शिवरात्रिपूजोपदेशम् ईश्वरप्रोक्तं Ishvaraproktam Shivaratripujopadesham

(शिवरहस्यान्तर्गते महादेवाख्ये)शिवपार्वतीसंवादेईश्वर उवाच ।सा तिथिर्दुर्लभतरा योग्ययुक्ता विशेषतः ।शिवरात्रिव्रतं पुण्यं ममैव प्रीतिदं परम् ॥ १॥

(śivarahasyāntargate mahādevākhye)śivapārvatīsaṃvādeīśvara uvāca |sā tithirdurlabhatarā yogyayuktā viśeṣataḥ |śivarātrivrataṃ puṇyaṃ mamaiva prītidaṃ param || 1||

शिवलिङ्गतयोद्भूतस्तस्यां रात्रौ महेश्वरः ।ब्रह्मविष्ण्वोर्बोधनार्थं चतुर्दश्यां निशि प्रिये ॥ २॥

śivaliṅgatayodbhūtastasyāṃ rātrau maheśvaraḥ |brahmaviṣṇvorbodhanārthaṃ caturdaśyāṃ niśi priye || 2||

माघे कृष्णचतुर्दश्यां सोमपार्द्रक ऋक्षके ।सा तिथिर्दुलभतरा योग्ययुक्ता विशेषतः ॥ ३॥

māghe kṛṣṇacaturdaśyāṃ somapārdraka ṛkṣake |sā tithirdulabhatarā yogyayuktā viśeṣataḥ || 3||

माघे कृष्णचतुर्दश्यां पूज्योऽहंलिङ्गमध्यमे ।रात्रौ यामेषु चतुर्षु अनिद्रोपोषणादिभिः ॥ ४॥

māghe kṛṣṇacaturdaśyāṃ pūjyo'haṃliṅgamadhyame |rātrau yāmeṣu caturṣu anidropoṣaṇādibhiḥ || 4||

नैत्यकं व्रतमेतद्धि सर्वेषां सर्वदं शिवे ।त्रयोदश्यर्धघटिका यदि तस्याङ्गता भवेत् ॥ ५॥

naityakaṃ vratametaddhi sarveṣāṃ sarvadaṃ śive |trayodaśyardhaghaṭikā yadi tasyāṅgatā bhavet || 5||

प्रदोषपूजा तत्रैव कार्या सा प्रहरादिमे ।निशीथसमये ग्राह्या माघकृष्णचतुर्दशी ॥ ६॥

pradoṣapūjā tatraiva kāryā sā praharādime |niśīthasamaye grāhyā māghakṛṣṇacaturdaśī || 6||

तस्यां समस्तपुण्यानि तीर्थान्यायतनानि च ।स्थावरे वा चरे लिङ्गे सङ्क्रमिष्यन्ति पार्वति ॥ ७॥

tasyāṃ samastapuṇyāni tīrthānyāyatanāni ca |sthāvare vā care liṅge saṅkramiṣyanti pārvati || 7||

उपवासप्रभावेण अतन्द्रो निशि जागरात् ।चतुर्यामार्चनाद्देवि बिल्वपत्रेण केवलम् ॥ ८॥

upavāsaprabhāveṇa atandro niśi jāgarāt |caturyāmārcanāddevi bilvapatreṇa kevalam || 8||

अक्षयं पुण्यमाप्नोति शिवसायुज्यमश्नुते ।शिवे मे शिवरात्रिं यः पूजाजागरणैः नयेत् ॥ ९॥

akṣayaṃ puṇyamāpnoti śivasāyujyamaśnute |śive me śivarātriṃ yaḥ pūjājāgaraṇaiḥ nayet || 9||

अखण्डितव्रती स स्यादाखण्डलशतं वसेत् ।शिवलोके सर्वभौगैः सुरासुरनमस्कृतः ॥ १०॥

akhaṇḍitavratī sa syādākhaṇḍalaśataṃ vaset |śivaloke sarvabhaugaiḥ surāsuranamaskṛtaḥ || 10||

नित्यं च कामिकं देवि शिवरात्रिव्रतं मम ।ममैव भक्तो यो देवि शिवरात्र्यर्चको भवेत् ॥ ११॥

nityaṃ ca kāmikaṃ devi śivarātrivrataṃ mama |mamaiva bhakto yo devi śivarātryarcako bhavet || 11||

पूजाजागरणोपेतो रात्रौ यामचतुष्टयम् ।गणत्वमक्षयं तस्य मम कैलासमूर्धनि ॥ १२॥

pūjājāgaraṇopeto rātrau yāmacatuṣṭayam |gaṇatvamakṣayaṃ tasya mama kailāsamūrdhani || 12||

वर्षे वर्षे महादेवि नरानार्यो द्विजान्त्यजाः ।शिवरात्रौ महादेवं नित्यं भक्त्या यजन्ति हि ॥ १३॥

varṣe varṣe mahādevi narānāryo dvijāntyajāḥ |śivarātrau mahādevaṃ nityaṃ bhaktyā yajanti hi || 13||

देवा विधीन्द्रविष्ण्वाद्याः सदाराश्चासुरा द्विजाः ।शिवरात्र्यां महादेवं पूजयन्ति दृढव्रताः ॥ १४॥

devā vidhīndraviṣṇvādyāḥ sadārāścāsurā dvijāḥ |śivarātryāṃ mahādevaṃ pūjayanti dṛḍhavratāḥ || 14||

शिवरात्रिव्रताद्देवि त्रिःसत्यं न परात्परम् ।न पूजयन्ति भक्त्येशं रुद्रं त्रिभुवनेश्वरम् ॥ १५॥

śivarātrivratāddevi triḥsatyaṃ na parātparam |na pūjayanti bhaktyeśaṃ rudraṃ tribhuvaneśvaram || 15||

योऽन्नभुक् कृमिभुक् स स्यात्सनिद्रोऽजगरो भवेत् ।नानायोनिसहस्रेषु भ्रमते सोऽधमो नरः ॥ १६॥

yo'nnabhuk kṛmibhuk sa syātsanidro'jagaro bhavet |nānāyonisahasreṣu bhramate so'dhamo naraḥ || 16||

द्वादशाब्दकमेवं स्याच्चतुर्विंशाब्दकं तु वा ।यावज्जन्म महापुण्यं कुर्वन्मद्गणपो भवेत् ॥ १७॥

dvādaśābdakamevaṃ syāccaturviṃśābdakaṃ tu vā |yāvajjanma mahāpuṇyaṃ kurvanmadgaṇapo bhavet || 17||

माघकृष्णचतुर्दश्यां भौमः सोमः प्रशस्यते ।भौमवारेण संयुक्ता कृष्णाङ्गारचतुर्दर्शी ॥ १८॥

māghakṛṣṇacaturdaśyāṃ bhaumaḥ somaḥ praśasyate |bhaumavāreṇa saṃyuktā kṛṣṇāṅgāracaturdarśī || 18||

यद्यार्द्रपातयुक्ता चेत् शिवयोगाः सुदुर्लभाः ।स जन्मायुतपापघ्नस्तस्यां बिल्वैकपूजनात् ॥ १९॥

yadyārdrapātayuktā cet śivayogāḥ sudurlabhāḥ |sa janmāyutapāpaghnastasyāṃ bilvaikapūjanāt || 19||

शिवयोगस्य योगोऽस्य सम्भवेदुत्तमोत्तमः ।त्रयोदशीकलाप्येका मध्ये चैव चतुर्दशी ॥ २०॥

śivayogasya yogo'sya sambhaveduttamottamaḥ |trayodaśīkalāpyekā madhye caiva caturdaśī || 20||

अन्ते चैव सिनीवाली त्रिस्पृश्यं शिवमर्चयेत् ।अर्धरात्रादधश्चोर्ध्वा युक्ता या स्याच्चतुर्दशी ॥ २१॥

ante caiva sinīvālī trispṛśyaṃ śivamarcayet |ardharātrādadhaścordhvā yuktā yā syāccaturdaśī || 21||

तस्यामेव प्रकुर्वीत सोऽश्वमेधफलं लभेत् ।प्रदोषव्यपिनी चापि ग्राह्या सेयं शिवार्चकैः ॥ २२॥

tasyāmeva prakurvīta so'śvamedhaphalaṃ labhet |pradoṣavyapinī cāpi grāhyā seyaṃ śivārcakaiḥ || 22||

प्रदोषैककलाव्याप्तौ परैषा सम्प्रशस्यते ।पूर्वापरेऽह्नि देवेशि निशीथ व्यापिकोत्तमा ॥ २३॥

pradoṣaikakalāvyāptau paraiṣā sampraśasyate |pūrvāpare'hni deveśi niśītha vyāpikottamā || 23||

जागरं चोपवासं च तस्यां कुर्याच्छिवार्चकः ।॥ इति शिवरहस्यान्तर्गते ईश्वरप्रोक्तं शिवरात्रिपूजोपदेशं सम्पूर्णम् ॥॥ श्रीशिवरहस्यम् । महादेवाख्यः एकादशमांशः । अध्यायः ३२ शिवरात्रिपूजाव्रतकथनम् । १२४\।१॥– ॥ श्रीशिवरहस्यम् । महादेवाख्यः एकादशमांशः । अध्यायः ३२ शिवरात्रिपूजाव्रतकथनम् । १-२४।१॥

jāgaraṃ copavāsaṃ ca tasyāṃ kuryācchivārcakaḥ ||| iti śivarahasyāntargate īśvaraproktaṃ śivarātripūjopadeśaṃ sampūrṇam |||| śrīśivarahasyam | mahādevākhyaḥ ekādaśamāṃśaḥ | adhyāyaḥ 32 śivarātripūjāvratakathanam | 124\|1||– || śrīśivarahasyam | mahādevākhyaḥ ekādaśamāṃśaḥ | adhyāyaḥ 32 śivarātripūjāvratakathanam | 1-24|1||