घटिकाचलहनुमत्स्तोत्रम् २ Shrighatikachalahanumatstotram 2

शङ्खचक्रधरं देवं घटिकाचलवासिनम् ।योगारूढं ह्याञ्जनेयं वायुपुत्रं नमाम्यहम् ॥ १॥

śaṅkhacakradharaṃ devaṃ ghaṭikācalavāsinam |yogārūḍhaṃ hyāñjaneyaṃ vāyuputraṃ namāmyaham || 1||

भक्ताभीष्टप्रदातारं चतुर्बाहुविराजितम् ।दिवाकरद्युतिनिभं वन्देऽहं पवनात्मजम् ॥ २॥

bhaktābhīṣṭapradātāraṃ caturbāhuvirājitam |divākaradyutinibhaṃ vande'haṃ pavanātmajam || 2||

कौपीनमेखलासूत्रं स्वर्णकुण्डलमण्डितम् ।लङ्घिताब्धिं रामदूतं नमामि सततं हरिम् ॥ ३॥

kaupīnamekhalāsūtraṃ svarṇakuṇḍalamaṇḍitam |laṅghitābdhiṃ rāmadūtaṃ namāmi satataṃ harim || 3||

दैत्यानां नाशनार्थाय महाकायधरं विभुम् ।गदाधरकरो यस्तं वन्देऽहं मारुतात्मजम् ॥ ४॥

daityānāṃ nāśanārthāya mahākāyadharaṃ vibhum |gadādharakaro yastaṃ vande'haṃ mārutātmajam || 4||

नृसिंहाभिमुखो भूत्वा पर्वताग्रे च संस्थितम् ।वाञ्छन्तं ब्रह्मपदवीं नमामि कपिनायकम् ॥ ५॥

nṛsiṃhābhimukho bhūtvā parvatāgre ca saṃsthitam |vāñchantaṃ brahmapadavīṃ namāmi kapināyakam || 5||

बालादित्यवपुष्कं च सागरोत्तारकारकम् ।समीरवेगं देवेशं वन्दे ह्यमितविक्रमम् ॥ ६॥

bālādityavapuṣkaṃ ca sāgarottārakārakam |samīravegaṃ deveśaṃ vande hyamitavikramam || 6||

पद्मरागारुणमणिशोभितं कामरूपिणम् ।पारिजाततरुस्थं च वन्देऽहं वनचारिणम् ॥ ७॥

padmarāgāruṇamaṇiśobhitaṃ kāmarūpiṇam |pārijātatarusthaṃ ca vande'haṃ vanacāriṇam || 7||

रामदूत नमस्तुभ्यं पादपद्मार्चनं सदा ।देहि मे वाञ्छितफलं पुत्रपौत्रप्रवर्धनम् ॥ ८॥

rāmadūta namastubhyaṃ pādapadmārcanaṃ sadā |dehi me vāñchitaphalaṃ putrapautrapravardhanam || 8||

इदं स्तोत्रं पठेन्नित्यं प्रातःकाले द्विजोत्तमः ।तस्याभीष्टं ददात्याशु रामभक्तो महाबलः ॥ ९॥

idaṃ stotraṃ paṭhennityaṃ prātaḥkāle dvijottamaḥ |tasyābhīṣṭaṃ dadātyāśu rāmabhakto mahābalaḥ || 9||