राधाविभूतिस्तोत्रम् Radhavibhuti Stotram

ज्योतीरूपा निराकारा भक्तानुग्रहविग्रहा ।भक्तानां रुचिवैचित्र्यान्नानामूर्त्तीश्च बिभ्रती ॥ ७८॥

jyotīrūpā nirākārā bhaktānugrahavigrahā |bhaktānāṃ rucivaicitryānnānāmūrttīśca bibhratī || 78||

महालक्ष्मीश्च वैकुण्ठे भारती च सतां प्रसूः ।पुण्यक्षेत्रे भारते च सती त्वं पार्वती तथा ॥ ७९॥

mahālakṣmīśca vaikuṇṭhe bhāratī ca satāṃ prasūḥ |puṇyakṣetre bhārate ca satī tvaṃ pārvatī tathā || 79||

तुलसी पुण्यरूपा च गङ्गा भुवनपावनी ।ब्रह्मलोके च सावित्री कलया त्वं वसुन्धरा ॥ ८०॥

tulasī puṇyarūpā ca gaṅgā bhuvanapāvanī |brahmaloke ca sāvitrī kalayā tvaṃ vasundharā || 80||

गोलोके राधिका त्वं च सर्वगोपालकेश्वरी ।त्वया विनाऽहं निर्जीवो ह्यशक्तः सर्व कर्मसु ॥ ८१॥

goloke rādhikā tvaṃ ca sarvagopālakeśvarī |tvayā vinā'haṃ nirjīvo hyaśaktaḥ sarva karmasu || 81||

शिवः शक्तस्त्वया शक्त्या शवाकारस्त्वया विना ।वेदकर्ता स्वयं ब्रह्मा वेदमात्रा त्वया सह ॥ ८२॥

śivaḥ śaktastvayā śaktyā śavākārastvayā vinā |vedakartā svayaṃ brahmā vedamātrā tvayā saha || 82||

नारायणस्त्वया लक्ष्म्या जगत्पाता जगत्पतिः ।फलं ददाति यज्ञश्च त्वया दक्षिणया सह ॥ ८३॥

nārāyaṇastvayā lakṣmyā jagatpātā jagatpatiḥ |phalaṃ dadāti yajñaśca tvayā dakṣiṇayā saha || 83||

बिभर्त्ति सृष्टिं शेषश्च त्वां कृत्वा मस्तके भुवम् ।बिभर्त्ति गङ्गारूपां त्वां मूर्ध्नि गङ्गाधरः शिवः ॥ ८४॥

bibhartti sṛṣṭiṃ śeṣaśca tvāṃ kṛtvā mastake bhuvam |bibhartti gaṅgārūpāṃ tvāṃ mūrdhni gaṅgādharaḥ śivaḥ || 84||

शक्तिमच्च जगत्सर्वं शवरूपं त्वया विना ।वक्ता सर्वस्त्वया वाण्या सूतो मूकस्त्वया विना ॥ ८९॥

śaktimacca jagatsarvaṃ śavarūpaṃ tvayā vinā |vaktā sarvastvayā vāṇyā sūto mūkastvayā vinā || 89||

यथा मृदा घटं कर्त्तुं कुलालः शक्तिमान्सदा ।सृष्टिं स्रष्टुं तथाऽहं च प्रकृत्या च त्वया सह ॥ ८६॥

yathā mṛdā ghaṭaṃ karttuṃ kulālaḥ śaktimānsadā |sṛṣṭiṃ sraṣṭuṃ tathā'haṃ ca prakṛtyā ca tvayā saha || 86||

त्वया विना जडश्चाहं सर्वत्र च न शक्तिमान् ।सर्वशक्तिस्वरूपा त्वं त्वमागच्छ ममान्तिकम् ॥ ८७॥

tvayā vinā jaḍaścāhaṃ sarvatra ca na śaktimān |sarvaśaktisvarūpā tvaṃ tvamāgaccha mamāntikam || 87||

वह्नौ त्वं दाहिकाशक्तिर्नाग्निश्शक्तस्त्वया विना ।शोभास्वरूपा चन्द्रे त्वं त्वां विना न स सुन्दरः ॥ ८८॥

vahnau tvaṃ dāhikāśaktirnāgniśśaktastvayā vinā |śobhāsvarūpā candre tvaṃ tvāṃ vinā na sa sundaraḥ || 88||

प्रभारूपा हि सूर्ये त्वं त्वां विना न स भानुमान् ।न कामः कामिनीबन्धुस्त्वया रत्या विना प्रिये ॥ ८९॥

prabhārūpā hi sūrye tvaṃ tvāṃ vinā na sa bhānumān |na kāmaḥ kāminībandhustvayā ratyā vinā priye || 89||

इत्येवं स्तवनं कृत्वा तां सम्प्राप जगत्प्रभुः ।देवा बभूवुः सश्रीकाः सभार्याः शक्तिसंयुताः ॥ ९०॥

ityevaṃ stavanaṃ kṛtvā tāṃ samprāpa jagatprabhuḥ |devā babhūvuḥ saśrīkāḥ sabhāryāḥ śaktisaṃyutāḥ || 90||

सस्त्रीकं च जगत्सर्वं समभूच्छैलकन्यके ।गोपीपूर्णश्च गोलोको ह्यभवत्तत्प्रसादतः ॥ ९१॥

sastrīkaṃ ca jagatsarvaṃ samabhūcchailakanyake |gopīpūrṇaśca goloko hyabhavattatprasādataḥ || 91||

राजा जगाम गोलोकमिति स्तुत्वा हरिप्रियाम् ।श्रीकृष्णेन कृतं स्तोत्रं राधाया यः पठेन्नरः ॥ ९२॥

rājā jagāma golokamiti stutvā haripriyām |śrīkṛṣṇena kṛtaṃ stotraṃ rādhāyā yaḥ paṭhennaraḥ || 92||

कृष्णभक्तिं च तद्दास्यं सं प्राप्नोति न संशयः ।स्त्रीविच्छेदे यः शृणोति मासमेकमिदं शुचिः ॥ ९३॥

kṛṣṇabhaktiṃ ca taddāsyaṃ saṃ prāpnoti na saṃśayaḥ |strīvicchede yaḥ śṛṇoti māsamekamidaṃ śuciḥ || 93||

अचिराल्लभते भार्य्यां सुशीलां सुन्दरीं सतीम् ।भार्याहीनो भाग्यहीनो वर्षमेकं शृणोति यः ॥ ९४॥

acirāllabhate bhāryyāṃ suśīlāṃ sundarīṃ satīm |bhāryāhīno bhāgyahīno varṣamekaṃ śṛṇoti yaḥ || 94||

अचिराल्लभते भार्य्यां सुशीलां सुन्दरीं सतीम् ।पुरा मया च त्वं प्राप्ता स्तोत्रेणानेन पार्वति ॥ ९५॥

acirāllabhate bhāryyāṃ suśīlāṃ sundarīṃ satīm |purā mayā ca tvaṃ prāptā stotreṇānena pārvati || 95||

मृतायां दक्षकन्यायामाज्ञया परमात्मनः ।स्तोत्रेणानेन सम्प्राप्ता सावित्री ब्रह्मणा पुरा ॥ ९६॥

mṛtāyāṃ dakṣakanyāyāmājñayā paramātmanaḥ |stotreṇānena samprāptā sāvitrī brahmaṇā purā || 96||

पुरा दुर्वाससः शापान्निश्श्रीके देवतागणे ।स्तोत्रेणानेन देवैस्तैः सम्प्राप्ता श्रीः सुदुर्लभा ॥ ९७॥

purā durvāsasaḥ śāpānniśśrīke devatāgaṇe |stotreṇānena devaistaiḥ samprāptā śrīḥ sudurlabhā || 97||

शृणोति वर्षमेकं च पुत्रार्थी लभते सुतम् ।महाव्याधी रोगमुक्तो भवेत्स्तोत्रप्रसादतः ॥ ९८॥

śṛṇoti varṣamekaṃ ca putrārthī labhate sutam |mahāvyādhī rogamukto bhavetstotraprasādataḥ || 98||

कार्त्तिकीपूर्णिमायां तु तां सम्पूज्य पठेत्तु यः ।अचलां श्रियमाप्नोति राजसूयफलं लभेत् ॥ ९९॥

kārttikīpūrṇimāyāṃ tu tāṃ sampūjya paṭhettu yaḥ |acalāṃ śriyamāpnoti rājasūyaphalaṃ labhet || 99||

नारी शृणोति चेत्स्तोत्रं स्वामिसौभाग्यसंयुता ।भक्त्या शृणोति यः स्तोत्रं बन्धनान्मुच्यते ध्रुवम् ॥ १००॥

nārī śṛṇoti cetstotraṃ svāmisaubhāgyasaṃyutā |bhaktyā śṛṇoti yaḥ stotraṃ bandhanānmucyate dhruvam || 100||

नित्यं पठति यो भक्त्या राधां सम्पूज्य भक्तितः ।स प्रयाति च गोलोकं निर्मुक्तो भवबन्धनात् ॥ १०१॥

nityaṃ paṭhati yo bhaktyā rādhāṃ sampūjya bhaktitaḥ |sa prayāti ca golokaṃ nirmukto bhavabandhanāt || 101||

इति श्रीब्रह्मवैवर्त्ते महापुराणे द्वितीये प्रकृतिखण्डेपञ्चपञ्चाशत्तमाध्यायान्तर्गतं राधाविभूतिस्तोत्रंसमाप्तम् ।ब्रह्मवैवर्तपुराण । प्रकृतिखण्ड । अध्याय ५५/७८९२॥ब्रह्मवैवर्तपुराण । प्रकृतिखण्ड । अध्याय ५५/७८-९२॥

iti śrībrahmavaivartte mahāpurāṇe dvitīye prakṛtikhaṇḍepañcapañcāśattamādhyāyāntargataṃ rādhāvibhūtistotraṃsamāptam |brahmavaivartapurāṇa | prakṛtikhaṇḍa | adhyāya 55/7892||brahmavaivartapurāṇa | prakṛtikhaṇḍa | adhyāya 55/78-92||