शिवस्तोत्रम् (असितकृतम्) Shivastotram Asitakrita

श्रीगणेशाय नमः ॥असित उवाच ।जगद्गुरो नमस्तुभ्यं शिवाय शिवदाय च ।योगीन्द्राणां च योगीन्द्र गुरूणां गुरवे नमः ॥ १॥

śrīgaṇeśāya namaḥ ||asita uvāca |jagadguro namastubhyaṃ śivāya śivadāya ca |yogīndrāṇāṃ ca yogīndra gurūṇāṃ gurave namaḥ || 1||

मृत्योर्मृत्युस्वरूपेण मृत्युसंसारखण्डनमृत्योरीश मृत्युबीज मृत्युञ्जय नमोऽस्तु ते ॥ २॥

mṛtyormṛtyusvarūpeṇa mṛtyusaṃsārakhaṇḍanamṛtyorīśa mṛtyubīja mṛtyuñjaya namo'stu te || 2||

कालरूपं कलयतां कालकालेश कारण ।कालादतीत कालस्थ कालकाल नमोऽस्तु ते ॥ ३॥

kālarūpaṃ kalayatāṃ kālakāleśa kāraṇa |kālādatīta kālastha kālakāla namo'stu te || 3||

गुणातीत गुणाधार गुणबीज गुणात्मक ।गुणीश गुणिनां बीज गुणिनां गुरवे नमः ॥ ४॥

guṇātīta guṇādhāra guṇabīja guṇātmaka |guṇīśa guṇināṃ bīja guṇināṃ gurave namaḥ || 4||

ब्रह्मस्वरूप ब्रह्मज्ञ ब्रह्मभावे च तत्परः ।ब्रह्मबीजस्वरूपेण ब्रह्मबीज नमोऽस्तु ते ॥ ५॥

brahmasvarūpa brahmajña brahmabhāve ca tatparaḥ |brahmabījasvarūpeṇa brahmabīja namo'stu te || 5||

इति स्तुत्वा शिवं नत्वा पुरस्तस्थौ मुनीश्वरः ।दीनवत्साश्रुनेत्रश्च पुलकाञ्चितविग्रहः ॥ ६॥

iti stutvā śivaṃ natvā purastasthau munīśvaraḥ |dīnavatsāśrunetraśca pulakāñcitavigrahaḥ || 6||

असितेन कृतं स्तोत्रं भक्तियुक्तश्च यः पठेत् ।वर्षमेकं हविष्याशी शङ्करस्य महात्मनः ॥ ७॥

asitena kṛtaṃ stotraṃ bhaktiyuktaśca yaḥ paṭhet |varṣamekaṃ haviṣyāśī śaṅkarasya mahātmanaḥ || 7||

स लभेद्वैष्णवं पुत्रं ज्ञानिनं चिरजीविनम् ।भवेद्धनाढ्यो दुःखी च मूको भवति पण्डितः ॥ ८॥

sa labhedvaiṣṇavaṃ putraṃ jñāninaṃ cirajīvinam |bhaveddhanāḍhyo duḥkhī ca mūko bhavati paṇḍitaḥ || 8||

अभार्यो लभते भार्यां सुशीलां च पतिव्रताम् ।इह लोके सुखं भुक्त्वा यात्यन्ते शिवसन्निधिम् ॥ ९॥

abhāryo labhate bhāryāṃ suśīlāṃ ca pativratām |iha loke sukhaṃ bhuktvā yātyante śivasannidhim || 9||

इदं स्तोत्रं पुरा दत्तं ब्रह्मणा च प्रचेतसे ।प्रचेतसा स्वपुत्रायासिताय दत्तमुत्तमम् ॥ १०॥

idaṃ stotraṃ purā dattaṃ brahmaṇā ca pracetase |pracetasā svaputrāyāsitāya dattamuttamam || 10||

इति श्रीब्रह्मवैवर्ते महापुराणे श्रीकृष्णजन्मखण्डेअसितकृतशिवस्तोत्रं सम्पूर्णम् ॥

iti śrībrahmavaivarte mahāpurāṇe śrīkṛṣṇajanmakhaṇḍeasitakṛtaśivastotraṃ sampūrṇam ||