शिवस्तुतिः ब्रह्मकृता ५ Shivastuti by Brahma in Brahmanda Mahapurana

नमस्तुभ्यं विरूपाक्ष नमस्ते दिव्यचक्षुषे ।नमः पिनाकहस्ताय वज्रहस्ताय वै नमः ॥ १॥

namastubhyaṃ virūpākṣa namaste divyacakṣuṣe |namaḥ pinākahastāya vajrahastāya vai namaḥ || 1||

नमस्त्रैलोक्य नाथाय भूतानां पतये नमः ।नमः सुरारिहन्त्रे च सोमसूर्याग्निचक्षुषे ॥ २॥

namastrailokya nāthāya bhūtānāṃ pataye namaḥ |namaḥ surārihantre ca somasūryāgnicakṣuṣe || 2||

ब्रह्मणे चैव रुद्राय विष्णवे चैव ते नमः ।साङ्ख्याय चैव योगाय भूतग्रामाय वै नमः ॥ ३॥

brahmaṇe caiva rudrāya viṣṇave caiva te namaḥ |sāṅkhyāya caiva yogāya bhūtagrāmāya vai namaḥ || 3||

मन्मथाङ्गविनाशाय कालपृष्ठाय वै नमः ।सुरेतसेऽथ रुद्राय देवदेवाय रंहसे ॥ ४॥

manmathāṅgavināśāya kālapṛṣṭhāya vai namaḥ |suretase'tha rudrāya devadevāya raṃhase || 4||

कपर्दिने करालाय शङ्कराय हराय च ।कपालिने विरूपाय शिवाय वरदाय च ॥ ५॥

kapardine karālāya śaṅkarāya harāya ca |kapāline virūpāya śivāya varadāya ca || 5||

त्रिपुरघ्नमखघ्नाय मातॄणां पतये नमः ।वृद्धाय चैव शुद्धाय मुक्तायैव बलाय च ॥ ६॥

tripuraghnamakhaghnāya mātṝṇāṃ pataye namaḥ |vṛddhāya caiva śuddhāya muktāyaiva balāya ca || 6||

लोकत्रयैकवीराय चन्द्राय वरुणाय च ।अग्राय चैव चोग्राय विप्रायानेकचक्षुषे ॥ ७॥

lokatrayaikavīrāya candrāya varuṇāya ca |agrāya caiva cogrāya viprāyānekacakṣuṣe || 7||

रजसे चैव सत्त्वाय नमस्तेऽव्यक्तयोनये ।नित्याय चैवानित्याय नित्यानित्याय वै नमः ॥ ८॥

rajase caiva sattvāya namaste'vyaktayonaye |nityāya caivānityāya nityānityāya vai namaḥ || 8||

व्यक्ताय चैवाव्यक्ताय व्यक्ताव्यक्ताय वै नमः ।चिन्त्याय चैवाचिन्त्याय चिन्त्याचिन्त्याय वै नमः ॥ ९॥

vyaktāya caivāvyaktāya vyaktāvyaktāya vai namaḥ |cintyāya caivācintyāya cintyācintyāya vai namaḥ || 9||

जगतामार्त्तिनाशाय प्रियनारायणाय च ।उमाप्रियाय शर्वाय नन्दिवक्त्राङ्किताय च ॥ १०॥

jagatāmārttināśāya priyanārāyaṇāya ca |umāpriyāya śarvāya nandivaktrāṅkitāya ca || 10||

पक्षमासार्द्धमासाय ऋतुसंवत्सराय च ।बहुरूपाय मुण्डाय दण्डिने च वरूथिने ॥ ११॥

pakṣamāsārddhamāsāya ṛtusaṃvatsarāya ca |bahurūpāya muṇḍāya daṇḍine ca varūthine || 11||

नमः कपालहस्ताय दिग्वासाय शिखण्डिने ।धन्विने रथिने चैव यमिने ब्रह्मचारिणे ॥ १२॥

namaḥ kapālahastāya digvāsāya śikhaṇḍine |dhanvine rathine caiva yamine brahmacāriṇe || 12||

ऋग्यजुःसामवेदाय पुरुषायेश्वराय च ।इत्येवमादिचरितैः स्तोत्रैः स्तुत्य नमोऽस्तु ते ॥ १३॥

ṛgyajuḥsāmavedāya puruṣāyeśvarāya ca |ityevamādicaritaiḥ stotraiḥ stutya namo'stu te || 13||

॥ इति ब्रह्माण्डमहापुराणे ब्रह्माकृता शिवस्तुतिः सम्पूर्णा ॥॥ ब्रह्माण्डमहापुराणम् । वायुप्रोक्तं पूर्वभागः । अनुषङ्गपादः २।अध्यायः २५ नीलकण्ठनामोत्पत्तिकथनम् । ६४७६॥

|| iti brahmāṇḍamahāpurāṇe brahmākṛtā śivastutiḥ sampūrṇā |||| brahmāṇḍamahāpurāṇam | vāyuproktaṃ pūrvabhāgaḥ | anuṣaṅgapādaḥ 2|adhyāyaḥ 25 nīlakaṇṭhanāmotpattikathanam | 6476||

॥ ब्रह्माण्डमहापुराणम् । वायुप्रोक्तं पूर्वभागः । अनुषङ्गपादः – २।अध्यायः २५ – नीलकण्ठनामोत्पत्तिकथनम् । ६४-७६॥

|| brahmāṇḍamahāpurāṇam | vāyuproktaṃ pūrvabhāgaḥ | anuṣaṅgapādaḥ – 2|adhyāyaḥ 25 – nīlakaṇṭhanāmotpattikathanam | 64-76||