राधावराष्टकम् ३ राधिकाधिपाष्टकम् Shri Radhavarashtakam

चतुर्मुखादिसंस्तुतं समस्तसात्वतानुतम् ।हलायुधादिसंयुतं नमामि राधिकाधिपम् ॥ १॥

caturmukhādisaṃstutaṃ samastasātvatānutam |halāyudhādisaṃyutaṃ namāmi rādhikādhipam || 1||

बकादिदैत्यकालकं सगोपगोपिपालकम् ।मनोहरासितालकं नमामि राधिकाधिपम् ॥ २॥

bakādidaityakālakaṃ sagopagopipālakam |manoharāsitālakaṃ namāmi rādhikādhipam || 2||

सुरेन्द्रगर्वभञ्जनं विरञ्चिमोहभञ्जनम् ।व्रजाङ्गनानुरञ्जनं नमामि राधिकाधिपम् ॥ ३॥

surendragarvabhañjanaṃ virañcimohabhañjanam |vrajāṅganānurañjanaṃ namāmi rādhikādhipam || 3||

मयूरपिच्छमण्डनं गजेन्द्रदन्तखण्डनम् ।नृशंसकंसदण्डनं नमामि राधिकाधिपम् ॥ ४॥

mayūrapicchamaṇḍanaṃ gajendradantakhaṇḍanam |nṛśaṃsakaṃsadaṇḍanaṃ namāmi rādhikādhipam || 4||

प्रदत्तविप्रदारकं सुदामधामकारकम् ।सुरद्रुमापहारकं नमामि राधिकाधिपम् ॥ ५॥

pradattavipradārakaṃ sudāmadhāmakārakam |suradrumāpahārakaṃ namāmi rādhikādhipam || 5||

धनञ्जयाजयावहं महाचमूक्षया वहम् ।पितमहव्यथापहं नमामि राधिकाधिपम् ॥ ६॥

dhanañjayājayāvahaṃ mahācamūkṣayā vaham |pitamahavyathāpahaṃ namāmi rādhikādhipam || 6||

मुनीन्द्रशापकारणं यदुप्रजापहारणम् ।धराभरावतारणं नमामि राधिकाधिपम् ॥ ७॥

munīndraśāpakāraṇaṃ yaduprajāpahāraṇam |dharābharāvatāraṇaṃ namāmi rādhikādhipam || 7||

सुवृक्षमूलशायिनं मृगारिमोक्षदायिनम् ।स्वकीयधाममायिनं नमामि राधिकाधिपम् ॥ ८॥

suvṛkṣamūlaśāyinaṃ mṛgārimokṣadāyinam |svakīyadhāmamāyinaṃ namāmi rādhikādhipam || 8||

इदं समाहितो हितं वराष्टकं सदा मुदा ।जपञ्जनो जनुर्जरादितो द्रुतं प्रमुच्यते ॥ ९॥

idaṃ samāhito hitaṃ varāṣṭakaṃ sadā mudā |japañjano janurjarādito drutaṃ pramucyate || 9||

इति श्रीनिम्बार्काचार्यविरचितं श्रीराधावराष्टकं सम्पूर्णम् ।राधिकाधिपाष्टकम्

iti śrīnimbārkācāryaviracitaṃ śrīrādhāvarāṣṭakaṃ sampūrṇam |rādhikādhipāṣṭakam