वैराग्यसन्दीपनी Vairagya Sandipani by Gosvami Tulasidas (2)

॥ अथ श्रीगोस्वामितुलसीदासकृत वैराग्यसंदीपनी ॥दोहाराम बाम दिसि जानकी लखन दाहिनी ओर ।ध्यान सकल कल्यानमय सुरतरु तुलसि तोर ॥ १॥तुलसी मिटै न मोह तम किएँ कोटि गुन ग्राम ।हृदय कमल फूलै नहीं बिनु रबिकुलरबि राम ॥ २॥सुनत लखत श्रुति नयन बिनु रसना बिनु रस लेत ।बास नासिका बिनु लहै परसै बिना निकेत ॥ ३॥सोरठाअज अद्वैत अनाम अलख रूपगुनरहित जो ।माया पति सोई राम दास हेतु नरतनुधरेउ ॥ ४॥दोहातुलसी यह तनु खेत है मन बच कर्म किसान ।पापपुन्य द्वै बीज हैं बवै सो लवै निदान ॥ ५॥तुलसी यह तनु तवा है तपत सदा त्रैताप ।सांति होई जब सांतिपद पावै राम प्रताप ॥ ६॥तुलसी बेदपुरानमत पूरन सास्त्र बिचार ।यह बिरागसंदीपनी अखिल ग्यान को सार ॥ ७॥दोहासरल बरन भाषा सरल सरल अर्थमय मानि ।तुलसी सरलै संतजन ताहि परी पहिचानि ॥ ८॥चौपाईअति सीतल अति ही सुखदाई ।सम दम राम भजन अधिकाई ॥जड जीवन कौं करै सचेता ।जग महँ बिचरत है एहि हेता ॥ ९॥दोहातुलसी ऐसे कहुँ कहूँ धन्य धरनि वह संत ।परकाजे परमारथी प्रीति लिये निबहंत ॥ १०॥की मुख पट दीन्हे रहैं जथा अर्थ भाषंत ।तुलसी या संसारमें सो बिचारजुत संत ॥ ११॥बोलै बचन बिचारि कै लीन्हें संत सुभाव ।तुलसी दुख दुर्बचन के पंथ देत नहिं पाँव ॥ १२॥सत्रु न काहू करि गनै मित्र गनै नहिं काहि ।तुलसी यह मत संत को बोलै समता माहि ॥ १३॥चौपाईअति अनन्यगति इंद्री जीता ।जाको हरि बिनु कतहुँ न चीता ॥मृग तृष्णा सम जग जिय जानी ।तुलसी ताहि संत पहिचानी ॥ १४॥दोहाएक भरोसो एक बल एक आस बिस्वास ।रामरूप स्वाती जलद चातक तुलसीदास ॥ १५॥सो जन जगत जहाज है जाके राग न दोष ।तुलसी तृष्णा त्यागि कै गहै सील संतोष ॥ १६॥सील गहनि सब की सहनि कहनि हीय मुख राम ।तुलसी रहिए एहि रहनि संत जनन को काम ॥ १७॥निज संगी निज सम करत दुरजन मन दुख दून ।मलयाचल है संतजन तुलसी दोष बिहून ॥ १८॥कोमल बानी संत की स्त्रवत अमृतमय आइ ।तुलसी ताहि कठोर मन सुनत मैन होइ जाइ ॥ १९॥अनुभव सुख उतपति करत भयभ्रम धरै उठाइ ।ऐसी बानी संत की जो उर भेदै आइ ॥ २०॥सीतल बानी संत की ससिहू ते अनुमान ।तुलसी कोटि तपन हरै जो कोउ धारै कान ॥ २१॥चौपाईपाप ताप सब सूल नसावै ।मोह अंध रबि बचन बहावै ॥तुलसी ऐसे सदगुन साधू ।बेद मध्य गुन बिदित अगाधू ॥ २२॥दोहातन करि मन करि बचन करि काहू दूखत नाहिं ।तुलसी ऐसे संतजन रामरूप जग माहिं ॥ २३॥मुख दीखत पातक हरै परसत कर्म बिलाहिं ।बचन सुनत मन मोहगत पूरुब भाग मिलाहिं ॥ २४॥अति कोमल अरु बिमल रुचि मानस में मल नाहिं ।तुलसी रत मन होइ रहै अपने साहिब माहिं ॥ २५॥जाके मन ते उठि गई तिलतिल तृष्णा चाहि ।मनसा बाचा कर्मना तुलसी बंदत ताहि ॥ २६॥कंचन काँचहि सम गनै कामिनि काष्ठ पषान ।तुलसी ऐसे संतजन पृथ्वी ब्रह्म समान ॥ २७॥चौपाईकंचन को मृतिका करि मानत ।कामिनि काष्ठ सिला पहिचानत ॥तुलसी भूलि गयो रस एह ।ते जन प्रगट राम की देहा ॥ २८॥दोहाआकिंचन इंद्रीदमन रमन राम इक तार ।तुलसी ऐसे संत जन बिरले या संसार ।२९ ॥अहंबाद मैं तैं नहीं दुष्ट संग नहिं कोइ ।दुख ते दुख नहिं ऊपजै सुख तैं सुख नहिं होइ ॥ ३०॥सम कंचन काँचै गिनत सत्रु मित्र सम दोइ ।तुलसी या संसारमें कात संत जन सोई ॥ ३१॥बिरले बिरले पाइए माया त्यागी संत ।तुलसी कामी कुटिल कलि केकी केक अनंत ॥ ३२॥मैं तं मेट्यो मोह तम उग्यो आतमा भानु ।संत राज सो जानिये तुलसी या सहिदानु ॥ ३३॥सोरठाको बरनै मुख एक तुलसी महिमा संत की ।जिन्ह के बिमल बिबेक सेस महेस न कहि सकत ॥ ३४॥दोहामहि पत्री करि सिंधु मसि तरु लेखनी बनाइ ।तुलसी गनपत सों तदपि महिमा लिखी न जाइ ॥ ३५॥धन्य धन्य माता पिता धन्य पुत्र बर सोइ ।तुलसी जो रामहि भजे जैसेहुँ कैसेहुँ होइ ॥ ३६॥तुलसी जाके बदन ते धोखेहुँ निकसत राम ।ताके पग की पगतरी मेरे तन को चाम ॥ ३७॥तुलसी भगत सुपच भलौ भजै रैन दिन राम ।ऊँचो कुल केहि कामको जहाँ न हरिको नाम ॥ ३८॥अति ऊँचे भूधरनि पर भुजगन के अस्थान ।तुलसी अति नीचे सुखद ऊख अन्न अरु पान ॥ ३९॥चौपाईअति अनन्य जो हरि को दासा ।रटै नाम निसिदिन प्रति स्वासा ॥तुलसी तेहि समान नहिं कोई ।हम नीकें देखा सब कोई ॥ ४०॥चौपाईजदपि साधु सबही बिधि हीना ।तद्यपि समता के न कुलीना ॥यह दिन रैन नाम उच्चरै ।वह नित मान अगिनि महँ जरै ॥ ४१॥दोहादास रता एक नाम सों उभय लोक सुख त्यागि ।तुलसी न्यारो ह्वै रहै दहै न दुख की आगि ॥ ४२॥रैनि को भूषन इंदु है दिवस को भूषन भानु ।दास को भूषन भक्ति है भक्ति को भूषन ग्यानु ॥ ४३॥ग्यान को भूषन ध्यान है ध्यान को भूषन त्याग ।त्याग को भूषन शांतिपद तुलसी अमल अदाग ॥ ४४॥चौपाईअमल अदाग शांतिपद सारा ।सकल कलेस न करत प्रहारा ॥तुलसी उर धारै जो कोई ।रहै अनंद सिंधु महँ सोई ॥ ४५॥बिबिध पाप संभव जो तापा ।मिटहिं दोष दुख दुसह कलापा ॥परम सांति सुख रहै समाई ।तहँ उतपात न बेधै आई ॥ ४६॥तुलसी ऐसे सीतल संता ।सदा रहै एहि भाँति एकंता ॥कहा करै खल लोग भुजंगा ।कीन्ह्यौ गरलसील जो अंगा ॥ ४७॥दोहाअति सीतल अतिही अमल सकल कामना हीन ।तुलसी ताहि अतीत गनि बृत्ति सांति लयलीन ॥ ४८॥चौपाईजो कोइ कोप भरे मुख बैना ।सन्मुख हतै गिरासर पैना ॥तुलसी तऊ लेस रिस नाहिं ।सो सीतल कहिए जग माहीं ॥ ४९॥दोहासात दीप नव खंड लौ तीनि लोक जग माहिं ।तुलसी सांति समान सुख अपर दूसरो नाहीं ॥ ५०॥चौपाईजहाँ सांति सतगुरु की दई ।तहाँ क्रोध की जर जरि गई ॥सकल काम बासना बिलानी ।तुलसी बहै सांति सहिदानी ॥ ५१॥तुलसी सुखद सांति को सागर ।संतन गायो करन उजागर ॥तामें तन मन रहै समोई ।अहं अगिनि नहिं दाहैं कोई ॥ ५२॥दोहाअहंकार की अगिनि में दहत सकल संसार ।तुलसी बाँचै संतजन केवल सांति अधार ॥ ५३॥महा सांति जल परसि कै सांत भए जन जोइ ।अहं अगिनि ते नहिं दहैं कोटि करै जो कोइ ॥ ५४॥तेज होत तन तरनि को अचरज मानत लोइ ।तुलसी जो पानी भया बहुरि न पावक होइ ॥ ५५॥जद्यपी सीतल सम सुखद जगमें जीवन प्रान ।तदपि सांति जल जनि गनौ पावक तेल प्रमान ॥ ५६॥चौपाईजरै बरै अरु खीझि खिझावै ।राग द्वेष महँ जनम गँवावै ॥सपनेहुँ सांति नहि उन देही ।तुलसी जहाँजहाँ ब्रत एही ॥ ५७॥दोहासोइ पंडित सोइ पारखी सोई संत सुजान ।सोई सूर सचेत सो सोई सुभट प्रमान ॥ ५८॥सोइ ग्यानी सोइ गुनी जन सोई दाता ध्यानि ।तुलसी जाके चित भई राग द्वेष की हानि ॥ ५९॥चौपाईराग द्वेष की अगिनि बुझानी ।काम क्रोध बासना नसानी ॥तुलसी जबहि सांति गृह आई ।तब उरहीं उर फिरी दोहाई ॥ ६०॥दोहाफिरी दोहाई राम की गे कामादिक भाजि ।तुलसी ज्यों रबि कें उदय तुरत जात तम लाजि ॥ ६१॥यह बिराग संदीपनी सुजन सुचित सुनि लेहु ।अनुचित बचन बिचारि के जस सुधारि तस देहु ॥ ६२॥

|| atha śrīgosvāmitulasīdāsakṛta vairāgyasaṃdīpanī ||dohārāma bāma disi jānakī lakhana dāhinī ora |dhyāna sakala kalyānamaya surataru tulasi tora || 1||tulasī miṭai na moha tama kiem̐ koṭi guna grāma |hṛdaya kamala phūlai nahīṃ binu rabikularabi rāma || 2||sunata lakhata śruti nayana binu rasanā binu rasa leta |bāsa nāsikā binu lahai parasai binā niketa || 3||soraṭhāaja advaita anāma alakha rūpagunarahita jo |māyā pati soī rāma dāsa hetu naratanudhareu || 4||dohātulasī yaha tanu kheta hai mana baca karma kisāna |pāpapunya dvai bīja haiṃ bavai so lavai nidāna || 5||tulasī yaha tanu tavā hai tapata sadā traitāpa |sāṃti hoī jaba sāṃtipada pāvai rāma pratāpa || 6||tulasī bedapurānamata pūrana sāstra bicāra |yaha birāgasaṃdīpanī akhila gyāna ko sāra || 7||dohāsarala barana bhāṣā sarala sarala arthamaya māni |tulasī saralai saṃtajana tāhi parī pahicāni || 8||caupāīati sītala ati hī sukhadāī |sama dama rāma bhajana adhikāī ||jaḍa jīvana kauṃ karai sacetā |jaga maham̐ bicarata hai ehi hetā || 9||dohātulasī aise kahum̐ kahūm̐ dhanya dharani vaha saṃta |parakāje paramārathī prīti liye nibahaṃta || 10||kī mukha paṭa dīnhe rahaiṃ jathā artha bhāṣaṃta |tulasī yā saṃsārameṃ so bicārajuta saṃta || 11||bolai bacana bicāri kai līnheṃ saṃta subhāva |tulasī dukha durbacana ke paṃtha deta nahiṃ pām̐va || 12||satru na kāhū kari ganai mitra ganai nahiṃ kāhi |tulasī yaha mata saṃta ko bolai samatā māhi || 13||caupāīati ananyagati iṃdrī jītā |jāko hari binu katahum̐ na cītā ||mṛga tṛṣṇā sama jaga jiya jānī |tulasī tāhi saṃta pahicānī || 14||dohāeka bharoso eka bala eka āsa bisvāsa |rāmarūpa svātī jalada cātaka tulasīdāsa || 15||so jana jagata jahāja hai jāke rāga na doṣa |tulasī tṛṣṇā tyāgi kai gahai sīla saṃtoṣa || 16||sīla gahani saba kī sahani kahani hīya mukha rāma |tulasī rahie ehi rahani saṃta janana ko kāma || 17||nija saṃgī nija sama karata durajana mana dukha dūna |malayācala hai saṃtajana tulasī doṣa bihūna || 18||komala bānī saṃta kī stravata amṛtamaya āi |tulasī tāhi kaṭhora mana sunata maina hoi jāi || 19||anubhava sukha utapati karata bhayabhrama dharai uṭhāi |aisī bānī saṃta kī jo ura bhedai āi || 20||sītala bānī saṃta kī sasihū te anumāna |tulasī koṭi tapana harai jo kou dhārai kāna || 21||caupāīpāpa tāpa saba sūla nasāvai |moha aṃdha rabi bacana bahāvai ||tulasī aise sadaguna sādhū |beda madhya guna bidita agādhū || 22||dohātana kari mana kari bacana kari kāhū dūkhata nāhiṃ |tulasī aise saṃtajana rāmarūpa jaga māhiṃ || 23||mukha dīkhata pātaka harai parasata karma bilāhiṃ |bacana sunata mana mohagata pūruba bhāga milāhiṃ || 24||ati komala aru bimala ruci mānasa meṃ mala nāhiṃ |tulasī rata mana hoi rahai apane sāhiba māhiṃ || 25||jāke mana te uṭhi gaī tilatila tṛṣṇā cāhi |manasā bācā karmanā tulasī baṃdata tāhi || 26||kaṃcana kām̐cahi sama ganai kāmini kāṣṭha paṣāna |tulasī aise saṃtajana pṛthvī brahma samāna || 27||caupāīkaṃcana ko mṛtikā kari mānata |kāmini kāṣṭha silā pahicānata ||tulasī bhūli gayo rasa eha |te jana pragaṭa rāma kī dehā || 28||dohāākiṃcana iṃdrīdamana ramana rāma ika tāra |tulasī aise saṃta jana birale yā saṃsāra |29 ||ahaṃbāda maiṃ taiṃ nahīṃ duṣṭa saṃga nahiṃ koi |dukha te dukha nahiṃ ūpajai sukha taiṃ sukha nahiṃ hoi || 30||sama kaṃcana kām̐cai ginata satru mitra sama doi |tulasī yā saṃsārameṃ kāta saṃta jana soī || 31||birale birale pāie māyā tyāgī saṃta |tulasī kāmī kuṭila kali kekī keka anaṃta || 32||maiṃ taṃ meṭyo moha tama ugyo ātamā bhānu |saṃta rāja so jāniye tulasī yā sahidānu || 33||soraṭhāko baranai mukha eka tulasī mahimā saṃta kī |jinha ke bimala bibeka sesa mahesa na kahi sakata || 34||dohāmahi patrī kari siṃdhu masi taru lekhanī banāi |tulasī ganapata soṃ tadapi mahimā likhī na jāi || 35||dhanya dhanya mātā pitā dhanya putra bara soi |tulasī jo rāmahi bhaje jaisehum̐ kaisehum̐ hoi || 36||tulasī jāke badana te dhokhehum̐ nikasata rāma |tāke paga kī pagatarī mere tana ko cāma || 37||tulasī bhagata supaca bhalau bhajai raina dina rāma |ūm̐co kula kehi kāmako jahām̐ na hariko nāma || 38||ati ūm̐ce bhūdharani para bhujagana ke asthāna |tulasī ati nīce sukhada ūkha anna aru pāna || 39||caupāīati ananya jo hari ko dāsā |raṭai nāma nisidina prati svāsā ||tulasī tehi samāna nahiṃ koī |hama nīkeṃ dekhā saba koī || 40||caupāījadapi sādhu sabahī bidhi hīnā |tadyapi samatā ke na kulīnā ||yaha dina raina nāma uccarai |vaha nita māna agini maham̐ jarai || 41||dohādāsa ratā eka nāma soṃ ubhaya loka sukha tyāgi |tulasī nyāro hvai rahai dahai na dukha kī āgi || 42||raini ko bhūṣana iṃdu hai divasa ko bhūṣana bhānu |dāsa ko bhūṣana bhakti hai bhakti ko bhūṣana gyānu || 43||gyāna ko bhūṣana dhyāna hai dhyāna ko bhūṣana tyāga |tyāga ko bhūṣana śāṃtipada tulasī amala adāga || 44||caupāīamala adāga śāṃtipada sārā |sakala kalesa na karata prahārā ||tulasī ura dhārai jo koī |rahai anaṃda siṃdhu maham̐ soī || 45||bibidha pāpa saṃbhava jo tāpā |miṭahiṃ doṣa dukha dusaha kalāpā ||parama sāṃti sukha rahai samāī |taham̐ utapāta na bedhai āī || 46||tulasī aise sītala saṃtā |sadā rahai ehi bhām̐ti ekaṃtā ||kahā karai khala loga bhujaṃgā |kīnhyau garalasīla jo aṃgā || 47||dohāati sītala atihī amala sakala kāmanā hīna |tulasī tāhi atīta gani bṛtti sāṃti layalīna || 48||caupāījo koi kopa bhare mukha bainā |sanmukha hatai girāsara painā ||tulasī taū lesa risa nāhiṃ |so sītala kahie jaga māhīṃ || 49||dohāsāta dīpa nava khaṃḍa lau tīni loka jaga māhiṃ |tulasī sāṃti samāna sukha apara dūsaro nāhīṃ || 50||caupāījahām̐ sāṃti sataguru kī daī |tahām̐ krodha kī jara jari gaī ||sakala kāma bāsanā bilānī |tulasī bahai sāṃti sahidānī || 51||tulasī sukhada sāṃti ko sāgara |saṃtana gāyo karana ujāgara ||tāmeṃ tana mana rahai samoī |ahaṃ agini nahiṃ dāhaiṃ koī || 52||dohāahaṃkāra kī agini meṃ dahata sakala saṃsāra |tulasī bām̐cai saṃtajana kevala sāṃti adhāra || 53||mahā sāṃti jala parasi kai sāṃta bhae jana joi |ahaṃ agini te nahiṃ dahaiṃ koṭi karai jo koi || 54||teja hota tana tarani ko acaraja mānata loi |tulasī jo pānī bhayā bahuri na pāvaka hoi || 55||jadyapī sītala sama sukhada jagameṃ jīvana prāna |tadapi sāṃti jala jani ganau pāvaka tela pramāna || 56||caupāījarai barai aru khījhi khijhāvai |rāga dveṣa maham̐ janama gam̐vāvai ||sapanehum̐ sāṃti nahi una dehī |tulasī jahām̐jahām̐ brata ehī || 57||dohāsoi paṃḍita soi pārakhī soī saṃta sujāna |soī sūra saceta so soī subhaṭa pramāna || 58||soi gyānī soi gunī jana soī dātā dhyāni |tulasī jāke cita bhaī rāga dveṣa kī hāni || 59||caupāīrāga dveṣa kī agini bujhānī |kāma krodha bāsanā nasānī ||tulasī jabahi sāṃti gṛha āī |taba urahīṃ ura phirī dohāī || 60||dohāphirī dohāī rāma kī ge kāmādika bhāji |tulasī jyoṃ rabi keṃ udaya turata jāta tama lāji || 61||yaha birāga saṃdīpanī sujana sucita suni lehu |anucita bacana bicāri ke jasa sudhāri tasa dehu || 62||

॥ इति श्रीमद्गोस्वामीतुलसीदासकृत वैराग्यसंदीपनी संपूर्णम् ॥

|| iti śrīmadgosvāmītulasīdāsakṛta vairāgyasaṃdīpanī saṃpūrṇam ||