शिवस्तोत्रम् (हिमालयकृतम् १ ब्रह्मवैवर्तपुराणान्तर्गतम्) Shivastotram Himalayakrita from brahmavaivarta

श्रीगणेशाय नमः ।हिमालय उवाच ।त्वं ब्रह्मा सृष्टिकर्ता च त्वं विष्णुः परिपालकः ।त्वं शिवः शिवदोऽनन्तः सर्वसंहारकारकः ॥ १॥

śrīgaṇeśāya namaḥ |himālaya uvāca |tvaṃ brahmā sṛṣṭikartā ca tvaṃ viṣṇuḥ paripālakaḥ |tvaṃ śivaḥ śivado'nantaḥ sarvasaṃhārakārakaḥ || 1||

त्वमीश्वरो गुणातीतो ज्योतीरूपः सनातनः ।प्रकृतिः प्रकृतीशश्च प्राकृतः प्रकृतेः परः ॥ २॥

tvamīśvaro guṇātīto jyotīrūpaḥ sanātanaḥ |prakṛtiḥ prakṛtīśaśca prākṛtaḥ prakṛteḥ paraḥ || 2||

नानारूपविधाता त्वं भक्तानां ध्यानहेतवे ।येषु रूपेषु यत्प्रीतिस्तत्तद्रूपं बिभर्षि च ॥ ३॥

nānārūpavidhātā tvaṃ bhaktānāṃ dhyānahetave |yeṣu rūpeṣu yatprītistattadrūpaṃ bibharṣi ca || 3||

सूर्यस्त्वं सृष्टिजनक आधारः सर्वतेजसाम् ।सोमस्त्वं शस्यपाता च सततं शीतरश्मिना ॥ ४॥

sūryastvaṃ sṛṣṭijanaka ādhāraḥ sarvatejasām |somastvaṃ śasyapātā ca satataṃ śītaraśminā || 4||

वायुस्त्वं वरुणस्त्वं च त्वमग्निः सर्वदाहकः ।इन्द्रस्त्वं देवराजश्च कालो मृत्युर्यमस्तथा ॥ ५॥

vāyustvaṃ varuṇastvaṃ ca tvamagniḥ sarvadāhakaḥ |indrastvaṃ devarājaśca kālo mṛtyuryamastathā || 5||

मृत्युञ्जयो मृत्युमृत्युः कालकालो यमान्तकः ।वेदस्त्वं वेदकर्ता च वेदवेदाङ्गपारगः ॥ ६॥

mṛtyuñjayo mṛtyumṛtyuḥ kālakālo yamāntakaḥ |vedastvaṃ vedakartā ca vedavedāṅgapāragaḥ || 6||

विदुषां जनकस्त्वं च विद्वांश्च विदुषां गुरुः ।मन्त्रस्त्वं हि जपस्त्वं हि तपस्त्वं तत्फलप्रदः ॥ ७॥

viduṣāṃ janakastvaṃ ca vidvāṃśca viduṣāṃ guruḥ |mantrastvaṃ hi japastvaṃ hi tapastvaṃ tatphalapradaḥ || 7||

वाक् त्वं रागाधिदेवी त्वं तत्कर्ता तद्गुरुः स्वयम् ।अहो सरस्वतीबीजं कस्त्वां स्तोतुमिहेश्वरः ॥ ८॥

vāk tvaṃ rāgādhidevī tvaṃ tatkartā tadguruḥ svayam |aho sarasvatībījaṃ kastvāṃ stotumiheśvaraḥ || 8||

इत्येवमुक्त्वाशैलेन्द्रस्तस्थौ धृत्वा पदाम्बुजम् ।तत्रोवास तमाबोध्य चावरुह्य वृषाच्छिवः ॥ ९॥

ityevamuktvāśailendrastasthau dhṛtvā padāmbujam |tatrovāsa tamābodhya cāvaruhya vṛṣācchivaḥ || 9||

स्तोत्रमेतन्महापुण्यं त्रिसन्ध्यं यः पठेन्नरः ।मुच्यते सर्वपापेभ्यो भयेभ्यश्च भवार्णवे ॥ १०॥

stotrametanmahāpuṇyaṃ trisandhyaṃ yaḥ paṭhennaraḥ |mucyate sarvapāpebhyo bhayebhyaśca bhavārṇave || 10||

अपुत्रो लभते पुत्रं मासमेकं पठेद्यदि ।भार्याहीनो लभेद्भार्यां सुशीलां सुमनोहराम् ॥ ११॥

aputro labhate putraṃ māsamekaṃ paṭhedyadi |bhāryāhīno labhedbhāryāṃ suśīlāṃ sumanoharām || 11||

चिरकालगतं वस्तु लभते सहसा ध्रुवम् ॥ १२॥

cirakālagataṃ vastu labhate sahasā dhruvam || 12||

राज्यभ्रष्टो लभेद्राज्यं शङ्करस्य प्रसादतः ।कारागारे श्मशाने च शत्रुग्रस्तेऽतिसङ्कटे ।गभीरेऽतिजलाकीर्णे भग्नपोते विषादने ॥ १३॥

rājyabhraṣṭo labhedrājyaṃ śaṅkarasya prasādataḥ |kārāgāre śmaśāne ca śatrugraste'tisaṅkaṭe |gabhīre'tijalākīrṇe bhagnapote viṣādane || 13||

रणमध्ये महाभीते हिंस्रजन्तुसमन्विते ।सर्वतो मुच्यते स्तुत्वा शङ्करस्य प्रसादतः ॥ १४॥

raṇamadhye mahābhīte hiṃsrajantusamanvite |sarvato mucyate stutvā śaṅkarasya prasādataḥ || 14||

इति श्रीब्रह्मवैवर्ते महापुराणे श्रीकृष्णजन्मखण्डेहिमालयकृतं शिवस्तोत्रं सम्पूर्णम् ॥श्रीकृष्णजन्मखण्ड अध्याय ३८ श्लोकानि ६५७८

iti śrībrahmavaivarte mahāpurāṇe śrīkṛṣṇajanmakhaṇḍehimālayakṛtaṃ śivastotraṃ sampūrṇam ||śrīkṛṣṇajanmakhaṇḍa adhyāya 38 ślokāni 6578