लिङ्गमण्डलमिदन्नगात्मजे चन्द्रखण्डललितोत्तमाङ्गकम् ।कुण्डलीशसुफणाविभूषितं पापजालसुगिरीन्द्रखण्डनम् ॥ २०॥

liṅgamaṇḍalamidannagātmaje candrakhaṇḍalalitottamāṅgakam |kuṇḍalīśasuphaṇāvibhūṣitaṃ pāpajālasugirīndrakhaṇḍanam || 20||

पुण्ड्रशोभितकपालमालकं बिल्वचन्दनसुपङ्कजार्चितम् ।पश्य पश्य गिरिजे नगमौलौ तोषदायकमतीव ममेष्टम् ॥ २१॥

puṇḍraśobhitakapālamālakaṃ bilvacandanasupaṅkajārcitam |paśya paśya girije nagamaulau toṣadāyakamatīva mameṣṭam || 21||

कैलासोऽयमतीव सुन्दर महालिङ्गालयानां शिवेकोटीभिः परितो वृतो मणिगृहैस्तादृक्षलिङ्गैरपि ।मालूरोत्तमशाखिशेखर शिखस्तस्याच्छपुष्पैः फलैरानम्रछदभारपल्लवयुतैस्तद्गन्धबन्धानिलः ॥ २२॥

kailāso'yamatīva sundara mahāliṅgālayānāṃ śivekoṭībhiḥ parito vṛto maṇigṛhaistādṛkṣaliṅgairapi |mālūrottamaśākhiśekhara śikhastasyācchapuṣpaiḥ phalairānamrachadabhārapallavayutaistadgandhabandhānilaḥ || 22||

शिखिशिखकुलाग्रपिञ्छभारैर्मम लिङ्गालयमार्जनं सदैव ।वनवेणूद्भवदावमध्यलग्नैस्सगरामोदसुधूपितं सदैव ॥ २३॥

śikhiśikhakulāgrapiñchabhārairmama liṅgālayamārjanaṃ sadaiva |vanaveṇūdbhavadāvamadhyalagnaissagarāmodasudhūpitaṃ sadaiva || 23||

मणिगर्भगृहोत्थरत्नदीपैस्सततन्दीपितमेव लिङ्गसङ्घम् ।वनबिल्वछदपुष्पगन्धवाहैरभिनीतैश्च सुपूजितानि पश्य ॥ २४॥

maṇigarbhagṛhottharatnadīpaissatatandīpitameva liṅgasaṅgham |vanabilvachadapuṣpagandhavāhairabhinītaiśca supūjitāni paśya || 24||

पाटलपटलैश्च कर्णिकारैस्सरसोत्फुल्लसुमुल्लसप्तरागैः ।अरविन्दैः कुरुविन्दवृन्दवर्णैर्नवनीलोत्पलहल्लकैस्सुफुल्लैः ॥ २५॥

pāṭalapaṭalaiśca karṇikāraissarasotphullasumullasaptarāgaiḥ |aravindaiḥ kuruvindavṛndavarṇairnavanīlotpalahallakaissuphullaiḥ || 25||

सितरक्तामलवर्णशीर्यवृत्तैरतिगन्धैर्मकरन्दवृन्दलीलैः ॥ २६॥

sitaraktāmalavarṇaśīryavṛttairatigandhairmakarandavṛndalīlaiḥ || 26||

(सितरक्तामलवर्णशीर्णवृन्तैरतिगन्धैर्मकरन्दवृन्दलीलैः) ॥ २६॥

(sitaraktāmalavarṇaśīrṇavṛntairatigandhairmakarandavṛndalīlaiḥ) || 26||

मन्दारैरतिसुन्दरैर्मम शिवे लिङ्गालिमौलिस्सदामल्लीफुल्लसुपुण्डरीककुमुदैस्मत्कर्णिकारैश्शिवे ।सञ्छन्नानि तरां सदाघनफलैः प्रोद्यत्सुधासारकैःनैवेद्येषु शिवे सदा सुरचितं लिङ्गाळयेषूद्यतम् ॥ २७॥

mandārairatisundarairmama śive liṅgālimaulissadāmallīphullasupuṇḍarīkakumudaismatkarṇikāraiśśive |sañchannāni tarāṃ sadāghanaphalaiḥ prodyatsudhāsārakaiḥnaivedyeṣu śive sadā suracitaṃ liṅgāḷayeṣūdyatam || 27||

करिकरपुष्करशीकरोत्थसारैरभिषिक्तानि स्वमौलिचन्द्रसारैः ।कस्तूरिकामृगमदाङ्गजघर्षणेन गन्धायितानि नगमौलिषु पश्य देवि ॥ २८॥

karikarapuṣkaraśīkarotthasārairabhiṣiktāni svamaulicandrasāraiḥ |kastūrikāmṛgamadāṅgajagharṣaṇena gandhāyitāni nagamauliṣu paśya devi || 28||

उत्फुल्लचामरकुलैरभिवीज्यमानं नृत्तं शिखण्डिविहितं पिकहंसरागम् ।सम्पूज्य पूजितमिदं मम लिङ्गसङ्घं पापापहारि सुगतिप्रदमुत्तमञ्च ॥ २९॥

utphullacāmarakulairabhivījyamānaṃ nṛttaṃ śikhaṇḍivihitaṃ pikahaṃsarāgam |sampūjya pūjitamidaṃ mama liṅgasaṅghaṃ pāpāpahāri sugatipradamuttamañca || 29||

॥ इति शिवरहस्यान्तर्गते माहेश्वराख्ये कैलासलिङ्गवर्णनम् २॥॥ श्रीशिवरहस्यम् । माहेश्वराख्यः प्रथमांशः । अध्यायः ३८ कैलासलिङ्गवर्णनम् । १३२९॥

|| iti śivarahasyāntargate māheśvarākhye kailāsaliṅgavarṇanam 2|||| śrīśivarahasyam | māheśvarākhyaḥ prathamāṃśaḥ | adhyāyaḥ 38 kailāsaliṅgavarṇanam | 1329||

– ॥ श्रीशिवरहस्यम् ।माहेश्वराख्यः प्रथमांशः ।अध्यायः ३८ – कैलासलिन्गवर्णनम् ।१३-२९॥

– || śrīśivarahasyam |māheśvarākhyaḥ prathamāṃśaḥ |adhyāyaḥ 38 – kailāsalingavarṇanam | 13-29||