पुरुषोत्तममालास्तोत्रम् Purushottamamalastotram

नीलाद्रौमालां मुकुन्दशिरसोऽनुपमप्रमोदलाभाधरीकृतसुरद्रुमकान्तगन्धाम् ।अन्धीकृतालिनिचयां पवनप्रसारिगन्धप्रणाशितजगत्कलुषां नमामि ॥ १॥

nīlādraumālāṃ mukundaśiraso'nupamapramodalābhādharīkṛtasuradrumakāntagandhām |andhīkṛtālinicayāṃ pavanaprasārigandhapraṇāśitajagatkaluṣāṃ namāmi || 1||

यत्पादपङ्कजगलद्रजसोनुषङ्गा ब्रह्मादयः परमसम्पदमापुरस्य ।विष्णोः कलेवरसमुज्ज्वलिताङ्गरागसंसक्तपुष्पनिलयां प्रणतोऽस्मि मालाम् ॥ २॥

yatpādapaṅkajagaladrajasonuṣaṅgā brahmādayaḥ paramasampadamāpurasya |viṣṇoḥ kalevarasamujjvalitāṅgarāgasaṃsaktapuṣpanilayāṃ praṇato'smi mālām || 2||

पद्मां हृत्पद्मवसतिं सपत्नीं या हसत्यसौ ।विकस्वरैः सुकुसुमैर्विष्ण्वङ्कस्थितिगर्विताम् ॥ ३॥

padmāṃ hṛtpadmavasatiṃ sapatnīṃ yā hasatyasau |vikasvaraiḥ sukusumairviṣṇvaṅkasthitigarvitām || 3||

कुत्र स्थितेयमाहार्षीन्महिमानं स्रगुज्ज्वला ।या श्रीनिधेः शरीरेऽभूत्सर्वाङ्गव्यापिनी चिरम् ॥ ४॥

kutra sthiteyamāhārṣīnmahimānaṃ sragujjvalā |yā śrīnidheḥ śarīre'bhūtsarvāṅgavyāpinī ciram || 4||

जय नीलाद्रिशिखरभूषणाघप्रदूषण ।प्रणतार्तिहर श्रीमंस्त्राहि मां शरणागतम् ॥ ५॥

jaya nīlādriśikharabhūṣaṇāghapradūṣaṇa |praṇatārtihara śrīmaṃstrāhi māṃ śaraṇāgatam || 5||

इति श्रीस्कन्दपुराणे वैष्णवखण्डे पुरुषोत्तममाहात्म्येमालास्तोत्रं सम्पूर्णम् ।

iti śrīskandapurāṇe vaiṣṇavakhaṇḍe puruṣottamamāhātmyemālāstotraṃ sampūrṇam |