शिवप्रासादकरणम् १ ईश्वरप्रोक्तं Ishvaraproktam Shivaprasadakaranam 1

(शिवरहस्यान्तर्गते महादेवाख्ये)शिवगौरीसंवादेईश्वर उवाच ।मृद्दार्विष्टकपाषाणैर्यः कुर्याद्वै शिवालयम् ॥ ३॥

(śivarahasyāntargate mahādevākhye)śivagaurīsaṃvādeīśvara uvāca |mṛddārviṣṭakapāṣāṇairyaḥ kuryādvai śivālayam || 3||

त्रिःसप्तकुलसंयुक्तः शिवलोके महीयते ।मृन्मयात्कोटिगुणितं पुण्यं स्याद्दारुभिः कृतम् ॥ ४॥

triḥsaptakulasaṃyuktaḥ śivaloke mahīyate |mṛnmayātkoṭiguṇitaṃ puṇyaṃ syāddārubhiḥ kṛtam || 4||

त्रिगुणं चेष्टकादिभ्यः सुधया परिकल्पितम् ।शैलैरनन्तं देवेशि कल्पितं शिल्पिभिर्दृढम् ॥ ५॥

triguṇaṃ ceṣṭakādibhyaḥ sudhayā parikalpitam |śailairanantaṃ deveśi kalpitaṃ śilpibhirdṛḍham || 5||

कोटिकोटिगुणं पुण्यमुत्तरत्र महेश्वर ।मृच्छैलयोः समं ज्ञेयं फलमाढ्यदरिद्रयोः ॥ ६॥

koṭikoṭiguṇaṃ puṇyamuttaratra maheśvara |mṛcchailayoḥ samaṃ jñeyaṃ phalamāḍhyadaridrayoḥ || 6||

यत्र क्वापि शिवे भक्त्या कुर्याच्छैलेष्टकादिभिः ।नवं पुराणरहितं जीर्णं पतितमेव वा ॥ ७॥

yatra kvāpi śive bhaktyā kuryācchaileṣṭakādibhiḥ |navaṃ purāṇarahitaṃ jīrṇaṃ patitameva vā || 7||

नवादपि सदोत्कृष्टं जीर्णोद्धारं महेश्वरि ।अष्टेष्टकाभिर्वा कुर्यात्क्रीडमानः शिवालयम् ॥ ८॥

navādapi sadotkṛṣṭaṃ jīrṇoddhāraṃ maheśvari |aṣṭeṣṭakābhirvā kuryātkrīḍamānaḥ śivālayam || 8||

सोऽपि रुद्रगणो भूयात् भक्त्या युक्तानुसारतः ।गर्भगेहं महेशस्य यः कुर्याद्युक्तधातुभिः ॥ ९॥

so'pi rudragaṇo bhūyāt bhaktyā yuktānusārataḥ |garbhagehaṃ maheśasya yaḥ kuryādyuktadhātubhiḥ || 9||

पट्टिकाकुमुदोपेतं देव कोष्ठैश्च शोभितम् ।रुद्रावतारचरितैर्वृषकुम्भविराजितम् ॥ १०॥

paṭṭikākumudopetaṃ deva koṣṭhaiśca śobhitam |rudrāvatāracaritairvṛṣakumbhavirājitam || 10||

तावद्युगसहस्राणि रुद्रलोके महीयते ।तत्पाषाणसुधालेपकणैः साहस्रसङ्ख्यया ॥ ११॥

tāvadyugasahasrāṇi rudraloke mahīyate |tatpāṣāṇasudhālepakaṇaiḥ sāhasrasaṅkhyayā || 11||

तावत्कालं वसेत्स्वर्गे यावदिन्द्राश्चतुर्दश ।मण्टपं दशभिः स्तम्भैर्युतं यःकारयेच्छिवे ॥ १२॥

tāvatkālaṃ vasetsvarge yāvadindrāścaturdaśa |maṇṭapaṃ daśabhiḥ stambhairyutaṃ yaḥkārayecchive || 12||

शतस्तम्भं ततोऽपीशे सहस्रस्तम्भमण्डितम् ।सुपीठवेदिकोपेतं वलभीकुम्भमण्डितम् ॥ १३॥

śatastambhaṃ tato'pīśe sahasrastambhamaṇḍitam |supīṭhavedikopetaṃ valabhīkumbhamaṇḍitam || 13||

जालकीतोरणोपेतं चित्रविद्रुमपुत्रिकम् ।तावद्युगसहस्राणि शिवलोके महीयते ॥ १४॥

jālakītoraṇopetaṃ citravidrumaputrikam |tāvadyugasahasrāṇi śivaloke mahīyate || 14||

गोपुरैर्भूधराकारैः सहस्रतलमण्डितैः ।कारयेच्छिल्पशास्त्रज्ञै रुद्ररूपविचित्रितैः ॥ १५॥

gopurairbhūdharākāraiḥ sahasratalamaṇḍitaiḥ |kārayecchilpaśāstrajñai rudrarūpavicitritaiḥ || 15||

दशैकादशसाहस्रतलैः शतपरीमितैः ।कुम्भैर्वृषैरुद्ररूपैर्योऽलङ्कुर्याच्च रङ्गतः ॥ १६॥

daśaikādaśasāhasratalaiḥ śataparīmitaiḥ |kumbhairvṛṣairudrarūpairyo'laṅkuryācca raṅgataḥ || 16||

यावन्ति रुद्ररूपाणि तानि सर्वाण्यपि लेखयेत् ।तावद्वर्षसहस्राणि शिवलोके महीयते ॥ १७॥

yāvanti rudrarūpāṇi tāni sarvāṇyapi lekhayet |tāvadvarṣasahasrāṇi śivaloke mahīyate || 17||

शिवालयस्य परितश्चतुर्दिक्षु विराजितैः ।प्राकारं कारयेद्युक्तं मारमारस्य शङ्करि ॥ १८॥

śivālayasya paritaścaturdikṣu virājitaiḥ |prākāraṃ kārayedyuktaṃ māramārasya śaṅkari || 18||

यावत्तस्मिन् विरचिता पाषाणा इष्टकास्तथा ।तावद्वर्षसहस्राणि मम लोके महीयते ॥ १९॥

yāvattasmin viracitā pāṣāṇā iṣṭakāstathā |tāvadvarṣasahasrāṇi mama loke mahīyate || 19||

खण्डस्फुटितसंस्कारं यः कुर्वीत शिवालये ।प्राकारं गोपुरं वापि मण्टपं वा सपीठकम् ॥ २०॥

khaṇḍasphuṭitasaṃskāraṃ yaḥ kurvīta śivālaye |prākāraṃ gopuraṃ vāpi maṇṭapaṃ vā sapīṭhakam || 20||

नूतनादपि चोत्कृष्टं जीर्णोद्धारं प्रशस्यते ।दूरतः शिखरं दृष्ट्वा गोपुरस्य महेशितुः ॥ २१॥

nūtanādapi cotkṛṣṭaṃ jīrṇoddhāraṃ praśasyate |dūrataḥ śikharaṃ dṛṣṭvā gopurasya maheśituḥ || 21||

सप्तजन्मकृतं पापं तत्क्षणादेव नश्यति ।पश्चात्प्राङ्मुखलिङ्गस्य गर्भागारं तु कारयेत् ॥ २२॥

saptajanmakṛtaṃ pāpaṃ tatkṣaṇādeva naśyati |paścātprāṅmukhaliṅgasya garbhāgāraṃ tu kārayet || 22||

देवालयं ततः कृत्वा देवीमूर्तिभिरन्वितम् ।शिवलोके गणो भूत्वा मोदते शाश्वतीःसमाः ॥ २३॥

devālayaṃ tataḥ kṛtvā devīmūrtibhiranvitam |śivaloke gaṇo bhūtvā modate śāśvatīḥsamāḥ || 23||

स्कन्दालयं गणेशस्य भैरवस्य महात्मनः ।चण्डेश्वरालयं कृत्वा स लभेत्पुण्यमद्भुतम् ॥ २४॥

skandālayaṃ gaṇeśasya bhairavasya mahātmanaḥ |caṇḍeśvarālayaṃ kṛtvā sa labhetpuṇyamadbhutam || 24||

वृषालयं प्रकुर्वीत तदग्रे बलिपीठकम् ।तस्याग्रतो ध्वजस्तम्भं कुर्यादूर्ध्वसवर्तुलम् ॥ २५॥

vṛṣālayaṃ prakurvīta tadagre balipīṭhakam |tasyāgrato dhvajastambhaṃ kuryādūrdhvasavartulam || 25||

॥ इति शिवरहस्यान्तर्गते ईश्वरप्रोक्तं शिवप्रासादकरणं १ सम्पूर्णम् ॥॥ श्रीशिवरहस्यम् । महादेवाख्यः एकादशमांशः । अध्यायः ६ शिवलिङ्गप्रतिष्ठा । ३\।२२५॥– ॥ श्रीशिवरहस्यम् । महादेवाख्यः एकादशमांशः । अध्यायः ६ शिवलिन्गप्रतिष्ठा । ३।२-२५॥

|| iti śivarahasyāntargate īśvaraproktaṃ śivaprāsādakaraṇaṃ 1 sampūrṇam |||| śrīśivarahasyam | mahādevākhyaḥ ekādaśamāṃśaḥ | adhyāyaḥ 6 śivaliṅgapratiṣṭhā | 3\|225||– || śrīśivarahasyam | mahādevākhyaḥ ekādaśamāṃśaḥ | adhyāyaḥ 6 śivalingapratiṣṭhā | 3|2-25||