गुरुरत्नत्रयस्तोत्रम् Gururatnatraya Stotram

ॐ नमोरत्नत्रयाय ।अथ बुद्धरत्नस्तोत्रम् ।तृष्णाजिह्वमसद्विकल्पशिरसं प्रद्वेषचञ्चत्फलंकामक्रोधवितर्कदर्शनमथो रागप्रचण्डेक्षणम् ।मोहास्यं स्वशरीरकोटिशतचिन्तातिगं दारुणंप्रज्ञामन्त्रबलेन यः शमितवान् बुद्धाय तस्मै नमः ॥ १॥

oṃ namoratnatrayāya |atha buddharatnastotram |tṛṣṇājihvamasadvikalpaśirasaṃ pradveṣacañcatphalaṃkāmakrodhavitarkadarśanamatho rāgapracaṇḍekṣaṇam |mohāsyaṃ svaśarīrakoṭiśatacintātigaṃ dāruṇaṃprajñāmantrabalena yaḥ śamitavān buddhāya tasmai namaḥ || 1||

बुद्धं प्रबुद्धं वरधर्मराजं शान्तं विशुद्धं समकीर्तिदं तम् ।गुणाकरं सत्त्वमुनीन्द्रराजं श्रीमन्महाबोधिमहं नमामि ॥ २॥

buddhaṃ prabuddhaṃ varadharmarājaṃ śāntaṃ viśuddhaṃ samakīrtidaṃ tam |guṇākaraṃ sattvamunīndrarājaṃ śrīmanmahābodhimahaṃ namāmi || 2||

इति बुद्धरत्नस्तोत्रम् ।अथ धर्मरत्नस्तोत्रम् ।यो जात्यादिकदुःखतप्तमहसां चक्षुः सतां प्राणिनांयस्त्रैधातुकपञ्जरादहरहः सत्त्वान् समाकर्षति ।अत्राणं च जगत्समुद्धरति यः सङ्क्लेशदुःखार्णवात्सम्बुद्धांश्च पुनश्च्युताच्च महते धर्माय तस्मै नमः ॥ ३॥

iti buddharatnastotram |atha dharmaratnastotram |yo jātyādikaduḥkhataptamahasāṃ cakṣuḥ satāṃ prāṇināṃyastraidhātukapañjarādaharahaḥ sattvān samākarṣati |atrāṇaṃ ca jagatsamuddharati yaḥ saṅkleśaduḥkhārṇavātsambuddhāṃśca punaścyutācca mahate dharmāya tasmai namaḥ || 3||

या सर्वज्ञतया नयत्युपशमं शान्तैषिणः श्रावकान्या मार्गज्ञतया जगद्धितकृता लोकार्थसम्पादिका ।सर्वाकारमिदं वदन्ति मुनयो विश्वस्य या सङ्गतातस्यै श्रावकबोधिसत्त्वगणिनो बुद्धस्य मात्रे नमः ॥ ४॥

yā sarvajñatayā nayatyupaśamaṃ śāntaiṣiṇaḥ śrāvakānyā mārgajñatayā jagaddhitakṛtā lokārthasampādikā |sarvākāramidaṃ vadanti munayo viśvasya yā saṅgatātasyai śrāvakabodhisattvagaṇino buddhasya mātre namaḥ || 4||

इति धर्मरत्नस्तोत्रम् ।अथ सङ्घरत्नस्तोत्रम् ।चत्वारः प्रत्युत्पन्नगा भवसुखे सुस्वादविद्वेषिणश्चत्वारश्च फले स्थिताः शमरताः शान्ता महायोगिनः ।इत्यष्टौ वरपुङ्गला भगवता यस्मिन् गणे व्याकृताःप्रज्ञाशीलसमाधितप्तवपुषा सङ्घाय तस्मै नमः ॥ ५॥

iti dharmaratnastotram |atha saṅgharatnastotram |catvāraḥ pratyutpannagā bhavasukhe susvādavidveṣiṇaścatvāraśca phale sthitāḥ śamaratāḥ śāntā mahāyoginaḥ |ityaṣṭau varapuṅgalā bhagavatā yasmin gaṇe vyākṛtāḥprajñāśīlasamādhitaptavapuṣā saṅghāya tasmai namaḥ || 5||

बुद्धं नमामि सततं वरपद्मपाणिंमैत्र्यात्मकं गगनगञ्जसमन्तभद्रम् ।यक्षाधिपं परिहितोद्धृतमञ्जुघोषंविष्कम्भिणं क्षितिगर्भं प्रणमामि भक्त्या ॥ ६॥

buddhaṃ namāmi satataṃ varapadmapāṇiṃmaitryātmakaṃ gaganagañjasamantabhadram |yakṣādhipaṃ parihitoddhṛtamañjughoṣaṃviṣkambhiṇaṃ kṣitigarbhaṃ praṇamāmi bhaktyā || 6||

इति सङ्घरत्नस्तोत्रम् ।गुरुर्बुद्धो गुरुर्धर्मो गुरुः सङ्घस्तथैव च ।गुरुर्वज्रधरः श्रीमान् तस्मै श्रीगुरवे नमः ॥ ७॥

iti saṅgharatnastotram |gururbuddho gururdharmo guruḥ saṅghastathaiva ca |gururvajradharaḥ śrīmān tasmai śrīgurave namaḥ || 7||

इति श्री गुरुरत्नत्रयस्तोत्रं सम्पूर्णम् ॥

iti śrī gururatnatrayastotraṃ sampūrṇam ||