गुरुराजसप्ततिः गणपतिशास्त्रिणा विरचिता) Gururaja Saptatih

विज्ञानैकवदान्यं विबुधैर्मान्यं कलेशमूर्धन्यम् ।श्रीमत्त्यागाधीशं गुरुं मखीशं भजेतरामनिशम् ॥ १॥

vijñānaikavadānyaṃ vibudhairmānyaṃ kaleśamūrdhanyam |śrīmattyāgādhīśaṃ guruṃ makhīśaṃ bhajetarāmaniśam || 1||

यागानन्दितदेवो रागादीनामगोचरस्वान्तः ।वागालयाननाब्जस्त्यागाधीशाभिधो गुरुर्जयति ॥ २॥

yāgānanditadevo rāgādīnāmagocarasvāntaḥ |vāgālayānanābjastyāgādhīśābhidho gururjayati || 2||

गदितपदवाक्यमानं गलदभिमानं गभीरमहिमानम् ।शिष्याणां दयमानं गुणभूमानं गुरुं भजेऽमानम् ॥ ३॥

gaditapadavākyamānaṃ galadabhimānaṃ gabhīramahimānam |śiṣyāṇāṃ dayamānaṃ guṇabhūmānaṃ guruṃ bhaje'mānam || 3||

तरुणाविवेकशैले स्वरुणा तुल्या कवित्वविधिकल्या ।गुरुणा विहिता सुहिता करुणा काचित् करोति मयि खेलाम् ॥ ४॥

taruṇāvivekaśaile svaruṇā tulyā kavitvavidhikalyā |guruṇā vihitā suhitā karuṇā kācit karoti mayi khelām || 4||

न्यस्ते विष्टरवर्ये ध्वस्तेतरदुर्मतस्थबुधचर्ये ।शस्ते गुरुवरचरणे हस्ते कृत्वा कृतार्थ एषोऽहम् ॥ ५॥

nyaste viṣṭaravarye dhvastetaradurmatasthabudhacarye |śaste guruvaracaraṇe haste kṛtvā kṛtārtha eṣo'ham || 5||

आशाजाङ्घिककीर्तिः पाशापोहावलोकनिजमूर्तिः ।ईशावतार एको धीशाली देशिकेश्वरो जयति ॥ ६॥

āśājāṅghikakīrtiḥ pāśāpohāvalokanijamūrtiḥ |īśāvatāra eko dhīśālī deśikeśvaro jayati || 6||

द्वैतमतध्वंसकरं कैतवरहितस्वभावजनसुलभम् ।रैततिनिराशहृदयं नैतमुदारं जहामि गुरुनाथम् ॥ ७॥

dvaitamatadhvaṃsakaraṃ kaitavarahitasvabhāvajanasulabham |raitatinirāśahṛdayaṃ naitamudāraṃ jahāmi gurunātham || 7||

धीकीलालजबन्धौ मूकीभूतप्रतीपबुधघूके ।एकीभूतदयौघे कोकीभूयान्मनो गुरुवरार्के ॥ ८॥

dhīkīlālajabandhau mūkībhūtapratīpabudhaghūke |ekībhūtadayaughe kokībhūyānmano guruvarārke || 8||

अविरतहविरास्वादनघुमुघुमितश्वासलम्पटा भृङ्गाः ।इति मतिवितारिगलगतरुद्राक्षं देशिकेन्द्रमद्राक्षम् ॥ ९॥

aviratahavirāsvādanaghumughumitaśvāsalampaṭā bhṛṅgāḥ |iti mativitārigalagatarudrākṣaṃ deśikendramadrākṣam || 9||

ध्यानारूढमहेशाज्ज्ञानानन्दामृतौघघनभावात् ।दूना परमतविबुधात् का नाम कथा परत्र गुरुवर्यात् ॥ १०॥

dhyānārūḍhamaheśājjñānānandāmṛtaughaghanabhāvāt |dūnā paramatavibudhāt kā nāma kathā paratra guruvaryāt || 10||

त्रेतागारनिविष्टं पीतात्मीयावबोधसुखपूरम् ।घृताखिलदुरितौघं पातास्म्यक्ष्णा कदा नु परमगुरुम् ॥ ११॥

tretāgāraniviṣṭaṃ pītātmīyāvabodhasukhapūram |ghṛtākhiladuritaughaṃ pātāsmyakṣṇā kadā nu paramagurum || 11||

द्राक्षेक्षुमाधुरीणामाक्षेपकसूक्तिकर्मसु धुरीणम् ।भ्रूक्षेपदासभूपं वीक्षे विज्ञानशेवधिं कमपि ॥ १२॥

drākṣekṣumādhurīṇāmākṣepakasūktikarmasu dhurīṇam |bhrūkṣepadāsabhūpaṃ vīkṣe vijñānaśevadhiṃ kamapi || 12||

भासितसिततरभसितभ्राजितवपुषे कवित्वविभवपुषे ।विदितर्कूसामकयजुषे विनतिर्गुरवे दय समुदयजुषे ॥ १३॥

bhāsitasitatarabhasitabhrājitavapuṣe kavitvavibhavapuṣe |viditarkūsāmakayajuṣe vinatirgurave daya samudayajuṣe || 13||

दम्भादिदूरहृदयं पुम्भावापन्नशारदासदृशम् ।सम्भावयामि चेतसि तं भासा तुलितचन्द्रशिशुमौलिम् ॥ १४॥

dambhādidūrahṛdayaṃ pumbhāvāpannaśāradāsadṛśam |sambhāvayāmi cetasi taṃ bhāsā tulitacandraśiśumaulim || 14||

वरतरबहुनिजशिष्यं सुरगुरुलज्जाकरस्ववैदुष्यम् ।विदलितधीकालुप्यं हृदये कलयन् परं गुरुमतुप्यम् ॥ १५॥

varatarabahunijaśiṣyaṃ suragurulajjākarasvavaiduṣyam |vidalitadhīkālupyaṃ hṛdaye kalayan paraṃ gurumatupyam || 15||

विद्या खलु देयानां हृद्या तदमूं वितीर्य सार्थाख्यः ।अद्यासौ गुरुमुख्यश्छिद्यादस्मासु दृष्टिवैमुख्यम् ॥ १६॥

vidyā khalu deyānāṃ hṛdyā tadamūṃ vitīrya sārthākhyaḥ |adyāsau gurumukhyaśchidyādasmāsu dṛṣṭivaimukhyam || 16||

कुण्ठितकुमतगविद्वत्कुलगर्वं कूलमुद्वहकृपौघम् ।कुन्दावभासयशसं कुर्वे हृदये गुरुं कुटिलदूरम् ॥ १७॥

kuṇṭhitakumatagavidvatkulagarvaṃ kūlamudvahakṛpaugham |kundāvabhāsayaśasaṃ kurve hṛdaye guruṃ kuṭiladūram || 17||

मोहं विभिद्य सम्यक् सोऽहम्बुद्।ह्ध्या शिवं हृदि भजन्तम् ।देहं च विस्मरन्तं कोऽहं कुक्षिभरिर्गुरुं स्तोतुम् ॥ १८॥

mohaṃ vibhidya samyak so'hambud|hdhyā śivaṃ hṛdi bhajantam |dehaṃ ca vismarantaṃ ko'haṃ kukṣibharirguruṃ stotum || 18||

शान्तं शिवमिव भान्तं परिहतजान्तं पलायितध्वान्तम् ।कान्तं विमलस्वान्तं भजे नितान्तं बुधीकृतभ्रान्तम् ॥ १९॥

śāntaṃ śivamiva bhāntaṃ parihatajāntaṃ palāyitadhvāntam |kāntaṃ vimalasvāntaṃ bhaje nitāntaṃ budhīkṛtabhrāntam || 19||

दासायितावनीपं जितनलिनीपं यशोभृतद्वीपम् ।ध्वान्तनिवहप्रदीपं धुतनततापं भजे कमपि दीपम् ॥ २०॥

dāsāyitāvanīpaṃ jitanalinīpaṃ yaśobhṛtadvīpam |dhvāntanivahapradīpaṃ dhutanatatāpaṃ bhaje kamapi dīpam || 20||

अज्ञानाप्रतिहरणं यज्ञानां सुहितहिमकराभरणम् ।विज्ञानार्थिषु शरणं प्रज्ञानघनं प्रणौमि गुरुचरणम् ॥ २१॥

ajñānāpratiharaṇaṃ yajñānāṃ suhitahimakarābharaṇam |vijñānārthiṣu śaraṇaṃ prajñānaghanaṃ praṇaumi gurucaraṇam || 21||

दोषानुषङ्गदूरा भूषा सर्वज्ञमूर्ध्नि शुचिवेषा ।एषा काचन नितरां तोषायास्माकमस्तु शशिलेखा ॥ २२॥

doṣānuṣaṅgadūrā bhūṣā sarvajñamūrdhni śuciveṣā |eṣā kācana nitarāṃ toṣāyāsmākamastu śaśilekhā || 22||

परितः परिहृतपङ्को भरितो भसितावदातरुचिभारैः ।वर्जितगर्जितलेशो वर्षति बोधं बलाहकः कोऽपि ॥ २३॥

paritaḥ parihṛtapaṅko bharito bhasitāvadātarucibhāraiḥ |varjitagarjitaleśo varṣati bodhaṃ balāhakaḥ ko'pi || 23||

मण्डितचम्पकगहनं खण्डिततमभेदवादिजनकथनम् ।दण्डितमदादिषडरिं पण्डितमणिमानतोऽस्मि परमगुरुम् ॥ २४॥

maṇḍitacampakagahanaṃ khaṇḍitatamabhedavādijanakathanam |daṇḍitamadādiṣaḍariṃ paṇḍitamaṇimānato'smi paramagurum || 24||

स्पर्शितभुजङ्गभीतिर्दर्शितषड्दर्शनस्ववाग्रीतिः ।विविधं मेधं विघ्नन् विद्याकेकी विराजते कोऽपि ॥ २५॥

sparśitabhujaṅgabhītirdarśitaṣaḍdarśanasvavāgrītiḥ |vividhaṃ medhaṃ vighnan vidyākekī virājate ko'pi || 25||

प्रतिमतबुधकुलजैत्रं प्रथितच्छात्रं प्रसादभृतनेत्रम् ।प्रयततमदिव्यगात्रं प्रज्ञापात्रं भजे कलुषदात्रम् ॥ २६॥

pratimatabudhakulajaitraṃ prathitacchātraṃ prasādabhṛtanetram |prayatatamadivyagātraṃ prajñāpātraṃ bhaje kaluṣadātram || 26||

विद्यापारावारं विमतविदारं विधेयसुखभारम् ।भूमौ कृतावतारं गौरीदारं भजे गुरुमुदारम् ॥ २७॥

vidyāpārāvāraṃ vimatavidāraṃ vidheyasukhabhāram |bhūmau kṛtāvatāraṃ gaurīdāraṃ bhaje gurumudāram || 27||

विलसति न बुधः पुरतः कविरपि कश्चित् तथाग्रतो यस्य ।चित्रचरित्रः सोऽयं कुत्रचिदास्ते गुरुर्महति देशे ॥ २८॥

vilasati na budhaḥ purataḥ kavirapi kaścit tathāgrato yasya |citracaritraḥ so'yaṃ kutracidāste gururmahati deśe || 28||

यशसा जितविधुबिम्बं वेदान्ताम्भोजसारलोलम्बम् ।व्रजिनव्रजगिरिशम्बं विद्यालम्बं भजे तमविलम्बम् ॥ २९॥

yaśasā jitavidhubimbaṃ vedāntāmbhojasāralolambam |vrajinavrajagiriśambaṃ vidyālambaṃ bhaje tamavilambam || 29||

विज्ञानौधनिकायं विनष्टमायं विशुद्धजनगेयम् ।कलितमखसम्प्रदायं गुणसमुदायं गुरुं रसादायम् ॥ ३०॥

vijñānaudhanikāyaṃ vinaṣṭamāyaṃ viśuddhajanageyam |kalitamakhasampradāyaṃ guṇasamudāyaṃ guruṃ rasādāyam || 30||

विहिताम्नायत्राणान् विरचितविद्याख्यरत्नविश्राणान् ।कानपि वाणीप्राणान् कलये भसितं सित्तं सुबिभ्राणान् ॥ ३१॥

vihitāmnāyatrāṇān viracitavidyākhyaratnaviśrāṇān |kānapi vāṇīprāṇān kalaye bhasitaṃ sittaṃ subibhrāṇān || 31||

निजमहिमभरितलोकं नितरामुद्यत्तमोपहालोकम् ।विमतभिदाधृतयत्नं विद्यारत्नं विराजते किमपि ॥ ३२॥

nijamahimabharitalokaṃ nitarāmudyattamopahālokam |vimatabhidādhṛtayatnaṃ vidyāratnaṃ virājate kimapi || 32||

स्फारीभवत्स्ववाचा दूरिकृतदुर्मतस्थदुष्टगजः ।पुण्ये चम्पारण्ये खेलति विज्ञानकेसरी कश्चित् ॥ ३३॥

sphārībhavatsvavācā dūrikṛtadurmatasthaduṣṭagajaḥ |puṇye campāraṇye khelati vijñānakesarī kaścit || 33||

गुरुरपि कविताशाली शुचिरपि भास्वान् विभूतिभरितोऽपि ।सम्पदि निरीहचेताः संवित्पूरः प्रकाशते कोऽपि ॥ ३४॥

gururapi kavitāśālī śucirapi bhāsvān vibhūtibharito'pi |sampadi nirīhacetāḥ saṃvitpūraḥ prakāśate ko'pi || 34||

कलिना मर्महतानां कर्मवराणां स कश्चिदालम्बः ।विलसति चम्पकविपिने वितरन् ज्ञानामृतं विनम्राणाम् ॥ ३५॥

kalinā marmahatānāṃ karmavarāṇāṃ sa kaścidālambaḥ |vilasati campakavipine vitaran jñānāmṛtaṃ vinamrāṇām || 35||

शिष्टानां सहकृत्वा शितया बुद्।ह्ध्या तु जीवसहयुध्वा ।श्रुतिनिवहपारदृश्या राजति यज्वा स मे मतावृज्वाम् ॥ ३६॥

śiṣṭānāṃ sahakṛtvā śitayā bud|hdhyā tu jīvasahayudhvā |śrutinivahapāradṛśyā rājati yajvā sa me matāvṛjvām || 36||

विबुधजनैरपि मृग्यं विशिष्य भूपालकार्हणायोग्यम् ।विनतजनमात्रभोग्यं विधिमहिलाया विराजते भाग्यम् ॥ ३७॥

vibudhajanairapi mṛgyaṃ viśiṣya bhūpālakārhaṇāyogyam |vinatajanamātrabhogyaṃ vidhimahilāyā virājate bhāgyam || 37||

भिन्दानमखिलविशयं विन्दानं विविधशास्त्रवाक्यार्थम् ।मन्दाननुगृह्णन्तं स्पन्दानन्तरितचक्षुरीक्षे तम् ॥ ३८॥

bhindānamakhilaviśayaṃ vindānaṃ vividhaśāstravākyārtham |mandānanugṛhṇantaṃ spandānantaritacakṣurīkṣe tam || 38||

कलिना मलिनस्वान्तैर्भ्रान्तैः सञ्चालितेन शीलेन ।गाढं दृढ इति कलितः पण्डित एकः परोरजा भाति ॥ ३९॥

kalinā malinasvāntairbhrāntaiḥ sañcālitena śīlena |gāḍhaṃ dṛḍha iti kalitaḥ paṇḍita ekaḥ parorajā bhāti || 39||

भस्मितदुर्मततूलं भव्ययशः कृतहरिद्वरदुकूलम् ।जडतासरितः कूलं जयति जगत्यां महस्तु चिन्मूलम् ॥ ४०॥

bhasmitadurmatatūlaṃ bhavyayaśaḥ kṛtaharidvaradukūlam |jaḍatāsaritaḥ kūlaṃ jayati jagatyāṃ mahastu cinmūlam || 40||

श्रितनन्दनस्वभावः शाखाशतभूषितो बुधश्लाघ्यः ।कल्पकभूरुह एको जल्पति जगतां कलाः समस्ताश्च ॥ ४१॥

śritanandanasvabhāvaḥ śākhāśatabhūṣito budhaślāghyaḥ |kalpakabhūruha eko jalpati jagatāṃ kalāḥ samastāśca || 41||

अज्ञातपरुषघोषो विज्ञानाब्धिः परेण पुरुषेण ।विलसितनिजान्तरोऽसौ वितरति कश्चित् सरस्वतीं भजताम् ॥ ४२॥

ajñātaparuṣaghoṣo vijñānābdhiḥ pareṇa puruṣeṇa |vilasitanijāntaro'sau vitarati kaścit sarasvatīṃ bhajatām || 42||

सम्पूर्णशारदागमसम्प्राप्तोल्लासभासुरो जगति ।एको हि राजहंसो लोकोत्तर एजते विशुद्धात्मा ॥ ४३॥

sampūrṇaśāradāgamasamprāptollāsabhāsuro jagati |eko hi rājahaṃso lokottara ejate viśuddhātmā || 43||

रक्षन् क्षमामजस्रं तक्षन् दुर्वादकेलिमाक्षिप्य ।अपथविदूरप्रकृतिर्नृप इव कश्चिद् विपश्चिदाभाति ॥ ४४॥

rakṣan kṣamāmajasraṃ takṣan durvādakelimākṣipya |apathavidūraprakṛtirnṛpa iva kaścid vipaścidābhāti || 44||

विज्ञानराशिकोशं वित्तनिराशं विरुद्धमतनाशम् ।विमलयशोभरिताशं जितवागीशं श्रयामि गुर्वीशम् ॥ ४५॥

vijñānarāśikośaṃ vittanirāśaṃ viruddhamatanāśam |vimalayaśobharitāśaṃ jitavāgīśaṃ śrayāmi gurvīśam || 45||

भसितत्रिपुण्ड्रयुक्तं भगवत्पूजाविधानसंसक्तम् ।पठितातिपुण्यसूक्तं पण्डितमेकं भजे दिवानक्तम् ॥ ४६॥

bhasitatripuṇḍrayuktaṃ bhagavatpūjāvidhānasaṃsaktam |paṭhitātipuṇyasūktaṃ paṇḍitamekaṃ bhaje divānaktam || 46||

अद्वैतराजधानीदृढतरवप्रं दिनेशमिव दीप्रम् ।कलये हृदये तमहं करुणाभरितं कलङ्कहरचरितम् ॥ ४७॥

advaitarājadhānīdṛḍhataravapraṃ dineśamiva dīpram |kalaye hṛdaye tamahaṃ karuṇābharitaṃ kalaṅkaharacaritam || 47||

दग्धेतरमतवादस्निग्धे दयया दृशा भृशं कुर्वन् ।मुग्धे मयि कोऽपि गुरुर्दुग्धे विद्याविशेषसर्वस्वम् ॥ ४८॥

dagdhetaramatavādasnigdhe dayayā dṛśā bhṛśaṃ kurvan |mugdhe mayi ko'pi gururdugdhe vidyāviśeṣasarvasvam || 48||

जित्वरमखिलबुधानां सृत्वरयशसं दिशासु निखिलासु ।सत्वरमुपैमि शरणं गत्वरमृजुना पथा गुरुश्रेष्ठम् ॥ ४९॥

jitvaramakhilabudhānāṃ sṛtvarayaśasaṃ diśāsu nikhilāsu |satvaramupaimi śaraṇaṃ gatvaramṛjunā pathā guruśreṣṭham || 49||

जडतालताकृपाणी जपार्थमालाविलासयुतपाणी ।पीयूषतुल्यवाणी पिनष्टु काचिच्छुचं कृपाश्रेणी ॥ ५०॥

jaḍatālatākṛpāṇī japārthamālāvilāsayutapāṇī |pīyūṣatulyavāṇī pinaṣṭu kācicchucaṃ kṛpāśreṇī || 50||

वित्तविनिग्रहयालुं विनतदयालुं मतावनिद्रालुम् ।शास्त्रेष्वसंशयालुं प्रणिपतयालुर्भवामि तं प्राज्ञम् ॥ ५१॥

vittavinigrahayāluṃ vinatadayāluṃ matāvanidrālum |śāstreṣvasaṃśayāluṃ praṇipatayālurbhavāmi taṃ prājñam || 51||

क्षेपिष्ठं कवितायां क्षोदिष्ठद्वैतखण्डनवरिष्ठम् ।कलये मतिवर्षिष्ठं कलुषदविष्ठं कलावतां श्रेष्ठम् ॥ ५२॥

kṣepiṣṭhaṃ kavitāyāṃ kṣodiṣṭhadvaitakhaṇḍanavariṣṭham |kalaye mativarṣiṣṭhaṃ kaluṣadaviṣṭhaṃ kalāvatāṃ śreṣṭham || 52||

नतजनकृपानुकम्पं नाम्नैवोद्यत्प्रतीपबुधकम्पम् ।यशसा दिशासु लिम्पं हृदये कृत्वा गुरुं शुचमलुम्पम् ॥ ५३॥

natajanakṛpānukampaṃ nāmnaivodyatpratīpabudhakampam |yaśasā diśāsu limpaṃ hṛdaye kṛtvā guruṃ śucamalumpam || 53||

कर्मवरकरणगृध्नुः कलुषत्रस्नुः कदध्वगक्षिप्नुः ।कश्चन वादे धृष्णुः कलयति विहृतिं स चम्पकारण्ये ॥ ५४॥

karmavarakaraṇagṛdhnuḥ kaluṣatrasnuḥ kadadhvagakṣipnuḥ |kaścana vāde dhṛṣṇuḥ kalayati vihṛtiṃ sa campakāraṇye || 54||

निखिलजनेड्यं कर्मानुष्ठास्नुर्निगमसीम्नि निष्ठास्नुः ।धिषणायामग्रस्नुर्धिनोतु कश्चिद्धिया धिषणजिष्णुः ॥ ५५॥

nikhilajaneḍyaṃ karmānuṣṭhāsnurnigamasīmni niṣṭhāsnuḥ |dhiṣaṇāyāmagrasnurdhinotu kaściddhiyā dhiṣaṇajiṣṇuḥ || 55||

जनान्धङ्करणं सुभगङ्करणं सुधोपमैः सूक्तैः ।नमतामाढ्यङ्करणं ज्ञानाद्वैतं चकास्ति विमपि भुवि ॥ ५६॥

janāndhaṅkaraṇaṃ subhagaṅkaraṇaṃ sudhopamaiḥ sūktaiḥ |namatāmāḍhyaṅkaraṇaṃ jñānādvaitaṃ cakāsti vimapi bhuvi || 56||

परशिवसघ्रीचीनं विष्वद्रीचीनविमलकीर्तिभरम् ।कलुषपराचीनमतिं कलये कञ्चिद् बुधं समीचीनम् ॥ ५७॥

paraśivasaghrīcīnaṃ viṣvadrīcīnavimalakīrtibharam |kaluṣaparācīnamatiṃ kalaye kañcid budhaṃ samīcīnam || 57||

अद्वैतद्रढिमानं धीकृशिमानं क्षणेन धुन्वानम् ।विद्वत्परिबृढिमानं वीक्षे कञ्चिद्विशुद्धमहिमानम् ॥ ५८॥

advaitadraḍhimānaṃ dhīkṛśimānaṃ kṣaṇena dhunvānam |vidvatparibṛḍhimānaṃ vīkṣe kañcidviśuddhamahimānam || 58||

सुचरितविधिजीवातुः सुधया सहयुध्वसूक्तिरसपूरः ।विधुसघ्रीचीनयशाः विभाति कश्चिद्विपश्चिदग्रण्यः ॥ ५९॥

sucaritavidhijīvātuḥ sudhayā sahayudhvasūktirasapūraḥ |vidhusaghrīcīnayaśāḥ vibhāti kaścidvipaścidagraṇyaḥ || 59||

करुणारसाम्बुधीनां कलुषरिपूणां कनद्यशोभूम्नाम् ।सततं वरिवसिताहं सारस्वतसारजीवनाडीनाम् ॥ ६०॥

karuṇārasāmbudhīnāṃ kaluṣaripūṇāṃ kanadyaśobhūmnām |satataṃ varivasitāhaṃ sārasvatasārajīvanāḍīnām || 60||

निगमपथसञ्चरिष्णुर्निराकरिष्णुर्निकृष्टमतघोषम् ।कापथविनिवर्तिष्णुः कलयतु मेधां गुरुः प्ररोचिष्णुः ॥ ६१॥

nigamapathasañcariṣṇurnirākariṣṇurnikṛṣṭamataghoṣam |kāpathavinivartiṣṇuḥ kalayatu medhāṃ guruḥ prarociṣṇuḥ || 61||

छविभूतिस्फुरदङ्गोऽप्यच्छविभूतिस्फुरच्छरीरोऽयम् ।कीर्तिभृतोऽपि विशुद्धो गुह्यश्चित्रीयते गुरूत्तंसः ॥ ६२॥

chavibhūtisphuradaṅgo'pyacchavibhūtisphuraccharīro'yam |kīrtibhṛto'pi viśuddho guhyaścitrīyate gurūttaṃsaḥ || 62||

विबुधैरखिलैर्वन्द्यः विहितप्रीतिर्विशिष्य गणपतये ।विज्ञानदानशौण्डः कोऽपि गिरीशः कुतूहलं कुरुते ॥ ६३॥

vibudhairakhilairvandyaḥ vihitaprītirviśiṣya gaṇapataye |vijñānadānaśauṇḍaḥ ko'pi girīśaḥ kutūhalaṃ kurute || 63||

सङ्क्षुण्णतमस्काण्डः सभुवनजातप्रतीक्ष्यनिजपादः ।निखिलजगद्बोधकरः निस्तुलतेजाश्चकास्ति मिहिर इव ॥ ६४॥

saṅkṣuṇṇatamaskāṇḍaḥ sabhuvanajātapratīkṣyanijapādaḥ |nikhilajagadbodhakaraḥ nistulatejāścakāsti mihira iva || 64||

वासर इवासदृक्षः वारिद इव वर्षितामृतस्रोताः ।वादे निपुणश्चम्पकवन्यामास्ते वदावदः कश्चित् ॥ ६५॥

vāsara ivāsadṛkṣaḥ vārida iva varṣitāmṛtasrotāḥ |vāde nipuṇaścampakavanyāmāste vadāvadaḥ kaścit || 65||

क्षीरमपि क्षारतरं मोचा नीचा सुधाविधापि मुधा ।माक्षिकमनीक्षिकार्हं कलिते ललिते गिरो गुरोः सारे ॥ ६६॥

kṣīramapi kṣārataraṃ mocā nīcā sudhāvidhāpi mudhā |mākṣikamanīkṣikārhaṃ kalite lalite giro guroḥ sāre || 66||

भास्वान् कलाधिनाथः मङ्गलरूपो बुधो गुरुश्च कविः ।सूर्यानन्दनरूपस्तनुते कश्चिन्मुदं तमःकेतुः ॥ ६७॥

bhāsvān kalādhināthaḥ maṅgalarūpo budho guruśca kaviḥ |sūryānandanarūpastanute kaścinmudaṃ tamaḥketuḥ || 67||

विचनीकसीति मेधा विसनीस्रंसीति येन जडता च ।तं प्रणिपनीपतीमि प्रश्रयभरितः प्रवेकमार्याणाम् ॥ ६८॥

vicanīkasīti medhā visanīsraṃsīti yena jaḍatā ca |taṃ praṇipanīpatīmi praśrayabharitaḥ pravekamāryāṇām || 68||

ज्ञानलवलाभमात्रा धन्यम्मन्यैरलं बुधैरन्यैः ।वाङ्मनसदूरदूरं वन्दे विज्ञानराशिमेव गुरुम् ॥ ६९॥

jñānalavalābhamātrā dhanyammanyairalaṃ budhairanyaiḥ |vāṅmanasadūradūraṃ vande vijñānarāśimeva gurum || 69||

जगदभिवन्द्याय नमो जडजनचैतन्यवर्षकाय नमः ।नतजनसुलभाय नमो निस्तुलविज्ञानराशयेऽस्तु नमः ॥ ७०॥

jagadabhivandyāya namo jaḍajanacaitanyavarṣakāya namaḥ |natajanasulabhāya namo nistulavijñānarāśaye'stu namaḥ || 70||

इति गणपतिना कृतिना गुह्या गुरुराजसप्ततिः कलिता ।ललितारसभरमिलिता पठतां भक्त्या ददाति पाण्डित्यम् ॥ ७१॥

iti gaṇapatinā kṛtinā guhyā gururājasaptatiḥ kalitā |lalitārasabharamilitā paṭhatāṃ bhaktyā dadāti pāṇḍityam || 71||

विजये चिरचितविजये विहिता गुरुराजसप्ततिः सेयम् ।अहिमकरे प्रेमकरे मकरे च करे परे बरे वारे ॥ ७२॥

vijaye ciracitavijaye vihitā gururājasaptatiḥ seyam |ahimakare premakare makare ca kare pare bare vāre || 72||

इति श्री(पैङ्गनाडु)गणपतिशास्त्रिणा विरचिता गुरुराजसप्ततिः सम्पूर्णा ।स्तोत्रसमुच्चयः २ (९२)

iti śrī(paiṅganāḍu)gaṇapatiśāstriṇā viracitā gururājasaptatiḥ sampūrṇā |stotrasamuccayaḥ 2 (92)