हनुमदष्टोत्तरशतनामस्तोत्रम् ०२ Shrihanumadashtottarashatanamastotram 2

(पाञ्चरात्रागमतः)ॐ रामदासाग्रणीः श्रीमान् हनूमान् पवनात्मजः ।आञ्जनेयः कपिश्रेष्ठः केसरीप्रियनन्दनः ॥ १॥

(pāñcarātrāgamataḥ)oṃ rāmadāsāgraṇīḥ śrīmān hanūmān pavanātmajaḥ |āñjaneyaḥ kapiśreṣṭhaḥ kesarīpriyanandanaḥ || 1||

आरोपितांसयुगलरामरामानुजः सुधीः ।सुग्रीवसचिवो वालिजितसुग्रीवमाल्यदः ॥ २॥

āropitāṃsayugalarāmarāmānujaḥ sudhīḥ |sugrīvasacivo vālijitasugrīvamālyadaḥ || 2||

रामोपकारविस्मर्तृसुग्रीवसुमतिप्रदः ।सुग्रीवसत्पक्षपाती रामकार्यसुसाधकः ॥ ३॥

rāmopakāravismartṛsugrīvasumatipradaḥ |sugrīvasatpakṣapātī rāmakāryasusādhakaḥ || 3||

मैनाकाश्लेषकृन्नागजननीजीवनप्रदः ।सर्वदेवस्तुतः सर्वदेवानन्दविवर्धनः ॥ ४॥

mainākāśleṣakṛnnāgajananījīvanapradaḥ |sarvadevastutaḥ sarvadevānandavivardhanaḥ || 4||

छायान्त्रमालाधारी च छायाग्रहविभेदकः ।सुमेरुसुमहाकायो गोष्पदीकृतवारिधिः ॥बिडालसदृशाकारस्तप्तताम्रसमाननः ।लङ्कानिभञ्जनः सीताराममुद्राङ्गुलीयदः ॥ ६॥

chāyāntramālādhārī ca chāyāgrahavibhedakaḥ |sumerusumahākāyo goṣpadīkṛtavāridhiḥ ||biḍālasadṛśākārastaptatāmrasamānanaḥ |laṅkānibhañjanaḥ sītārāmamudrāṅgulīyadaḥ || 6||

रामचेष्टानुसारेण चेष्टाकृद्विश्वमङ्गलः ।श्रीरामहृदयाभिज्ञो निःशेषसुरपूजितः ॥ ७॥

rāmaceṣṭānusāreṇa ceṣṭākṛdviśvamaṅgalaḥ |śrīrāmahṛdayābhijño niḥśeṣasurapūjitaḥ || 7||

अशोकवनसञ्च्छेत्ता शिंशुपावृक्षरक्षकः ।सर्वरक्षोविनाशार्थं कृतकोलाहलध्वनिः ॥ ८॥

aśokavanasañcchettā śiṃśupāvṛkṣarakṣakaḥ |sarvarakṣovināśārthaṃ kṛtakolāhaladhvaniḥ || 8||

तलप्रहारतः क्षुण्णबहुकोटिनिशाचरः ।पुच्छघातविनिष्पिष्टबहुकोटिनराशनः ॥ ९॥

talaprahārataḥ kṣuṇṇabahukoṭiniśācaraḥ |pucchaghātaviniṣpiṣṭabahukoṭinarāśanaḥ || 9||

जम्बुमाल्यन्तकः सर्वलोकान्तरसुतः कपिः ।स्वदेहप्राप्तपिष्टाङ्गदुर्धर्षाभिधराक्षसः ॥ १०॥

jambumālyantakaḥ sarvalokāntarasutaḥ kapiḥ |svadehaprāptapiṣṭāṅgadurdharṣābhidharākṣasaḥ || 10||

तलचूर्णितयूपाक्षो विरूपाक्षनिबर्हणः ।सुरान्तरात्मनः पुत्रो भासकर्णविनाशकः ॥ ११॥

talacūrṇitayūpākṣo virūpākṣanibarhaṇaḥ |surāntarātmanaḥ putro bhāsakarṇavināśakaḥ || 11||

अद्रिशृङ्गविनिष्पिष्टप्रघसाभिधराक्षसः ।दशास्यमन्त्रिपुत्रघ्नः पोथिताक्षकुमारकः ॥ १२॥

adriśṛṅgaviniṣpiṣṭapraghasābhidharākṣasaḥ |daśāsyamantriputraghnaḥ pothitākṣakumārakaḥ || 12||

सुवञ्चितेन्द्रजिन्मुक्तनानाशस्त्रास्त्रवृष्टिकः ।इन्द्रशत्रुविनिर्मुक्तशस्त्राचाल्यसुविग्रहः ॥ १३॥

suvañcitendrajinmuktanānāśastrāstravṛṣṭikaḥ |indraśatruvinirmuktaśastrācālyasuvigrahaḥ || 13||

सुखेच्छयेन्द्रजिन्मुक्तब्रह्मास्त्रवशगः कृती ।तृणीकृतेन्द्रजित्पूर्वमहाराक्षसयूथपः ॥ १४॥

sukhecchayendrajinmuktabrahmāstravaśagaḥ kṛtī |tṛṇīkṛtendrajitpūrvamahārākṣasayūthapaḥ || 14||

रामविक्रमसत्सिन्धुस्तोत्रकोपितरावणः ।स्वपुच्छवह्निनिर्दग्धलङ्कालङ्कापुरेश्वरः ॥ १५॥

rāmavikramasatsindhustotrakopitarāvaṇaḥ |svapucchavahninirdagdhalaṅkālaṅkāpureśvaraḥ || 15||

वह्न्यनिर्दग्धाच्छपुच्छः पुनर्लङ्घितवारिधिः ।जलदैवतसूनुश्च सर्ववानरपूजितः ॥ १६॥

vahnyanirdagdhācchapucchaḥ punarlaṅghitavāridhiḥ |jaladaivatasūnuśca sarvavānarapūjitaḥ || 16||

सन्तुष्टःकपिभिः सार्धं सुग्रीवमधुभक्षकः ।रामपादार्पितश्रीमच्चूडामणिरनाकुलः ॥ १७॥

santuṣṭaḥkapibhiḥ sārdhaṃ sugrīvamadhubhakṣakaḥ |rāmapādārpitaśrīmaccūḍāmaṇiranākulaḥ || 17||

भक्त्याकृतानेकरामप्रणामो वायुनन्दनः ।रामालिङ्गनतुष्टाङ्गो रामप्राणप्रियः शुचिः ॥ १८॥

bhaktyākṛtānekarāmapraṇāmo vāyunandanaḥ |rāmāliṅganatuṣṭāṅgo rāmaprāṇapriyaḥ śuciḥ || 18||

रामपादैकनिरतविभीषणपरिग्रहः ।विभीषणश्रियः कर्ता रामलालितनीतिमान् ॥ १९॥

rāmapādaikaniratavibhīṣaṇaparigrahaḥ |vibhīṣaṇaśriyaḥ kartā rāmalālitanītimān || 19||

विद्रावितेन्द्रशत्रुश्च लक्ष्मणैकयशःप्रदः ।शिलाप्रहारनिष्पिष्टधूम्राक्षरथसारथिः ॥ २०॥

vidrāvitendraśatruśca lakṣmaṇaikayaśaḥpradaḥ |śilāprahāraniṣpiṣṭadhūmrākṣarathasārathiḥ || 20||

गिरिशृङ्गविनिष्पिष्टधूम्राक्षो बलवारिधिः ।अकम्पनप्राणहर्ता पूर्णविज्ञानचिद्घनः ॥ २१॥

giriśṛṅgaviniṣpiṣṭadhūmrākṣo balavāridhiḥ |akampanaprāṇahartā pūrṇavijñānacidghanaḥ || 21||

रणाध्वरे कण्ठरोधमारितैकनिकुम्भकः ।नरान्तकरथच्छेत्ता देवान्तकविनाशकः ॥ २२॥

raṇādhvare kaṇṭharodhamāritaikanikumbhakaḥ |narāntakarathacchettā devāntakavināśakaḥ || 22||

मत्ताख्यराक्षसच्छेत्ता युद्धोन्मत्तनिकृन्तनः ।त्रिशिरोधनुषश्छेत्ता त्रिशिरःखड्गभञ्जनः ॥ २३॥

mattākhyarākṣasacchettā yuddhonmattanikṛntanaḥ |triśirodhanuṣaśchettā triśiraḥkhaḍgabhañjanaḥ || 23||

त्रिशिरोरथसंहारी त्रिशिरस्त्रिशिरोहरः ।रावणोरसि निष्पिष्टमुष्टिर्दैत्यभयङ्करः ॥ २४॥

triśirorathasaṃhārī triśirastriśiroharaḥ |rāvaṇorasi niṣpiṣṭamuṣṭirdaityabhayaṅkaraḥ || 24||

वज्रकल्पमहामुष्टिघातचूर्णितरावणः ।अशेषभुवनाधारो लक्ष्मणोद्धरणक्षमः ॥ २५॥

vajrakalpamahāmuṣṭighātacūrṇitarāvaṇaḥ |aśeṣabhuvanādhāro lakṣmaṇoddharaṇakṣamaḥ || 25||

सुग्रीवप्राणरक्षार्थं मक्षिकोपमविग्रहः ।कुम्भकर्णत्रिशूलैकसञ्छेत्ता विष्णुभक्तिमान् ॥ २६॥

sugrīvaprāṇarakṣārthaṃ makṣikopamavigrahaḥ |kumbhakarṇatriśūlaikasañchettā viṣṇubhaktimān || 26||

नागास्त्रास्पृष्टसद्देहः कुम्भकर्णविमोहकः ।शस्त्रास्त्रास्पृष्टसद्देहः सुज्ञानी रामसम्मतः ॥ २७॥

nāgāstrāspṛṣṭasaddehaḥ kumbhakarṇavimohakaḥ |śastrāstrāspṛṣṭasaddehaḥ sujñānī rāmasammataḥ || 27||

अशेषकपिरक्षार्थमानीतौषधिपर्वतः ।स्वशक्त्या लक्ष्मणोद्धर्ता लक्ष्मणोज्जीवनप्रदः ॥ २८॥

aśeṣakapirakṣārthamānītauṣadhiparvataḥ |svaśaktyā lakṣmaṇoddhartā lakṣmaṇojjīvanapradaḥ || 28||

लक्ष्मणप्राणरक्षार्थमानीतौषधिपर्वतः ।तपःकृशाङ्गभरते रामागमनशंसकः ॥ २९॥

lakṣmaṇaprāṇarakṣārthamānītauṣadhiparvataḥ |tapaḥkṛśāṅgabharate rāmāgamanaśaṃsakaḥ || 29||

रामस्तुतस्वमहिमा सदा सन्दृष्टराघवः ।रामच्छत्रधरो देवो वेदान्तपरिनिष्ठितः ॥ ३०॥

rāmastutasvamahimā sadā sandṛṣṭarāghavaḥ |rāmacchatradharo devo vedāntapariniṣṭhitaḥ || 30||

मूलरामायणसुधासमुद्रस्नानतत्परः ।बदरीषण्डमध्यस्थनारायणनिषेवकः ॥ ३१॥

mūlarāmāyaṇasudhāsamudrasnānatatparaḥ |badarīṣaṇḍamadhyasthanārāyaṇaniṣevakaḥ || 31||

इत्येतच्छ्रीहनूमतो नामनमष्टोत्तरं शतम् ।पठतां शृण्वतां चैव नित्यमभ्यसतां सताम् ॥ ३२॥

ityetacchrīhanūmato nāmanamaṣṭottaraṃ śatam |paṭhatāṃ śṛṇvatāṃ caiva nityamabhyasatāṃ satām || 32||

अनन्तपुण्यफलदं महापातकनाशनम् ।महारोगप्रशमनं महादुःखविनाशनम् ॥ ३३॥

anantapuṇyaphaladaṃ mahāpātakanāśanam |mahārogapraśamanaṃ mahāduḥkhavināśanam || 33||

दुस्तरापत्प्रशमनं तापत्रयविनाशनम् ।रामक्रोधादिशमनं बाह्यशत्रुविनाशनम् ॥ ३४॥

dustarāpatpraśamanaṃ tāpatrayavināśanam |rāmakrodhādiśamanaṃ bāhyaśatruvināśanam || 34||

अनाद्यज्ञानशमनं संसारभयनाशनम् ।महाबन्धहरं सम्यक् कर्मबन्धनिकृन्तनम् ॥ ३५॥

anādyajñānaśamanaṃ saṃsārabhayanāśanam |mahābandhaharaṃ samyak karmabandhanikṛntanam || 35||

वादे विजयदं नित्यं रणे शत्रुविनाशनम् ।धनधान्यप्रदं सम्यक् पुत्रपौत्रप्रवर्धनम् ॥ ३६॥

vāde vijayadaṃ nityaṃ raṇe śatruvināśanam |dhanadhānyapradaṃ samyak putrapautrapravardhanam || 36||

किमत्र बहुनोक्तेन मोक्षैकफलदं सताम् ।पूर्णानुग्रहतो विष्णोर्यो वायुर्मोक्षदः सताम् ॥तस्य स्तोत्रस्य माहात्म्यं कोऽपि वर्णयितुं क्षमः ।श्रुतिस्मृतिपुराणानि भारताद्युक्तयस्तथा ॥ ३८॥

kimatra bahunoktena mokṣaikaphaladaṃ satām |pūrṇānugrahato viṣṇoryo vāyurmokṣadaḥ satām ||tasya stotrasya māhātmyaṃ ko'pi varṇayituṃ kṣamaḥ |śrutismṛtipurāṇāni bhāratādyuktayastathā || 38||

अस्मिन्नर्थे प्रमाणानि सत्यं सत्यं वदाम्यहम् ।सत्यं सत्यं पुनः सत्यं नात्र कार्या विचारणा ॥ ३९॥

asminnarthe pramāṇāni satyaṃ satyaṃ vadāmyaham |satyaṃ satyaṃ punaḥ satyaṃ nātra kāryā vicāraṇā || 39||

(पाञ्चरात्रागमतः)इति श्रीहनुमदष्टोत्तरशतनामस्तोत्रं सम्पूर्णम् ।

(pāñcarātrāgamataḥ)iti śrīhanumadaṣṭottaraśatanāmastotraṃ sampūrṇam |