ककारादि कालीसहस्रनामस्तोत्रम् Kakaradi Kali Sahasranama Stotram

काळ्याः मेधासाम्राज्यप्रदसहस्रनामस्तोत्रम्श्री गणेशाय नमः ।कैलासशिखरे रम्ये नानादेवगणावृते ।नानावृक्षलताकीर्णे नानापुष्पैरलङ्कृते ॥ १॥

kāḷyāḥ medhāsāmrājyapradasahasranāmastotramśrī gaṇeśāya namaḥ |kailāsaśikhare ramye nānādevagaṇāvṛte |nānāvṛkṣalatākīrṇe nānāpuṣpairalaṅkṛte || 1||

चतुर्मण्डलसंयुक्ते शृङ्गारमण्डपे स्थिते ।समाधौ संस्थितं शान्तं क्रीडन्तं योगिनीप्रियम् ॥ २॥

caturmaṇḍalasaṃyukte śṛṅgāramaṇḍape sthite |samādhau saṃsthitaṃ śāntaṃ krīḍantaṃ yoginīpriyam || 2||

तत्र मौनधरं दृष्ट्वा देवी पृच्छति शङ्करम् ।देव्युवाच ।किं त्वया जप्यते देव किं त्वया स्मर्य्यते सदा ॥ ३॥

tatra maunadharaṃ dṛṣṭvā devī pṛcchati śaṅkaram |devyuvāca |kiṃ tvayā japyate deva kiṃ tvayā smaryyate sadā || 3||

सृष्टिः कुत्र विलीनास्ति पुनः कुत्र प्रजायते ।ब्रह्माण्डकारणं यत्तत् किमाद्यं कारणं महत् ॥ ४॥

sṛṣṭiḥ kutra vilīnāsti punaḥ kutra prajāyate |brahmāṇḍakāraṇaṃ yattat kimādyaṃ kāraṇaṃ mahat || 4||

मनोरथमयी सिद्धिस्तथा वाञ्छामयी शिव ।तृतीया कल्पनासिद्धिः कोटिसिद्धीश्वरात्मकम् ॥ ५॥

manorathamayī siddhistathā vāñchāmayī śiva |tṛtīyā kalpanāsiddhiḥ koṭisiddhīśvarātmakam || 5||

शक्तिपाताष्टदशकं चराचरपुरीगतिः ।महेन्द्रजालमिन्द्रादिजालानां रचना तथा ॥ ६॥

śaktipātāṣṭadaśakaṃ carācarapurīgatiḥ |mahendrajālamindrādijālānāṃ racanā tathā || 6||

अणिमाद्यष्टकं देव परकायप्रवेशनम् ।नवीनसृष्टिकरणं समुद्रशोषणं तथा ॥ ७॥

aṇimādyaṣṭakaṃ deva parakāyapraveśanam |navīnasṛṣṭikaraṇaṃ samudraśoṣaṇaṃ tathā || 7||

अमायां चन्द्रसन्दर्शो दिवा चन्द्रप्रकाशनम् ।चन्द्राष्टकं चाष्टदिक्षु तथा सूर्याष्टकं शिव ॥ ८॥

amāyāṃ candrasandarśo divā candraprakāśanam |candrāṣṭakaṃ cāṣṭadikṣu tathā sūryāṣṭakaṃ śiva || 8||

जले जलमयत्वं च वह्नौ वह्निमयत्वकम् ।ब्रह्मविष्ण्वादिनिर्माणमिन्द्राणां कारणं करे ॥ ९॥

jale jalamayatvaṃ ca vahnau vahnimayatvakam |brahmaviṣṇvādinirmāṇamindrāṇāṃ kāraṇaṃ kare || 9||

पातालगुटिकायक्षवेतालपञ्चकं तथा ।रसायनं तथा गुप्तिस्तथैव चाखिलाञ्जनम् ॥ १०॥

pātālaguṭikāyakṣavetālapañcakaṃ tathā |rasāyanaṃ tathā guptistathaiva cākhilāñjanam || 10||

महामधुमती सिद्धिस्तथा पद्मावती शिव ।तथा भोगवती सिद्धिर्यावत्यः सन्ति सिद्धयः ॥ ११॥

mahāmadhumatī siddhistathā padmāvatī śiva |tathā bhogavatī siddhiryāvatyaḥ santi siddhayaḥ || 11||

केन मन्त्रेण तपसा कलौ पापसमाकुले ।आयुष्यं पुण्यरहिते कथं भवति तद्वद ॥ १२॥

kena mantreṇa tapasā kalau pāpasamākule |āyuṣyaṃ puṇyarahite kathaṃ bhavati tadvada || 12||

श्रीशिव उवाच ।विना मन्त्रं विना स्तोत्रं विनैव तपसा प्रिये ।विना बलिं विना न्यासं भूतशुद्धिं विना प्रिये ॥ १३॥

śrīśiva uvāca |vinā mantraṃ vinā stotraṃ vinaiva tapasā priye |vinā baliṃ vinā nyāsaṃ bhūtaśuddhiṃ vinā priye || 13||

विना ध्यानं विना यन्त्रं विना पूजादिना प्रिये ।विना क्लेशादिभिर्देवि देहदुःखादिभिर्विना ॥ १४॥

vinā dhyānaṃ vinā yantraṃ vinā pūjādinā priye |vinā kleśādibhirdevi dehaduḥkhādibhirvinā || 14||

सिद्धिराशु भवेद्येन तदेवं कथ्यते मया ।शून्ये ब्रह्मण्डगोले तु पञ्चाशच्छून्यमध्यके ॥ १५॥

siddhirāśu bhavedyena tadevaṃ kathyate mayā |śūnye brahmaṇḍagole tu pañcāśacchūnyamadhyake || 15||

पञ्चशून्यस्थिता तारा सर्वान्ते कालिका स्थिता ।अनन्तकोटि ब्रह्माण्ड राजदण्डाग्रके शिवे ॥ १६॥

pañcaśūnyasthitā tārā sarvānte kālikā sthitā |anantakoṭi brahmāṇḍa rājadaṇḍāgrake śive || 16||

स्थाप्य शून्यालयं कृत्वा कृष्णवर्णं विधाय च ।महानिर्गुणरूपा च वाचातीता परा कला ॥ १७॥

sthāpya śūnyālayaṃ kṛtvā kṛṣṇavarṇaṃ vidhāya ca |mahānirguṇarūpā ca vācātītā parā kalā || 17||

क्रीडायां संस्थिता देवी शून्यरूपा प्रकल्पयेत् ।सृष्टेरारम्भकार्यार्थं दृष्टा छाया तया यदा ॥ १८॥

krīḍāyāṃ saṃsthitā devī śūnyarūpā prakalpayet |sṛṣṭerārambhakāryārthaṃ dṛṣṭā chāyā tayā yadā || 18||

इच्छाशक्तिस्तु सा जाता तथा कालो विनिर्मितः ।प्रतिबिम्बं तत्र दृष्टं जाता ज्ञानाभिधा तु सा ॥ १९॥

icchāśaktistu sā jātā tathā kālo vinirmitaḥ |pratibimbaṃ tatra dṛṣṭaṃ jātā jñānābhidhā tu sā || 19||

इदमेतत्किंविशिष्टं जातं विज्ञानकं मुदा ।तदा क्रियाऽभिधा जाता तदीच्छातो महेश्वरि ॥ २०॥

idametatkiṃviśiṣṭaṃ jātaṃ vijñānakaṃ mudā |tadā kriyā'bhidhā jātā tadīcchāto maheśvari || 20||

ब्रह्माण्डगोले देवेशि राजदण्डस्थितं च यत् ।सा क्रिया स्थापयामास स्वस्वस्थानक्रमेण च ॥ २१॥

brahmāṇḍagole deveśi rājadaṇḍasthitaṃ ca yat |sā kriyā sthāpayāmāsa svasvasthānakrameṇa ca || 21||

तत्रैव स्वेच्छया देवि सामरस्यपरायणा ।तदिच्छा कथ्यते देवि यथावदवधारय ॥ २२॥

tatraiva svecchayā devi sāmarasyaparāyaṇā |tadicchā kathyate devi yathāvadavadhāraya || 22||

युगादिसमये देवि शिवं परगुणोत्तमम् ।तदिच्छा निर्गुणं शान्तं सच्चिदानन्दविग्रहम् ॥ २३॥

yugādisamaye devi śivaṃ paraguṇottamam |tadicchā nirguṇaṃ śāntaṃ saccidānandavigraham || 23||

शाश्वतं सुन्दरं शुद्धं सर्वदेवयुतं वरम् ।आदिनाथं गुणातीतं काल्या संयुतमीश्वरम् ॥ २४॥

śāśvataṃ sundaraṃ śuddhaṃ sarvadevayutaṃ varam |ādināthaṃ guṇātītaṃ kālyā saṃyutamīśvaram || 24||

विपरीतरतं देवं सामरस्यपरायणम् ।पूजार्थमागतं देवगन्धर्वाऽप्सरसां गणम् ॥ २५॥

viparītarataṃ devaṃ sāmarasyaparāyaṇam |pūjārthamāgataṃ devagandharvā'psarasāṃ gaṇam || 25||

यक्षिणीं किन्नरीकन्यामुर्वश्याद्यां तिलोत्तमाम् ।वीक्ष्य तन्मायया प्राह सुन्दरी प्राणवल्लभा ॥ २६॥

yakṣiṇīṃ kinnarīkanyāmurvaśyādyāṃ tilottamām |vīkṣya tanmāyayā prāha sundarī prāṇavallabhā || 26||

त्रैलोक्यसुन्दरी प्राणस्वामिनी प्राणरञ्जिनी ।किमागतं भवत्याऽद्य मम भाग्यार्णवो महान् ॥ २७॥

trailokyasundarī prāṇasvāminī prāṇarañjinī |kimāgataṃ bhavatyā'dya mama bhāgyārṇavo mahān || 27||

उक्त्वा मौनधरं शम्भुं पूजयन्त्यप्सरोगणाः ।अप्सरस ऊचुः ।संसारात्तारितं देव त्वया विश्वजनप्रिय ॥ २८॥

uktvā maunadharaṃ śambhuṃ pūjayantyapsarogaṇāḥ |apsarasa ūcuḥ |saṃsārāttāritaṃ deva tvayā viśvajanapriya || 28||

सृष्टेरारम्भकार्य्यार्थमुद्युक्तोऽसि महाप्रभो ।वेश्याकृत्यमिदं देव मङ्गलार्थप्रगायनम् ॥ २९॥

sṛṣṭerārambhakāryyārthamudyukto'si mahāprabho |veśyākṛtyamidaṃ deva maṅgalārthapragāyanam || 29||

प्रयाणोत्सवकाले तु समारम्भे प्रगायनम् ।गुणाद्यारम्भकाले हि वर्त्तते शिवशङ्कर ॥ ३०॥

prayāṇotsavakāle tu samārambhe pragāyanam |guṇādyārambhakāle hi varttate śivaśaṅkara || 30||

इन्द्राणीकोटयः सन्ति तस्याः प्रसवबिन्दुतः ।ब्रह्माणी वैष्णवी चैव माहेशी कोटिकोटयः ॥ ३१॥

indrāṇīkoṭayaḥ santi tasyāḥ prasavabindutaḥ |brahmāṇī vaiṣṇavī caiva māheśī koṭikoṭayaḥ || 31||

तव सामरसानन्द दर्शनार्थं समुद्भवाः ।सञ्जाताश्चाग्रतो देव चास्माकं सौख्यसागर ॥ ३२॥

tava sāmarasānanda darśanārthaṃ samudbhavāḥ |sañjātāścāgrato deva cāsmākaṃ saukhyasāgara || 32||

रतिं हित्वा कामिनीनां नाऽन्यत् सौख्यं महेश्वर ।सा रतिर्दृश्यतेऽस्माभिर्महत्सौख्यार्थकारिका ॥ ३३॥

ratiṃ hitvā kāminīnāṃ nā'nyat saukhyaṃ maheśvara |sā ratirdṛśyate'smābhirmahatsaukhyārthakārikā || 33||

एवमेतत्तु चास्माभिः कर्तव्यं भर्तृणा सह ।एवं श्रुत्वा महादेवो ध्यानावस्थितमानसः ॥ ३४॥

evametattu cāsmābhiḥ kartavyaṃ bhartṛṇā saha |evaṃ śrutvā mahādevo dhyānāvasthitamānasaḥ || 34||

ध्यानं हित्वा मायया तु प्रोवाच कालिकां प्रति ।कालि कालि रुण्डमाले प्रिये भैरववादिनी ॥ ३५॥

dhyānaṃ hitvā māyayā tu provāca kālikāṃ prati |kāli kāli ruṇḍamāle priye bhairavavādinī || 35||

शिवारूपधरे क्रूरे घोरद्रंष्टे भयानके ।त्रैलोक्यसुन्दरकरी सुन्दर्य्यः सन्ति मेऽग्रतः ॥ ३६॥

śivārūpadhare krūre ghoradraṃṣṭe bhayānake |trailokyasundarakarī sundaryyaḥ santi me'grataḥ || 36||

सुन्दरीवीक्षणं कर्म कुरु कालि प्रिये शिवे ।ध्यानं मुञ्च महादेवि ता गच्छन्ति गृहं प्रति ॥ ३७॥

sundarīvīkṣaṇaṃ karma kuru kāli priye śive |dhyānaṃ muñca mahādevi tā gacchanti gṛhaṃ prati || 37||

तव रूपं महाकालि महाकालप्रियङ्करम् ।एतासां सुन्दरं रूपं त्रैलोक्यप्रियकारकम् ॥ ३८॥

tava rūpaṃ mahākāli mahākālapriyaṅkaram |etāsāṃ sundaraṃ rūpaṃ trailokyapriyakārakam || 38||

एवं मायाभ्रमाविष्टो महाकालो वदन्निति ।इति कालवचः श्रुत्वा कालं प्राह च कालिका ॥ ३९॥

evaṃ māyābhramāviṣṭo mahākālo vadanniti |iti kālavacaḥ śrutvā kālaṃ prāha ca kālikā || 39||

माययाऽऽच्छाद्य चात्मानं निजस्त्रीरूपधारिणी ।इतः प्रभृति स्त्रीमात्रं भविष्यति युगे युगे ॥ ४०॥

māyayā''cchādya cātmānaṃ nijastrīrūpadhāriṇī |itaḥ prabhṛti strīmātraṃ bhaviṣyati yuge yuge || 40||

वल्ल्याद्यौषधयो देवि दिवा वल्लीस्वरूपताम् ।रात्रौ स्त्रीरूपमासाद्य रतिकेलिः परस्परम् ॥ ४१॥

vallyādyauṣadhayo devi divā vallīsvarūpatām |rātrau strīrūpamāsādya ratikeliḥ parasparam || 41||

अज्ञानं चैव सर्वेषां भविष्यति युगे युगे ।एवं शापं च दत्वा तु पुनः प्रोवाच कालिका ॥ ४२॥

ajñānaṃ caiva sarveṣāṃ bhaviṣyati yuge yuge |evaṃ śāpaṃ ca datvā tu punaḥ provāca kālikā || 42||

विपरीतरतिं कृत्वा चिन्तयन्ति मनन्ति ये ।तेषां वरं प्रदास्यामि नित्यं तत्र वसाम्यहम् ॥ ४३॥

viparītaratiṃ kṛtvā cintayanti mananti ye |teṣāṃ varaṃ pradāsyāmi nityaṃ tatra vasāmyaham || 43||

इत्युक्त्वा कालिका विद्या तत्रैवान्तरधीयत ।त्रिंशत्त्रिखर्वषड्वृन्दनवत्यर्बुदकोटयः ॥ ४४॥

ityuktvā kālikā vidyā tatraivāntaradhīyata |triṃśattrikharvaṣaḍvṛndanavatyarbudakoṭayaḥ || 44||

दर्शनार्थं तपस्तेपे सा वै कुत्र गता प्रिया ।मम प्राणप्रिया देवी हाहा प्राणप्रिये शिवे ॥ ४५॥

darśanārthaṃ tapastepe sā vai kutra gatā priyā |mama prāṇapriyā devī hāhā prāṇapriye śive || 45||

किं करोमि क्व गच्छामि इत्येवं भ्रमसङ्कुलः ।तस्याः काल्या दया जाता मम चिन्तापरः शिवः ॥ ४६॥

kiṃ karomi kva gacchāmi ityevaṃ bhramasaṅkulaḥ |tasyāḥ kālyā dayā jātā mama cintāparaḥ śivaḥ || 46||

यन्त्रप्रस्तारबुद्धिस्तु काल्या दत्तातिसत्वरम् ।यन्त्रयागं तदारभ्य पूर्वं चिद्घनगोचरा ॥ ४७॥

yantraprastārabuddhistu kālyā dattātisatvaram |yantrayāgaṃ tadārabhya pūrvaṃ cidghanagocarā || 47||

श्रीचक्रं यन्त्रप्रस्ताररचनाभ्यासतत्परः ।इतस्ततो भ्रम्यमाणस्त्रैलोक्यं चक्रमध्यकम् ॥ ४८॥

śrīcakraṃ yantraprastāraracanābhyāsatatparaḥ |itastato bhramyamāṇastrailokyaṃ cakramadhyakam || 48||

चक्रपारदर्शनार्थं कोट्यर्बुदयुगं गतम् ।भक्तप्राणप्रिया देवी महाश्रीचक्रनायिका ॥ ४९॥

cakrapāradarśanārthaṃ koṭyarbudayugaṃ gatam |bhaktaprāṇapriyā devī mahāśrīcakranāyikā || 49||

तत्र बिन्दौ परं रूपं सुन्दरं सुमनोहरम् ।रूपं जातं महेशानि जाग्रत्त्रिपुरसुन्दरि ॥ ५०॥

tatra bindau paraṃ rūpaṃ sundaraṃ sumanoharam |rūpaṃ jātaṃ maheśāni jāgrattripurasundari || 50||