पुरुषोत्तमस्तवनम् Purushottamastavanam

(महासौराष्ट्रीयसङ्घस्य लुण्ठकजनप्रधर्षितस्य पुरुषोत्तमस्तवनम्)श्रीपुरुषोत्तम उवाच ।शृणु नारायणीश्रि त्वं चमत्कारमयीं कथाम् ।महासौराष्ट्रदेशीया भक्ताः सङ्घगताः शतम् ॥ १॥

(mahāsaurāṣṭrīyasaṅghasya luṇṭhakajanapradharṣitasya puruṣottamastavanam)śrīpuruṣottama uvāca |śṛṇu nārāyaṇīśri tvaṃ camatkāramayīṃ kathām |mahāsaurāṣṭradeśīyā bhaktāḥ saṅghagatāḥ śatam || 1||

कुङ्कुमवापिकाक्षेत्रं सोमनाथं च रैवतम् ।स्वर्णवतीं कृष्णभूमिं गोपनार्थं च सुन्दरम् ॥ २॥

kuṅkumavāpikākṣetraṃ somanāthaṃ ca raivatam |svarṇavatīṃ kṛṣṇabhūmiṃ gopanārthaṃ ca sundaram || 2||

एवमादीनि तीर्थानि कर्तुं सौराष्ट्रमाययुः ।मार्गे महीं तथा वापीं तीर्त्वा नावा ततः परम् ॥ ३॥

evamādīni tīrthāni kartuṃ saurāṣṭramāyayuḥ |mārge mahīṃ tathā vāpīṃ tīrtvā nāvā tataḥ param || 3||

साभ्रमतीं समुत्तीर्य गोपनाथं समाययुः ।ततो गुप्तप्रयागं च कृत्वा सिंहवनं महत् ॥ ४॥

sābhramatīṃ samuttīrya gopanāthaṃ samāyayuḥ |tato guptaprayāgaṃ ca kṛtvā siṃhavanaṃ mahat || 4||

प्रविश्य यावदायान्ति सोमनाथं प्रति द्रुतम् ।सिंहारण्ये तदा प्राप्ता लुण्ठकाः शस्त्रधारिणः ॥ ५॥

praviśya yāvadāyānti somanāthaṃ prati drutam |siṃhāraṇye tadā prāptā luṇṭhakāḥ śastradhāriṇaḥ || 5||

लुण्ठकाधिपतिस्तेषु नाम्ना सामान्तविक्रमः ।अश्ववारैश्च सहितः शस्त्रादियुग्भटान्वितः ॥ ६॥

luṇṭhakādhipatisteṣu nāmnā sāmāntavikramaḥ |aśvavāraiśca sahitaḥ śastrādiyugbhaṭānvitaḥ || 6||

यन्त्रनादानकरोद्वै सन्निधौ नाऽतिदूरगः ।आक्रोशान् भयदाँश्चापि चक्रुस्तस्यानुगामिनः ॥ ७॥

yantranādānakarodvai sannidhau nā'tidūragaḥ |ākrośān bhayadām̐ścāpi cakrustasyānugāminaḥ || 7||

लुण्ठनार्थं द्रुतं सङ्घस्याऽभितो बन्धनं व्यधुः ।मध्ये चक्रुर्भयदानैः सङ्घस्य शतमानवान् ॥ ८॥

luṇṭhanārthaṃ drutaṃ saṅghasyā'bhito bandhanaṃ vyadhuḥ |madhye cakrurbhayadānaiḥ saṅghasya śatamānavān || 8||

स्त्रीणां भूषा नराणां च भूषाद्रव्याणि यानि च ।उत्तारयित्वा त्वेकत्र कारयामासुरुल्बणाः ॥ ९॥

strīṇāṃ bhūṣā narāṇāṃ ca bhūṣādravyāṇi yāni ca |uttārayitvā tvekatra kārayāmāsurulbaṇāḥ || 9||

शुभाम्बराणि सर्वाणि जगृहुः सङ्घवर्तिनाम् ।सङ्घाग्रगण्यवणिजो बबन्धू रज्जुभिस्तदा ॥ १०॥

śubhāmbarāṇi sarvāṇi jagṛhuḥ saṅghavartinām |saṅghāgragaṇyavaṇijo babandhū rajjubhistadā || 10||

पद्मचन्द्रं शङ्खचन्द्रं शृङ्खलाचन्द्रमित्यपि ।वनचन्द्रं वालिचन्द्रं बबन्धुस्ते हि लुण्ठकाः ॥ ११॥

padmacandraṃ śaṅkhacandraṃ śṛṅkhalācandramityapi |vanacandraṃ vālicandraṃ babandhuste hi luṇṭhakāḥ || 11||

अन्यान् दण्डैस्ताडनादि प्रचक्रुर्भयहेतवे ।भीतास्ते वणिजः सर्वे मौना बभूवुरर्दिताः ॥ १२॥

anyān daṇḍaistāḍanādi pracakrurbhayahetave |bhītāste vaṇijaḥ sarve maunā babhūvurarditāḥ || 12||

ददुः सर्वस्वमेतेभ्यो लुण्ठकेभ्योऽतिताडिताः ।अथैतेषु मम भक्तो वैष्णवो वनचन्द्रकः ॥ १३॥

daduḥ sarvasvametebhyo luṇṭhakebhyo'titāḍitāḥ |athaiteṣu mama bhakto vaiṣṇavo vanacandrakaḥ || 13||

तस्य पत्नी सुखादेवी मम भक्ताऽभवद् रमे ।आबाल्यात्तौ मम भक्तौ भजतो मां निरन्तरम् ॥ १४॥

tasya patnī sukhādevī mama bhaktā'bhavad rame |ābālyāttau mama bhaktau bhajato māṃ nirantaram || 14||

साधोर्मे सायनायननाम्नो योगेन वैष्णवौ ।वर्तेते तौ भक्तियुक्तौ कृष्णनारायणाश्रितौ ॥ १५॥

sādhorme sāyanāyananāmno yogena vaiṣṇavau |vartete tau bhaktiyuktau kṛṣṇanārāyaṇāśritau || 15||

आपत्काले तु तौ भक्तौ सस्मरतुस्तदा हि माम् ।अन्येऽपि बालगोपाला रुरुदुः सस्मरुः प्रभुम् ॥ १६॥

āpatkāle tu tau bhaktau sasmaratustadā hi mām |anye'pi bālagopālā ruruduḥ sasmaruḥ prabhum || 16||

लुण्ठकेभ्यो हरे कृष्ण प्ररक्षय हि तीर्थिनः ।अनाथानां वने कृष्णनाथनारायणो भवान् ॥ १७॥

luṇṭhakebhyo hare kṛṣṇa prarakṣaya hi tīrthinaḥ |anāthānāṃ vane kṛṣṇanāthanārāyaṇo bhavān || 17||

त्राता मोचयिता दुःखाद्रक्षयिता पिता भवान् ।माता गुरुर्हरिकृष्णो बालकृष्णः प्ररक्षतु ॥ १८॥

trātā mocayitā duḥkhādrakṣayitā pitā bhavān |mātā gururharikṛṣṇo bālakṛṣṇaḥ prarakṣatu || 18||

यतो वयं कृतपापा लुण्ठ्यन्तेऽतो वनान्तरे ।तथापि निजभक्तानां रक्षां विधेहि माधव ॥ १९॥

yato vayaṃ kṛtapāpā luṇṭhyante'to vanāntare |tathāpi nijabhaktānāṃ rakṣāṃ vidhehi mādhava || 19||

तव भक्तिं करिष्यामो दानं दास्याम एव ते ।सर्वस्वं भगवन् विष्णो रक्ष कृष्णनरायण ॥ २०॥

tava bhaktiṃ kariṣyāmo dānaṃ dāsyāma eva te |sarvasvaṃ bhagavan viṣṇo rakṣa kṛṣṇanarāyaṇa || 20||

कुङ्कुमवापिकातीर्थेऽर्पयिष्यामो धनादिकम् ।यदि लुण्ठकदुष्टेभ्यो रक्षां नस्त्वं विधास्यसि ॥ २१॥

kuṅkumavāpikātīrthe'rpayiṣyāmo dhanādikam |yadi luṇṭhakaduṣṭebhyo rakṣāṃ nastvaṃ vidhāsyasi || 21||

विभूषणानि सर्वाणि श्रेष्ठाम्बराणि यानि च ।रूप्यकाः स्वर्णमुद्राश्च दास्यामोऽश्वसरोवरे ॥ २२॥

vibhūṣaṇāni sarvāṇi śreṣṭhāmbarāṇi yāni ca |rūpyakāḥ svarṇamudrāśca dāsyāmo'śvasarovare || 22||

व्रतं कार्तिकमासाद्य करिष्यामो फलादिभिः ।नित्यं शतं मालिकाश्चाऽऽवर्तयिष्याम एव च ॥ २३॥

vrataṃ kārtikamāsādya kariṣyāmo phalādibhiḥ |nityaṃ śataṃ mālikāścā''vartayiṣyāma eva ca || 23||

सतां मठेषु वै मासं मासं स्थित्वा तु माघके ।मासे सेवां करिष्यामः सतामाज्ञानुसारिणीम् ॥ २४॥

satāṃ maṭheṣu vai māsaṃ māsaṃ sthitvā tu māghake |māse sevāṃ kariṣyāmaḥ satāmājñānusāriṇīm || 24||

इत्येवं वनचन्द्राद्या आर्त्ता लुण्ठकधर्षिताः ।मानता विविधाश्चक्रुर्लुण्ठकेभ्यो विमुक्तये ॥ २५॥

ityevaṃ vanacandrādyā ārttā luṇṭhakadharṣitāḥ |mānatā vividhāścakrurluṇṭhakebhyo vimuktaye || 25||

वनचन्द्रस्य भार्याऽपि सुखादेवी तथा स्त्रियः ।या याः सङ्घगताश्चासन् प्रार्थयामासुरेव माम् ॥ २६॥

vanacandrasya bhāryā'pi sukhādevī tathā striyaḥ |yā yāḥ saṅghagatāścāsan prārthayāmāsureva mām || 26||

हे हरे हे वनवासिन् वृन्दावनविहारकृत् ।गोपीसङ्घान्तरगुप्त कृष्ण रक्ष स्वदासिकाः ॥ २७॥

he hare he vanavāsin vṛndāvanavihārakṛt |gopīsaṅghāntaragupta kṛṣṇa rakṣa svadāsikāḥ || 27||

अबलानां सबलोऽसि भक्तानां भगवानसि ।दासीनां मोदकर्ताऽसि कृष्ण रक्षय दासिकाः ॥ २८॥

abalānāṃ sabalo'si bhaktānāṃ bhagavānasi |dāsīnāṃ modakartā'si kṛṣṇa rakṣaya dāsikāḥ || 28||

वने गोपीविहारोऽसि राधासखोऽसि निर्जने ।शयने कमलानन्द कृष्ण रक्षय दासिकाः ॥ २९॥

vane gopīvihāro'si rādhāsakho'si nirjane |śayane kamalānanda kṛṣṇa rakṣaya dāsikāḥ || 29||

प्रलये मुक्तसेव्योऽसि सृष्टौ भक्तिमतीपतिः ।रासे सर्वानुरक्तोऽसि कृष्ण रक्षय दासिकाः ॥ ३०॥

pralaye muktasevyo'si sṛṣṭau bhaktimatīpatiḥ |rāse sarvānurakto'si kṛṣṇa rakṣaya dāsikāḥ || 30||

विपत्तौ चार्त्तदीनेश शरणागतरक्षक ।अरातिकष्टहर्तस्त्वं कृष्ण रक्षय दासिकाः ॥ ३१॥

vipattau cārttadīneśa śaraṇāgatarakṣaka |arātikaṣṭahartastvaṃ kṛṣṇa rakṣaya dāsikāḥ || 31||

गर्भे भ्रूणस्य पोष्टा त्वं बाल्ये निर्मलहृत्स्थितः ।यौवने प्रेमपात्रं त्वं कृष्ण रक्षय दासिकाः ॥ ३२॥

garbhe bhrūṇasya poṣṭā tvaṃ bālye nirmalahṛtsthitaḥ |yauvane premapātraṃ tvaṃ kṛṣṇa rakṣaya dāsikāḥ || 32||

वार्धक्ये शिष्टवर्य त्वं युद्धे जयप्रदः पुमान् ।निराश्रये त्वं चाधारः कृष्ण रक्षय दासिकाः ॥ ३३॥

vārdhakye śiṣṭavarya tvaṃ yuddhe jayapradaḥ pumān |nirāśraye tvaṃ cādhāraḥ kṛṣṇa rakṣaya dāsikāḥ || 33||

रोहिणाण्डासुरः पूर्वमनादिद्युनरायणः ।भूत्वा निषूदितः कृष्ण त्वया नः स प्ररक्षतु ॥ ३४॥

rohiṇāṇḍāsuraḥ pūrvamanādidyunarāyaṇaḥ |bhūtvā niṣūditaḥ kṛṣṇa tvayā naḥ sa prarakṣatu || 34||

अनादिश्रीमेरुनारायणस्त्वं चाऽभवं पुरा ।निम्नं तु पतमानस्य मेरोः रक्षा त्वया कृता ॥ ३५॥

anādiśrīmerunārāyaṇastvaṃ cā'bhavaṃ purā |nimnaṃ tu patamānasya meroḥ rakṣā tvayā kṛtā || 35||

सूर्याग्निना दह्यमानब्रह्माण्डस्य त्वया पुरा ।रक्षा शान्तिः कृताऽनादिविष्णुनारायणात्मना ॥ ३६॥

sūryāgninā dahyamānabrahmāṇḍasya tvayā purā |rakṣā śāntiḥ kṛtā'nādiviṣṇunārāyaṇātmanā || 36||

धूम्रासुरविनाशश्च चन्द्ररक्षा त्वया पुरा ।विहिता श्रीहरेऽनादिदेवनारायणात्मना ॥ ३७॥

dhūmrāsuravināśaśca candrarakṣā tvayā purā |vihitā śrīhare'nādidevanārāyaṇātmanā || 37||

त्वयाऽनादियज्ञनारायण यज्ञाः प्रवर्तिताः ।रुद्रशास्ताऽनादिब्रह्मनारायणो ह्यभूः पुरा ॥ ३८॥

tvayā'nādiyajñanārāyaṇa yajñāḥ pravartitāḥ |rudraśāstā'nādibrahmanārāyaṇo hyabhūḥ purā || 38||

देवधिष्ण्यनियमायाऽनाद्याऽऽदित्यनरायणः ।भवान् पुराऽऽभवत् कृष्ण कृष्ण रक्षय दासिकाः ॥ ३९॥

devadhiṣṇyaniyamāyā'nādyā''dityanarāyaṇaḥ |bhavān purā''bhavat kṛṣṇa kṛṣṇa rakṣaya dāsikāḥ || 39||

नागशास्ताऽनादिगरुत्मन्नारायणरूपवान् ।ध्रुवस्थित्यै भवाननाद्यार्षनारायणोऽभवत् ॥ ४०॥

nāgaśāstā'nādigarutmannārāyaṇarūpavān |dhruvasthityai bhavānanādyārṣanārāyaṇo'bhavat || 40||

षुरानन्दादिदैत्यानां पराभूत्यर्थमेव ह ।त्वमनादिप्राज्ञनारायणोऽभवः परेश्वर ॥ ४१॥

ṣurānandādidaityānāṃ parābhūtyarthameva ha |tvamanādiprājñanārāyaṇo'bhavaḥ pareśvara || 41||

त्वमनादिवीरनारायणोऽभवो वृषावनः ।त्वमनादिभद्रनारायणो दग्धप्रमुक्तये ॥ ४२॥

tvamanādivīranārāyaṇo'bhavo vṛṣāvanaḥ |tvamanādibhadranārāyaṇo dagdhapramuktaye || 42||

तुङ्गभद्रासनापुत्रीपतिर्हरिनरायणः ।अभवस्त्वं पुरा कृष्ण कृष्ण रक्षय दासिकाः ॥ ४३॥

tuṅgabhadrāsanāputrīpatirharinarāyaṇaḥ |abhavastvaṃ purā kṛṣṇa kṛṣṇa rakṣaya dāsikāḥ || 43||

नाशार्थं कोशस्तेनाख्यरक्षसस्त्वं पुराऽभवः ।अनादिश्रीबीजनारायणो बीजस्य रक्षकः ॥ ४४॥

nāśārthaṃ kośastenākhyarakṣasastvaṃ purā'bhavaḥ |anādiśrībījanārāyaṇo bījasya rakṣakaḥ || 44||

धर्मव्रतस्य पुत्राणां मोक्षार्थं त्वं पुराऽभवः ।अनादिश्रीवरनारायणो ना कृष्ण रक्षतु ॥ ४५॥

dharmavratasya putrāṇāṃ mokṣārthaṃ tvaṃ purā'bhavaḥ |anādiśrīvaranārāyaṇo nā kṛṣṇa rakṣatu || 45||

सुदर्शनीमहासाध्वीशापेन स्त्रीमयं जगत् ।रक्षार्थं त्वमनादिस्त्रीपुन्नारायणतामगाः ॥ ४६॥

sudarśanīmahāsādhvīśāpena strīmayaṃ jagat |rakṣārthaṃ tvamanādistrīpunnārāyaṇatāmagāḥ || 46||

अनादिश्रीजलनारायणस्त्वं माकरासुरम् ।हत्वा लोकानरक्षः श्रीकृष्ण रक्षय दासिकाः ॥ ४७॥

anādiśrījalanārāyaṇastvaṃ mākarāsuram |hatvā lokānarakṣaḥ śrīkṛṣṇa rakṣaya dāsikāḥ || 47||

अनादिश्रीशीलनारायणस्त्वमभवः पुरा ।साधुधर्मप्ररक्षार्थं कृष्ण रक्षय दासिकाः ॥ ४८॥

anādiśrīśīlanārāyaṇastvamabhavaḥ purā |sādhudharmaprarakṣārthaṃ kṛṣṇa rakṣaya dāsikāḥ || 48||

अनादिश्रीवार्धिनारायणस्त्वमभवः पुरा ।व्याघ्रानलादिनाशार्थं कृष्ण रक्षय दासिकाः ॥ ४९॥

anādiśrīvārdhinārāyaṇastvamabhavaḥ purā |vyāghrānalādināśārthaṃ kṛṣṇa rakṣaya dāsikāḥ || 49||

त्वमनादिचतुर्मुखनारायणोऽभवः पुरा ।राधनिकापुण्यरातविप्रयोरिष्टदो भवान् ॥ ५०॥

tvamanādicaturmukhanārāyaṇo'bhavaḥ purā |rādhanikāpuṇyarātaviprayoriṣṭado bhavān || 50||

अभवच्छ्रीछ्रीपुरुषोत्तमनारायणः पुरा ।तीर्थपूत्यर्थमनादितीर्थनारायणोऽभवः ॥ ५१॥

abhavacchrīchrīpuruṣottamanārāyaṇaḥ purā |tīrthapūtyarthamanāditīrthanārāyaṇo'bhavaḥ || 51||

भक्त्यर्थं त्वमनादिश्रीजीवनारायणोऽभवः ।यज्ञे त्वं श्रीमदर्धश्रीश्वरनारायणोऽभव ॥ ५२॥

bhaktyarthaṃ tvamanādiśrījīvanārāyaṇo'bhavaḥ |yajñe tvaṃ śrīmadardhaśrīśvaranārāyaṇo'bhava || 52||

पित्रुद्धर्ताऽनाद्यर्धश्रीपितृनारायणोऽभवः ।भक्त्या मोक्षोपदेशार्थं प्लक्षनारायणोऽभवः ॥ ५३॥

pitruddhartā'nādyardhaśrīpitṛnārāyaṇo'bhavaḥ |bhaktyā mokṣopadeśārthaṃ plakṣanārāyaṇo'bhavaḥ || 53||

नरमेधे भक्तरक्षामनादिपुन्नरायणः ।भूत्वाऽकरोस्त्वं देवेश कृष्ण रक्षय दासिकाः ॥ ५४॥

naramedhe bhaktarakṣāmanādipunnarāyaṇaḥ |bhūtvā'karostvaṃ deveśa kṛṣṇa rakṣaya dāsikāḥ || 54||

सूर्यवर्च्चनृपद्वाराऽनादिश्यामनरायणः ।अभवस्त्वं पुरा कृष्ण कृष्ण रक्षय दासिकाः ॥ ५५॥

sūryavarccanṛpadvārā'nādiśyāmanarāyaṇaḥ |abhavastvaṃ purā kṛṣṇa kṛṣṇa rakṣaya dāsikāḥ || 55||

अनादिश्रीराजनारायणस्त्वं चाऽभवः पुरा ।मायूरकाऽसुरहन्ता कृष्ण रक्षय दासिकाः ॥ ५६॥

anādiśrīrājanārāyaṇastvaṃ cā'bhavaḥ purā |māyūrakā'surahantā kṛṣṇa rakṣaya dāsikāḥ || 56||

अनादिश्रीब्रह्मचारिनारायणोऽभवः पुरा ।नैष्ठिकतारक्षणार्थं कृष्ण रक्षय दासिकाः ॥ ५७॥

anādiśrībrahmacārinārāyaṇo'bhavaḥ purā |naiṣṭhikatārakṣaṇārthaṃ kṛṣṇa rakṣaya dāsikāḥ || 57||

हल्लकासुरनाशार्थं शिवोज्जीवार्थमित्यपि ।अनादिश्रीशिवनारायणस्त्वं चाऽभवः पुरा ॥ ५८॥

hallakāsuranāśārthaṃ śivojjīvārthamityapi |anādiśrīśivanārāyaṇastvaṃ cā'bhavaḥ purā || 58||

अनादिश्रीस्वर्णनारायणस्त्वं चाऽभवः पुरा ।कुबेरस्योज्जीवनार्थं कृष्ण रक्षय दासिकाः ॥ ५९॥

anādiśrīsvarṇanārāyaṇastvaṃ cā'bhavaḥ purā |kuberasyojjīvanārthaṃ kṛṣṇa rakṣaya dāsikāḥ || 59||

ज्वालारुणाऽचलवह्निरसदग्धप्रजाऽवनम् ।अनादिश्रीस्वामिनारायणस्त्वं चाऽकरोः पुरा ॥ ६०॥

jvālāruṇā'calavahnirasadagdhaprajā'vanam |anādiśrīsvāminārāyaṇastvaṃ cā'karoḥ purā || 60||

निर्वाणिकाऽऽराधितया लक्ष्म्या साकं भवान् पुरा ।अनादिसाऽवननारायणोऽभवत् स रक्षतु ॥ ६१॥

nirvāṇikā''rādhitayā lakṣmyā sākaṃ bhavān purā |anādisā'vananārāyaṇo'bhavat sa rakṣatu || 61||

अंशुक्रमथनृपतेर्भक्त्या त्वमभवः पुरा ।अनादिश्रीसाधुनारायणः कृष्णः स रक्षतु ॥ ६२॥

aṃśukramathanṛpaterbhaktyā tvamabhavaḥ purā |anādiśrīsādhunārāyaṇaḥ kṛṣṇaḥ sa rakṣatu || 62||

शप्तस्य वर्णिशालस्य मनोरुज्जीवनाय वै ।अनादिश्रीभक्तनारायणोऽभवः स पातु नः ॥ ६३॥

śaptasya varṇiśālasya manorujjīvanāya vai |anādiśrībhaktanārāyaṇo'bhavaḥ sa pātu naḥ || 63||

वर्मधरक्ष्मेशमोक्षार्थं त्वं पुरा स्वयं प्रभुः ।अनादिश्रीमेधनारायणोऽभवः स पातु नः ॥ ६४॥

varmadharakṣmeśamokṣārthaṃ tvaṃ purā svayaṃ prabhuḥ |anādiśrīmedhanārāyaṇo'bhavaḥ sa pātu naḥ || 64||

अनलादमहासुरविनाशार्थं भवान् पुरा ।अनादिश्रीवह्निनारायणोऽभवत् स पातु नः ॥ ६५॥

analādamahāsuravināśārthaṃ bhavān purā |anādiśrīvahninārāyaṇo'bhavat sa pātu naḥ || 65||

इलोदरविनाशार्थं रसनारायणोऽभवः ।स त्वं नारायण कृष्ण कृष्ण रक्षय दासिकाः ॥ ६६॥

ilodaravināśārthaṃ rasanārāyaṇo'bhavaḥ |sa tvaṃ nārāyaṇa kṛṣṇa kṛṣṇa rakṣaya dāsikāḥ || 66||

अनादिश्रीचक्रनारायणस्त्वं चाऽभवः पुरा ।दैत्यनाशकरः कृष्ण कृष्ण रक्षय दासिकाः ॥ ६७॥

anādiśrīcakranārāyaṇastvaṃ cā'bhavaḥ purā |daityanāśakaraḥ kṛṣṇa kṛṣṇa rakṣaya dāsikāḥ || 67||

कृतधर्मस्थापनायाऽनादिसत्यनरायणः ।अद्रिस्थित्यर्थमनादिश्रीहिरण्यनरायणः ॥ ६८॥

kṛtadharmasthāpanāyā'nādisatyanarāyaṇaḥ |adristhityarthamanādiśrīhiraṇyanarāyaṇaḥ || 68||

भक्तार्थं त्वमनादिश्रीनैरञ्जनिनरायणः ।अनादिश्रीपुण्यनारायणश्चाऽप्यभवः पुरा ॥ ६९॥

bhaktārthaṃ tvamanādiśrīnairañjaninarāyaṇaḥ |anādiśrīpuṇyanārāyaṇaścā'pyabhavaḥ purā || 69||

पुण्यवतीशापनिवर्तकः कृष्णः स पातु नः ।अनादिश्रीबृहद्ब्रह्मनारायणोऽभवद्भवान् ॥ ७०॥

puṇyavatīśāpanivartakaḥ kṛṣṇaḥ sa pātu naḥ |anādiśrībṛhadbrahmanārāyaṇo'bhavadbhavān || 70||

अप्सरसां मनःपूर्त्यै कृष्ण रक्षय दासिकाः ।अनादिश्रीगुरुनारायणस्त्वं चाऽभवः पुरा ॥ ७१॥

apsarasāṃ manaḥpūrtyai kṛṣṇa rakṣaya dāsikāḥ |anādiśrīgurunārāyaṇastvaṃ cā'bhavaḥ purā || 71||

ब्रह्मविद्याप्रदानार्थं कृष्ण रक्षय दासिकाः ।बृहद्धर्मभूपयज्ञे साधुदीक्षाप्रदायकः ॥ ७२॥

brahmavidyāpradānārthaṃ kṛṣṇa rakṣaya dāsikāḥ |bṛhaddharmabhūpayajñe sādhudīkṣāpradāyakaḥ || 72||

अनादिश्रीमदाचार्यनारायणः स पातु नः ।अनादिश्रीमहाविद्युन्नारायणोऽभवः पुरा ॥ ७३॥

anādiśrīmadācāryanārāyaṇaḥ sa pātu naḥ |anādiśrīmahāvidyunnārāyaṇo'bhavaḥ purā || 73||

विद्युत्स्तावदैत्यहन्ता कृष्ण रक्षय दासिकाः ।अनादिश्रीमधुनारायणस्त्वं चाऽभवः पुरा ॥ ७४॥

vidyutstāvadaityahantā kṛṣṇa rakṣaya dāsikāḥ |anādiśrīmadhunārāyaṇastvaṃ cā'bhavaḥ purā || 74||

मधुभक्षासुरहन्ता कृष्ण रक्षय दासिकाः ।अनादिश्रीनाथनारायणस्त्वं चाऽभवः पुरा ॥ ७५॥

madhubhakṣāsurahantā kṛṣṇa rakṣaya dāsikāḥ |anādiśrīnāthanārāyaṇastvaṃ cā'bhavaḥ purā || 75||

तिष्ये दैत्यविनाशार्थं कृष्ण रक्षय दासिकाः ।अनादिश्रीविभुनारायणस्त्वं चाऽभवः पुरा ॥ ७६॥

tiṣye daityavināśārthaṃ kṛṣṇa rakṣaya dāsikāḥ |anādiśrīvibhunārāyaṇastvaṃ cā'bhavaḥ purā || 76||

स्वर्णोत्सवे वेधसः स कृष्ण रक्षय दासिकाः ।अनादिश्रीमोक्षनारायणस्त्वं चाऽभवः पुरा ॥ ७७॥

svarṇotsave vedhasaḥ sa kṛṣṇa rakṣaya dāsikāḥ |anādiśrīmokṣanārāyaṇastvaṃ cā'bhavaḥ purā || 77||

अनादिश्रीकृष्णनारायणस्त्वं कान्तकेशव ।ब्रह्मप्रियादिस्वामिन्नो लुण्ठकेभ्यः प्ररक्षय ॥ ७८॥

anādiśrīkṛṣṇanārāyaṇastvaṃ kāntakeśava |brahmapriyādisvāminno luṇṭhakebhyaḥ prarakṣaya || 78||

बालकृष्ण हरे कृष्ण वल्लभेश कृपां कुरु ।लुण्ठकेभ्योऽवनं शीघ्रं कुरु ते शरणं गताः ॥ ७९॥

bālakṛṣṇa hare kṛṣṇa vallabheśa kṛpāṃ kuru |luṇṭhakebhyo'vanaṃ śīghraṃ kuru te śaraṇaṃ gatāḥ || 79||

इत्युक्त्वा ताः स्त्रियश्चापि लक्ष्मि ध्यानं व्यधुर्हरेः ।अहं हरिः स्वयं तत्राऽऽगत्याऽदृश्योऽभवं क्षणम् ॥ ८०॥

ityuktvā tāḥ striyaścāpi lakṣmi dhyānaṃ vyadhurhareḥ |ahaṃ hariḥ svayaṃ tatrā''gatyā'dṛśyo'bhavaṃ kṣaṇam || 80||

शृण्वानः स्तुतिवाक्यानि मम प्राक्चरितानि वै ।लुण्ठकाश्च सञ्चिन्वन्ति त्वेकत्र नाणकादिकम् ॥ ८१॥

śṛṇvānaḥ stutivākyāni mama prākcaritāni vai |luṇṭhakāśca sañcinvanti tvekatra nāṇakādikam || 81||

इति श्रीलक्ष्मीनारायणीयसंहितायाः द्वापरयुगसन्तानात्मकस्य तृतीयखण्डे१९०अध्यायान्तर्गतं महासौराष्ट्रीयसङ्घस्य लुण्ठकजनप्रधर्षितस्यपुरुषोत्तमस्तवनं सम्पूर्णम् । चोन्तिनुएद्लक्ष्मीनारायणीयसंहिता । खण्ड ३। अध्याय १९०/११८१॥लक्ष्मीनारायणीयसंहिता । खण्ड ३। अध्याय १९०/१-१८१॥

iti śrīlakṣmīnārāyaṇīyasaṃhitāyāḥ dvāparayugasantānātmakasya tṛtīyakhaṇḍe190adhyāyāntargataṃ mahāsaurāṣṭrīyasaṅghasya luṇṭhakajanapradharṣitasyapuruṣottamastavanaṃ sampūrṇam | continuedlakṣmīnārāyaṇīyasaṃhitā | khaṇḍa 3| adhyāya 190/1181||lakṣmīnārāyaṇīyasaṃhitā | khaṇḍa 3| adhyāya 190/1-181||