प्रेमसुधासत्रम् अथवा वृन्दावनेश्वर्या एवं राधिकाष्टोत्तरशतनामस्तोत्रं Shri Premasudhasatram

श्रीवृन्दावनेश्वर्या अष्टोत्तरशतनामस्तोत्रंश्रीराधिकाष्टोत्तरशतनामस्तोत्रं च ।नमो वृन्दावनेश्वर्यै ।मानसं मानसं त्यागादुत्कण्ठार्तं निरुन्धतीम् ।राधां संविद्य विद्याढ्या तुङ्गविद्येदमब्रवीत् ॥ १॥

śrīvṛndāvaneśvaryā aṣṭottaraśatanāmastotraṃśrīrādhikāṣṭottaraśatanāmastotraṃ ca |namo vṛndāvaneśvaryai |mānasaṃ mānasaṃ tyāgādutkaṇṭhārtaṃ nirundhatīm |rādhāṃ saṃvidya vidyāḍhyā tuṅgavidyedamabravīt || 1||

विमुञ्च बन्धुरे मानं निर्बन्धं शृणु मे वचः ।पुरा कन्दर्पसुन्दर्यै यान्युत्कण्ठितचेतसे ॥ २॥

vimuñca bandhure mānaṃ nirbandhaṃ śṛṇu me vacaḥ |purā kandarpasundaryai yānyutkaṇṭhitacetase || 2||

भगवतोपदिष्टानि तव सख्योपलब्धये ।इङ्गिताभिज्ञया तानि सिन्दूरेणाद्य वृन्दया ॥ ३॥

bhagavatopadiṣṭāni tava sakhyopalabdhaye |iṅgitābhijñayā tāni sindūreṇādya vṛndayā || 3||

विलिख्य सखि दत्तानि स जीवितसुहृत्तमः ।विरहार्तस्तवेमानि जपन्नामानि शाम्यति ॥ ४॥

vilikhya sakhi dattāni sa jīvitasuhṛttamaḥ |virahārtastavemāni japannāmāni śāmyati || 4||

राधा कृष्णवनाधीशा मुकुन्दमधुमाधवी ।गोविन्दप्रेयसीवृन्दमुख्या वृन्दावनेश्वरी ॥ ५॥

rādhā kṛṣṇavanādhīśā mukundamadhumādhavī |govindapreyasīvṛndamukhyā vṛndāvaneśvarī || 5||

ब्रह्माण्डमण्डलोत्तंसकीरित्ः कार्तिकदेवता ।दामोदरप्रियसखी राधिका वार्षभानवी ॥ ६॥

brahmāṇḍamaṇḍalottaṃsakīritḥ kārtikadevatā |dāmodarapriyasakhī rādhikā vārṣabhānavī || 6||

भानुभक्तिभराभिज्ञा वृषभानुकुमारिका ।मुखराप्राणदौहित्री कीर्तिदाकीर्तिदायिनी ॥ ७॥

bhānubhaktibharābhijñā vṛṣabhānukumārikā |mukharāprāṇadauhitrī kīrtidākīrtidāyinī || 7||

कृष्णप्रेमाब्धिकरी वत्सलाच्युतमातृका ।सखीमण्डलजीवातुर्ललिताजीविताधिका ॥ ८॥

kṛṣṇapremābdhikarī vatsalācyutamātṛkā |sakhīmaṇḍalajīvāturlalitājīvitādhikā || 8||

विशाखाप्राणसर्वस्वं कारुण्यामृतमेदुरा ।पौर्णमासीपृथुप्रेमपात्री सुबलनन्दिता ॥ ९॥

viśākhāprāṇasarvasvaṃ kāruṇyāmṛtamedurā |paurṇamāsīpṛthupremapātrī subalananditā || 9||

कृष्णाधिराजमहिषी वृन्दारण्यविहारिणी ।विशाखासख्यविख्याता ललिताप्रेमलालिता ॥ १०॥

kṛṣṇādhirājamahiṣī vṛndāraṇyavihāriṇī |viśākhāsakhyavikhyātā lalitāpremalālitā || 10||

सदा किशोरिका गोष्ठयुवराजविलासिनी ।गोविन्दप्रेमशिक्षार्थनटीकृतनिजांशका ॥ ११॥

sadā kiśorikā goṣṭhayuvarājavilāsinī |govindapremaśikṣārthanaṭīkṛtanijāṃśakā || 11||

प्रबोधिनीनिशानृत्यमाहात्म्यभरदर्शिनी ।चन्द्रकान्तिचरी सर्वगन्धर्वकुलपावनी ॥ १२॥

prabodhinīniśānṛtyamāhātmyabharadarśinī |candrakānticarī sarvagandharvakulapāvanī || 12||

स्वजन्मभूषितोत्तुङ्गवृषभानुकुलस्थितिः ।लास्यविद्याव्रतस्नाता रासक्रीडादिकारणम् ॥ १३॥

svajanmabhūṣitottuṅgavṛṣabhānukulasthitiḥ |lāsyavidyāvratasnātā rāsakrīḍādikāraṇam || 13||

रासोत्सवयपुरगण्या कृष्णनीतरहःस्थला ।गोविन्दबन्धकवरी कृष्णोत्तंसितकुन्तला ॥ १४॥

rāsotsavayapuragaṇyā kṛṣṇanītarahaḥsthalā |govindabandhakavarī kṛṣṇottaṃsitakuntalā || 14||

व्यक्तगोष्ठारविन्दाक्षि वृन्दोत्कर्षातिहर्षिणी ।अन्नतर्पितदुर्वासा गान्धर्वा श्रुतिविश्रुता ॥ १५॥

vyaktagoṣṭhāravindākṣi vṛndotkarṣātiharṣiṇī |annatarpitadurvāsā gāndharvā śrutiviśrutā || 15||

गान्धर्विका स्वगान्धर्वविस्मापितबलाच्युता ।शङ्खचूडारिदयिता गोपीचूडाग्रमालिका ॥ १६॥

gāndharvikā svagāndharvavismāpitabalācyutā |śaṅkhacūḍāridayitā gopīcūḍāgramālikā || 16||

चारुगोरोचनागौरी गारुत्मतनिभाम्बरा ।विचित्रपट्टचमरीचारुवेणीशिखारुचिः ॥ १७॥

cārugorocanāgaurī gārutmatanibhāmbarā |vicitrapaṭṭacamarīcāruveṇīśikhāruciḥ || 17||

पद्मेन्दुजैत्रवक्त्रश्रीनिरुद्धमुरमर्दना ।चकोरिकाचमत्कारीहरिहारिविलोचना ॥ १८॥

padmendujaitravaktraśrīniruddhamuramardanā |cakorikācamatkārīharihārivilocanā || 18||

कालियदमनोत्कम्पिभङ्गुरभ्रूभुजङ्गमा ।नासिकाशिखरालम्बिलवलीस्थलमौक्तिका ॥ १९॥

kāliyadamanotkampibhaṅgurabhrūbhujaṅgamā |nāsikāśikharālambilavalīsthalamauktikā || 19||

बन्धुराधरबन्धूकविकृष्टमधुसूदना ।दन्तनिर्धूतशिखरा शिखरीन्द्रधरप्रिया ॥ २०॥

bandhurādharabandhūkavikṛṣṭamadhusūdanā |dantanirdhūtaśikharā śikharīndradharapriyā || 20||

कपोलमण्डलान्दोलिमणिकुण्डलमण्डिता ।पीतांशुकशुकाकर्षिनिस्तलस्तनदाडिमा ॥ २१॥

kapolamaṇḍalāndolimaṇikuṇḍalamaṇḍitā |pītāṃśukaśukākarṣinistalastanadāḍimā || 21||

मणिकिङ्किण्यलङ्कारझङ्कारिश्रोणिमण्डला ।स्थलारविन्दविञ्छोलीनिर्मञ्छितपदद्युतिः ॥ २२॥

maṇikiṅkiṇyalaṅkārajhaṅkāriśroṇimaṇḍalā |sthalāravindaviñcholīnirmañchitapadadyutiḥ || 22||

अरिष्टवधनर्मार्थनिर्मापितसरोवरा ।गन्धोन्मादितगोविन्दो माधवद्वन्द्वताङ्किता ॥ २३॥

ariṣṭavadhanarmārthanirmāpitasarovarā |gandhonmāditagovindo mādhavadvandvatāṅkitā || 23||

कालिन्दीकूलकुञ्जश्रीर्भाण्डीरतटमण्डना ।धृतनन्दीश्वरस्थेमा गोवर्धनदरीप्रिया ॥ २४॥

kālindīkūlakuñjaśrīrbhāṇḍīrataṭamaṇḍanā |dhṛtanandīśvarasthemā govardhanadarīpriyā || 24||

वंशीबडिशिकाबिद्धरसोत्तर्षमनोझषा ।वंशिकाध्वनिविश्रंसिनीवीबन्धग्रहातुरा ॥ २५॥

vaṃśībaḍiśikābiddharasottarṣamanojhaṣā |vaṃśikādhvaniviśraṃsinīvībandhagrahāturā || 25||

मुकुन्दनेत्रशफरी विहारामृतदीर्घिका ।निजकुण्डकुडुङ्गान्तस्तुङ्गानङ्गरसोन्मदा ॥ २६॥

mukundanetraśapharī vihārāmṛtadīrghikā |nijakuṇḍakuḍuṅgāntastuṅgānaṅgarasonmadā || 26||

कृष्णभ्रूचण्डकोदण्डोड्डीनधैर्यविहङ्गमा ।अनुरागसुधासिन्धुहिन्दोलान्दोलिताच्युता ॥ २७॥

kṛṣṇabhrūcaṇḍakodaṇḍoḍḍīnadhairyavihaṅgamā |anurāgasudhāsindhuhindolāndolitācyutā || 27||

व्रजेन्द्रनन्दनास्येन्दुतुङ्गितानङ्गसागरा ।अनङ्गसङ्गरोत्तृष्णकृष्णलुञ्चितकञ्चुका ॥ २८॥

vrajendranandanāsyendutuṅgitānaṅgasāgarā |anaṅgasaṅgarottṛṣṇakṛṣṇaluñcitakañcukā || 28||

लीलापद्महतोद्दामनर्मलम्पटकेशवा ।हरिवक्षोहरिग्रावहरितालीयरेखिका ॥ २९॥

līlāpadmahatoddāmanarmalampaṭakeśavā |harivakṣoharigrāvaharitālīyarekhikā || 29||

माधवोत्सङ्गपर्यङ्का कृष्णबाहूपधानिका ।रतिकेलिविशेषोहसखीस्मितविलज्जिता ॥ ३०॥

mādhavotsaṅgaparyaṅkā kṛṣṇabāhūpadhānikā |ratikeliviśeṣohasakhīsmitavilajjitā || 30||

आलीपुरोरहःकेलिजल्पोत्कहरिवन्दिनी ।वैजयन्ती कलाभिज्ञा वनस्रक्शिल्पकल्पिनी ॥ ३१॥

ālīpurorahaḥkelijalpotkaharivandinī |vaijayantī kalābhijñā vanasrakśilpakalpinī || 31||

धातुचित्रातिवैचित्रीविसृष्टिपरमेष्ठिनी ।विदग्धीप्रथमाचार्या चारुचातुर्यचित्रिता ॥ ३२॥

dhātucitrātivaicitrīvisṛṣṭiparameṣṭhinī |vidagdhīprathamācāryā cārucāturyacitritā || 32||

असाधारणसौभाग्यभाग्यामृततरङ्गिनी ।मौग्ध्यप्रगल्भतारम्या धीराधीराङ्कभूषिता ॥ ३३॥

asādhāraṇasaubhāgyabhāgyāmṛtataraṅginī |maugdhyapragalbhatāramyā dhīrādhīrāṅkabhūṣitā || 33||

श्यामलप्रच्छदपटी मूकनूपुरधारिणी ।निकुञ्जधामसंस्कारमाधवाध्वेक्षणक्रिया ॥ ३४॥

śyāmalapracchadapaṭī mūkanūpuradhāriṇī |nikuñjadhāmasaṃskāramādhavādhvekṣaṇakriyā || 34||

प्रादुर्भूतघनोत्कण्ठा विप्रलम्भविषण्णधीः ।प्रातरुत्प्रासितोपेन्द्रा चन्द्रावलिकटाक्षिणी ॥ ३५॥

prādurbhūtaghanotkaṇṭhā vipralambhaviṣaṇṇadhīḥ |prātarutprāsitopendrā candrāvalikaṭākṣiṇī || 35||

अनाकर्णितकंसारिकाकूवादा मनस्विनी ।चाटुकारहरित्यागजातानुशयकातरा ॥ ३६॥

anākarṇitakaṃsārikākūvādā manasvinī |cāṭukāraharityāgajātānuśayakātarā || 36||

धृतकृष्णेक्षणोत्सुक्या ललिताभीतिमानिनी ।विप्रयोगव्यथाहारिहरिसन्देशनन्दिता ॥ ३७॥

dhṛtakṛṣṇekṣaṇotsukyā lalitābhītimāninī |viprayogavyathāhāriharisandeśananditā || 37||

मदाल्पजल्पिताधीनपुण्डरीकाक्षमण्डिता ।भ्रूलीलामोहितोपेन्द्रहस्ताग्रहृतवंशिका ॥ ३८॥

madālpajalpitādhīnapuṇḍarīkākṣamaṇḍitā |bhrūlīlāmohitopendrahastāgrahṛtavaṃśikā || 38||

अतुलाच्युतमाधुर्यस्वादनाद्वैतभाग्यभूः ।नियुद्धश्रान्तिनिद्राण हरिहारापहारिणी ॥ ३९॥

atulācyutamādhuryasvādanādvaitabhāgyabhūḥ |niyuddhaśrāntinidrāṇa harihārāpahāriṇī || 39||

द्यूतनिर्जितवंशार्थिकंसारिपरिहासिनी ।निजप्राणार्बुदप्रेष्ठकृष्णपादनखाञ्चला ॥ ४०॥

dyūtanirjitavaṃśārthikaṃsāriparihāsinī |nijaprāṇārbudapreṣṭhakṛṣṇapādanakhāñcalā || 40||

इति राधा सखीवाचमाचम्य पुलकाञ्चिता ।छद्मना पद्मनाभस्य लतासद्मान्तिकं गता ॥ ४१॥

iti rādhā sakhīvācamācamya pulakāñcitā |chadmanā padmanābhasya latāsadmāntikaṃ gatā || 41||

यः सेवते जनो राधानाम्नामष्टोत्तरं शतम् ।नाम्ना प्रेमसुधासत्रं लिह्यात् प्रेमसुधामसौ ॥ ४२॥

yaḥ sevate jano rādhānāmnāmaṣṭottaraṃ śatam |nāmnā premasudhāsatraṃ lihyāt premasudhāmasau || 42||

इति श्रीरूपगोस्वामिविरचितस्तवमालायां प्रेमेन्दुसुधासत्रनामकश्रीराधिकाष्टोत्तरशतनामस्तोत्रं समाप्तम् ।

iti śrīrūpagosvāmiviracitastavamālāyāṃ premendusudhāsatranāmakaśrīrādhikāṣṭottaraśatanāmastotraṃ samāptam |