नारायणस्तोत्रम् (रैवतमनुकृतं लक्ष्मीनारायणीयसंहितान्तर्गतम्) Raivatamanukritam Narayana Stotram

श्रीनारायण उवाच ।शृणु लक्ष्मि ! रैवताख्यो मनुर्वैकुण्ठमाप्तवान् ।तुष्टाव च महाप्रेम्णा दयालुं मां त्वयाऽन्वितम् ॥ १॥

śrīnārāyaṇa uvāca |śṛṇu lakṣmi ! raivatākhyo manurvaikuṇṭhamāptavān |tuṣṭāva ca mahāpremṇā dayāluṃ māṃ tvayā'nvitam || 1||

नमः सच्चित्स्वरूपायानन्दसन्दोहवार्धये ।नमोऽस्त्वेकस्वरूपायोभयरूपाय ते नमः ॥ २॥

namaḥ saccitsvarūpāyānandasandohavārdhaye |namo'stvekasvarūpāyobhayarūpāya te namaḥ || 2||

नमो हिरण्यकेशाय श्मश्रुवश्मश्रुमते नमः ।नमः स्तन्याऽस्तन्यवते बीजाऽबीजधृते नमः ॥ ३॥

namo hiraṇyakeśāya śmaśruvaśmaśrumate namaḥ |namaḥ stanyā'stanyavate bījā'bījadhṛte namaḥ || 3||

नमो बहिः प्रचिह्नायाबहिश्चिह्नाय ते नमः ।नमो विश्वक्प्रवालाय क्वचिद्बालाय ते नमः ॥ ४॥

namo bahiḥ pracihnāyābahiścihnāya te namaḥ |namo viśvakpravālāya kvacidbālāya te namaḥ || 4||

नमो दक्षिणसत्त्वाय ।वामसत्त्वाय ते नमः ।नम ऊर्ध्वस्वरूपायानूर्ध्वरूपाय ते नमः ॥ ५॥

namo dakṣiṇasattvāya |vāmasattvāya te namaḥ |nama ūrdhvasvarūpāyānūrdhvarūpāya te namaḥ || 5||

नम आधेयरूपायाधाररूपाय ते नमः ।नमो द्विदलरूपायाङ्कुरप्रसूतये नमः ॥ ६॥

nama ādheyarūpāyādhārarūpāya te namaḥ |namo dvidalarūpāyāṅkuraprasūtaye namaḥ || 6||

नमो वैकुण्ठवासाय कुण्ठवासाय ते नमः ।नमो मानसरूपाय भक्तरूपाय ते नमः ॥ ७॥

namo vaikuṇṭhavāsāya kuṇṭhavāsāya te namaḥ |namo mānasarūpāya bhaktarūpāya te namaḥ || 7||

नमस्ते करुणासिन्धो नमः सौराष्ट्रवर्धिने ।नमो रैवतवासाय दामोदराय ते नमः ॥ ८॥

namaste karuṇāsindho namaḥ saurāṣṭravardhine |namo raivatavāsāya dāmodarāya te namaḥ || 8||

नमः पत्नीव्रताख्याय नमः कृष्णाय विष्णवे ।नमोऽनन्तस्वरूपाय ममान्तर्यामिणे नमः ॥ ९॥

namaḥ patnīvratākhyāya namaḥ kṛṣṇāya viṣṇave |namo'nantasvarūpāya mamāntaryāmiṇe namaḥ || 9||

स्वतन्त्रस्त्वं महाविष्णो न जाने त्वं किमिच्छसि ।भक्तो यदर्थमाहूतस्तद्वै विधातुमर्हसि ॥ १०॥

svatantrastvaṃ mahāviṣṇo na jāne tvaṃ kimicchasi |bhakto yadarthamāhūtastadvai vidhātumarhasi || 10||

दासोऽयं कृपया विष्णो नेयः पारं भवाध्वनः ।यत्र ते चरणौ स्तस्तद्देशो मे ह्यरणं भवेत् ॥ ११॥

dāso'yaṃ kṛpayā viṣṇo neyaḥ pāraṃ bhavādhvanaḥ |yatra te caraṇau stastaddeśo me hyaraṇaṃ bhavet || 11||

न वै त्याज्यः कृपानाथ दासोऽयं शरणागतः ।करुणया गृहीतोऽयं न वै तं त्यक्तुमर्हसि ॥ १२॥

na vai tyājyaḥ kṛpānātha dāso'yaṃ śaraṇāgataḥ |karuṇayā gṛhīto'yaṃ na vai taṃ tyaktumarhasi || 12||

यदिष्टं क्षेमकृल्लोके तदिष्टं संविधीयताम् ।इति स्तुत्वा विरराम रैवतो भक्तसत्तमः ॥ १३॥

yadiṣṭaṃ kṣemakṛlloke tadiṣṭaṃ saṃvidhīyatām |iti stutvā virarāma raivato bhaktasattamaḥ || 13||

इति श्रीलक्ष्मीनारायणीयसंहितायां प्रथमे कृतयुगसन्ताने ५५अध्यायान्तर्गतंरैवतमनुकृतं नारायणस्तोत्रं सम्पूर्णम् ।लक्ष्मीनारायणीयसंहिता । खण्ड १। अध्याय ५५/११३॥लक्ष्मीनारायणीयसंहिता । खण्ड १। अध्याय ५५/१-१३॥

iti śrīlakṣmīnārāyaṇīyasaṃhitāyāṃ prathame kṛtayugasantāne 55adhyāyāntargataṃraivatamanukṛtaṃ nārāyaṇastotraṃ sampūrṇam |lakṣmīnārāyaṇīyasaṃhitā | khaṇḍa 1| adhyāya 55/113||lakṣmīnārāyaṇīyasaṃhitā | khaṇḍa 1| adhyāya 55/1-13||