राधापूजाविधिवर्णनम् Radhapujavidhivarnanam

श्वेतचम्पकवर्णाभां कोटिचन्द्रसमप्रभाम् ।शरत्पार्वणचन्द्रास्यां शरत्पङ्कजलोचनाम् ।सुश्रोणीं सुनितम्बां च पक्वबिम्बाधरां वराम् ॥ १०॥

śvetacampakavarṇābhāṃ koṭicandrasamaprabhām |śaratpārvaṇacandrāsyāṃ śaratpaṅkajalocanām |suśroṇīṃ sunitambāṃ ca pakvabimbādharāṃ varām || 10||

मुक्तापङ्क्तिप्रतिनिधिदन्तपङ्क्तिमनोहराम् ।ईषद्धास्यप्रसन्नास्यां भक्तानुग्रहकारिकाम् ।वह्निशुद्धांशुकाधानां रत्नमालाविभूषिताम् ॥ ११॥

muktāpaṅktipratinidhidantapaṅktimanoharām |īṣaddhāsyaprasannāsyāṃ bhaktānugrahakārikām |vahniśuddhāṃśukādhānāṃ ratnamālāvibhūṣitām || 11||

रत्नकेयूरवलयां रत्नमञ्जीररञ्जिताम् ।रत्नकुण्डलयुग्मेन विचित्रेण विराजिताम् ।सूर्यप्रभाप्रतिकृतिगण्डस्थलविराजिताम् ॥ १२॥

ratnakeyūravalayāṃ ratnamañjīrarañjitām |ratnakuṇḍalayugmena vicitreṇa virājitām |sūryaprabhāpratikṛtigaṇḍasthalavirājitām || 12||

अमूल्यरत्नखचितग्रैवेयकविभूषिताम् ।सद्रत्नसारखचितकिरीटमुकुटोज्ज्वलाम् ।रत्नाङ्गुलीयसंयुक्तां रत्नपाशकशोभिताम् ॥ १३॥

amūlyaratnakhacitagraiveyakavibhūṣitām |sadratnasārakhacitakirīṭamukuṭojjvalām |ratnāṅgulīyasaṃyuktāṃ ratnapāśakaśobhitām || 13||

बिभ्रतीं कबरीभारं मालतीमाल्यशोभिताम् ।रूपाधिष्ठातृदेवीं च मत्तवारणगामिनीम् ॥ १४॥

bibhratīṃ kabarībhāraṃ mālatīmālyaśobhitām |rūpādhiṣṭhātṛdevīṃ ca mattavāraṇagāminīm || 14||

गोपीभिः सुप्रियाभिश्च सेवितां श्वेतचामरैः ।कस्तूरीबिन्दुभिः सार्द्धमधश्चन्दनबिन्दुना ॥ १५॥

gopībhiḥ supriyābhiśca sevitāṃ śvetacāmaraiḥ |kastūrībindubhiḥ sārddhamadhaścandanabindunā || 15||

सिन्दूरबिन्दुना चारुसीमन्ताधःस्थलोज्ज्वलाम् ।नित्यं सुपूजितां भक्त्या कृष्णेन परमात्मना ॥ १६॥

sindūrabindunā cārusīmantādhaḥsthalojjvalām |nityaṃ supūjitāṃ bhaktyā kṛṣṇena paramātmanā || 16||

कृष्णसौभाग्यसंयुक्तां कृष्णप्राणाधिकां वराम् ।कृष्णप्राणाधिदेवीं च निर्गुणां च परात्पराम् ॥ १७॥

kṛṣṇasaubhāgyasaṃyuktāṃ kṛṣṇaprāṇādhikāṃ varām |kṛṣṇaprāṇādhidevīṃ ca nirguṇāṃ ca parātparām || 17||

महाविष्णुविधात्रीं च प्रदात्रीं सर्वसम्पदाम् ।कृष्णभक्तिप्रदां शान्तां मूलप्रकृतिमीश्वरीम् ॥ १८॥

mahāviṣṇuvidhātrīṃ ca pradātrīṃ sarvasampadām |kṛṣṇabhaktipradāṃ śāntāṃ mūlaprakṛtimīśvarīm || 18||

वैष्णवीं विष्णुमायां च कृष्णप्रेममयीं शुभाम् ।रासमण्डलमध्यस्थां रत्नसिंहासनस्थिताम् ।रासे रासेश्वरयुतां राधां रासेश्वरीं भजे ॥ १९॥

vaiṣṇavīṃ viṣṇumāyāṃ ca kṛṣṇapremamayīṃ śubhām |rāsamaṇḍalamadhyasthāṃ ratnasiṃhāsanasthitām |rāse rāseśvarayutāṃ rādhāṃ rāseśvarīṃ bhaje || 19||

ध्यात्वा पुष्पं मूर्ध्नि दत्त्वा पुनर्ध्यायेज्जगत्प्रभुम् ।दद्यात्पुष्पं पुनर्ध्यात्वा चोपचाराणि षोडश ॥ २०॥

dhyātvā puṣpaṃ mūrdhni dattvā punardhyāyejjagatprabhum |dadyātpuṣpaṃ punardhyātvā copacārāṇi ṣoḍaśa || 20||

आसनं वसनं पाद्यमर्घ्यं गन्धानुलेपनम् ।धूपं दीपं सुपुष्पं च स्नानीयं रत्नभूषणम् ॥ २१॥

āsanaṃ vasanaṃ pādyamarghyaṃ gandhānulepanam |dhūpaṃ dīpaṃ supuṣpaṃ ca snānīyaṃ ratnabhūṣaṇam || 21||

नानाप्रकारनैवेद्यं ताम्बूलं वासितं जलम् ।मधुपर्कं रत्नतल्पमुपचाराणि षोडश ॥ २२॥

nānāprakāranaivedyaṃ tāmbūlaṃ vāsitaṃ jalam |madhuparkaṃ ratnatalpamupacārāṇi ṣoḍaśa || 22||

इति श्रीब्रह्मवैवर्त्ते महापुराणे द्वितीये प्रकृतिखण्डेपञ्चपञ्चाशत्तमाध्यायान्तर्गतं राधापूजाविधिवर्णनंसमाप्तम् ।ब्रह्मवैवर्तपुराण । प्रकृतिखण्ड । अध्याय ५५/१०२२॥ब्रह्मवैवर्तपुराण । प्रकृतिखण्ड । अध्याय ५५/१०-२२॥

iti śrībrahmavaivartte mahāpurāṇe dvitīye prakṛtikhaṇḍepañcapañcāśattamādhyāyāntargataṃ rādhāpūjāvidhivarṇanaṃsamāptam |brahmavaivartapurāṇa | prakṛtikhaṇḍa | adhyāya 55/1022||brahmavaivartapurāṇa | prakṛtikhaṇḍa | adhyāya 55/10-22||