हनुमदष्टोत्तरशतनामस्तोत्रम् ०१ Shrihanumadashtottarashatanamastotram 1

(श्रीपद्मोत्तरखण्डतः)नारद उवाच ।सर्वशास्त्रार्थतत्त्वज्ञ सर्वदेवनमस्कृत ।यत्त्वया कथितं पूर्वं रामचन्द्रेण धीमता ॥ १॥

(śrīpadmottarakhaṇḍataḥ)nārada uvāca |sarvaśāstrārthatattvajña sarvadevanamaskṛta |yattvayā kathitaṃ pūrvaṃ rāmacandreṇa dhīmatā || 1||

स्तोत्रं समस्तपापघ्नं श्रुत्वा धन्योऽस्मि पद्मज ।इदानीं श्रोतुमिच्छामि लोकानां हितकाम्यया ॥ २॥

stotraṃ samastapāpaghnaṃ śrutvā dhanyo'smi padmaja |idānīṃ śrotumicchāmi lokānāṃ hitakāmyayā || 2||

वायोरंशावतरणमाहात्म्यं सर्वकामदम् ।वद मे विस्तराद्ब्रह्मन् देवगुह्यमनुत्तमम् ॥ ३॥

vāyoraṃśāvataraṇamāhātmyaṃ sarvakāmadam |vada me vistarādbrahman devaguhyamanuttamam || 3||

इति पृष्टो नारदेन ब्रह्मा लोकपितामहः ।नमस्कृत्य जगन्नाथं लक्ष्मीकान्तं परात्परम् ॥ ४॥

iti pṛṣṭo nāradena brahmā lokapitāmahaḥ |namaskṛtya jagannāthaṃ lakṣmīkāntaṃ parātparam || 4||

प्रोवाच वायोर्माहात्म्यं नारदाय महात्मने ।यच्छ्रुत्वा सर्वसौभाग्यं प्राप्नुवन्ति जनाः सदा ॥ ५॥

provāca vāyormāhātmyaṃ nāradāya mahātmane |yacchrutvā sarvasaubhāgyaṃ prāpnuvanti janāḥ sadā || 5||

ब्रह्मोवाच ।इदं रहस्यं पापघ्नं वायोरष्टोत्तरं शतम् ।विष्णुना लोकनाथेन रमायै कथितं पुरा ॥ ६॥

brahmovāca |idaṃ rahasyaṃ pāpaghnaṃ vāyoraṣṭottaraṃ śatam |viṣṇunā lokanāthena ramāyai kathitaṃ purā || 6||

रमा मामाह यद्दिव्यं तत्ते वक्ष्यामि नारद ।इदं पवित्रं पापघ्नं श्रद्धया हृदि धारय ॥ ७॥

ramā māmāha yaddivyaṃ tatte vakṣyāmi nārada |idaṃ pavitraṃ pāpaghnaṃ śraddhayā hṛdi dhāraya || 7||

ॐ हनुमानञ्जनापुत्रो वायुसूनुर्महाबलः ।रामदूतो हरिश्रेष्ठः सूरी केसरीनन्दनः ॥सूर्यश्रेष्ठो महाकायो वज्री वज्रप्रहारवान् ।महासत्त्वो महारूपो ब्रह्मण्यो ब्राह्मणप्रियः ॥ ९॥

oṃ hanumānañjanāputro vāyusūnurmahābalaḥ |rāmadūto hariśreṣṭhaḥ sūrī kesarīnandanaḥ ||sūryaśreṣṭho mahākāyo vajrī vajraprahāravān |mahāsattvo mahārūpo brahmaṇyo brāhmaṇapriyaḥ || 9||

मुख्यप्राणो महाभीमः पूर्णप्रज्ञो महागुरुः ।ब्रह्मचारी वृक्षधरः पुण्यः श्रीरामकिङ्करः ॥ १०॥

mukhyaprāṇo mahābhīmaḥ pūrṇaprajño mahāguruḥ |brahmacārī vṛkṣadharaḥ puṇyaḥ śrīrāmakiṅkaraḥ || 10||

सीताशोकविनाशी च सिंहिकाप्राणनाशकः ।मैनाकगर्वभङ्गश्च छायाग्रहनिवारकः ॥ ११॥

sītāśokavināśī ca siṃhikāprāṇanāśakaḥ |mainākagarvabhaṅgaśca chāyāgrahanivārakaḥ || 11||

लङ्कामोक्षप्रदो देवः सीतामार्गणतत्परः ।रामाङ्गुलिप्रदाता च सीताहर्षविवर्धनः ॥ १२॥

laṅkāmokṣaprado devaḥ sītāmārgaṇatatparaḥ |rāmāṅgulipradātā ca sītāharṣavivardhanaḥ || 12||

महारूपधरो दिव्यो ह्यशोकवननाशकः ।मन्त्रिपुत्रहरो वीरः पञ्चसेनाग्रमर्दनः ॥ १३॥

mahārūpadharo divyo hyaśokavananāśakaḥ |mantriputraharo vīraḥ pañcasenāgramardanaḥ || 13||

दशकण्ठसुतघ्नश्च ब्रह्मास्त्रवशगोऽव्ययः ।दशास्यसल्लापपरो लङ्कापुरविदाहकः ॥ १४॥

daśakaṇṭhasutaghnaśca brahmāstravaśago'vyayaḥ |daśāsyasallāpaparo laṅkāpuravidāhakaḥ || 14||

तीर्णाब्धिः कपिराजश्च कपियूथप्ररञ्जकः ।चूडामणिप्रदाता च श्रीवश्यः प्रियदर्शकः ॥ १५॥

tīrṇābdhiḥ kapirājaśca kapiyūthaprarañjakaḥ |cūḍāmaṇipradātā ca śrīvaśyaḥ priyadarśakaḥ || 15||

कौपीनकुण्डलधरः कनकाङ्गदभूषणः ।सर्वशास्त्रसुसम्पन्नः सर्वज्ञो ज्ञानदोत्तमः ॥ १६॥

kaupīnakuṇḍaladharaḥ kanakāṅgadabhūṣaṇaḥ |sarvaśāstrasusampannaḥ sarvajño jñānadottamaḥ || 16||

मुख्यप्राणो महावेगः शब्दशास्त्रविशारदः ।बुद्धिमान् सर्वलोकेशः सुरेशो लोकरञ्जकः ॥ १७॥

mukhyaprāṇo mahāvegaḥ śabdaśāstraviśāradaḥ |buddhimān sarvalokeśaḥ sureśo lokarañjakaḥ || 17||

लोकनाथो महादर्पः सर्वभूतभयापहः ।रामवाहनरूपश्च सञ्जीवाचलभेदकः ॥ १८॥

lokanātho mahādarpaḥ sarvabhūtabhayāpahaḥ |rāmavāhanarūpaśca sañjīvācalabhedakaḥ || 18||

कपीनां प्राणदाता च लक्ष्मणप्राणरक्षकः ।रामपादसमीपस्थो लोहितास्यो महाहनुः ॥ १९॥

kapīnāṃ prāṇadātā ca lakṣmaṇaprāṇarakṣakaḥ |rāmapādasamīpastho lohitāsyo mahāhanuḥ || 19||

रामसन्देशकर्ता च भरतानन्दवर्धनः ।रामाभिषेकलोलश्च रामकार्यधुरन्धरः ॥ २०॥

rāmasandeśakartā ca bharatānandavardhanaḥ |rāmābhiṣekalolaśca rāmakāryadhurandharaḥ || 20||

कुन्तीगर्भसमुत्पन्नो भीमो भीमपराक्रमः ।लाक्षागृहाद्विनिर्मुक्तो हिडिम्बासुरमर्दनः ॥ २१॥

kuntīgarbhasamutpanno bhīmo bhīmaparākramaḥ |lākṣāgṛhādvinirmukto hiḍimbāsuramardanaḥ || 21||

धर्मानुजः पाण्डुपुत्रो धनञ्जयसहायवान् ।बकासुरवधोद्युक्तस्तद्ग्रामपरिरक्षकः ॥ २२॥

dharmānujaḥ pāṇḍuputro dhanañjayasahāyavān |bakāsuravadhodyuktastadgrāmaparirakṣakaḥ || 22||

भिक्षाहाररतो नित्यं कुलालगृहमध्यगः ।पाञ्चाल्युद्वाहसञ्जातसम्मोदो बहुकान्तिमान् ॥ २३॥

bhikṣāhārarato nityaṃ kulālagṛhamadhyagaḥ |pāñcālyudvāhasañjātasammodo bahukāntimān || 23||

विराटनगरे गूढचरः कीचकमर्दनः ।दुर्योधननिहन्ता च जरासन्धविमर्दनः ॥ २४॥

virāṭanagare gūḍhacaraḥ kīcakamardanaḥ |duryodhananihantā ca jarāsandhavimardanaḥ || 24||

सौगन्धिकापहर्ता च द्रौपदीप्राणवल्लभः ।पूर्णबोधो व्यासशिष्यो यतिरूपो महामतिः ॥ २५॥

saugandhikāpahartā ca draupadīprāṇavallabhaḥ |pūrṇabodho vyāsaśiṣyo yatirūpo mahāmatiḥ || 25||

दुर्वादिगजसिंहस्य तर्कशास्त्रस्य खण्डकः ।बौद्धागमविभेत्ता च साङ्ख्यशास्त्रस्य दूषकः ॥ २६॥

durvādigajasiṃhasya tarkaśāstrasya khaṇḍakaḥ |bauddhāgamavibhettā ca sāṅkhyaśāstrasya dūṣakaḥ || 26||

द्वैतशास्त्रप्रणेता च वेदव्यासमतानुगः ।पूर्णानन्दः पूर्णसत्वः पूर्णवैराग्यसागरः ॥ २७॥

dvaitaśāstrapraṇetā ca vedavyāsamatānugaḥ |pūrṇānandaḥ pūrṇasatvaḥ pūrṇavairāgyasāgaraḥ || 27||

इति श्रुत्वा नारदस्तु वायोश्चरितमद्भुतम् ।मुदा परमया युक्तः स्तोतुं समुपचक्रमे ॥ २८॥

iti śrutvā nāradastu vāyoścaritamadbhutam |mudā paramayā yuktaḥ stotuṃ samupacakrame || 28||

रामावतारजाताय हनुमद्रूपिणे नमः ।वासुदेवस्य भक्ताय भीमसेनाय ते नमः ॥ २९॥

rāmāvatārajātāya hanumadrūpiṇe namaḥ |vāsudevasya bhaktāya bhīmasenāya te namaḥ || 29||

वेदव्यासमतोद्धारकर्त्रे पूर्णसुखाय च ।दुर्वादिध्वान्तचन्द्राय पूर्णबोधाय ते नमः ॥ ३०॥

vedavyāsamatoddhārakartre pūrṇasukhāya ca |durvādidhvāntacandrāya pūrṇabodhāya te namaḥ || 30||

गुरुराजाय धन्याय कञ्जनेत्राय ते नमः ।दिव्यरूपाय शान्ताय नमस्ते यतिरूपिणे ॥ ३१॥

gururājāya dhanyāya kañjanetrāya te namaḥ |divyarūpāya śāntāya namaste yatirūpiṇe || 31||

स्वान्तस्थवासुदेवाय सच्चित्ताय नमो नमः ।अज्ञानतिमिरार्काय व्यासशिष्याय ते नमः ॥ ३२॥

svāntasthavāsudevāya saccittāya namo namaḥ |ajñānatimirārkāya vyāsaśiṣyāya te namaḥ || 32||

अथाभिवन्द्य पितरं ब्रह्माणं नारदो मुनिः ।परिक्रम्य विनिर्यातो वासुदेवं हरिं स्मरन् ॥ ३३॥

athābhivandya pitaraṃ brahmāṇaṃ nārado muniḥ |parikramya viniryāto vāsudevaṃ hariṃ smaran || 33||

अष्टोत्तरशतं दिव्यं वायुसूनोर्महात्मनः ।यः पठेच्छ्रद्धया नित्यं सर्वबन्धात् प्रमुच्यते ॥ ३४॥

aṣṭottaraśataṃ divyaṃ vāyusūnormahātmanaḥ |yaḥ paṭhecchraddhayā nityaṃ sarvabandhāt pramucyate || 34||

सर्वरोगविनिर्मुक्तः सर्वपापैर्न लिप्यते ।राजवश्यं भवेन्नित्यं स्तोत्रस्यास्य प्रभावतः ॥ ३५॥

sarvarogavinirmuktaḥ sarvapāpairna lipyate |rājavaśyaṃ bhavennityaṃ stotrasyāsya prabhāvataḥ || 35||

भूतग्रहनिवृत्तिश्च प्रजावृद्धिश्च जायते ।आयुरारोग्यमैश्वर्यं बलं कीर्तिं लभेत् पुमान् ॥ ३६॥

bhūtagrahanivṛttiśca prajāvṛddhiśca jāyate |āyurārogyamaiśvaryaṃ balaṃ kīrtiṃ labhet pumān || 36||

यः पठेद्वायुचरितं भक्त्या परमया युतः ।सर्वज्ञानसमायुक्तः स याति परमं पदम् ॥ ३६॥

yaḥ paṭhedvāyucaritaṃ bhaktyā paramayā yutaḥ |sarvajñānasamāyuktaḥ sa yāti paramaṃ padam || 36||

इति श्रीपद्मोत्तरखण्डतः श्रीहनुमदष्टोत्तरशतनामस्तोत्रं सम्पूर्णम् ।

iti śrīpadmottarakhaṇḍataḥ śrīhanumadaṣṭottaraśatanāmastotraṃ sampūrṇam |