स्वाराज्यानुभवः सार्थः Svarajyanubhavah

चन्द्रच्छायापहरणपटोः सौख्यमाधुर्यधाम्नःसन्तप्तानां परमसुखदैः श्रीमतो राघवस्य ।शीतैः स्वच्छैर्मधुरमधुरै र्हास्यरूपप्रवाहैरारात्तिष्ठन्निधिगतसुखः कल्मषं क्षालयामि ॥ १॥

candracchāyāpaharaṇapaṭoḥ saukhyamādhuryadhāmnaḥsantaptānāṃ paramasukhadaiḥ śrīmato rāghavasya |śītaiḥ svacchairmadhuramadhurai rhāsyarūpapravāhairārāttiṣṭhannidhigatasukhaḥ kalmaṣaṃ kṣālayāmi || 1||

कश्चिद्गङ्गातटमधिवसन् पापपुञ्जं विमुञ्चन्,सत्कर्मादीन्विदधदपरो निर्मलत्वं प्रयाति ।शोभां पश्यन्मधुरवचनस्येन्दुकान्ताननस्य,क्षीणं कुर्वे दुरितमखिलं स्वस्य सीतासखस्य ॥ २॥

kaścidgaṅgātaṭamadhivasan pāpapuñjaṃ vimuñcan,satkarmādīnvidadhadaparo nirmalatvaṃ prayāti |śobhāṃ paśyanmadhuravacanasyendukāntānanasya,kṣīṇaṃ kurve duritamakhilaṃ svasya sītāsakhasya || 2||

कश्चिद्गीतां पठति सततं प्रातरुत्थाय नित्यं,वेदान् कश्चित्पठति सुतरामात्मनिश्श्रेयसाय ।शोभासिन्धोः शुभगुणनिधेः श्रीमतो राघवेन्द्रोर्निर्व्याजं मे रटति रसना नाम कामं ललामम् ॥ ३॥

kaścidgītāṃ paṭhati satataṃ prātarutthāya nityaṃ,vedān kaścitpaṭhati sutarāmātmaniśśreyasāya |śobhāsindhoḥ śubhaguṇanidheḥ śrīmato rāghavendrornirvyājaṃ me raṭati rasanā nāma kāmaṃ lalāmam || 3||

दीनोद्धाराप्रतिहतगतेः सर्वकल्याणधाम्नो,रम्याभोजोपमितवपुषो राघवाम्भोजमानोः ।कान्तं शान्तं सरसमनघं सर्वसच्चित्तहारी,लक्ष्यं यत्तन्मृदुनि वदने मार्दवं शं तनोति ॥ ४॥

dīnoddhārāpratihatagateḥ sarvakalyāṇadhāmno,ramyābhojopamitavapuṣo rāghavāmbhojamānoḥ |kāntaṃ śāntaṃ sarasamanaghaṃ sarvasaccittahārī,lakṣyaṃ yattanmṛduni vadane mārdavaṃ śaṃ tanoti || 4||

संसाराम्भः पटलकुटिलोत्तुङ्गरिङ्गतरङ्गैर्निष्कारुण्यं प्रतिपलमलं ताड्यमानं मनो मे ।चिन्ताचक्रोन्मथितमभितः क्वथ्यमानं विपद्भिर्दन्तज्योती रचयतितमां रामभद्रस्य शान्तम् ॥ ५॥

saṃsārāmbhaḥ paṭalakuṭilottuṅgariṅgataraṅgairniṣkāruṇyaṃ pratipalamalaṃ tāḍyamānaṃ mano me |cintācakronmathitamabhitaḥ kvathyamānaṃ vipadbhirdantajyotī racayatitamāṃ rāmabhadrasya śāntam || 5||

शान्ते शून्ये हृदयपटले दुर्बले मे विनम्रे,पापापारोदकनिधिसरद्विप्रतीसारतापम् ।फुल्लाम्भोजामलदलदृशः श्रीमतो राघवस्य,हृद्यः सद्यः शमयतितमां दृष्टिकोणावपातः ॥ ६॥

śānte śūnye hṛdayapaṭale durbale me vinamre,pāpāpārodakanidhisaradvipratīsāratāpam |phullāmbhojāmaladaladṛśaḥ śrīmato rāghavasya,hṛdyaḥ sadyaḥ śamayatitamāṃ dṛṣṭikoṇāvapātaḥ || 6||

॥ इति श्री परमहंस परिव्राजक जगद्गुरु रामानवाचार्य स्वामिश्री भगवदाचार्यमहाराजैः १९७६ तमे विक्रमसम्वत्सरे प्रणीतः ॥

|| iti śrī paramahaṃsa parivrājaka jagadguru rāmānavācārya svāmiśrī bhagavadācāryamahārājaiḥ 1976 tame vikramasamvatsare praṇītaḥ ||