शिवप्रासादकरणम् २ ईश्वरप्रोक्तं Ishvaraproktam Shivaprasadakaranam 2

(शिवरहस्यान्तर्गते महादेवाख्ये)शिवगौरीसंवादेईश्वर उवाच ।कैलासाचलसङ्काशं गोपुरावलिभासुरम् ।प्राकारवरशोभाढ्यं महामण्टपसुन्दरम् ॥ १॥

(śivarahasyāntargate mahādevākhye)śivagaurīsaṃvādeīśvara uvāca |kailāsācalasaṅkāśaṃ gopurāvalibhāsuram |prākāravaraśobhāḍhyaṃ mahāmaṇṭapasundaram || 1||

पर्यन्तराजद्वृषभं चित्रविद्रुमवेदिकम् ।गवाक्षतोरणयुतं वलभीकुलभूषितम् ॥ २॥

paryantarājadvṛṣabhaṃ citravidrumavedikam |gavākṣatoraṇayutaṃ valabhīkulabhūṣitam || 2||

नानाद्रुमलतोपेतं वापीकूपशतावृतम् ।सरोभिः फुल्लकल्हारकमलोत्पलमण्डितैः ॥ ३॥

nānādrumalatopetaṃ vāpīkūpaśatāvṛtam |sarobhiḥ phullakalhārakamalotpalamaṇḍitaiḥ || 3||

नानाविहगशोभाढ्यं नृत्यच्छिखिलाकुलम् ।कृत्वा नगोर्ध्वशिखरजालजालकिताम्बरम् ॥ ४॥

nānāvihagaśobhāḍhyaṃ nṛtyacchikhilākulam |kṛtvā nagordhvaśikharajālajālakitāmbaram || 4||

रम्यनिर्झरकं मञ्जुरङ्गवल्लीविचित्रितम् ।तन्मध्ये मम देवेश कुर्यात्प्रासादमुन्नतम् ॥ ५॥

ramyanirjharakaṃ mañjuraṅgavallīvicitritam |tanmadhye mama deveśa kuryātprāsādamunnatam || 5||

शतं सहस्रमयुतं स्तम्भकुम्भविराजितम् ।वेदिकापट्टिकोपेतं चित्रविद्रुमपुत्रिकम् ॥ ६॥

śataṃ sahasramayutaṃ stambhakumbhavirājitam |vedikāpaṭṭikopetaṃ citravidrumaputrikam || 6||

प्रतोलीवलभीनिर्यद्धारासारगृहान्तरम् ।पुष्पमालापरिक्षिप्तं धूपदीपविराजितम् ॥ ७॥

pratolīvalabhīniryaddhārāsāragṛhāntaram |puṣpamālāparikṣiptaṃ dhūpadīpavirājitam || 7||

मध्ये सिह्मासनयुतं डोलास्तरणशोभितम् ।वितानशोभितोर्ध्वान्तमुपधानशतावृतम् ॥ ८॥

madhye sihmāsanayutaṃ ḍolāstaraṇaśobhitam |vitānaśobhitordhvāntamupadhānaśatāvṛtam || 8||

तस्मिन्नासनपर्यङ्के मूर्ति सोमां महेश्वरि ।त्रिणेत्रां चारुचन्द्रार्कां त्वत्सहायां सुशोभनाम् ॥ ९॥

tasminnāsanaparyaṅke mūrti somāṃ maheśvari |triṇetrāṃ cārucandrārkāṃ tvatsahāyāṃ suśobhanām || 9||

स्कन्दान्वितां नीलकण्ठां त्रिपुण्ड्रपरिशोभिताम् ।प्रतिष्ठाप्य च कैलासप्रासादे परमेश्वरि ॥ १०॥

skandānvitāṃ nīlakaṇṭhāṃ tripuṇḍrapariśobhitām |pratiṣṭhāpya ca kailāsaprāsāde parameśvari || 10||

स यत्फलमवाप्नोति तदेकाग्रमनाः शृणु ।सूर्यकोटिप्रतीकाशैर्यानैः कैलाससप्रभैः ॥ ११॥

sa yatphalamavāpnoti tadekāgramanāḥ śṛṇu |sūryakoṭipratīkāśairyānaiḥ kailāsasaprabhaiḥ || 11||

औमं कौमारमैशानं वैष्णवं ब्राह्ममेव च ।प्राजापत्यं महातेजोजनोलोकं महस्तथा ॥ १२॥

aumaṃ kaumāramaiśānaṃ vaiṣṇavaṃ brāhmameva ca |prājāpatyaṃ mahātejojanolokaṃ mahastathā || 12||

ऐन्द्रमासाद्य चेन्द्रत्वं कृत्वा कल्पायुतं दिवि ।मन्वन्तर परीवृत्तं यावदिन्द्रशतं शिवे ॥ १३॥

aindramāsādya cendratvaṃ kṛtvā kalpāyutaṃ divi |manvantara parīvṛttaṃ yāvadindraśataṃ śive || 13||

भुक्त्वा चैव भुवर्लोकभोगान् देवसुदुर्लभान् ।यावदायुर्ब्रह्मणोऽयं वसेत् कैलासपर्वते ॥ १४॥

bhuktvā caiva bhuvarlokabhogān devasudurlabhān |yāvadāyurbrahmaṇo'yaṃ vaset kailāsaparvate || 14||

मेरुमासाद्य देवानां भवनेषु प्रमोदने ।किम्पुरुषाप्सरोलोके यक्षविद्याधरालये ॥ १५॥

merumāsādya devānāṃ bhavaneṣu pramodane |kimpuruṣāpsaroloke yakṣavidyādharālaye || 15||

भुक्त्वा भोगान् स विपुलान् पदे स्यादैच्छिके भुवि ।आखण्डलाधिको भूयात् महीमण्डलमण्डनः ॥ १६॥

bhuktvā bhogān sa vipulān pade syādaicchike bhuvi |ākhaṇḍalādhiko bhūyāt mahīmaṇḍalamaṇḍanaḥ || 16||

एकछत्राधिपो राजा भवेद्वीजितचामरः ।जातिस्मरो भवेद्भूम्यां कृत्वा धर्मं शिवस्य तु ॥ १७॥

ekachatrādhipo rājā bhavedvījitacāmaraḥ |jātismaro bhavedbhūmyāṃ kṛtvā dharmaṃ śivasya tu || 17||

पुनर्मद्गणपो भूयान्नास्यान्तो धर्मवर्त्मनः ।मन्दिराद्रिं(मन्थराद्रौ मन्दराद्रौवा) प्रकुर्वीत मम प्रासादमुत्तमम् ॥ १८॥

punarmadgaṇapo bhūyānnāsyānto dharmavartmanaḥ |mandirādriṃ(mantharādrau mandarādrauvā) prakurvīta mama prāsādamuttamam || 18||

शिखरायुत संयुक्तं प्रासादं दिव्यवेदिकम् ।रुद्रावतारक्रीडाभिरप्सरोगणचित्रितम् ॥ १९॥

śikharāyuta saṃyuktaṃ prāsādaṃ divyavedikam |rudrāvatārakrīḍābhirapsarogaṇacitritam || 19||

देवदानवगन्धर्वप्रतिमापरिशोभितम् ।सन्तानपारिजातादिमन्दराद्यैरलङ्कृतम् ॥ २०॥

devadānavagandharvapratimāpariśobhitam |santānapārijātādimandarādyairalaṅkṛtam || 20||

देवोद्यानोद्भवैर्वृक्षैः समन्तादुपशोभितम् ।सुधाविचित्रिताः सर्वाः कारयेत्प्रतिमाः शुभाः ॥ २१॥

devodyānodbhavairvṛkṣaiḥ samantādupaśobhitam |sudhāvicitritāḥ sarvāḥ kārayetpratimāḥ śubhāḥ || 21||

रञ्जिताः पञ्चवर्णैश्च तत्प्रासादे विशेषतः ।मम देव्या गणेशस्य स्कन्दभैरवनन्दिनः ॥ २२॥

rañjitāḥ pañcavarṇaiśca tatprāsāde viśeṣataḥ |mama devyā gaṇeśasya skandabhairavanandinaḥ || 22||

वृषाग्रे चारुशृङ्गैश्च शोभितं कारयेन्नरः ।तत्प्रासादे महापीठे पुष्पमालाविराजिते ॥ २३॥

vṛṣāgre cāruśṛṅgaiśca śobhitaṃ kārayennaraḥ |tatprāsāde mahāpīṭhe puṣpamālāvirājite || 23||

गन्धधूपदिवितते दीपमालाकृतान्तरे ।नृत्तमानं त्रयानेत्रं(? ) सोमं सोमार्धशेखरम् ॥ २४॥

gandhadhūpadivitate dīpamālākṛtāntare |nṛttamānaṃ trayānetraṃ(? ) somaṃ somārdhaśekharam || 24||

मत्पार्श्वे त्वां महादेवीं पश्यन्तीं मत्पदाम्बुजम् ।कृत्वा भक्त्या प्रतिष्ठाप्य स मे प्रियतरो गणः ॥ २५॥

matpārśve tvāṃ mahādevīṃ paśyantīṃ matpadāmbujam |kṛtvā bhaktyā pratiṣṭhāpya sa me priyataro gaṇaḥ || 25||

मन्दराद्रिप्रतीकाशैर्विमानैर्विश्वतोमुखैः ।हावभावसमायुक्तरुद्राणीनृत्तनिर्भरैः ॥ २६॥

mandarādripratīkāśairvimānairviśvatomukhaiḥ |hāvabhāvasamāyuktarudrāṇīnṛttanirbharaiḥ || 26||

गत्वा शिवपुरं दिव्यं भुक्त्वा भोगाननुत्तमान् ।ज्ञान योगं समासाद्य गाणा(ण)पत्यं लभेन्नरः ॥ २७॥

gatvā śivapuraṃ divyaṃ bhuktvā bhogānanuttamān |jñāna yogaṃ samāsādya gāṇā(ṇa)patyaṃ labhennaraḥ || 27||

यः कुर्यान्मेरुनामानं प्रासादं मे महेश्वरि ।सहस्रशृङ्गसंयुक्तस्तम्भसाहस्रसंयुतम् ॥ २८॥

yaḥ kuryānmerunāmānaṃ prāsādaṃ me maheśvari |sahasraśṛṅgasaṃyuktastambhasāhasrasaṃyutam || 28||

वेदिकातोरणोपेतं वलभीजालिकान्वितम् ।दिक्पालैर्देवसङ्घैश्च तत्तद्वर्णायुधान्वितैः ॥ २९॥

vedikātoraṇopetaṃ valabhījālikānvitam |dikpālairdevasaṅghaiśca tattadvarṇāyudhānvitaiḥ || 29||

कल्पितं शिल्पिवर्यैश्च प्रासादान्त पीठके ।धूपदीपसुमामोदप्रसारितदिगन्तरे ॥ ३०॥

kalpitaṃ śilpivaryaiśca prāsādānta pīṭhake |dhūpadīpasumāmodaprasāritadigantare || 30||

वामदक्षिणपार्श्वे(र्श्व)स्य विष्णुब्रह्मादिसेविताम् ।उमान्वितां ममैवेशि मूर्ति संस्थाप्य पूजयेत् ॥ ३१॥

vāmadakṣiṇapārśve(rśva)sya viṣṇubrahmādisevitām |umānvitāṃ mamaiveśi mūrti saṃsthāpya pūjayet || 31||

स यत्फलमवाप्नोति न तत्सर्वां महामखैः ।सर्वयज्ञतपोदानसर्वतीर्थेषु यत्फलम् ॥ ३२॥

sa yatphalamavāpnoti na tatsarvāṃ mahāmakhaiḥ |sarvayajñatapodānasarvatīrtheṣu yatphalam || 32||

लब्ध्वा विमानवर्येण जितसूर्येण याति माम् ।निषधं नामतः कुर्यात् प्रासादं भक्तिमान्नरः ॥ ३३॥

labdhvā vimānavaryeṇa jitasūryeṇa yāti mām |niṣadhaṃ nāmataḥ kuryāt prāsādaṃ bhaktimānnaraḥ || 33||

सहस्रशिखरोपेतं शुभकुम्भसमन्वितम् ।वलभीकुलसञ्छन्नं तोरणारुणमण्डितम् ॥ ३४॥

sahasraśikharopetaṃ śubhakumbhasamanvitam |valabhīkulasañchannaṃ toraṇāruṇamaṇḍitam || 34||

वेदिकापट्टिकोपेतं मुनिवर्यैश्च शोभितम् ।वैखानसैर्वालखिल्यैर्देवगन्धर्वशोभितम् ॥ ३५॥

vedikāpaṭṭikopetaṃ munivaryaiśca śobhitam |vaikhānasairvālakhilyairdevagandharvaśobhitam || 35||

तादृग्विधसुधाक्लृप्तमूर्तिभिः परिशोभितम् ।तत्रासने सुखासीनं चन्द्रखण्डजटालकम् ॥ ३६॥

tādṛgvidhasudhāklṛptamūrtibhiḥ pariśobhitam |tatrāsane sukhāsīnaṃ candrakhaṇḍajaṭālakam || 36||

त्रिपुण्ड्रभालं मां देवि योगपट्टसनोज्ज्वलम् ।चिन्मुद्राद्राविताज्ञानं मुनीनां भावितात्मनाम् ॥ ३७॥

tripuṇḍrabhālaṃ māṃ devi yogapaṭṭasanojjvalam |cinmudrādrāvitājñānaṃ munīnāṃ bhāvitātmanām || 37||

संवृतं मुनिभिस्तत्र नतप्राञ्जलिभिः शिवे ।कृत्वा मे दक्षिणमूर्ति वटमूले प्रतिष्ठिताम् ॥ ३८॥

saṃvṛtaṃ munibhistatra nataprāñjalibhiḥ śive |kṛtvā me dakṣiṇamūrti vaṭamūle pratiṣṭhitām || 38||

देवलोकं पानवर्यैः सहयुक्तैर्विराजितैः ।विमानैश्चन्द्रतारैश्च वृतमप्सरसां गणैः ॥ ३९॥

devalokaṃ pānavaryaiḥ sahayuktairvirājitaiḥ |vimānaiścandratāraiśca vṛtamapsarasāṃ gaṇaiḥ || 39||

भुक्त्वाथ सुचिरङ्कालं देवभोगाननुत्तमान् ।अभूतं देवि पश्चान्मे ज्ञानमैश्वरमुत्तम् ॥ ४०॥

bhuktvātha suciraṅkālaṃ devabhogānanuttamān |abhūtaṃ devi paścānme jñānamaiśvaramuttam || 40||

लब्ध्वा मय्येव लीयेत भक्तियुक्तः प्रमुच्यते ।कुर्याद्वा यः शिवे भक्त्या हिमशैलाख्यमुत्तमम् ॥ ४१॥

labdhvā mayyeva līyeta bhaktiyuktaḥ pramucyate |kuryādvā yaḥ śive bhaktyā himaśailākhyamuttamam || 41||

प्रासादं परया भक्त्या दिव्यस्तम्भशतैर्युतम् ।जालिकामालिकामध्यस्तम्भकुम्भशतवृतम् ॥ ४२॥

prāsādaṃ parayā bhaktyā divyastambhaśatairyutam |jālikāmālikāmadhyastambhakumbhaśatavṛtam || 42||

वेदिकातोरणोपेतं दिव्यपीठमनोहरम् ।धूपदीपावृतं पुष्पमालामुदितमेदुरम् ॥ ४३॥

vedikātoraṇopetaṃ divyapīṭhamanoharam |dhūpadīpāvṛtaṃ puṣpamālāmuditameduram || 43||

नन्दिभृङ्गिमहाकालमूर्तिभिः परिशोभितम् ।तिष्ठन्तं मां तत्र मूर्तिं कृत्वा वृषमुखे करम् ॥ ४४॥

nandibhṛṅgimahākālamūrtibhiḥ pariśobhitam |tiṣṭhantaṃ māṃ tatra mūrtiṃ kṛtvā vṛṣamukhe karam || 44||

सोष्णीषं सोममकुटं पुष्पापीडमुमान्वितम् ।प्रतिष्ठाप्य लभेद्गौरि विमानं सार्वगामिकम् ॥ ४५॥

soṣṇīṣaṃ somamakuṭaṃ puṣpāpīḍamumānvitam |pratiṣṭhāpya labhedgauri vimānaṃ sārvagāmikam || 45||

हिमशैलोपमैर्यानैर्भुक्त्वा देव पुरे सुखम् ।नन्दनादिवने देवि पीत्वाऽमृतमनुत्तमम् ॥ ४६॥

himaśailopamairyānairbhuktvā deva pure sukham |nandanādivane devi pītvā'mṛtamanuttamam || 46||

स्रग्गन्धवासोविभ्राजदप्सरोभिः प्रमोदते ।यावदिन्द्रायुतं देवि पश्चान्मे गणपो भवेत् ॥ ४७॥

sraggandhavāsovibhrājadapsarobhiḥ pramodate |yāvadindrāyutaṃ devi paścānme gaṇapo bhavet || 47||

नीलाद्रिशिखराख्यं वा प्रासादं तोरणान्वितम् ।वेदिकापट्टिकोपेतं गोपानसि विराजितम् ॥ ४८॥

nīlādriśikharākhyaṃ vā prāsādaṃ toraṇānvitam |vedikāpaṭṭikopetaṃ gopānasi virājitam || 48||

पञ्चाशत्स्तम्भसंवीत चित्रविद्रुमपुत्रिकम् ।विराजितवृषाग्रं च धूयमानपताककम् ॥ ४९ ॥

pañcāśatstambhasaṃvīta citravidrumaputrikam |virājitavṛṣāgraṃ ca dhūyamānapatākakam || 49 ||

(विराजित वृषाधीशधूयमानपताककम्) ॥ ४९॥

(virājita vṛṣādhīśadhūyamānapatākakam) || 49||

वेणुवीणारवानेकसमधूपादिदीपितम् ।पीठे देवि प्रतिष्ठाप्य गजध्नीं मूर्तिमव्ययाम् ॥ ५०॥

veṇuvīṇāravānekasamadhūpādidīpitam |pīṭhe devi pratiṣṭhāpya gajadhnīṃ mūrtimavyayām || 50||

त्रिणेत्रचारुचन्द्रार्का गजमस्तलसाङ्घ्रिकाम् । (गजमस्तलसत्पदाम्)विदीपितमहाशूलकरां दंष्ट्राङ्कुरास्यकाम् ॥ ५१॥

triṇetracārucandrārkā gajamastalasāṅghrikām | (gajamastalasatpadām)vidīpitamahāśūlakarāṃ daṃṣṭrāṅkurāsyakām || 51||

यानैर्वृषयुतैर्देवि तिष्ठेद्धि परमेष्ठिनः ।लोके भोगयुतो धीमानधीते ज्ञानमुत्तमम् ॥ ५२॥

yānairvṛṣayutairdevi tiṣṭheddhi parameṣṭhinaḥ |loke bhogayuto dhīmānadhīte jñānamuttamam || 52||

पश्चात्तेनैव मां प्राप्य ब्रह्मणा परिमुच्यते ।वृषभाख्यं हि यः कुर्यात्प्रासादं परमेश्वरि ॥ ५३॥

paścāttenaiva māṃ prāpya brahmaṇā parimucyate |vṛṣabhākhyaṃ hi yaḥ kuryātprāsādaṃ parameśvari || 53||

मण्टपं वा सुविहितं स्तम्भकुम्भशतावृतम् ।राजद्वृषाग्रकलशं पुष्पमालापरिष्कृतम् ॥ ५४॥

maṇṭapaṃ vā suvihitaṃ stambhakumbhaśatāvṛtam |rājadvṛṣāgrakalaśaṃ puṣpamālāpariṣkṛtam || 54||

तत्र पीठे कालहरं मां प्रतिष्ठाप्य शङ्करि ।कालस्य मकुटे पादहस्तशूलेन ताडितम् ॥ ५५ ॥

tatra pīṭhe kālaharaṃ māṃ pratiṣṭhāpya śaṅkari |kālasya makuṭe pādahastaśūlena tāḍitam || 55 ||

(विध्यन्तंकालमकुटे शूलेनाथ निजङ्घ्रिणा) ॥ ५५॥

(vidhyantaṃkālamakuṭe śūlenātha nijaṅghriṇā) || 55||

कालं च पतितं चाग्रे उग्रं मां चन्द्रशेखरम् ।दंष्ट्राकरालवदनं कृत्वा बेरं लभेन्नरः ॥ ५६॥

kālaṃ ca patitaṃ cāgre ugraṃ māṃ candraśekharam |daṃṣṭrākarālavadanaṃ kṛtvā beraṃ labhennaraḥ || 56||

गाणा(ण)पत्यं प्रियं मे स्यात् विमानेनार्क भास्वता (रोचिषा) ।गत्वा शिवपुरं देवि ज्ञानं लब्ध्वा विमुच्यते ॥ ५७॥

gāṇā(ṇa)patyaṃ priyaṃ me syāt vimānenārka bhāsvatā (rociṣā) |gatvā śivapuraṃ devi jñānaṃ labdhvā vimucyate || 57||

महेन्द्राख्यं तु यः कुर्यात् प्रासादं परमेशितुः ।नानालङ्कारशोभाढ्यं स्तम्भकुम्भशता वृतम् ॥ ५८॥

mahendrākhyaṃ tu yaḥ kuryāt prāsādaṃ parameśituḥ |nānālaṅkāraśobhāḍhyaṃ stambhakumbhaśatā vṛtam || 58||

गवाक्षपङ्क्ति मध्यस्थां शिखरप्रकरान्वितम् ।वेदिकाद्वारविहितं दृषद्भिः पिहितं दृढैः ॥ ५९॥

gavākṣapaṅkti madhyasthāṃ śikharaprakarānvitam |vedikādvāravihitaṃ dṛṣadbhiḥ pihitaṃ dṛḍhaiḥ || 59||

तस्मिन्नासनवर्ये मां प्रतिष्ठाप्य त्वया सह ।मूर्तिं कृत्वा ताम्रमयीं राजतीं स्वर्णनिर्मिताम् ॥ ६०॥

tasminnāsanavarye māṃ pratiṣṭhāpya tvayā saha |mūrtiṃ kṛtvā tāmramayīṃ rājatīṃ svarṇanirmitām || 60||

चन्द्रापीडां त्रिणयनां मन्दस्मितमनोहराम् ।वामदक्षिणभागे मे गणेशगुहसंयुताम् ॥ ६१॥

candrāpīḍāṃ triṇayanāṃ mandasmitamanoharām |vāmadakṣiṇabhāge me gaṇeśaguhasaṃyutām || 61||

स फलं लभते मर्त्यो भुवि भाग्यसमन्वितः ।पुत्रपौत्रैर्युतो दारैर्वंशलक्षसमन्वितः ॥ ६२॥

sa phalaṃ labhate martyo bhuvi bhāgyasamanvitaḥ |putrapautrairyuto dārairvaṃśalakṣasamanvitaḥ || 62||

काव्यसंशोभियानेन पुष्पमालाविराजता ।कैलासं दक्षिणं प्राप्य यक्षेन्द्रार्चितभोगभुक् ॥ ६३॥

kāvyasaṃśobhiyānena puṣpamālāvirājatā |kailāsaṃ dakṣiṇaṃ prāpya yakṣendrārcitabhogabhuk || 63||

प्रासादं हेम कूटाख्यं कृत्वा स्तम्भशतान्वितम् ।गवाक्षशिक्षाविततं त्र्यक्षप्रीतिकरं शिवे ॥ ६४॥

prāsādaṃ hema kūṭākhyaṃ kṛtvā stambhaśatānvitam |gavākṣaśikṣāvitataṃ tryakṣaprītikaraṃ śive || 64||

संराजद्वेदिका कुम्भपताकावलिशोभितम् ।तत्र सिह्मासनासीनमर्धनारीश्वरं हि माम् ॥ ६५॥

saṃrājadvedikā kumbhapatākāvaliśobhitam |tatra sihmāsanāsīnamardhanārīśvaraṃ hi mām || 65||

प्रतिष्ठाप्य लभेन्मुक्तिं भुङ्क्ते भोगाननुत्तमान् ।विषयान् विषवत् त्यक्त्वा निःशेषं मामवाप्नुयात् ॥ ६६॥

pratiṣṭhāpya labhenmuktiṃ bhuṅkte bhogānanuttamān |viṣayān viṣavat tyaktvā niḥśeṣaṃ māmavāpnuyāt || 66||

हेम्ना वा राजतेनापि ताम्रकांस्यसुपित्तलैः ।मणिभिः स्फटिकैर्वापि विद्रुमैर्वा महेश्वरि ॥ ६७॥

hemnā vā rājatenāpi tāmrakāṃsyasupittalaiḥ |maṇibhiḥ sphaṭikairvāpi vidrumairvā maheśvari || 67||

आढ्यो वा द्रव्यरहितो भक्त्या कुर्याच्छिवालयम् ।मृन्मयात्कोटिगुणितं पुण्यं स्याद्दारुभिः कृते ॥ ६८॥

āḍhyo vā dravyarahito bhaktyā kuryācchivālayam |mṛnmayātkoṭiguṇitaṃ puṇyaṃ syāddārubhiḥ kṛte || 68||

कोटिकोटिगुणं पुण्यं मृत्काष्टादिष्टकामयम् ।त्रिगुणं चेष्टकादिभ्यः शैलैर्देवि शिवालयम् ॥ ६९॥

koṭikoṭiguṇaṃ puṇyaṃ mṛtkāṣṭādiṣṭakāmayam |triguṇaṃ ceṣṭakādibhyaḥ śailairdevi śivālayam || 69||

दृषद्भिः कृष्णवर्णैश्च ततः कोटिगुणं भवेत् ।मृच्छैलयोः समं ज्ञेयं फलमाढ्यदरिद्रयो ॥ ७०॥

dṛṣadbhiḥ kṛṣṇavarṇaiśca tataḥ koṭiguṇaṃ bhavet |mṛcchailayoḥ samaṃ jñeyaṃ phalamāḍhyadaridrayo || 70||

वने वापि नदीतीरे पुण्यपर्वतमूर्धसुतीरे नदीपतेर्देवि भक्त्या कुर्याच्छिवालयम् ॥ ७१॥

vane vāpi nadītīre puṇyaparvatamūrdhasutīre nadīpaterdevi bhaktyā kuryācchivālayam || 71||

स्थावरं शिवलिङ्गस्य गृहे वा पुरुषाधिकम् ।न कार्यमालयं देवि चरलिङ्गस्य शङ्करि ॥ ७२॥

sthāvaraṃ śivaliṅgasya gṛhe vā puruṣādhikam |na kāryamālayaṃ devi caraliṅgasya śaṅkari || 72||

यत्र क्वापि शिवे भक्त्या कुर्याच्छैलैः शिवालयम् ।जीर्णं वा पतितं वापि खण्डितं स्फुटितं तथा ॥ ७३॥

yatra kvāpi śive bhaktyā kuryācchailaiḥ śivālayam |jīrṇaṃ vā patitaṃ vāpi khaṇḍitaṃ sphuṭitaṃ tathā || 73||

पूर्ववत्कारयेद्युक्तः सर्वस्माल्लभते फलम् ।नवादपि महादेवि जीर्णोद्धारः प्रशस्यते ॥ ७४॥

pūrvavatkārayedyuktaḥ sarvasmāllabhate phalam |navādapi mahādevi jīrṇoddhāraḥ praśasyate || 74||

प्रासादं गोपुरं वापि प्राकारं मण्टपं तथा ।कर्तुरभ्यधिकं पुण्यं लभते नात्र संशयः ॥ ७५॥

prāsādaṃ gopuraṃ vāpi prākāraṃ maṇṭapaṃ tathā |karturabhyadhikaṃ puṇyaṃ labhate nātra saṃśayaḥ || 75||

भक्त्या वित्तानुसारेण कुर्यात्प्रासादसञ्चयम् ।अल्पे महति वा पुण्यं सममाढ्यदरिद्रयोः ॥ ७६॥

bhaktyā vittānusāreṇa kuryātprāsādasañcayam |alpe mahati vā puṇyaṃ samamāḍhyadaridrayoḥ || 76||

वित्तशाठ्येन यः कुर्यात्पुण्यमाढ्योऽपि मानवः ।न स तत्फलमाप्नोति प्रलोभाक्रान्तमानसः ॥ ७७॥

vittaśāṭhyena yaḥ kuryātpuṇyamāḍhyo'pi mānavaḥ |na sa tatphalamāpnoti pralobhākrāntamānasaḥ || 77||

तस्मान्मदालयं देवि कुर्याद्वित्तमवञ्चयन् ।अष्टेष्टकाभिरपि वा कुर्यादेव शिवालयम् ॥ ७८॥

tasmānmadālayaṃ devi kuryādvittamavañcayan |aṣṭeṣṭakābhirapi vā kuryādeva śivālayam || 78||

प्रसादार्थं महेशस्य प्रासादं परमेश्वरि ।तथैवान्यस्य करणे साहाय्यमपि वा स्वयम् ॥ ७९॥

prasādārthaṃ maheśasya prāsādaṃ parameśvari |tathaivānyasya karaṇe sāhāyyamapi vā svayam || 79||

वाचा धनेन वा देवि स्वस्याशक्तौ सदा शिवे ।कुर्याद्वघ्नकरो (कुयद्विघ्नं नरो) यस्तु नरके पच्यते चिरम् ॥ ८०॥

vācā dhanena vā devi svasyāśaktau sadā śive |kuryādvaghnakaro (kuyadvighnaṃ naro) yastu narake pacyate ciram || 80||

यावद्ब्रह्मशतं गौरि यः शिवालयभङ्गकृत् ।किं पूर्णे बहुनोक्तेन भक्त्या वित्तानुसारतः ॥ ८१॥

yāvadbrahmaśataṃ gauri yaḥ śivālayabhaṅgakṛt |kiṃ pūrṇe bahunoktena bhaktyā vittānusārataḥ || 81||

कुर्याद्देवि शिवक्षेत्रं जन्म प्राप्येह मानवम् ।वापीकूपकरा ये स्युस्तटाकं वा शिवालये ॥ ८२॥

kuryāddevi śivakṣetraṃ janma prāpyeha mānavam |vāpīkūpakarā ye syustaṭākaṃ vā śivālaye || 82||

यावत्तद्विदुतोयानां सहस्रपरिवत्सरम् ।(यावन्तो बिन्दवस्तत्र तावद्वर्षसहस्रकम्) ।सुधासागरमध्यस्थो निवसेत् स पितामहैः(हः) ॥ ८३॥

yāvattadvidutoyānāṃ sahasraparivatsaram |(yāvanto bindavastatra tāvadvarṣasahasrakam) |sudhāsāgaramadhyastho nivaset sa pitāmahaiḥ(haḥ) || 83||

वनवाटीकरो यस्तु पुष्पार्चाया(यै) महेश्वरि ।एकं बिल्वतरुं वापि रोपयेद्यः शिवालये ॥ ८४॥

vanavāṭīkaro yastu puṣpārcāyā(yai) maheśvari |ekaṃ bilvataruṃ vāpi ropayedyaḥ śivālaye || 84||

यावत्तत्पत्रकुसुमं बीजमूलफलानि च ।तावद्वर्षसहस्राणि मम लोके महीयते ॥ ८५॥

yāvattatpatrakusumaṃ bījamūlaphalāni ca |tāvadvarṣasahasrāṇi mama loke mahīyate || 85||

उत्सवार्थं महेशस्य वाहनानि च कारयेत् ।गजमश्वं भूतगणं वृषं चापि महेशितुः ॥ ८६॥

utsavārthaṃ maheśasya vāhanāni ca kārayet |gajamaśvaṃ bhūtagaṇaṃ vṛṣaṃ cāpi maheśituḥ || 86||

सौवर्णं राजतं वापि दारुणा रङ्गचित्रितम् ।कृत्वा भवेद्गणेन्द्रोऽसौ मम कैलासमौलिगः ॥ ८७॥

sauvarṇaṃ rājataṃ vāpi dāruṇā raṅgacitritam |kṛtvā bhavedgaṇendro'sau mama kailāsamauligaḥ || 87||

रथं च मम देवेशि ध्वजकुम्भपरिष्कृतम् ।सहस्रशतचक्रं वा दशचक्रं मनोहरम् ॥ ८८॥

rathaṃ ca mama deveśi dhvajakumbhapariṣkṛtam |sahasraśatacakraṃ vā daśacakraṃ manoharam || 88||

उत्तमं शतचक्रं स्यात् दशचक्रं तु मध्यमम् ।अधमं षट्चतुश्चक्रं रथं शिल्पविदो विदुः ॥ ८९॥

uttamaṃ śatacakraṃ syāt daśacakraṃ tu madhyamam |adhamaṃ ṣaṭcatuścakraṃ rathaṃ śilpavido viduḥ || 89||

तादृक्कलाचित्रितं च पुष्पमालापरीवृतम् ।कद्भिर्देव(र्देव)गन्धर्वैर्ब्रह्मसारथिमुन्नतम् ॥ ९०॥

tādṛkkalācitritaṃ ca puṣpamālāparīvṛtam |kadbhirdeva(rdeva)gandharvairbrahmasārathimunnatam || 90||

कृत्वा मल्लोकमाप्नोति पुनरावृत्तिवर्जितम् ।गृहोत्सवार्थे कुर्वीत पुरुषोऽर्धरथं शिवे ॥ ९१॥

kṛtvā mallokamāpnoti punarāvṛttivarjitam |gṛhotsavārthe kurvīta puruṣo'rdharathaṃ śive || 91||

ईश्वर उवाच ।मदालयं (शिवालयं) यः परमेश्वरस्यकरोति लोष्टैरपि भक्तियुक्तः ।कैलासमायाति विमानवर्यैःसुरेन्द्रपद्मोद्भवविष्णुवन्द्यः ॥ ९२॥

īśvara uvāca |madālayaṃ (śivālayaṃ) yaḥ parameśvarasyakaroti loṣṭairapi bhaktiyuktaḥ |kailāsamāyāti vimānavaryaiḥsurendrapadmodbhavaviṣṇuvandyaḥ || 92||

बाल्ये च काष्ठेन शिवं च कृत्वामृदापि वा पांसुभिरेव लिङ्गम् ।सम्पूज्य पुण्यैर्लभते गणेन्द्रतांभक्त्या कृतत्वादगणय्य पुण्यम् ॥ ९३॥

bālye ca kāṣṭhena śivaṃ ca kṛtvāmṛdāpi vā pāṃsubhireva liṅgam |sampūjya puṇyairlabhate gaṇendratāṃbhaktyā kṛtatvādagaṇayya puṇyam || 93||

प्रासाद प्रकरं महेशसदने कृत्वा प्रसादं लभेत्शम्भोर्मुख्यगणेन्द्रतामुपगतो मन्दार(वृन्दार)वृन्दार्चितः ।तस्मिन्नीश्वरमूर्तयः सुविहिताः संस्थाप्य मेघायुतंपुण्यं प्राप्य स मोदते गिरिसुते पातादिशकोज्झितः ॥ ९४॥

prāsāda prakaraṃ maheśasadane kṛtvā prasādaṃ labhetśambhormukhyagaṇendratāmupagato mandāra(vṛndāra)vṛndārcitaḥ |tasminnīśvaramūrtayaḥ suvihitāḥ saṃsthāpya meghāyutaṃpuṇyaṃ prāpya sa modate girisute pātādiśakojjhitaḥ || 94||

यो वाहनानि रुचिराणि गजांश्च भूतकैलासवर्यमगजे प्रकरोति भक्त्या ।दिव्यं सुधांशुवरदीधिति सन्निभाङ्गलब्ध्वा शिवे मम निवसेत गणेन्द्रम् ॥ ९५॥

yo vāhanāni rucirāṇi gajāṃśca bhūtakailāsavaryamagaje prakaroti bhaktyā |divyaṃ sudhāṃśuvaradīdhiti sannibhāṅgalabdhvā śive mama nivaseta gaṇendram || 95||

कृत्वा रथाधिपतये वरचारुचक्रप्रोद्यत्पताककनकोत्तमकुम्भमौलिम् ।वेदाश्वसारथिविधिं रथमीशमूर्तिंसंस्थाप्य कर्षति महोत्सवकरः स मुक्तः ॥ ९६॥

kṛtvā rathādhipataye varacārucakraprodyatpatākakanakottamakumbhamaulim |vedāśvasārathividhiṃ rathamīśamūrtiṃsaṃsthāpya karṣati mahotsavakaraḥ sa muktaḥ || 96||

॥ इति शिवरहस्यान्तर्गते ईश्वरप्रोक्तं शिवप्रासादकरणं २ सम्पूर्णम् ॥॥ श्रीशिवरहस्यम् । महादेवाख्यः एकादशमांशः । अध्यायः ७ प्रासादकरणम् । १९६॥

|| iti śivarahasyāntargate īśvaraproktaṃ śivaprāsādakaraṇaṃ 2 sampūrṇam |||| śrīśivarahasyam | mahādevākhyaḥ ekādaśamāṃśaḥ | adhyāyaḥ 7 prāsādakaraṇam | 196||

– ॥ श्रीशिवरहस्यम् ।महादेवाख्यः एकादशमांशः ।अध्यायः ७ प्रासादकरणम् ।१-९६॥

– || śrīśivarahasyam |mahādevākhyaḥ ekādaśamāṃśaḥ |adhyāyaḥ 7 prāsādakaraṇam | 1-96||