दक्षाध्वरे वीरभद्रागमनकथनम् Dakshadhvare Virabhadragamanakathanam

(शिवरहस्यान्तर्गते ईशाख्ये)(स्कन्द उवाच)हिमवच्छिखरे रम्ये हेमशृङ्गे सुशोभने ।यज्ञवाटस्तदा तस्य गङ्गाद्वारे(र) समीपतः ॥ ३५॥

(śivarahasyāntargate īśākhye)(skanda uvāca)himavacchikhare ramye hemaśṛṅge suśobhane |yajñavāṭastadā tasya gaṅgādvāre(ra) samīpataḥ || 35||

तं तत्क्षणात्प्रविश्यैव यज्ञवाटं गणेश्वरैः ।रोमजैः सहितो भद्रैः कालाग्निरिव चापरः ॥ ३६॥

taṃ tatkṣaṇātpraviśyaiva yajñavāṭaṃ gaṇeśvaraiḥ |romajaiḥ sahito bhadraiḥ kālāgniriva cāparaḥ || 36||

उवाच भद्रो भगवान् यज्ञवाटाद्बहिः स्थितः ।सर्वामरैर्वृतं तत्र दक्षं विष्णुविधी तदा ॥ ३७॥

uvāca bhadro bhagavān yajñavāṭādbahiḥ sthitaḥ |sarvāmarairvṛtaṃ tatra dakṣaṃ viṣṇuvidhī tadā || 37||

वीरभद्र उवाच ।दक्ष दक्षोऽसि नितरां सुरैः सह मुनीश्वरैः ।एते च ब्रह्मविष्ण्वाद्या मोहिताः शिवमायया ॥ ३८॥

vīrabhadra uvāca |dakṣa dakṣo'si nitarāṃ suraiḥ saha munīśvaraiḥ |ete ca brahmaviṣṇvādyā mohitāḥ śivamāyayā || 38||

वाक्याद्देवस्य भागार्थं समायातस्त्वदन्तिकम् ।सत्या वियोगदुःखेन भवस्यात्यन्तरोषतः ॥ ३९॥

vākyāddevasya bhāgārthaṃ samāyātastvadantikam |satyā viyogaduḥkhena bhavasyātyantaroṣataḥ || 39||

दग्धुं वै प्रेषितश्चाहं भवता च मुनीश्वरैः ।क्व ते साहाय्यकृद्विष्णुर्निर्गच्छतु मया रणे ॥ ४०॥

dagdhuṃ vai preṣitaścāhaṃ bhavatā ca munīśvaraiḥ |kva te sāhāyyakṛdviṣṇurnirgacchatu mayā raṇe || 40||

शङ्खचक्रधरः शाङ्गी दैत्यसङ्घादिदर्पहा ।(स्कन्द उवाच)इत्युक्त्वा यज्ञशालां तां ददाह गणपुङ्गवः ॥ ४१॥

śaṅkhacakradharaḥ śāṅgī daityasaṅghādidarpahā |(skanda uvāca)ityuktvā yajñaśālāṃ tāṃ dadāha gaṇapuṅgavaḥ || 41||

भालनेत्रानलज्वालाजालमालाभिरेव हि ।गणा नर्दन्ति सोत्साहं दारयन्ति सुरान् मुनीन् ॥ ४२॥

bhālanetrānalajvālājālamālābhireva hi |gaṇā nardanti sotsāhaṃ dārayanti surān munīn || 42||

त्रिशूलमूलनिर्भिन्ना निर्विण्णा बाष्पवारिभिः ।सिञ्चन्ति स्वानि चाङ्गानि द्विजा देवाः सवासवाः ॥ ४३॥

triśūlamūlanirbhinnā nirviṇṇā bāṣpavāribhiḥ |siñcanti svāni cāṅgāni dvijā devāḥ savāsavāḥ || 43||

धावन्ति कान्दिशीकास्ते विस्रस्तमुकुटाङ्गदाः ।स्खलत्पदाः पतन्तश्च मुक्तकेशैकवाससः ॥ ४४॥

dhāvanti kāndiśīkāste visrastamukuṭāṅgadāḥ |skhalatpadāḥ patantaśca muktakeśaikavāsasaḥ || 44||

वसवश्चासुभिर्हीना पेतुः प्रेता इवात्र गाम् ।कुबेरोऽथ विरूपोऽभूत् वरुणः शरणोज्झितः ॥ ४५॥

vasavaścāsubhirhīnā petuḥ pretā ivātra gām |kubero'tha virūpo'bhūt varuṇaḥ śaraṇojjhitaḥ || 45||

वायुराकाशयुक्तात्मा भास्करो निष्प्रभोऽभवत् ।निरृतिर्धृतिहीनोऽभूत् आदित्या नित्यमानिनः ॥ ४६॥

vāyurākāśayuktātmā bhāskaro niṣprabho'bhavat |nirṛtirdhṛtihīno'bhūt ādityā nityamāninaḥ || 46||

सोमो भयामययुतः पितरः कातरास्तथा ।कृतान्तश्च भयोद्रेकसङ्क्रान्तः पूर्वखेदतः ॥ ४७॥

somo bhayāmayayutaḥ pitaraḥ kātarāstathā |kṛtāntaśca bhayodrekasaṅkrāntaḥ pūrvakhedataḥ || 47||

सुधन्वानो विधन्वानोह्यभया भयमोहिताः ।निर्वीर्याश्चाभवन् सर्वे गन्धर्वा धैर्यवर्जिताः ॥ ४८॥

sudhanvāno vidhanvānohyabhayā bhayamohitāḥ |nirvīryāścābhavan sarve gandharvā dhairyavarjitāḥ || 48||

तर्जिता गणरावेण तत्रैवाप्सरसां गणाः ।विस्रस्तकबराश्चैव विगलत्करकङ्कणाः ॥ ४९॥

tarjitā gaṇarāveṇa tatraivāpsarasāṃ gaṇāḥ |visrastakabarāścaiva vigalatkarakaṅkaṇāḥ || 49||

धावन्ति विदिशं तत्र सिद्धविद्याधरादयः ।किम्पूर्षा नागयक्षाश्च व्याकुलाक्षाः प्रदुद्रुवुः ॥ ५०॥

dhāvanti vidiśaṃ tatra siddhavidyādharādayaḥ |kimpūrṣā nāgayakṣāśca vyākulākṣāḥ pradudruvuḥ || 50||

नागा नगाश्च भूनागा नद्यो विद्याधरास्तथा ।हाहाकारकृतस्तत्र भ्रमन्ति परितो मुहुः ॥ ५१॥

nāgā nagāśca bhūnāgā nadyo vidyādharāstathā |hāhākārakṛtastatra bhramanti parito muhuḥ || 51||

द्रुमसीमा समूहेन शालां तां संस्थिता द्विजाः ।विदग्धाश्चैव मुग्धाश्च शालादाहेन मोहिताः ॥ ५२॥

drumasīmā samūhena śālāṃ tāṃ saṃsthitā dvijāḥ |vidagdhāścaiva mugdhāśca śālādāhena mohitāḥ || 52||

वडवानलसङ्काशो ज्वालामालानलैर्युतः ।शाखाशिखाभिर्वह्नेश्च लेलिहानमभूज्जगत् ॥ ५३॥

vaḍavānalasaṅkāśo jvālāmālānalairyutaḥ |śākhāśikhābhirvahneśca lelihānamabhūjjagat || 53||

धूमज्वालाऽवृतालोका अभवन् गन्धमेदुराः ।मांसानि चैव भक्ष्याणि अन्नमुच्चावचं बहु ॥ ५४॥

dhūmajvālā'vṛtālokā abhavan gandhamedurāḥ |māṃsāni caiva bhakṣyāṇi annamuccāvacaṃ bahu || 54||

रसवन्ति च पानानि सोमाज्यहविरादयः ।वासांस्याभरणान्यत्र स ददाहोज्ज्वलच्छिखः ॥ ५५॥

rasavanti ca pānāni somājyahavirādayaḥ |vāsāṃsyābharaṇānyatra sa dadāhojjvalacchikhaḥ || 55||

गणेश्वराश्च सङ्क्रुद्धा यूपान्युत्पाट्य चिक्षिपुः ।प्रस्तोत्रा सह नेत्रा च योक्त्रा नेष्ट्रा गणेश्वराः ॥ ५६॥

gaṇeśvarāśca saṅkruddhā yūpānyutpāṭya cikṣipuḥ |prastotrā saha netrā ca yoktrā neṣṭrā gaṇeśvarāḥ || 56||

गङ्गास्रोतसि वेगेन पशुभिस्तानपातयन् ।भाण्डानि यज्ञपात्राणि छिन्दन्ति गणपा मुदा ॥ ५७॥

gaṅgāsrotasi vegena paśubhistānapātayan |bhāṇḍāni yajñapātrāṇi chindanti gaṇapā mudā || 57||

भक्ष्याणि तत्र पेयानि पिबन्तो भक्षयन्ति च ।धावन्ति परितस्तत्र अनुपृष्ठं सुरान् मुनीन् ॥ ५८॥

bhakṣyāṇi tatra peyāni pibanto bhakṣayanti ca |dhāvanti paritastatra anupṛṣṭhaṃ surān munīn || 58||

बिभिदुः शरवर्षेण हर्षेण महता गणाः ।कुन्तशातान् सुरांस्तत्र क्रूरा आक्रोशकारिणः ॥ ५९॥

bibhiduḥ śaravarṣeṇa harṣeṇa mahatā gaṇāḥ |kuntaśātān surāṃstatra krūrā ākrośakāriṇaḥ || 59||

हा हा हेति वदन्त्यन्ये ताताम्बेति वदन्ति ते ।भ्रातर्हन्तेति सम्भ्रान्ता धावन्ति मुनयः सुराः ॥ ६०॥

hā hā heti vadantyanye tātāmbeti vadanti te |bhrātarhanteti sambhrāntā dhāvanti munayaḥ surāḥ || 60||

गतदण्डाजिनाः सर्वे खण्डिता गणखड्गतः ।चूर्णिताश्चाश्मभिः केचिन् घूर्णिताः प्रापतन् क्षितौ ॥ ६१॥

gatadaṇḍājināḥ sarve khaṇḍitā gaṇakhaḍgataḥ |cūrṇitāścāśmabhiḥ kecin ghūrṇitāḥ prāpatan kṣitau || 61||

जटाश्चोत्पाट्य गणपानधश्चापातयन्मुनीन् ।श्मश्रुभिश्च गणाश्चाष्टौ दन्तैर्निष्कासयन्त्यपि ॥ ६२॥

jaṭāścotpāṭya gaṇapānadhaścāpātayanmunīn |śmaśrubhiśca gaṇāścāṣṭau dantairniṣkāsayantyapi || 62||

मुनीनां ऋत्विजां तत्र सदस्यानां तदा गणाः ।हावयन्तं सोमवासं भृगुं ताड्य कपोलयोः ॥ ६३॥

munīnāṃ ṛtvijāṃ tatra sadasyānāṃ tadā gaṇāḥ |hāvayantaṃ somavāsaṃ bhṛguṃ tāḍya kapolayoḥ || 63||

पातयन्ति महीपृष्ठे निसृष्ठोष्ठमकुर्वत ।वीरभद्रो महातेजा शक्रं नक्रवदास्थितम् ॥ ६४॥

pātayanti mahīpṛṣṭhe nisṛṣṭhoṣṭhamakurvata |vīrabhadro mahātejā śakraṃ nakravadāsthitam || 64||

ऐरावतेन धावन्तं पातयामास खड्गतः ।आखण्डलकरं तत्र चापाकृष्टेषुभिस्तदा ॥ ६५॥

airāvatena dhāvantaṃ pātayāmāsa khaḍgataḥ |ākhaṇḍalakaraṃ tatra cāpākṛṣṭeṣubhistadā || 65||

तिलशः खण्डयामासुः सम्पूर्याक्षीण्यपातयन् ।मकुटेनापविद्धेन पतन्नुर्व्यां स वासवः ॥ ६६॥

tilaśaḥ khaṇḍayāmāsuḥ sampūryākṣīṇyapātayan |makuṭenāpaviddhena patannurvyāṃ sa vāsavaḥ || 66||

लम्बमानो गजपदे कक्षासक्तपदोऽलुठत् ।निस्त्रिंशेन हतस्तत्र वरुणो यादसां पतिः ॥ ६७॥

lambamāno gajapade kakṣāsaktapado'luṭhat |nistriṃśena hatastatra varuṇo yādasāṃ patiḥ || 67||

लुलायेनैव निहतो गणबाणैर्यमस्तदा ।आर्यं चानर्मया वाचा अभयं समयाचत ॥ ६८॥

lulāyenaiva nihato gaṇabāṇairyamastadā |āryaṃ cānarmayā vācā abhayaṃ samayācata || 68||

शरेणोच्चकिरे नेत्रे तस्य ते गणपुङ्गवाः ।वीरभद्रो महातेजा मुष्ट्या शक्रमताड्यत् ॥ ६९॥

śareṇoccakire netre tasya te gaṇapuṅgavāḥ |vīrabhadro mahātejā muṣṭyā śakramatāḍyat || 69||

भास्वन्नेत्रे चोत्पाट्य करजाग्रेण लीलया ।निपात्य मुष्टिना दन्तान् पूष्णश्चाथ न्यपातयत् ॥ ७०॥

bhāsvannetre cotpāṭya karajāgreṇa līlayā |nipātya muṣṭinā dantān pūṣṇaścātha nyapātayat || 70||

तदा चन्द्रमसं देवं पादाङ्गुष्ठेन लीलया ।शिरो यज्ञस्य स तदा चिछेद करवालतः ॥ ७१॥

tadā candramasaṃ devaṃ pādāṅguṣṭhena līlayā |śiro yajñasya sa tadā cicheda karavālataḥ || 71||

वह्नेर्हस्तद्वयं छित्वा जिह्वाश्चोपाटयन् द्रुतम् ।निर्गतासून् वसूंश्चेक्रे पादाहतिजघाततः ॥ ७२॥

vahnerhastadvayaṃ chitvā jihvāścopāṭayan drutam |nirgatāsūn vasūṃścekre pādāhatijaghātataḥ || 72||

विश्वेदेवाश्विनौ तत्र मरुतः पितरस्तथा ।तेन सन्ताडिता पादाघाताच्चापि विधीर्णिताः ॥ ७३॥

viśvedevāśvinau tatra marutaḥ pitarastathā |tena santāḍitā pādāghātāccāpi vidhīrṇitāḥ || 73||

यमं सदन्डं गमपः पादघातैरथाहनत् (रहन् तदा) ।जघान तत्रचेशानं त्रिशूलेन महाबलम् ॥ ७४॥

yamaṃ sadanḍaṃ gamapaḥ pādaghātairathāhanat (rahan tadā) |jaghāna tatraceśānaṃ triśūlena mahābalam || 74||

पत्नीशालां ददाहास्य क्रोशन्तीनां गवामिव ।दक्षपत्न्यास्तु कबरं करवालेन चाहरत् ॥ ७५॥

patnīśālāṃ dadāhāsya krośantīnāṃ gavāmiva |dakṣapatnyāstu kabaraṃ karavālena cāharat || 75||

सरस्वतीं छिन्ननासां अकरोदसिधारया ।क्षतजेनोक्षितास्तत्र देवराजाङ्गनागणाः ॥ ७६॥

sarasvatīṃ chinnanāsāṃ akarodasidhārayā |kṣatajenokṣitāstatra devarājāṅganāgaṇāḥ || 76||

विस्रस्तवामभरणा गलद्धम्मिल्लमल्लिकाः ।सस्वेदाश्रुगलद्गन्धस्वाङ्गरागभयाकुलाः ॥ ७७॥

visrastavāmabharaṇā galaddhammillamallikāḥ |sasvedāśrugaladgandhasvāṅgarāgabhayākulāḥ || 77||

कुरर्य इव क्रोशन्त्यो धावन्ति सुरयोषितः ।त्रयस्त्रिंशत्सुरानेवं तद्गणांश्च गणेश्वरः ॥ ७८॥

kurarya iva krośantyo dhāvanti surayoṣitaḥ |trayastriṃśatsurānevaṃ tadgaṇāṃśca gaṇeśvaraḥ || 78||

जघान भगवान् रुद्रः खड्गयष्ट्यसिसायकैः ।गदापरिघनिस्त्रिंशैर्निर्दयं मर्दयन्गणैः ॥ ७९॥

jaghāna bhagavān rudraḥ khaḍgayaṣṭyasisāyakaiḥ |gadāparighanistriṃśairnirdayaṃ mardayangaṇaiḥ || 79||

एतस्मिन्नन्तरे तत्र वीरभद्रं वचोऽब्रवीत् ।याचमानश्च शरणं वृद्धभावात्पितामहः ॥ ८०॥

etasminnantare tatra vīrabhadraṃ vaco'bravīt |yācamānaśca śaraṇaṃ vṛddhabhāvātpitāmahaḥ || 80||

रथस्थमपि सारथ्यं स्वयं कुर्वन्तमीक्ष्य वै ।ब्रह्मोवाचः ।सारथिस्ते भवाम्यद्य वृद्धो नो योद्धुमुत्सहे ॥ ८१॥

rathasthamapi sārathyaṃ svayaṃ kurvantamīkṣya vai |brahmovācaḥ |sārathiste bhavāmyadya vṛddho no yoddhumutsahe || 81||

सुराणां चरणे मेऽद्य पश्य मे रश्मिलाघवम् ।पुरा त्रिपुरसंहारे शम्भोः सारथ्यकर्मणि ॥ ८२॥

surāṇāṃ caraṇe me'dya paśya me raśmilāghavam |purā tripurasaṃhāre śambhoḥ sārathyakarmaṇi || 82||

न्ययुङ्क्त मां प्रसादेन भगवानगजापतिः ।स्थापयन्मां रथस्याग्रे विजयायासुराहवे ॥ ८३॥

nyayuṅkta māṃ prasādena bhagavānagajāpatiḥ |sthāpayanmāṃ rathasyāgre vijayāyāsurāhave || 83||

(स्कन्द उवाच)तं ब्रह्माणं गणश्रेष्ठः सारथ्ये समयोजयत् ।तस्य रश्मीन्प्रजग्राह तदश्वांश्चाप्यचोदयत् ॥ ८४॥

(skanda uvāca)taṃ brahmāṇaṃ gaṇaśreṣṭhaḥ sārathye samayojayat |tasya raśmīnprajagrāha tadaśvāṃścāpyacodayat || 84||

गतप्रत्यागतैश्चित्रैरपवाहनयोजनैः ।सन्तुष्टमकरोद्वेधा वीरभद्रं सुराजिषु ॥ ८५॥

gatapratyāgataiścitrairapavāhanayojanaiḥ |santuṣṭamakarodvedhā vīrabhadraṃ surājiṣu || 85||

पक्षपातेन दक्षस्य दक्षं कृत्वाऽथ पृष्ठतः ।तदृत्विजो मुनिगणान् प्राहतान् सुरसत्तमान् ॥ ८६॥

pakṣapātena dakṣasya dakṣaṃ kṛtvā'tha pṛṣṭhataḥ |tadṛtvijo munigaṇān prāhatān surasattamān || 86||

पुनर्योज्य सहस्राक्षं रथे मातलिचोदिते ।वामदक्षिणभागस्थौ सहस्राक्षसुदक्षकौ ॥ ८७॥

punaryojya sahasrākṣaṃ rathe mātalicodite |vāmadakṣiṇabhāgasthau sahasrākṣasudakṣakau || 87||

निषङ्गकार्मुकधरौ वर्षन्तौ च शराञ्छितान् ।मध्ये स्वयं रथोपस्थे समास्थाय ययौ हरिः ॥ ८८॥

niṣaṅgakārmukadharau varṣantau ca śarāñchitān |madhye svayaṃ rathopasthe samāsthāya yayau hariḥ || 88||

देवानीकैश्च कोटीभिः संवृतो विविधायुधैः ।निषङ्गिभिः कवचिभिर्गदाप्रासासिपाणिभिः ॥ ८९॥

devānīkaiśca koṭībhiḥ saṃvṛto vividhāyudhaiḥ |niṣaṅgibhiḥ kavacibhirgadāprāsāsipāṇibhiḥ || 89||

शरासारं प्रमुञ्चन् वै शा धुन्वन्हरिर्ययौ ।प्राध्माप्य शङ्खान् भेरीश्च पटहाहतिनिः स्वनैः ॥ ९०॥

śarāsāraṃ pramuñcan vai śā dhunvanhariryayau |prādhmāpya śaṅkhān bherīśca paṭahāhatiniḥ svanaiḥ || 90||

वीरभद्रःप्रयाहीति माधवं चोदयद्विधिम् ।गणैर्नानाप्रहरणैर्हेतिशूलहलायुधैः ॥ ९१॥

vīrabhadraḥprayāhīti mādhavaṃ codayadvidhim |gaṇairnānāpraharaṇairhetiśūlahalāyudhaiḥ || 91||

निषङ्गस्थसनागैश्च धनुर्बाणासिसायकैः ।कुन्तैर्गदाभिर्मुसलैः पट्टिशैश्च परश्वथैः ॥ ९२॥

niṣaṅgasthasanāgaiśca dhanurbāṇāsisāyakaiḥ |kuntairgadābhirmusalaiḥ paṭṭiśaiśca paraśvathaiḥ || 92||

दध्मुर्मुरज भेरीश्च संवाद्यपटहानकान् ।बृह्मितास्फोटनरवैः पताकाधूतनिःस्वनैः ॥ ९३॥

dadhmurmuraja bherīśca saṃvādyapaṭahānakān |bṛhmitāsphoṭanaravaiḥ patākādhūtaniḥsvanaiḥ || 93||

निष्कोशितासिविद्योतच्छतार्कमिव भास्करम् ।आहर प्रहरस्वेति गणैः सुरगणारवैः ॥ ९४॥

niṣkośitāsividyotacchatārkamiva bhāskaram |āhara praharasveti gaṇaiḥ suragaṇāravaiḥ || 94||

धनूंषि कर्षतां तत्र शराणामाशु धन्विनाम् ।कृतक्रेङ्कारसीत्कारैर्हयहेषरथस्वनैः ॥ ९५॥

dhanūṃṣi karṣatāṃ tatra śarāṇāmāśu dhanvinām |kṛtakreṅkārasītkārairhayaheṣarathasvanaiḥ || 95||

भ्रमच्चक्राक्षसङ्कजद्गदामुसलपातनैः ।एवं युयोध भद्रोऽपि हरिणा दानवारिणा ॥ ९६॥

bhramaccakrākṣasaṅkajadgadāmusalapātanaiḥ |evaṃ yuyodha bhadro'pi hariṇā dānavāriṇā || 96||

हरिः सुरगणैः सार्धं भद्रमेव ययौ तदा ।तयोः समभवद्युद्धं सुघोरं रोमहर्षणम् ॥ ९७॥

hariḥ suragaṇaiḥ sārdhaṃ bhadrameva yayau tadā |tayoḥ samabhavadyuddhaṃ sughoraṃ romaharṣaṇam || 97||

सुराणामथ भीरूणां दारुणं मरणोपमम् ।देवा गणैश्च युयुधुर्वस्वश्विमरुतोऽर्ककाः ॥ ९८॥

surāṇāmatha bhīrūṇāṃ dāruṇaṃ maraṇopamam |devā gaṇaiśca yuyudhurvasvaśvimaruto'rkakāḥ || 98||

विश्वेदेवाश्च पितरः साध्या विद्याधरास्तथा ।यक्षा दक्षैकपक्षस्थकुबेरवरुणादयः ॥ ९९॥

viśvedevāśca pitaraḥ sādhyā vidyādharāstathā |yakṣā dakṣaikapakṣasthakuberavaruṇādayaḥ || 99||

सुधन्वानोऽथ मरुतो धन्विनः सायकैस्तदा ।विष्वकसेनादिगणपाः स्वगणैः कोटिभिर्वृताः ॥ १००॥

sudhanvāno'tha maruto dhanvinaḥ sāyakaistadā |viṣvakasenādigaṇapāḥ svagaṇaiḥ koṭibhirvṛtāḥ || 100||

शङ्खचक्रगदाहस्ता युयुधुः स्वायुधैस्तदा ।गरुडोऽपि गणांस्तत्र विददार नखैः शितैः ॥ १०१॥

śaṅkhacakragadāhastā yuyudhuḥ svāyudhaistadā |garuḍo'pi gaṇāṃstatra vidadāra nakhaiḥ śitaiḥ || 101||

पक्षतुण्डप्रहारैश्च गणैःसुरगणैस्तदा ।उद्यतायुधजालैश्च युयुधुर्वरसायकैः ॥ १०२॥

pakṣatuṇḍaprahāraiśca gaṇaiḥsuragaṇaistadā |udyatāyudhajālaiśca yuyudhurvarasāyakaiḥ || 102||

विष्णुः सायकसाहस्रैर्वीरभद्रं जघान ह ।वीरभद्रोऽच्छिनद्बाणान् विष्णोस्तत्पश्यतां तदा ॥ १०३॥

viṣṇuḥ sāyakasāhasrairvīrabhadraṃ jaghāna ha |vīrabhadro'cchinadbāṇān viṣṇostatpaśyatāṃ tadā || 103||

त्रिभिः शरैस्तदा विष्णुं जघान गणपुङ्गवः ।धनुर्ज्यां कवचं तत्र छित्वा चैवाप्यपातयत् ॥ १०४॥

tribhiḥ śaraistadā viṣṇuṃ jaghāna gaṇapuṅgavaḥ |dhanurjyāṃ kavacaṃ tatra chitvā caivāpyapātayat || 104||

नवत्या वीरभद्रं च शरैरानतपर्वभिः ।सन्ताड्य मर्मसु हरिः शङ्खं प्राध्मापयत्तदा ॥ १०५॥

navatyā vīrabhadraṃ ca śarairānataparvabhiḥ |santāḍya marmasu hariḥ śaṅkhaṃ prādhmāpayattadā || 105||

तुहुण्डहुण्डहेरण्डमण्डली बाष्कलिर्बलिः ।एते गणेन्द्रा वस्वश्विमरुद्भिर्युयुधू रणे ॥ १०६॥

tuhuṇḍahuṇḍaheraṇḍamaṇḍalī bāṣkalirbaliḥ |ete gaṇendrā vasvaśvimarudbhiryuyudhū raṇe || 106||

गदापरिघनिस्त्रिशैःशरैर्मर्मस्वताडयत् ।गजा गजैर्हयैरश्वा रथस्था रथिभिः सह ॥ १०७॥

gadāparighanistriśaiḥśarairmarmasvatāḍayat |gajā gajairhayairaśvā rathasthā rathibhiḥ saha || 107||

॥ इति शिवरहस्यान्तर्गते दक्षाध्वरे वीरभद्रागमनकथनं सम्पूर्णम् ॥॥ श्रीशिवरहस्यम् । ईशाख्यः द्वादशमांशः । अध्यायः ६ वीरभद्रविष्णुयुद्धम् । ३५१०७ ॥

|| iti śivarahasyāntargate dakṣādhvare vīrabhadrāgamanakathanaṃ sampūrṇam |||| śrīśivarahasyam | īśākhyaḥ dvādaśamāṃśaḥ | adhyāyaḥ 6 vīrabhadraviṣṇuyuddham | 35107 ||

– ॥ श्रीशिवरहस्यम् ।ईशाख्यः द्वादशमांशः ।अध्यायः ६ वीरभद्रविष्णुयुद्धम् ।३५-१०७ ॥

– || śrīśivarahasyam |īśākhyaḥ dvādaśamāṃśaḥ |adhyāyaḥ 6 vīrabhadraviṣṇuyuddham | 35-107 ||